གཉིས་པ་སྒྲུབ་པའི་དམིགས་པ་བདེན་པ་བཞི་ལ་གདམས་པ་བཤད་པ།
གཉིས་པ་སྒྲུབ་པའི་དམིགས་པ་བདེན་པ་བཞི་ལ་གདམས་པ་བཤད་པ་ལ།
སྤྱི་དོན་དང༌། མཐའ་རགས་ཙམ་དཔྱད་པ་དང་གཉིས། དང་པོ་བདེན་པ་བཞིའི་མཚན་ཉིད། དབྱེ་བ། གྲངས་ངེས། གོ་རིམ། ངེས་ཚིག དེ་དག་གི་རྣམ་པ་བཅུ་དྲུག་བཤད་པ་དང་ལྔ་ལས། དང་པོ་བདེན་བཞིའི་མཚན་ཉིད་དབྱེ་བ་བཤད་པ་ལ་བཞི་ལས། དང་པོ་སྡུག་བདེན་གྱི་མཚན་ཉིད་དང༌། དབྱེ་བ་གཉིས། དང་པོ་སྡུག་བདེན་གྱི་མཚན་ཉིད། རང་རྒྱུ་ལས་ཉོན་ལས་བྱུང་བའི་འབྲས་བསྡུས་ཀྱི་རིགས་སུ་གནས་པའི་ཟག་བཅས་དེ་ཡིན་ཏེ། ཉ་ཊཱིཀ་ལས། སྡུག་བསྔལ་བདེན་པའི་མཚན་ཉིད་ནི། ཉོན་མོངས་པའི་ཟག་བཅས་འབྲས་བསྡུས་སོ། །ཞེས་གསུངས་སོ། །
གཉིས་པ་དབྱེ་བ་ནི། ལས་ཉོན་གྱི་རང་དབང་མེད་པར་འཁོར་བ་སྐྱེ་བ་ལེན་པའི་སྐྱེས་བུ་དང་དེའི་རྒྱུད་ཀྱི་ཉེར་ཕུང་ལྔ་དང༌། འཁོར་བའི་སྣོད་ཀྱི་འཇིག་རྟེན་དང་གཉིས་ཡོད་དེ། མངོན་པ་ཀུན་བཏུས་ལས། སྡུག་བསྔལ་གྱི་བདེན་པ་གང་ཞེ་ན། སེམས་ཅན་སྐྱེ་བ་དང་སྐྱེ་བའི་གནས་ཀྱིས་ཀྱང་རིག་པར་བྱའོ། །ཞེས་གསུངས་སོ། །གཉིས་པ་ཀུན་འབྱུང་བདེན་པ་ལ་མཚན་ཉིད་དང་དབྱེ་བ་གཉིས། དང་པོ་ཀུན་འབྱུང་བདེན་པའི་མཚན་ཉིད་ནི། རང་འབྲས་ཟག་བཅས་ཀྱི་རྒྱུར་གྱུར་པའི་ལས་ཉོན་གྱིས་བསྡུས་པ་དེ་ཡིན་ཏེ། ཉ་ཊཱིཀ་ལས། ཀུན་བདེན་གྱི་མཚན་ཉིད། ཉོན་མོངས་པའི་ཟག་བཅས་རྒྱུས་བསྡུས་སོ། །ཞེས་གསུངས་སོ། ། གཉིས་པ་དབྱེ་བ་ནི། ཟག་བཅས་ཀྱི་ལས་ཉོན་གཉིས་ཡོད་དེ། ཀུན་བཏུས་སུ། ཀུན་འབྱུང་བའི་བདེན་པ་གང་ཞེ་ན། ཉོན་མོངས་པ་དང་ཉོན་མོངས་པའི་དབང་གིས་བྱུང་བའི་ལས་སོ། །ཞེས་གསུངས་སོ། །