འཇམ་དཔལ་གཤིན་རྗེ་ཁྲོ་ཆུའི་ལས་བྱང་རྒྱས་བསྡུས་གསུམ་དང་མདོས་ཟློག་ཡང་ཟློག་རྣམས་ཀྱི་ཟིན་བྲིས།
འཇམ་དཔལ་གཤིན་རྗེ་ཁྲོ་ཆུའི་ལས་བྱང་རྒྱས་བསྡུས་གསུམ་དང་མདོས་ཟློག་ཡང་ཟློག་རྣམས་ཀྱི་ཟིན་བྲིས་ཡོད།།
ན་མོ་གུ་རུ་ཡ་མཱནྟ་ཀ་ཡེ། སྲུང་བ་འཇམ་དཔལ་སྨན་གདོང་དང་། །ཟློག་བསད་གཤིན་རྗེ་དུག་གདོང་ལ། །དགོངས་པ་འགྲོལ་ཕྱིར་ཕྱག་འཚལ་ནས། །དེ་ཡི་འདོན་འགྲིགས་བཤད་པར་བྱ། །རང་བཞིན་བསྙེན་སྒྲུབ་བྱ་ཚུལ་དང་། །སྲུང་ཟློག་བསད་པ་བྱ་ཚུལ་ལོ། །བསྙེན་བསྒྲུབ་བྱ་ཚུལ་སྟ་གོན་རྣམས། །གཞུང་ལྟར་རྒྱས་བསྡུས་གང་ལྕོགས་བཅའ། །འདོན་ལུགས་ཁྱད་པར་མེད་པ་ཡིན། །དེ་ལའང་རྒྱུས་བསྡུས་འབྲིང་གསུམ་སྟེ། །རྒྱས་པ་སི་ཏུས་བསྒྲིགས་པ་ལྟར། །སྐྱབས་སེམས་མངོན་རྟོགས་གཞུང་ལྟར་ལ། །མངོན་རྟོགས་ཕྱི་ཡི་སྲུང་འཁོར་དང་། །ནང་གི་
ཐུགས་ཀའི་སྲུང་འཁོར་གཉིས། །སྡེབ་འཁྱོར་ཡོད་པས་སབ་པར་བྱ། །རྙིང་མ་སྤྱི་ཡི་ལུགས་ཡིན་པས། །བདག་མདུན་སོ་སོར་འདོན་སྲོལ་མེད། །ཆོ་ག་གཅིག་གིས་དུས་གཅིག་བསྐྱེད། །མཆོད་བསྟོད་སོ་སོར་མི་དགོས་ཏེ། །མཆོད་བསྟོད་ཚར་གཅིག་འདོན་པའི་ཚེ། སྤྲུལ་པའི་ལྷ་མོ་གྲངས་མེད་ཀྱིས། །བདག་མདུན་སོ་སོར་མཆོད་བསྟོད་དམིགས། །སྨན་མཆོད་བརྒྱུད་རིམ་ཁ་སབ་བྱ། །གཏོར་མདོས་མ་བྱས་གོང་དེར་བསྙེན་པ་བྱས་ན་ལེགས། །གཞུང་གི་བསྟོད་པ་ཚར་བའི་རྗེས། །ཧཱུཾ། པདྨ་ཉི་མའི་གདན་སྟེང་ནས། །ཞེས་སོགས་བསྟོད་པ་རྒྱས་པའང་
སྦྱར། །དེ་རྗེས་བསྙེན་པ་བྱ་བ་སྟེ། །ཟིན་བྲིས་གཞུང་ནས་འབྱུང་བ་ལྟར། །གནས་གསུམ་བྱིན་རླབས་དབང་བསྐུར་སོགས། །བསྒོམ་ཞིང་སོ་སོའི་སྔགས་ཀྱང་བཟླ། །ཐུགས་ཀའི་ཧཱུྃ་མཐའ་སོགས་པའི་དམིགས་པ་བྷྱོ། །བདག་བསྐྱེད་མཛྫུ་ཤྲཱི་དང་། །དུ་ཏྲི་སོགས་ལ་དམིགས་བསྙེན་བྱ། །བདག་བསྐྱེད་ཞལ་ནས་སྔགས་ཕྲེང་སོགས། །མདུན་བསྐྱེད་ལ་དམིགས་བསྙེན་པ་བྱ། །བདག་མདུན་བསྙེན་པ་ཚར་བའི་རྗེས། །མདུན་བསྐྱེད་གནས་གསུམ་བདུད་རྩི་སོགས། །དངོས་གྲུབ་ལེན་པའི་སྔགས་དམིགས་བྱ། །ཨོྃ་ཨཱཿཧཱུྃ་ཀཱ་ཡ་སིདྡྷི་སོགས་། །དེ་ནས་མདུན་དུ་ཨེ་ལས་ལྕགས་ཁང་སོགས། །ཚེ་བདུད་གཟིར་བའི་སྔགས་དམིགས་བྱ། །དེ་རྗེས་གཏོར་མ་གསོ་བྱས་ལ། །ཧཱུྃ། ཕྱི་སྣོད་འཇིག་རྟེན་གཏོར་གཞོང་དུ། །ཚིགས་བཅད་སྔགས་བཟླས་གཏོར་མ་བསྔོ། །འདི་ལ་གཏོར་ཆུང་འབུལ་ཀྱང་ལེགས། །ཧཱུྃ་ཡ་བྷྱོ་སོགས་བསྟོད་པ་བྱ། །དེ་ནས་དབྱངས་གསལ་རྟེན་འབྲེལ་བརྗོད། །དེ་རྣམས་སྔ་ཐུན་རིམ་པ་སྟེ། །ཐུན་གཞན་གསུམ་ལ་དེ་དང་མཚུངས། །འཛོམས་ན་ཞག་རེ་ཚོགས་རེ་བྱ། །སྤྲོ་ན་མངའ་གསོལ་གསོལ་ཁའང་བྱ། །དེ་ལྟར་བདུན་གཅིག་བདུན་གཉིས་
