༨ རྡོ་རྗེ་གསུམ་གྱི་བསྙེན་སྒྲུབ།
བརྒྱད་པ་རྡོ་རྗེ་གསུམ་གྱི་བསྙེན་སྒྲུབ་ནི། མཁས་གྲུབ་ཨོ་རྒྱན་པ་རིན་ཆེན་དཔལ་དེ་ཉིད་མདོ་སྔགས་སྤྱི་དང་དུས་འཁོར་སོགས་ལ་སྦྱངས་པ་མཐར་ཕྱིན། རྒྱལ་བ་རྒོད་ཚང་པ་ལས་རྟོགས་པ་མཐར་ཐུག་སྐྱེས་ནས་བརྟུལ་ཞུགས་ཀྱི་སྤྱོད་པས་འཛམ་གླིང་གི་གནས་ཡུལ་ཀུན་ཉུལ་བའི་ཚེ། དྷཱུ་མ་ཐ་ལར་ཕྱོགས་བཞིར་རིགས་བཞིའི་མཁའ་འགྲོས་བྱིན་གྱིས་བརླབས་ཤིང་རྡོ་རྗེ་རྣལ་འབྱོར་མ་ཐ་མལ་པའི་གཟུགས་ཀྱིས་རེག་བདེ་སྩལ་ཏེ་རྩ་མདུད་བཀྲོལ། སླར་རྡོ་རྗེ་བཙུན་མོས་ཞལ་དངོས་སུ་བསྟན་ནས་གདམས་པ་གནང་། མཆོག་ཐུན་གྱི་དངོས་གྲུབ་བརྙེས་ནས་བོད་དུ་བྱོན། མཁར་ཆུ་རིན་པོ་ཆེས་གསོལ་བ་བཏབ་པའི་ངོར་རྡོ་རྗེའི་ཚིག་རྐང་ཡི་གེར་བཀོད། ཁྲིད་གཉེར་པ་ཟླ་བ་སེང་གེ་དང་། གོ་ལུང་པ་གཞོན་ནུ་དཔལ། ཟུར་ཕུག་པ་རིན་ཆེན་དཔལ། མཁས་པ་ཤངས་སྟོན། སྙེ་མདོ་ཀུན་དགའ་དོན་གྲུབ་སོགས་ཀྱིས་ཟིན་བྲིས་དང་ཊིཀ་ཆེན་སོགས་བརྩམས་ནས་རིམ་པར་སྤེལ་བ་ལས་བརྒྱུད་པ་དང་། རྒྱལ་དབང་རང་བྱུང་རྡོ་རྗེས་གྲུབ་ཆེན་ཉིད་ལས་གདམས་སྐོར་རྫོགས་པར་གསན་ཏེ་སྤེལ་བ་སོགས་ད་ལྟའི་བར་བྱུང་བའོ། གཞན་ཡང་གདམས་སྐོར་ཕྲན་ཚེགས་སུ་བྱུང་བའི་ཚུལ་ནི། གྲུབ་ཆེན་མི་ཏྲ་ཛོ་ཀི་ཉིད་ཁྲོ་ཕུ་ལོ་ཙཱ་བ་བྱམས་པའི་དཔལ་གྱིས་སྤྱན་དྲངས་ནས་ཕྱི་ནང་གསང་གསུམ་གྱི་གདམས་སྐོར་དང་། མི་ཏྲ་ཁྲིད་དྲུག་ཏུ་གྲགས་པ་པཎྜི་ཏ་ཤཱ་རི་པུ་ཏྲ་ནས། མི་ཉག་གྲགས་རིན་ལ་བརྒྱུད་པ་དང་། རྡོ་རྗེ་ཕྲེང་བའི་དབང་བསྐུར་བརྒྱ་རྩ་པཎ་ཆེན་དོན་ཡོད་རྡོ་རྗེ་ནས་བརྒྱུད་པ་སོགས་གདམས་ཕྲན་གྱི་སྐོར་དུ་མ་བྱུང་བ་ལས། སྨིན་གྲོལ་གྱི་རྒྱུན་བཞུགས་པ་ཕལ་ཆེར་རིས་མེད་བསྟན་པའི་མངའ་བདག་འཇམ་མགོན་བློ་གྲོས་མཐའ་ཡས་དང་། འཇམ་དབྱངས་མཁྱེན་བརྩེའི་དབང་པོ་རྣམ་གཉིས་ཀྱི་བཀའ་དྲིན་ལ་བརྟེན་ནས་གདམས་ངག་མཛོད་དུ་བཞུགས་ཤིང་བརྒྱུད་པའང་མཐའ་རྒྱས་སུ་བྱུང་བའོ། །
སྨྲས་པ།
གཅིག་ཏུ་དཀར་མིན་ལས་ཀྱི་རླུང་ཤུགས་ཀྱིས། །བདས་པའི་སྲེག་ཟ་སྡིག་ཅན་རྒྱལ་པོའི་ཁ། །དགེ་བཅུའི་ནགས་རླུང་དར་བའི་གངས་ཅན་རིར། །མཆེད་ཚེ་ཐུབ་བསྟན་ལྗོན་བཟང་ཐལ་བར་བྱས། །དེ་ཚེ་ལེགས་བྱས་ཤར་རིའི་ཕྲག་པ་ནས། །མ་ཉམས་ཐུགས་བསྐྱེད་དཀྱིལ་འཁོར་ལྷུན་རྫོགས་པ། །དམར་གཡོ་གཙང་ཞེས་ཉི་ཟླ་སྐར་གསུམ་གྱི། །ཕྲིན་ལས་སྣང་བས་དུས་ཀྱི་རྒུད་པ་བསལ། །སྔོན་བྱོན་ལོ་པཎ་ཐུགས་བསྐྱེད་སྐྱ་རེངས་ཀྱིས། །ལྗོངས་འདིར་ཐོག་མར་དྲངས་པའི་མདོ་སྔགས་ཆོས། །ཚང་ལ་མ་ནོར་གསང་ཆེན་རྙིང་མ་པ། །བསྟན་པའི་ཕྱི་མོ་ཆེ་བ་དྲུག་གིས་འཕགས། །དག་གཙང་པདྨའི་སྦུབས་ལ་ཅོ་འདྲི་བའི། །རྣམ་དག་བསླབ་གསུམ་བསྟན་པ་རིན་ཆེན་མཛོད། །ལུང་རིགས་འདོད་དགུར་འཇོ་བའི་ཕྲིན་ལས་ཅན། །གསེར་མདོག་ཅོད་པཎ་འཆང་བ་བཀའ་གདམས་པ། །རྒྱལ་བསྟན་ཆུ་གཏེར་རྒྱས་པའི་ཆོས་ཀྱི་མཚོ། །བཤད་སྒྲུབ་དཔུང་པ་དར་མས་བསྲུབས་པ་ལས། །གསུང་ངག་ལམ་འབྲས་རིན་ཆེན་གཏེར་གྱི་མཛོད། །སྙིང་པོའི་བཅུད་ཐོབ་དཔལ་ལྡན་ས་སྐྱ་པ། །རྡོ་རྗེ་འཆང་དབང་དགོངས་པའི་ཆུ་མཚོ་ལས། །འོངས་པའི་བཀའ་བབ་རྣམ་བཞིའི་གདམས་པའི་རྒྱུན། །འཐུངས་ལྡན་གྲུབ་བརྙེས་བྱེ་བས་ས་འདི་ཁེངས། །སྒྲུབ་བརྒྱུད་རིང་ལུགས་མ་ཉམས་བཀའ་བརྒྱུད་པ། །ཡེ་ཤེས་ཌཱཀྐིའི་ཐུགས་བཅུད་ཆོས་ཀྱི་མཛོད། །སྙན་ནས་སྙན་བརྒྱུད་གསེར་ཆོས་གཙང་མ་སོགས། །འཁྲུལ་མེད་ཟབ་དོན་རིན་ཆེན་ཐང་མར་བརྡལ། །མཁས་གྲུབ་ཁྱུང་པོའི་བཀའ་སྲོལ་ཤངས་པ་བ། །རྒྱལ་གསུང་འཁོར་ལོ་བར་བའི་བསྟན་བྱའི་དོན། །གསང་རྒྱུད་ཕྱག་རྒྱ་ཆེན་པོའི་དགོངས་པའི་བཅུད། །ངེས་དོན་སྟོང་ཉིད་ཕར་ཕྱིན་ཉམས་ལེན་གྱིས། །བདུད་བཞིའི་འཆིང་བ་གཅོད་པ་ཞི་བྱེད་ལམ། །གསང་ཆེན་བླ་མེད་རྒྱུད་སྡེའི་དགོངས་པའི་བཅུད། །སྦྱོར་བ་དྲུག་ལྡན་རྫོགས་རིམ་རྣལ་འབྱོར་གྱིས། །ཟུང་འཇུག་དག་པ་ཡེ་ཤེས་སྒྱུ་མའི་སྐུར། །མངོན་པར་བྱང་ཆུབ་དུས་ཀྱི་འཁོར་ལོའི་གནད། །ཤིན་ཏུ་རྣལ་འབྱོར་རྡོ་རྗེ་མཁའ་འགྲོའི་ལུང་། །བསྙེན་སྒྲུབ་སྒྲུབ་ཆེན་གསང་བའི་མན་ངག་གིས། །ཟུང་འཇུག་སྐུ་གསུམ་འབྲས་བུའི་གོ་འཕང་ལ། །མངོན་པར་སྦྱོར་བ་རྡོ་རྗེའི་བསྙེན་སྒྲུབ་རྨད། །
ཅེས་པ་ནི་རྒྱལ་བསྟན་ཕྱི་དར་གྱི་བསྟན་པའི་མེ་རོ་སླར་ཡང་གསོས་ནས་སྒྲུབ་བརྒྱུད་ཤིང་རྟ་བརྒྱད་ཀྱི་བཀའ་སྲོལ་བྱུང་ཚུལ་མདོ་ཙམ་བརྗོད་པའི་སྐབས་ཀྱི་བསྡུ་བའི་ཚིགས་སུ་བཅད་པའི་ཕྲེང་བའོ། །
སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ལས། ཕྱི་དར་བསྟན་པའི་མེ་རོ་སླར་ཡང་གསོས་ནས་སྒྲུབ་བརྒྱུད་ཤིང་རྟ་བརྒྱད་ཀྱི་བྱུང་བ་འཕྲོས་དོན་དུ་བརྗོད་པ་སྟེ་སརྒ་ལྔ་པ་རྫོགས་སོ།། །།