གཉིས་པ་སྔོན་ཆོག་དངོས་ཀྱི་དོན་བསྟན་པ།

གཉིས་པ་སྔོན་ཆོག་དངོས་ཀྱི་དོན་བསྟན་པ་ལས།

སྔོན་ཆོག་གི་དགོས་པའི་དོན་ནི།ཚེགས་ཆུང་ངུས་རབ་བྱུང་དང་བསྙེན་རྫོགས་ཐོབ་པའོ། །སྔོན་ཆོག་གི་མཚན་ཉིད་ནི། མཁན་སློབ་མེད་པར་ཡུལ་གང་ཟག་གཅིག་གི་རྒྱུད་ལ་དགེ་འདུན་གྱི་མདུན་ནས་རབ་བྱུང་དང་བསྙེན་རྫོགས་དུས་གཅིག་ཏུ་ཐོབ་བྱེད་ཀྱི་ཐབས་ཁྱད་པར་ཅན་གྱི་བདག་ཉིད་དུ་གཏོགས་པའི་གསོལ་བཞིའི་ལས་ཀྱི་ཆོ་གའོ། །སྔོན་ཆོག་གི་སྒྲ་བཤད་ནི། ཊཱི་ཀ་ལས། སྔོན་གྱི་ཆོ་ག་ཞེས་བྱ་བ་ནི་ད་ལྟར་གྱི་ཆོ་ག་བས་སྔར་གྱི་ཆོ་ག་རིགས་པ་རྣམ་པ་གཞན་དེ་ལྟ་བུ་བྱུང་ངོ༌། །ཞེས་པ་ལྟར་རོ། །དུས་ནམ་གྱི་ཚེ་གནང་བ་ནི། བཅོམ་ལྡན་འདས་སངས་རྒྱས་ནས་ལོ་དྲུག་ཡན་ཆད་དུ་ནི་རབ་ཏུ་བྱུང་བ་ཕལ་ཆེར་ལ་སྔོན་གྱི་ཆོ་ག་མཛད་ལ། ལོ་དྲུག་ནས་ད་ལྟར་གྱི་ཆོ་ག་གནང་ངོ༌། །སྟོན་པ་སངས་རྒྱས་ནས་རིང་པོར་མ་ལོན་པ་ན་དགེ་སློང་ཞིག་གི་དྲུང་དུ་བསྙེན་རྫོགས་འོང་པ་ལ་བཅོམ་ལྡན་འདས་ཀྱི་དྲུང་དུ་བཏང་ནས་ལམ་བར་ནས་ཤི་བ་གསན་པས་ངའི་ཉན་ཐོས་ཐག་རིང་པོ་ནས་འོང་བ་སྡུག་བསྔལ་བར་གཟིགས་ནས་དེང་ཕྱིན་ཆད་དགེ་འདུན་འདུས་པས་རབ་བྱུང་བསྙེན་རྫོགས་བྱའོ་ཞེས་གསུངས་ནས་སྔོན་ཆོག་གི་བཅས་པ་མཛད་པའོ། །བཅོམ་ལྡན་འདས་སངས་རྒྱས་ནས་ལོ་དྲུག་ལོན་པ་ན་ད་ལྟར་གྱི་ཆོ་ག་བྱུང་སྟེ། ལུང་རྣམ་འབྱེད་འཁྲུར་འཇུག་གི་སྐབས་ལས། ཤཱ་རིའི་བུས་མཁན་པོ་བྱས་ཏེ་འཆར་ཀ་ད་ལྟར་གྱི་ཆོ་གས་བསྙེན་པར་རྫོགས་ནས་དེས་ཕོ་ཉ་བྱས་ནས་བཅོམ་ལྡན་འདས་སེར་སྐྱའི་གནས་སུ་བྱོན། ཞེས་དང༌། ལུང་རྣམ་འབྱེད་ལས། བཅོམ་ལྡན་འདས་མངོན་པར་བྱུང་ནས་ལོ་བཅུ་གཉིས་ལོན་ཞིང་སངས་རྒྱས་ནས་ལོ་དྲུག་ལོན་ནས་སེར་སྐྱའི་གནས་སུ་བྱོན་ཏེ་འཆར་ཀས་ཁྲིའུ་ལ་ལུས་ཐམས་ཅད་ཀྱི་ལྗིད་ཀྱིས་ཕབ་སྟེ་འདུག་པ་དང༌། ཞེས་གསུངས་པའི་ཕྱིར་རོ། །དེ་ལ་བཅོམ་ལྡན་འདས་སངས་རྒྱས་ནས་ལོ་དྲུག་ལོན་པའི་ཚེ་ན་ཆོས་ཅན། ཕམ་པའི་ལྟུང་བར་འགྱུར་བའི་ཆོས་བཞི་བརྗོད་པ་ཡོད་པར་ཐལ། ད་ལྟར་གྱི་ཆོ་ག་ཡོད་པའི་ཕྱིར། མ་ཁྱབ་སྟེ། དེ་བཞི་བརྗོད་པ་མེད་ཀྱང་ད་ལྟར་གྱི་ཆོ་ག་ཡོད་པའི་ཕྱིར། ཟུར་དང་པོ་གྲུབ་སྟེ། ལུང་རྣམ་འབྱེད་ལས། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ལོ་བཅུ་གཉིས་སུ་སྐྱོན་མེད་ཅིང༌། ལོ་བཅུ་གསུམ་ལ་བབ་པ་ན་མི་ཚངས་པར་སྤྱོད་པའི་ཕམ་པར་བཅས་སོ། །ཞེས་གསུངས་པའི་ཕྱིར། རྟགས་གཉིས་པ་གྲུབ་སྟེ། མཚོ་ཊཱིཀ་ལས། དེས་ན་ཕམ་པ་བཅས་པའི་སྔ་རོལ་ན་ད་ལྟར་གྱི་ཆོ་ག་ལ་ཕམ་པ་བཞི་བརྗོད་པ་མེད་པ་ལས། ཕྱིས་ཕམ་པ་བཞི་བཅས་ནས་ད་ལྟར་གྱི་ཆོ་ག་ལ་ཕམ་པ་བཞི་བརྗོད་དགོས་པར་གསུངས་པའོ། །ཞེས་གསུངས་པའི་ཕྱིར་རོ། །གང་ལ་ནོད་པ་ཡུལ་གྱི་ཁྱད་པར་ནི། དགེ༷་འདུ༷ན་ཏེ་དགེ་སློང་བཞི་དགོས་ལ་རང་བཞིན་གྱི་མཚམས་དེའི་ནང་ན་གནས་པ་ཐ༷མས་ཅ༷ད་འདུ༷ས་པ༷་དགོས་ཏེ། ཊཱི་ཀ་ལས། མཚམས་ནང་དེ་ན་དགེ་སློང་ཇི་སྙེད་གནས་པ་དེ་དག་ཐམས་ཅད་ལས་ཀྱི་གནས་དེར་ལྷགས་པ་ཡིན། ཞེས་གསུངས་སོ། །དགོས་པ་ནི་ཁྲེལ་ཡོད་སྐྱེ་ཞིང་ལས་ཆགས་པའོ། ། སྡོམ་པ་ལེན་པ་པོ་དེས་ཉན་ཐོས་དགེ་སློང་གི་ཆ༷་ལུ༷གས་འདི༷་བཞི༷ན་དུ་བྱ༷ས་པའོ། །དགོས་པ་ནི་ཁྲེལ་ཡོད་སྐྱེ་ཞིང་དགེ་སློང་གི་སྡོམ་པའི་རྟེན་དུ་རུང་བའོ། །བསྙེན་རྫོགས་བྱེད་པའི་ཚེ་ན་ཆོས་གོས་དང་ལྷུང་བཟེད་ལ་བྱིན་གྱིས་བརླབ་པ་ཡོད་པ་དང་མེད་པ་སྟེ། སྔོན་གྱི་ཆོ་ག་ལ་མེད་ཅིང༌།ད་ལྟར་བསྙེན་རྫོགས་བྱེད་པ་ལ་ཡོད་པའོ། །སྐབས་འདིར་མཚོ་ཊཱིཀ་ཏུ། ལུང་གཞི་ལས། སངས་རྒྱས་ཀྱི་ལྷུང་བཟེད་ནི་རྡོའི་ལྷུང་བཟེད་ཡིན་པར་གསུངས་ལ། ཉན་ཐོས་རྣམས་ལ་ནི་ལྔ་ཚན་༼ལུང་ལྔ་ཚན་པ་ལས་ལྷུང་བཟེད་ལྔ་ནི་བཅང་བར་མ་བྱེད་ཅིག ལྔ་གང་ཞེ་ན་རྡོའི་ལྷུང་བཟེད་དང་ཞེས་གསུངས་ཤིང་མ་མོ་ལས་ལྷུང་བཟེད་རྣམ་པ་བརྒྱད་ནི་མི་གནང་བ་སྟེ། རྡོ་ལས་བྱས་པ་དང་ཞེས་པ་ལ་སོགས་པ་གསུངས་སོ། །འོ་ན་བསྡུས་པ་ལས་ལྷུང་བཟེད་རྡོ་ལས་བྱས་པ་ནི་ས་ལས་བྱས་པའི་ནང་དུ་འདུའོ། །གཞན་དུ་ན་ཅིའི་ཕྱིར་བཅོམ་ལྡན་འདས་མི་རུང་བ་འཆང་ཞེས་པ་དང་འགལ་སྙམ་ན་སྔར་གྱི་ལུང་དེ་གཉིས་དང་འགལ་བས་ན་མི་རིགས་སོ།།༽པ་དང་མ་མོ་ལས་རྡོའི་ལྷུང་བཟེད་མི་རུང་བར་གསུངས་པའི་ཕྱིར་དང༌། འོད་ལྡན་ལས། སངས་རྒྱས་ནི་མེ་ཏོག་ཤེ་པ་ལི་ཀས་ཁ་བསྒྱུར་བའི་ཆོས་གོས་གསོལ་ཡང༌། ཉན་ཐོས་རྣམས་ལ་དེ་མི་རུང་བར་གསུངས་པའི་ཕྱིར་རོ། །ཞེས་མཚོ་ཊཱིཀ་སྐབས་དུ་མར་དེ་ལྟར་གསུངས་པ་ལྟར་ན་བསྡུ་བའི་ལུང་དོན་གང་ཡིན་དང་རྡོའི་ལྷུང་བཟེད་འཆང་ན་དགག་བྱ་གང་ཡོད་དཔྱད། གུས་པས་འཇུག་པའི་ཁྱད་པར་ནི། །དགེ་འདུན་སྤྱི་ལ་དམིགས་ནས་བསླབ་པ་རྒ༷ན་རི༷མ་ལ༷་ངོས་གཏད་དེ་ཡན་ལག་ལྔས་ཕྱ༷ག་འཚ༷ལ་བའོ། །སྔོན་ཆོག་ལ་ཕྱག་ཚན་གཅིག་ལས་མེད་ལ། ད་ལྟའི་ཆོ་ག་ལ་བསྙེན་རྫོགས་བྱེད་པའི་ཚེ་ན་ཕྱག་ཚན་བཅུ་གཅིག་ཡོད་དེ། སངས་རྒྱས་དགེ་འདུན་མཁན་པོར་གསོལ། །གོས་ཀྱི་གཉིས་དང་ལྷུང་བཟེད་དང༌། །གསང་སྟེ་སྟོན་དང་འཇུག་ཡོན་དང༌། །སངས་རྒྱས་དགེ་འདུན་ལས་བྱེད་པའོ། །ཞེས་གཟུང་ངོ༌། །༡ཐོག་མར་སངས་རྒྱས་ལ་ཕྱག་ཚན་གཅིག ༢ དེ་ནས་དགེ་འདུན། ༣ དེ་ནས་མཁན་པོར་གསོལ་བ་དང༌། གོས་ཀྱི་ཕྱག་ཚན་ལ་༤གོས་བྱིན་རླབས་པ། ༥ སྣམ་སྦྱར་གྱོན་པ། ༦ ལྷུང་བཟེད་བྱིན་རླབས་པ། ༧ གསང་སྟེ་སྟོན་པ་ལ་གསོལ་བ་བཏབ་པ། ༨ ནང་དུ་འཇུག་ཡོན། ༩ དངོས་གཞི་རྫོགས་པའི་ཆེད་དུ་སངས་རྒྱས་ལ། ༡༠ དགེ་འདུན་ལ། ༡༡ ལས་བྱེད་པ་པོ་ལ་བར་ཆད་དྲི་བ་སོགས་ཀྱི་ཕྱག་ཚན་གཅིག་སྟེ་བཅུ་གཅིག་གོ། །འདིར་ལུང་ལས་ནི་ཕྱག་ཚན་དགུ་ལས་དངོས་སུ་མ་གསུངས་ཀྱང༌། ཆོས་གོས་དང་ལྷུང་བཟེད་བྱིན་གྱིས་རློབ་པ་ལ་ཕྱག་མཚན་གཉིས་ནི་སློབ་དཔོན་གྱིས་རུང་མཐུན་སྦྱར་བའོ། །ཀརྨ་ཤཱ་ཏམ་ལས། ཆོས་ལ་ཡང་ངོ༌། །ཞེས་ཆོས་ལ་ཕྱག་ཚན་གཅིག་གསུངས་ཀྱང་ལུང་ན་མེད་པར་གསུངས་སོ། །མཚོ་ཊཱིཀ་ལས་བསྙེན་རྫོགས་གསོལ་འདེབས་རྗེས་བཟློས་ཀྱི་ཕྱག་མ་བགྲང་བ་རང་གི་བྱེད་ནུས་ན་མི་དགོས་པའི་རྒྱུ་མཚན་གྱིས་ཡིན་ལ། བཅུ་གསུམ་བྱེད་ཚུལ་ད་ལྟའི་ཕྱག་ལེན་ལ་ཆོས་ལ་མེད་པས་བསྙེན་རྫོགས་གསོལ་འདེབས་རྗེས་བཟློས་ཀྱི་ཕྱག་དང་ནང་དུ་བར་ཆད་དྲི་བའི་ཕྱག་སོ་སོར་བྱས་ནས་མཇུག་ཡོན་གྱི་ཕྱག་དང་བཅུ་གསུམ་བྱེད་པ་ཡོད་དོ། །སྤྱོད་ལམ་གྱི་ཁྱད་པར་ནི། ཐལ་མོ་སྦྱར་བ་སྔོན་ཆོག་ཡུན་ཐུང་བ་དང་ད་ལྟར་ཡུན་རིང་བ་དང་ཕ་གུ་རྩྭབཏིང་བ་ལ་རྟིང་པ་གཟར་མི་དགོས་པ་དང་དགོས་པའོ། །གཞི་འགྲེལ་ལས། ཐ༷ལ་མོ༷་ལྗབ་ལྗབ་པོར་སྦྱར་ཏེ། ཞེས་སོ། །ཐལ་མོ་ཁོང་སྟོང་དུ་སྦྱ༷ར་བ་ནི་ཆོས་འདི་པའི་ལུགས་དང༌། ཐལ་མོ་ཅར་ལེབ་ཏུ་སྦྱར་བ་ནི་མུ་སྟེགས་པའི་ལུགས་ཡིན་ནོ་ཞེས་པུ་ཎྱ་ཤྲཱིས་གསུངས་སོ། །ཙོག་པུར་འདུག་པ་ནི་གཞི་འགྲེལ་ལས། སྟན་ལ་མི་བཞག་པར་པུས་མོ་གཉིས་གྱེན་དུ་ཙོ༷ག་ཙོ༷ག་པུ༷ར་འདུ༷ག་ཏུ་བཅུག་སྟེའོ། །ཞེས་སོ། །ཊཱི་ཀ་ལས་ཀྱང༌། དེ་ལྟར་སྟན་ལ་མི་འདུག་གོ། །ཞེས་སོ། །གསོ༷ལ་བ༷་བཏ༷བ་པ༷་ནི་སྡོམ་པ་ནོད་པའི་ཕྱིར་ཞུ་འབུལ་གྱི་སྔགས་ལ༷ན་གསུ༷མ་བརྗོད་པའོ། །དགོས་པ་ནི་བསྙེན་རྫོགས་ཀྱི་སྡོམ་པ་སྟེར་བར་འགྱུར་བའོ། །ཁྱད་པར་ནི་སྔོན་གྱི་ཆོ་ག་ལ་རང་ཉིད་ཀྱིས་གསོལ་བ་འདེབས་ལ། ད་ལྟར་གྱི་ཆོ་ག་ལ་མཁན་པོས་ངོ་ཆེན་བྱས། ལས་ཀྱི་སློབ་དཔོན་གྱིས་བརྡ་སྦྱར་ནས་གསོལ་བ་འདེབས་དགོས་པའོ། །ཇི་ལྟར་ནོད་པ་ཆོ་ག་ནི་གསོལ་བ་དང་བཞིའི་ལས་སོ། །དགོས་པ་ནི་དངོས་སུ་སྡོམ་པ་སྐྱེ་བའོ། །ཁྱད་པར་ནི་མཐུན་རྐྱེན་ཚང་བ་དང་འགལ་རྐྱེན་བྲལ་བ་བརྗོད་མི་དགོས་པ་དང་དགོས་པའོ། །ཡོངས་སུ་རྫོགས་པ་འབྲས་བུའི་ཁྱད་པར་ནི་གསོལ་བཞིའི་ལས་ཀྱི་ཆོ་ག་གཅིག་ལ་བརྟེན་ནས་རབ་བྱུང་དང་བསྙེན་རྫོགས་དུས་གཅིག་ཏུ་ཐོབ་པའོ། །དགོས་པ་ནི་ཚེགས་ཆུང་ངུས་སྡོམ་པ་ཐོབ་པའོ། །ཁྱད་པར་ནི་ཆོ་ག་གཅིག་གིས་རབ་བྱུང་དང་བསྙེན་རྫོགས་དུས་གཅིག་ཏུ་སྐྱེ་བ་དང་མི་སྐྱེ་བའོ། །རབ་ཏུ་བྱུང་བ་བར་མའི་དགེ་བ་དང་བསྙེན་པར་རྫོགས་པ་དགེ་སློང་གི་སྡོམ་པ་དུས་ཅིག་ཅར་ཁད་ཉེ་བར་བསྒྲུབ་པར་གྱུར་ཅེས་མཚོ་ཊཱིཀ་དང་ཟླ་ཟེར་གཉིས་ཀ་ལས་གསུངས་སོ། །རྩ་བར། གསོལ་བ་དང་གཞིའི་ལས་ཀྱིས་ཅིག་ཆར་རབ་ཏུ་བྱུང་བ་དང་བསྙེན་པར་རྫོགས་པ་ཉེ་བར་སྒྲུབ་པར་གྱུར་བ་ལྟ་བུ་ནི་སྔོན་གྱི་ཆོ་གའོ། །ཞེས་གསུངས་སོ། །