སམ། །བདུན་གསུམ་བསྙེན་སྒྲུབ་གཞི་བསྙེན་ཡིན། །བདུན་གསུམ་དག་ལས་རིང་མི་བྱ། །གྲོལ་ཁ་སྒྲུབ་རྟེན་གཏོར་མ་ལ། །དམིགས་པས་རང་ལ་དབང་ཡང་བླངས། །ཀཱ་ཡ་ཝཱཀ་ཙིཏྟ་སོགས། །གནས་གསུམ་བྱིན་གྱིས་བརླབ་ཚུལ་བྱ། །དེས་ནི་བསྙེན་བསྒྲུབ་བྱ་བའི་ཚུལ། །ཆོ་ག་རྒྱས་པའི་འདོན་འགྲིགས་རྫོགས།། ༈ །།ཆོ་ག་བསྡུས་པའི་འདོན་འགྲིག་ནི། །གནམ་ལྕགས་གོ་མཚོན་གཞུང་ལྟར་ལ། །གནུབས་སྟོན་སངས་རྒྱས་ཡེ་ཤེས་ཀྱི། །བསྟོད་པ་ཡན་ཆད་གཞུང་ལྟར་ལས། །ཐུན་མཚམས་གསུམ་ནི་དགོང་ཐུན་མཇུག །ཚེ་སྒྲུབ་ནོར་སྒྲུབ་གཉིས་པོ་སྦྱར། །རྫོགས་རིམ་བསྡུ་རིམ་མི་བྱའོ། །དེ་བཞིན་ཚེ་སྒྲུབ་ནོར་སྒྲུབ་གཉིས། །རྒྱས་པའི་སྐབས་སུའང་ཤེས་པར་གྱིས། །གསོལ་ཁ་བསྐང་གསོལ་ཚོགས་མཆོད་གསུམ། །འདོད་ན་རྒྱས་པའི་སྐབས་ལྟར་བྱ། །དེ་ནས་རྒྱུན་ཁྱེར་ཉམས་ལེན་བྱེད་འདོད་ན། །གནམ་ལྕགས་གོ་མཚོན་གཞུང་ལྟར་ལས། །བདག་བསྐྱེད་བསྙེན་པའི་སྐབས་དེ་རུ། །བསྙེན་པ་ཅི་ནུས་འབད་པར་བྱ། །མདུན་བསྐྱེད་ཐང་སྐུ་དར་ནག་གམ། །མེད་ན་གཏོར་མའི་རྩེ་རུ་བསྐྱེད། །མདུན་བསྐྱེད་བསྙེན་པ་ཅི་འགྲུབ་
དང་། །དངོས་གྲུབ་ལེན་ཆོག་གཞུང་ལྟར་ལས། །མདུན་དུ་ཨེ་ལས་ལྕགས་ཁང་སོགས། །ཚེ་བདུད་གཟིར་མནན་མི་དགོས་ཏེ། །བཏོན་ཡང་འགལ་བ་མེད་པ་ཡིན། །ཐུན་མཚམས་ཕྱི་སྣོད་འཇིག་རྟེན་སོགས། །གཞུང་གི་གཏོར་བསྔོས་བསྟོད་པའང་བྱ། །སྔ་དྲོ་སྲུང་བའི་དམིགས་པ་དང་། །སྲུང་སྔགས་ཧཱུྃ་བྷཾ་རཀྵ་སོགས། །ཕྲེང་སྐོར་ཙམ་ཞིག་བརྗོད་པར་བྱ། །དེ་ནས་བྱ་བ་གང་དགོས་བསྒྲུབ། །ཕྱི་དྲོ་ལས་བྱང་ཝིག་མི་དགོས། །དྲན་རྫོགས་ཉིད་དུ་གསལ་བཏབ་ནས། །ལུས་ལྷ་གཤིན་རྗེའི་ལུས་བཅས་གསལ་བཏབ་ལ། །ཟློག་དམིགས་དང་བཅས་ཟློག་སྔགས་བཟླ། །བརྒྱ་ལས་མང་བར་མི་བྱ་སྟེ། །མཐུ་འདྲེན་བྱེད་ན་སུམ་བརྒྱ་ཡིན། །དེ་ནས་དམར་གཏོར་གཅིག་བཤམས་ལ། །ཨེ་གཏོར་སྣོད་ལ་སོགས་འགུགས་གཞུག་དང་། །དྲག་པོ་ཆོས་དབྱིངས་ལ་སོགས་ནས། །ཕྲིན་ལས་མཛོད་བར་གཞུང་ལྟར་འདོན། །ཤ་ཁྲག་གཤིན་རྗེའི་ཟོས་ལྷག་སོགས། །དམིགས་པ་དང་བཅས་ཐུན་གཏོར་དེ། །འཕེན་ནམ་གནོད་བྱེད་དགྲ་ཡུལ་སོགས། །ཕུལ་བ་ལ་སོགས་སྐབས་དང་བསྟུན། །དེ་རྗེས་རང་གི་ལག་མཐིལ་སོགས། །དམིགས་པ་དང་བཅས་ཐལ་མོ་ནི། །
ལན་དགུ་དང་བཅས་སྔགས་བཟློག་སྔགས་དང་སྤྱད། །དེ་ནས་སྤྱི་གཙུག་མཆོད་རྟེན་ལ་སོགས་བརྗོད་པ་ཡིན། །དེ་ཉིད་རྒྱུན་ཁྱེར་བྱས་པ་ན། །བསྙེན་པ་སྲུང་ཟློག་བསད་པ་སོགས། །ཐམས་ཅད་དེ་གས་ཆོག་པར་ངེས། །མ་ཚིག་ཙམ་གྱིས་བསྡུས་པ་ནི། །ཧེ་ལ་སྣ་ཚོགས་ལས་གྲུབ་སོགས། །མངོན་རྟོགས་ཉུང་ངུ་དེ་ཉིད་བརྗོད། །དེ་འང་བསྙེན་པ་སྲུང་ཟློག་བསད། །གཅིག་ཆོག་གསུམ་གྱི་གདམས་པ་འདུས། །དེ་དོན་ཟིན་བྲིས་དག་ལས་གསལ། །དེ་ནས་གཏོར་ཟློག་ཡང་ཟློག་གཉིས། །བཅའ་ཚོགས་མཐོང་བ་བརྒྱུད་པ་ལྟར། །དེ་ཡང་ཟིན་བྲིས་དག་ལས་གསལ། །ཆོ་ག་རྒྱས་པ་གཞུང་ལྟར་ལས། །སྲུང་འཁོར་རང་ཐུགས་ཕྱི་ནང་གཉིས་པོ་སབ། །སྨན་མཆོད་སྐབས་སུ་བརྒྱུད་རིམ་སབ་། །ཀཱ་ཡ་སིདྡྷི་ཞེས་པའི་སྐབས། །གནས་གསུམ་ཐིག་ལེ་ལྕེ་ལ་བཞག །བསྟོད་པ་ཡན་ཆད་གཞུང་ལྟར་ལས། །ཧཱུཾ་པདྨ་ཉི་མ་ལ་སོགས་པའི། །བསྟོད་པ་རྒྱས་པའང་བསྟོད་པའི་རྗེས། །བསྙེན་པ་ཕྲེང་སྐོར་ཙམ་ཞིག་བྱ། །དེ་ནས་སྲུང་སྔགས་ཅུང་ཟད་བཟླ། །དེ་ཚེ་བསྙེན་པ་བསྲུང་བ་ཡིན། །དམིགས་རིམ་བསྡུས་པ་ཅི་ཟིན་བྱ། །དེ་ནས་གསོལ་ཀ་
མངའ་གསོལ་གསུམ། །སྦྱར་ན་ལེགས་ཤིང་མ་སྦྱར་རུང་། །སྦྱར་ན་གཏོར་ཟློག་གསོ་བྲན་ཝིག །ཡང་ན་གཏོར་ཆུང་ཕུལ་ཡང་ལེགས། །དེ་ནས་ཚོགས་བྱ་ཚོགས་ཕུད་ཕུལ། །ཁྲོ་ཆུ་ཁོ་ནར་གཙོར་བཟུང་ནས། །སྐབས་འདིར་གཏོར་བསྔོས་གང་དགོས་བྱ། །མ་སབ་ནའང་མ་ཚང་མེད། །ཚོགས་ཕུད་བར་པས་བསྐང་བ་གསོ། །མེད་ན་གཏོར་ཟློག་གསོ་བྲན་བྱ། །གཞུང་གི་བསྐང་བ་ཉུང་ངུ་འདོན། །གཏོར་ཟློག་མེད་པའི་ཚོགས་ལ་ནི། །བསྒྲལ་ལས་གུད་དུ་མི་དགོས་ཏེ། །བསྐང་བའི་ནང་ན་དོན་གྱིས་ཚང་། །གཏོར་ཟློག་ཡོད་ན་ཚོགས་དུམ་བདུན། །ཟན་ལིང་བདུན་དང་ཤ་དུམ་བདུན། །གཏོར་ཆུང་མང་བ་སོ་སོར་བཤམས། །མདུན་དུ་ཟངས་ལྕགས་སྣོད་ཀྱི་ནང་། །ཚོགས་དུམ་ལིངྒ་གཅིག་བཞག་བྲན། །བྲུབ་ཁུང་ཡོད་ན་བྲུབ་ཁུང་དང་། །མེད་ན་གཏོར་ཆེན་འོག་རྣམས་སུ། །ཟན་ལིང་བཞག་པ་ལ་དམིགས་ཏེ། །བྲུབ་ཁུང་བསྐྱེད་ཆོག་ནས་བཟུང་སྟེ། །ཀཱི་ལ་ཡ་ཡི་བར་ཡན་འདོན་། །དེ་ནས་གཏོར་ཆུང་གཉིས་བྲན་ལ། །གཤེད་ཆེན་སྡེ་བཞིའི་བསྐུལ་པ་དང་། །གནམ་ལྕགས་རྒྱ་གྲམ་འབར་བ་སོགས། །སྔགས་པ་སྡེ་དྲུག་གཏོར་མ་འབུལ། །ཕུར་
འདེབས་བཏོན་ལ་ཕུར་པ་བཏབ། །ཐུན་རྫས་སོགས་ཀྱི་དམོད་པ་བརྗོད་པའི་ཚེ། །ཕྱི་ལག་བྱས་ལ་ཐུན་རྫས་བརྒྱབ། །དེ་ནས་ཡུངས་དཀར་ནས་བཟུང་སྟེ། །ཐོ་བའི་བར་གྱི་ཐུན་རྫས་བརྒྱབ། །ཤིན་ཏུ་གལ་ཆེན་ཡིན་ན་ནི། །ཐུན་རྫས་རེ་ལ་བསད་སྔགས་སྦྱར། །ཧཾ་ཟེར་རམ་ནི་ཐོད་སྟེང་དུ། །ལིང་རོ་བཀྱག་ལ་ཞལ་བསྟབ་གྱེར། །གཏོར་ཟློག་ནང་ཕུལ་བདུད་རྩིས་བྲན། །དེ་ནས་གཏོར་ཆུང་གཅིག་བཤམས་ལ། །ཧཱུྃ། ལས་ཀྱི་གཤིན་རྗེ་ནག་པོ་མཐུ་བོ་ཆེ། །ནས་བཟུང་བསྒྱུར་བའི་ཕྲིན་ལས་མཛོད། །སྔོན་ཚེ་ཟློག་པ་གང་ནས་བྱུང་། །སོགས་ནས་འདི་ལྟར་བཟློག་བར་འདོན། །བྷྱོ། ཕྱོགས་ཕྱོགས་དག་ཀྱང་ཕ་ཀི་ནས། །བན་བོན་སྔགས་པའི་བྱད་ཁ་བཟློག་གི་བར། །ཧཱུཾ། ང་ནི་འཇམ་དཔལ་གཤིན་རྗེའི་གཤེད། །འཇིག་རྟེན་དྲེགས་པ་སྐུ་གསུང་ཐུགས་སྤྲུལ་དང་། །ཟློག་སྒྱུར་དུས་བབ་བར་གྱི་ཚིག་གསུམ་མཐར། །བདག་ཅག་ཡོན་མཆོད་འཁོར་བཅས་ཞེས་པ་ནས། །བཅོལ་བའི་ཕྲིན་ལས་འགྲུབ་པར་མཛོད་ཀྱི་བར། །དེ་ནས་རྔ་ནི་དྲག་བརྡུང་ཟློག་སྔགས་བཟླ། །དེ་ཡིས་གཙོ་བོའི་ཟློག་པ་ཚང་བ་ཡིན། །བན་སྐྱོང་བོན་སྐྱོང་ཀུན་གྱི་གཤེད་
