དྲི་བ་བཅུ་བ་ཐེག་མཆོག་དབུ་མ་ལས། ཆ་མེད་ཉེ་རིང་མེད་ཅེས་པའི་སྐབས་ཀྱི་བདེ་གཤེགས་སྙིང་པོ་ཆ་མེད་ཡིན་པའི་དོན་གང་ཡིན་ཞེས་པའི་ལན།
དྲི་བ་བཅུ་བ་ཐེག་མཆོག་དབུ་མ་ལས། ཆ་མེད་ཉེ་རིང་མེད་ཅེས་པའི་སྐབས་ཀྱི་བདེ་གཤེགས་སྙིང་པོ་ཆ་མེད་ཡིན་པའི་དོན་གང་ཡིན་ཞེས་པའི་ལན།
ཐེག་མཆོག་དབུ་མ་ལས། ཆ་མེད་ཉེ་རིང་མེད་ཅེས་པའི་སྐབས་ཀྱི་བདེ་གཤེགས་སྙིང་པོ་ཆ་མེད་ཡིན་པའི་དོན་གང་ཡིན་ཞེས་པའོ། །དེའི་ལན་ནི། ཆ་མེད་ཀྱི་དོན་ནི། ཡུལ་དུས་ཀྱི་ཆ་ཤས་དང་བྲལ་བའི་དོན་དམ་དབྱིངས་དེ་ཡིན་ནོ། །གཟུགས་ཅན་རྣམས་ཡུལ་གྱི་ཆ་དུ་མ་དང་བཅས་ཏེ། རགས་པའི་གཟུགས་ཅན་རྣམས་རང་གྲུབ་བྱེད་ཀྱི་རྡུལ་ཕྲན་གྱི་ཆ་དུ་མ་དང༌། རྡུལ་ཕྲན་ཡང་རྣམ་པར་དཔྱད་ན་ཕྱོགས་ཀྱི་ཆ་སོགས་ཆ་དུ་མ་དང་བཅས་པའི་ཕྱིར་དང༌། ཤེས་པ་རྣམས་ལ་གོ་ས་གཅོད་པའི་ཡུལ་གྱི་ཆ་མེད་ཀྱང་དུས་ཀྱི་ཆ་དུ་མ་དང་བཅས་པ་ཡིན་ཏེ། བསྐལ་བ་ཡང་ལོའི་ཆ་དུ་མ་དང༌། ལོ་ཡང་ཟླ་བའི་ཆ་དུ་མ་དང༌། ཟླ་བ་ཡང་ཞག་གི་ཆ་དུ་མ་དང༌། དེ་ཡང་དབུགས་ཀྱི་ཆ་དུ་མ་དང༌། དེ་ཡང་སྐད་ཅིག་གི་ཆ་དུ་མ་དང༌། དེ་ལ་ཡང་ཐོག་མཐའ་བར་གྱི་ཆ་ཤས་དུ་མ་ཡོད་པའི་ཕྱིར། དེས་ན་དངོས་པོ་རྣམས་ནི་ཆ་བཅས་ཡིན་ནོ། །ཡུལ་དུས་ཀྱི་ཆ་ཤས་དང་བྲལ་བ་ནི། དཔེར་ན་བྱེ་མའི་ཕུང་པོ་ཞིག་གི་སྟེང་དུ་དེ་ལ་ཁྱབ་པར་བྱེ་མ་བརྡལ་བ་ན། བྱེ་མ་ནི་རྡུལ་རེ་རེའི་གོ་ས་ན་བྱེ་མ་རེ་རེས་ཁྱབ་པ་ཡིན་གྱི་ཁྱབ་བྱེད་བྱེ་མ་གཅིག་གིས་ཁྱབ་བྱ་མང་པོ་ལ་ཁྱབ་པ་མི་སྲིད་པ་ལྟར་མ་ཡིན་པར་ཡུལ་གྱི་ཆ་དང་དུས་ཀྱི་ཆ་སོ་སོར་མེད་པས་ཐམས་ཅད་ལ་ཉེ་རིང་མེད་པར་ཁྱབ་པའོ། །