ཡིན་ཕྱིར། །ཁྱོད་ཁ་བཟློག་ལ་འདི་བས་ཟབ་པ་མེད། །དེ་ནས་སླར་ཡང་ཟན་ལིང་ཚོགས་དུམ་བཤམས། །བྲུབ་ཁུང་བསྐྱེད་ཆོག་ཝིག་ནི་མི་དགོས་ཏེ། །གཏོར་ཆུང་བཤམས་ལ་ཕོ་ཉ་བསྐུལ་བ་ནི། ། བྷྱོ༔ འཆི་བདག་ནག་པོའི་དུས་བབ་ཚིག་གཅིག་ལ། །གཤེད་ཆེན་སྡེ་བཞིའི་དུས་བབ་མན་ཆད་སྦྱར། །བསྙེན་སྔགས་བླ་འགུགས་སྔགས་བསྟབ་བརྗོད་པར་བྱ། ། བྷྱོ༔ བཀའ་ཉན་ཆེན་མོ་ནས་བཟུང་ལྷ་དབྱེ་གྱེར། །བྱ་རོག་འུག་པའི་སྒོ་ཡིས་འཐབ་ཚུལ་བྱ། །མེད་ན་ཐུན་བྲབ་ལྷ་དབྱེའི་སྔགས་ཀྱང་བརྗོད། །སྐད་ཅིག་ལྷོ་ཕྱོགས་ལ་སོགས་ཐུན་བྱིན་རླབས། །གཤེད་ཆེན་སྡེ་བཞི་སྔགས་པ་སྡེ་དྲུག་གཉིས། །གཙོ་བོ་མ་གཏོགས་འཁོར་ལ་མི་སྦྱར་རོ། །བྷྱོ༔ འཆི་བདག་ནག་པོའི་དུས་ལ་བབ། །ཅེས་པ་ནས་ཐོ་བའི་བར་གོང་ལྟར་ལས། །བསྟབ་པ་འཆི་བདག་ནག་པོའི་ཞལ་དུ་བསྟབ། །བྷྱོ༔ སྐུ་ཡི་སྤྲུལ་པ་འཆི་བདག་ནག་པོ་ནས། །ཚིག་གཉིས་མཇུག་ཏུ་ཞལ་གཅིག་ཕྱག་གཉིས་སོགས། །ལས་མཛོད་ཅིག་བར་བརྗོད་ཅིང་གཏོར་ཆུང་འབུལ། །འཇིག་རྟེན་དྲེགས་པ་སྐུ་གསང་ཐུགས་སྤྲུལ་དང་། །སྐུ་ཡི་སྤྲུལ་པས་ནམ་མཁའ་གང་ཞེས་མཐར། །བདག་ཅག་ཡོན་མཆོད་ཅེས་ནས་
འགྲུབ་མཛོད་བར། །ཟློག་སྔགས་བརྗོད་ཅིང་རྔ་དྲག་བརྡུང་། །དེས་ནི་སྐུ་སྤྲུལ་འཆི་བདག་ཟློག་པ་རྫོགས། །འཆི་བདག་འདི་ནི་ནཱ་ག་རཀྵ་སྟེ། །གཏད་དང་ཀླུ་གདོན་ཟློག་པའི་མཆོག་ཡིན་ནོ། །དེ་ནི་གཞུང་ལྟར་འགྲེས་རྣམས་ཤེས་བྱས་ཏེ། །ཚེ་བདག་འདི་ནི་ཟློག་བསད་ཡང་ཟློག་མཆོག་།ཡང་ཟློག་རྡོ་རྗེ་ཕ་ལམ་མཆོད་བསྟོད་དང་། གཏོར་ཟློག་ཀྱང་ནི་འདི་ལ་འཐུས་པ་ཡིན། །དེ་ནི་ཐུགས་སྤྲུལ་སྲོག་བདག་འགྲེས་གཤང་སྟེ། །སྲོག་བདག་སྲོག་ཐིག་ཁ་ཐུན་དོན་གཅིག་སྟེ། །བསད་པའི་ལས་ལ་ཤིན་ཏུ་རྣོ་བར་བཤད། །དེ་ནས་བེ་བྷ་སྭ་ཏའི་འགྲེས་བཤང་འདོན། །བི་བྷ་སྭ་ཏ་འཆར་ཀའི་མིང་ཡིན་ཏེ། །ཟོར་ཁ་རྒོད་སྟོང་ཟློག་པའི་མཆོག་ཏུ་གསུངས། །ཕྲིན་ལས་སྤྲུལ་པ་ཟ་ཝ་ལྗང་ནག་ནི། །ཡིག་ཆ་ལ་ལར་ཟ་བ་ལྗང་དམར་ཡོད། །ཡ་ཀའི་རྫོགས་པའི་སངས་རྒྱས་མན་ཆོད་ནས། །མ་ཀའི་འཇག་མའི་སྲིན་བུ་ཡན་ཆད་ཀྱིས། །སྲོག་དབུགས་ཟ་བ་སྲིད་པ་ལས་ཀྱིས་བསྐོས། །དེ་ཕྱིར་ཟ་བ་ཞེས་སུ་མིང་བཏགས་ཏེ། །དོན་ལ་འཆི་བདག་ནག་པོ་ཡིན་པར་ངེས། །ཡ་མ་རཱ་ཙ་ཆོས་རྒྱལ་དོན་གཅིག་སྟེ། །ངོ་བོ་རྫོགས་པའི་སངས་རྒྱས་ཡིན་
ནའང་། །རྣམ་པ་གཤིན་རྗེ་ཡོངས་ཀྱི་སྡེ་དཔོན་ཚུལ། །ས་བརྒྱད་སེམས་དཔའ་དགེ་སྡིག་ཤན་འབྱེད་ཡིན། །དེ་དག་རྣམས་ལས་འཇིགས་པའི་ལྷ་གཞན་མེད། །ཚར་གཅིག་ནང་དུ་གབ་བདུན་སྤྱད་པ་དེས། །ཟློག་པ་ཚར་གཅིག་ཟློག་པ་ཚར་བདུན་ཚང་། །བཅུ་དྲུག་བཏོན་པས་ཟློག་པ་བརྒྱ་རྩ་ཚང་། །དེ་ནི་རྒྱས་པ་ཡིན་ཞིང་འབྲིང་གི་ཆེ། །གཙོ་བོ་ཞིག་དང་འཁོར་གསུམ་ལ། །འགྲེས་བཤང་དཔེར་ན་ཟློག་པ་ཚར་གསུམ་འགྲོ། །བསྡུ་ན་གཙོ་འཁོར་བདུན་པོ་ཕྱོགས་གཅིག་བསྡུ། །འགྲེས་ཀྱི་ས་རུ་བདུན་པོའི་མཚན་རྣམས་བརྗོད། །བསྒྲལ་ལས་བསྟབ་པ་གཏོར་ཟློག་གཞུང་ཉིད་འདོན། །དེ་ནས་ཚོགས་རོལ་ལྷག་མ་རྩང་ནང་ཕུལ། །དེ་ནས་རྩང་གྱེར་བཏོན་པས་ཟློག་གཞུང་རྫོགས། །ཟློག་བསད་ཐུན་མོང་ཕྱི་རྟགས་ཐོན་འདོད་ན། །ཟློག་པ་རེ་ལ་འགུགས་གཞུག་གསུམ་གསུམ་རེ། །བླ་འགུགས་སྔགས་ལ་ཉི་ཤུ་རྩ་གཅིག་ཙམ། །ཕུར་འདེབས་ལ་སོགས་ཐུན་གྱི་སྐབས་ཀུན་ཏུ། །དམིགས་པ་གསལ་བས་བསད་སྔགས་ཚར་གསུམ་རེ། །དེ་ལྟར་བྱས་པས་བསད་ཟློག་གཉིས་ཀ་འགྲུབ། །རྟགས་ཐོན་བྱེད་ན་ཞག་རེ་ཚར་གསུམ་འདོན། །བར་སྐབས་སྔ་དྲོ་ཀུན་ལ་སྲུང་སྔགས་
ཅི་ནུས་བཟླ། །ཕྱེད་ཡོལ་ཉི་ནུབ་བར་དུ་ཟློག་པའི་སྔགས། །ཉི་ནུབ་ནས་བཟུང་མཚན་མོའི་ཆ་རྒྱུན་ལ། །བསད་སྔགས་ཁོ་ན་བཟླ་བར་བྱ་བ་སྟེ། །སྔགས་རྒྱུན་བྱེད་མཁན་མང་དུ་ཡོད་ན་མཆོག །མེད་ན་རང་གིས་བར་སྐབས་ཅི་ནུས་བཟླ། །དེ་ལྟར་རྨིས་རྟགས་མ་ཐོན་བར་དུ་འབད། །བདེ་རིམ་ཡིན་ན་ཡོན་བདག་འདོད་དང་བསྟུན། །དེ་ནས་འབུལ་ཉིན་སྔ་དྲོའི་ཆ་ལ་ནི། །སྔ་དྲོ་གནམ་ལྕགས་གོ་མཚོན་ལ་སོགས་པ། །ཁྲོ་ཆུའི་ལས་བྱང་བསྡུས་པ་ཚར་གཅིག་འདོན། །ཚོགས་དང་བསྒྲལ་ལས་བསྟབ་པ་སྔོན་དང་མཚུངས་། །ཟློག་གཞུང་གབ་མ་སྤྱད་པ་བསྡུས་པ་འདོན། །ཟོར་སྣོད་ནང་དུ་ཟོར་ཆེན་གཉིས་དང་ནི། །རུ་ཏྲ་སྡེ་བཞི་དེ་འདྲར་ཆུང་བ་བཞི། །ཁྲམ་ཟོར་ཁྲག་ཟོར་རྡོ་ཟོར་མདའ་དང་གཞུ། །ཀོང་ཟོར་མདའ་འཕང་ནམ་རྒྱང་བཙུགས་པ་ཞིག །སྒོང་ཟོར་དང་བཅས་དཔེའུ་རིས་ལྟར་བཅའ། །སྔར་ནས་བཅས་ལ་་་ཡུངས་ཀར་སྔགས་ནས་གཏོར། ཐུན་སྔགས་བྲབ་ན་བཟང་། །འཕྲལ་དུ་དེ་ཉིན་བཅས་ན་འགལ་བ་མེད། །དེ་ནས་འབུལ་ཉིན་གསེར་སྐྱེམས་དཀར་གཏོར་འབུལ། །སྔོན་ནས་གཏོར་མའི་སྟོད་ཆ་ལྷ་སོ་སོ། །སྨད་ཆ་བྲུབ་ཁུང་དགྲ་
བགེགས་ཤ་ཁྲག་དང་། །སྐེད་པ་མཆོད་པའི་སྤྲིན་དུ་བསྒོམ་ཡོད་པ། །ཡིད་ཀྱིས་ལྷ་ཚོགས་ནམ་མཁར་བཏེགས་བྱས་ནས། །སྤྲིན་ནག་འཁྲིག་བཞིན་འུར་ཆེམ་ནམ་མཁར་བཞུགས་། །ཞལ་ཡང་རང་ལ་མི་བལྟ་དགྲ་ལ་བལྟ། །རྔམ་རྔམ་ཅིག་ཅིག་དམག་ལ་ཆས་པར་བྷེ། །ཕྱར་ནག་སྟེང་དུ་གཏོར་མདོས་ཞལ་བསྒྱུར་ལ། །དེ་མཐར་གཏོར་ཆུང་བཅུ་བཞིའི་བསྐོར་བ་ཅན། །བཀུག་གཞུག་བསྡུས་པ་ཙམ་ཞིག་འགྲུབ་ན་ལེགས། །མ་འགྲུབ་ན་ཡང་དགྲ་བགེགས་ཤ་ཁྲག་དམིགས། །ཨེ་དྲག་པོ་ཆོས་དབྱིངས་གཤིན་རྗེ་ལ་སོགས་པའི། །སྡེ་ཚན་སོ་སོའི་མཚན་གྱི་མཇུག་ཏུ་ནི། །དམ་རྫས་ཕྱི་ནང་ལ་སོགས་ཚིག་བདུན་པོ། །སྦྱར་ནས་རྫོ་ངས་འདེབས་ཚུལ་དུ་གཏོར་ཆུང་འབུལ། །རྩ་སྔགས་མཇུག་ཏུ་ཤན་པ་ནག་པོ་སོགས། །ཁཱ་ཧི་སྦྱར་ཞིང་རོལ་མོ་འུར་བརྡུང་བྱ། །ནམ་མཁར་བཞུགས་པའི་ལྷ་ཚོགས་ཐམས་ཅད་ཀྱིས། །དགྲ་བགེགས་ཤ་ཁྲག་ལྷག་མེད་ཧབ་ཐོབ་ཟོས། །དམག་ཆེན་བཟའ་བཏུང་ཟས་ཀྱིས་མགུ་བ་ལྟར། །ཁྲོས་འཁྲུགས་རྔམ་ཞིང་ཟ་ཟ་རམ་རམ་བསམ། །དེ་ནས་བདེ་རིམ་གཏོར་ཟློག་ཡིན་ན་ནི། །ཕྱོགས་ཀྱི་གཙང་སར་འབུལ་རྒྱུ་བསྐུར་བས་ཆོག །
སྔོན་དུ་དཀར་གཏོར་དེ་རྗེས་གཏོར་ཟློག་ཁྱེར། །དང་པོ་འགྲོ་ཁ་ཡུད་ཙམ་བཀྱག་བཅུག་ལ། །ཉི་མ་ལྷོ་ཕྱོགས་མ་ཡི་བསྐུལ་རིང་འདོན། །སྒོ་ཐེམ་ནས་བཟུང་གོམ་པ་བདུན་ཅུ་ནི། །རྩ་བཞི་བས་ནི་ཉེ་ན་འཁོར་ལ་ལྡོག །དེ་ནས་ཕྱི་ལྟས་མི་བྱ་ཚུར་འོང་སྟེ། །གཏོར་སྣོད་སྒོ་ཐེམ་རྩ་རུ་སྒྲུབ་པར་བྱ། །གཏོར་སྐྱེལ་ཚུར་ལ་མ་ཕྱིན་བར་དུ་ནི། །ཟློག་སྔགས་འདོན་ཅིང་རོམ་མོ་ཅི་བཅད་དེ། །དེ་ནི་གཏོར་སྐྱེལ་དག་གིས་སྲུང་བ་ཡིན། །དེ་ནས་སྒོ་རྩར་གཏོར་སྣོད་སྒྲུབ་པ་ལ། །དམ་སྲི་འགུགས་གཞུག་བྱས་ལ་གཏོར་བྲོ་བརྡུང་། །ནང་དུ་ཕྱིན་ནས་ཚེ་འགུགས་ནོར་སྒྲུབ་སོགས། །གནམ་ལྕགས་གོ་མཚོན་གཞུང་ནས་འབྱུང་ལྟར་འདོན། །དགའ་སྟོན་ཚོགས་འཁོར་ཡོད་ན་བཟང་བ་སྟེ། །ཆད་མདོ་བརྟན་སྐྱོང་རྗེས་ཆོག་བཀྲ་ཤིས་སོགས། །ལས་བྱང་ཆེ་བའི་གཞུང་རྣམས་ཚང་བར་བྱ། །གལ་ཏེ་འཇམ་སྟབས་མི་བྱ་རྩུབ་བྱེད་ན། །ཁྱིམ་དེར་ཕྱོགས་ཀྱི་གཙང་སར་ཁ་ཕྱོགས་སུ། །སླ་ངའི་ནང་དུ་གྲུ་གསུམ་ཨེ་བཅས་ནས། །དེ་ནང་གཏོར་མའི་ཞབས་དང་བྲུབ་ཁུང་གི །ཤོག་ལིང་ཡོད་ན་བཏོན་ནས་དེར་བཞག་ལ། །མེད་ན་ཟན་ལིང་ཆེ་བ་གཅིག་བཞག་ནས། །ཧོམ་ཁུང་བསྐྱེད་
ཆོག་བཀུག་གཞུག་བཅས་པ་བྱ། །སྐབས་འདིར་ཆད་མདོའི་གཏོར་མ་ཕུལ་ཡང་ཉིན། །སྒོང་ཟོར་ནས་བཟུང་ཟོར་རྣམས་རིམ་བཞིན་འཕངས། །བཞེས་འབོད་བྱས་ལ་ཟོར་ཆེན་འཕེན་པ་དང་། །མཉམ་དུ་དར་ནག་ཆོས་གོས་ལ་སོགས་བརྡབ། །གལ་ཏེ་ཟོར་ཆེན་མ་གྱུ་ཚུར་ལོག་ན། །ཟོར་ཆེན་གཉིས་པོ་འཕང་བར་བྱ་བ་ཡིན། །སྔོན་མ་གྱུ་ན་རྒྱབ་མ་བསྐྱལ་མི་དགོས། །དེ་ཡང་མ་གྲུ་ལན་གསུམ་དག་ལ་བསྐྱལ། །སྦྱིན་བདག་གམ་ནི་གྲྭ་སློབ་གལ་ཆེན་རྣམས། །གྲལ་ནི་མགོ་མཇུག་ལྡོག་པར་འཁོད་པ་ཡིས། །གྲལ་མཇུག་གཏོར་ཟློག་ཉིད་ལ་ཐུག་པར་བསྡད། །གྲལ་མགོར་རྡོ་རྗེ་སློབ་དཔོན་ཉིད་འདུག་ནས། །གཏོར་ཟློག་ནང་གི་ཡ་མ་རཱ་ཙ་ཡི། །གཏོར་མ་བླངས་བྲན་གཅིག་གིས་གཅིག་ལ་གཏད། །རྡོ་རྗེ་སློབ་དཔོན་ཕྱག་ཏུ་ཕྱིན་པ་ནས། །ཧཱུཾ། གཉིས་མེད་སྤྲུལ་པ་ཡ་མ་རཱ་ཙ་སོགས། །ཟློག་གཞུང་ཡ་མ་རྭ་ཙའི་ལེའུ་བཏོན། །ཟློག་སྔགས་བརྗོད་ནས་ལིང་གར་བརྒྱབ། །དེ་ནསཟ་བ་ལྗང་ནག་ནས་བཟུང་སྟེ། །འཆི་བདག་ནག་པོའི་བར་གྱི་ལས་གཤིན་ལྔ། །འདྲེས་བཤང་བཏོན་ཅིང་གཏོར་མ་ལིངྒར་བརྒྱབ། །དེ་རྗེས་གཙོ་བོའི་གཏོར་མ་སྣོད་དུ་བཤམས། །དཔལ་འབར་
བཙུགས་ལ་སློབ་དཔོན་ཕྱག་ཏུ་ཐོགས། །ཕྱག་རྟགས་རྡོ་རྗེ་བརྗོད་ན་ལེགས་པ་སྟེ། །ཧཱུྃ། ལས་ཀྱི་གཤིན་རྗེ་ནག་པོ་མཐུ་བོ་ཆེ། །ཞེས་པ་གཙོ་བོའི་ཟློག་པ་དེ་ཉིད་ཀྱིས། །ཟོར་ཁ་རླུང་ཁ་བསྒྱུར་བའི་ཕྲིན་ལས་མཛོད། །ཟློག་སྔགས་བཏོན་ཅིང་ཀུན་གྱི་སྤྱི་བོར་འགྲིམ། །མི་ཆེན་བླ་ཆེན་ལ་སོགས་ང་རྒྱལ་ཅན། །དབུ་ན་གཏོར་མ་འཇོག་པ་མི་བདེ་ན། །ཕྱག་ཏུ་བཞག་པ་ཙམ་གྱིས་འཐུས་པ་ཡིན། །དམིགས་པ་གཏོར་མའི་རྩེ་སྟོད་ཁྲོ་ཆུའི་སྐུ། །དེ་ལ་ཡེ་ཤེས་བསྐལ་པའི་མེ་འབར་བས། །བསྲུང་བྱའི་ནད་དང་ལུས་གདོན་ཐམས་ཅད་བསྲེགས། །སྔོན་གྱི་འཁོར་ནི་དྲུག་པོ་འགྲིམ་པའི་ཚེ། །བསྲུང་བྱའི་ནད་གདོན་བར་ཆད་ཐམས་ཅད་ཀུན། །ལག་འགྲིམས་བྱས་པས་གཏོར་མའི་འོད་ཟེར་གྱིས། །ནད་དང་གདོན་དང་དགྲ་དང་བར་ཆད་ཀུན། །རྩིག་གསེབ་དུ་བ་རླུང་གིས་དེད་པ་ལྟར། །དེད་ནས་སླ་ངའི་ནང་གི་ལིངྒར་བསྟིམ། །གཏོར་མ་དྲུག་པོ་གྲ་སྟ་མེ་འབར་བས། །ལིངྒར་བརྒྱབས་པས་རྩྭ་ཕུང་མེ་བརྒྱབ་ལྟར། །རྡུལ་དུ་བརླགས་ནས་རྗེས་མེད་སོང་བར་བསམ། །དེ་ནས་གཙོ་བོའི་གཏོར་མ་དེ་ཉིད་ནི། །གནམ་ལྕགས་རི་བོ་ཟུར་གསུམ་ལ་སོགས་པ། །དམིགས་
པ་དང་བཅས་དམིགས་པ་མ་ཟིན་བར། །གཏོར་མ་ལིངྒར་རྒྱག་སྟོང་བྱེད་བཞིན་དུ། །ཟློག་སྔགས་་་་བསད་པ་ཡིན་ན་བསད་སྔགས། མང་བཏོན་ལིངྒའི་སྟེང་དུ་བསྐྱེལ། །དར་ནག་བརྡབ་ཅིང་རོལ་མོ་དྲག་ཏུ་འཁྲོལ། །དེ་ནས་ས་ལ་གྲུ་གསུམ་རིམ་མཚན་བྲི། །དེ་སྟེང་ཤིང་གིས་གྲུ་གསུམ་བསྒོང་བྱས་ནས། །གཏོར་མ་ལིངྒ་རྩང་དང་བཅས་པ་བསྲེགས། །སྦྱིན་སྲེག་བྱེད་ན་ཤོག་ལིང་སྐྱུར་ནས་བཞག །ཐལ་བ་རྒྱ་གྲམ་ལམ་དང་མཆོད་རྟེན་འོག །ས་ནོན་ཆེ་བ་གཅིག་ཏུ་བླུག་པར་བྱ། །དེ་གོང་ཚོགས་དང་ཆད་མདོ་ཚེ་སྒྲུབ་དང་། །བཀྲ་ཤིས་བསྡུ་ཚིག་ལ་སོགས་གཞུང་ལྟར་རོ། །དེ་ནི་རིམ་གྲོ་ལུགས་ཀྱི་དྲག་ལས་ཡིན། །བསད་ཟློག་གཉིས་ལ་རྟགས་ཐོན་དྲག་ལས་ནི། །ཟིན་བྲིས་རྒྱས་པའི་ནང་ནས་འབྱུང་བ་ལྟར། །སྔོན་ནས་མར་མེ་གཏོར་ཟློག་མདུན་དུ་བཞག །འགུགས་གཞུག་དུས་སུ་དེ་ལ་དམིགས་རིམ་བྱ། །འབུལ་ཁ་ཉིན་པར་འགུགས་གཞུག་བརྒྱ་རྩ་བྱ། །གཏོར་ཟློག་གཏོར་རྫོངས་བཅས་པ་ཚར་བའི་རྗེས། །སྔོན་དུ་དཀར་གཏོར་དེ་རྗེས་རང་ཉིད་ཀྱི། །གཏོར་མགྲོན་ཆོས་སྐྱོང་གང་ཡོད་དམར་གཏོར་དང་། །མར་མེ་གཏོར་ཟློག་དར་ནག་རྣམས་ཀྱང་ཁྱེར། །སྔགས་ཆས་གྱོན་ལ་
གོམ་པ་དོན་བཞིའི་སར། །དགྲ་སོགས་ཕྱོགས་ནི་གཙང་སར་ཁ་བལྟས་ཏེ། །དང་པོ་དཀར་གཏོར་འབུལ་ཞིང་གསེར་སྐྱེམས་མཆོད། །དེ་ནས་རང་གི་ཆོས་སྐྱོང་ཐམས་ཅད་ཀྱི། །དྲག་རིམ་གཏོར་མ་རྗེས་བཞག་རིམ་གྱིས་བཤམས། །དེ་ནས་ལིངྒ་མར་མེ་བཅས་པ་ལ། །འགུགས་གཞུག་ལན་གསུམ་བླ་འགུགས་དང་བཅས་བརྗོད། །ཀོང་བུ་དེ་ཉིད་དགྲ་བོ་དངོས་སུ་བསམ། །བསད་སྔགས་བརྗོད་ཅིང་སྔར་ནས་སྔགས་པ་ཡི། །ཁྲག་གིས་མར་མེ་དེ་ཉིད་བསད་པའི་ཚེ། །དགྲ་བོའི་རྣམ་ཤེས་ནག་སྐམ་སོང་བར་བསམ། །མར་མེ་གསུམ་གཉིས་ཙམ་ཞིག་མ་ཟད་པར། །བསད་སྔགས་བཟླ་ཞིང་དམིགས་པ་ཁོ་ན་གཟིར། །ཁྲག་གི་ནད་རླངས་དུག་རླངས་རྣམས་སུ་བསམ། །མར་མེ་བསད་རྗེས་ལྷ་གྲངས་གཏོར་མའམ། །མེད་ན་ཁྲོ་ཆུའི་ཆད་མདོའི་གཏོར་མ་དེ། །དགྲ་བོའི་ཕྱོགས་སུ་རྩེ་བསྟན་ཕུལ་བར་བྱ། །དེ་རྗེས་མདོས་ཀྱི་རྩང་རྣམས་བླངས་བྱས་ནས། །ཡ་མ་རཱ་ཙ་ལ་སོགས་ལས་གཤིན་དྲུག །ཁྱིམ་དུ་གཏོར་རྒྱབ་བྱེད་ལྟར་རིམ་བཞིན་འཕེན། །དེ་རྗེས་གཙོ་བོའི་གཏོར་མ་ལག་ཏུ་ཐོགས། །ཉི་མ་ལྷོ་ཕྱོགས་བསྐུལ་རིང་བཏོན་པའི་རྗེས། །གནམ་ལྕགས་རི་བོ་
ཟུར་གསུམ་ལ་སོགས་པའི། །དམིགས་པ་མ་ཟིན་བར་དུ་བསད་སྔགས་བཟླ། །དེ་ཚེ་རོལ་མོ་བསྒྲགས་ཤིང་གཟི་བརྗིད་བསྐྱེད། །དམིགས་པ་ཟིན་ནས་ཐེ་ཚོམ་མེད་པར་འཕངས། །དར་ནག་བརྡབ་ཅིང་ཆས་གོས་དང་། །དུག་པོ་གང་ཡིན་མགོ་མཇུག་ལྡོག་ལ་བརྡབ། །དེ་ནས་དམིགས་མེད་ངང་ལ་ཡུད་ཙམ་སྡོད། །གལ་ཏེ་གཏོར་མ་གྲུ་བར་མ་གྱུར་ན། །ཚུར་འོང་ལན་གསུམ་འཕང་བར་བཤད། །ཟོར་དང་གཏོར་མ་གྲུ་བའི་གནད་ཟབ་ལ། །གཏོར་རྩེ་སྦོམ་ཞིང་རྩ་བ་ཕྲ་བར་བཤད། །འཕེན་ཕྱོགས་ཅུང་དམའ་རང་ཕྱོགས་མཐོ་བར་བྱ། །ཧ་ཅང་གཟར་ན་ལེགས་པ་མ་ཡིན་ནོ། །དེ་ནས་མདོས་སྣོད་སྦུབ་ལ་གཏོར་བྲོ་བརྡུང་། །དར་དྲིལ་ཕྱི་མིག་མི་བྱ་ཁྱིམ་དུ་འོང་། །རྗེས་སུ་ཁྱུང་དམར་གཅིག་གིས་བཅད་པར་བསྒོམ། །ལམ་དུ་འོང་ཚེ་རྣམ་འཇོམས་བསྒྲག་པར་བྱ། །ནང་དུ་སྦྱིན་སྲེག་བླུག་རྒྱུ་ཡོད་ན་བླུགས། །དེ་ནས་དགའ་སྟོན་ཚོགས་ཀྱི་འཁོར་ལོ་བྱ། །ཚེ་སྒྲུབ་ནོར་སྒྲུབ་བཀྲ་ཤིས་མི་བྱའོ། །ཡང་ཟློག་ཡིན་ན་བཅའ་ཚོགས་ཟིན་བྲིས་ལྟར། །འདོན་ལུགས་གཏོར་ཟློག་ཉིད་དང་མཚུངས་པ་ལ། །འབུལ་དུས་དང་པོ་དཀར་གཏོར་གསེར་སྐྱེམས་ཕུལ། །དེ་ནས་ཕྱི་ཡི་རྩང་རྣམས་ཤབ་བྱས་
ལ། །ཧོམ་ཁུང་བཅོ་ལྔའི་ནང་གི་ལིངྒ་བླངས། །སླ་ངའི་ནང་བཞག་སྔར་དང་འདྲ་བ་སྟེ། །ལིངྒ་བྲན་ལ་འགུགས་གཞུག་ལན་གསུམ་བྱ། །དེ་ནས་འདི་ལ་གཏོར་རྫོངས་མི་བྱེད་པར། །དྲག་པོ་ཆོས་དབྱིངས་གཤིན་རྗེའི་གཞལ་ཡས་སོགས། །མཇུག་ནས་རིམ་བཞིན་ཡར་སྟོན་ལིངྐར་བརྒྱབ། །རྗེས་ལ་གཙོ་བོའི་གཏོར་མ་དེ་ལ་ནི། །ཉི་མ་ལྷོ་ཕྱོགས་མ་ཡི་བསྐུལ་རིང་མཇུག །དགོངས་སུ་གསོལ་སོགས་བཞེས་འབོད་བྱས་པའི་མཐར། །ཟློག་སྔགས་བཟླ་ཞིང་ལིངྒའི་སྟེང་དུ་བསྐྱེལ། །དར་ནག་གཡབ་ཅིང་མདོས་གདན་སྣོད་སྦུབས་ནས། །དགྲ་བགེགས་དམ་སྲི་འགུགས་གཞུག་ཅུང་ཞིག་བྱ། །དེ་ནས་ཡ་མ་རཱ་ཙའི་ཕྱོགས་ཕྱོགས་བསྐུལ་སྟོན་ཏེ། །ས་གས་ས་འོག་ཡ་མ་རཱ་ཙ་ལངས། །ཁ་ཡི་ནང་དུ་དགྲ་བགེགས་དམ་སྲི་བཅུག །དེ་སྟེང་རི་རབ་གླིང་བཞིས་མནན་པར་བྷེ། །ལས་བྱང་མཇུག་གི་རྟ་བྲོ་བརྡུང་བར་བྱ། །གལ་ཏེ་ཡང་ཟློག་ཕྱི་རོལ་འགྲིགས་ན་ནི། །མར་མེ་ཁྲག་གསོད་སྦྱར་ཡང་རུང་བ་ཡིན། །བྱ་ཚུལ་རྣམས་ནི་གོང་དང་མཚུངས་པ་ཡིན། །འདི་ནི་རྙིང་མ་སྤྱི་ཡི་ལུགས་ཡིན་པས། །བདག་མདུན་སོ་སོར་འདོན་པ་མི་དགོས་ཀྱང་། །གསར་མའི་ཆོས་
ལ་ཐུགས་ཞེན་ཆེ་བའི་ཕྱིར། །སོ་སོར་མེད་པས་བློ་ཁ་མི་རྫོགས་ན། །གནམ་ལྕགས་གོ་མཚོན་སྟོད་ཆ་བདག་བསྐྱེད་བྱ། །མདུན་དུ་ཨེ་ལས་ལྕགས་ཁང་ཞེས་སོགས་དང་། །མདུན་བསྐྱེད་ལ་དམིགས་བསྙེན་པའི་དམིགས་རིམ་བསྒྱུར། །བདག་བསྐྱེད་བསྟོད་པ་ཡན་ཆད་ཚར་བའི་རྗེས། །ཟློག་པའི་དམིགས་པ་བྱེད་ལ་ལུས་ལྷ་སྒྱུར། །མདུན་བསྐྱེད་སི་ཏུའི་ལུགས་ཀྱི་ཆོ་ག་དེའི། །སྐྱབས་འགྲོ་སེམས་བསྐྱེད་མཚམས་གཅོད་སྒྱུར་བར་བྱ། །མཆོད་པ་བྱིན་རླབས་མན་ཆད་གཞུང་ལྟར་འདོན། །སྲུང་འཁོར་ཁ་བ་གཉིས་པོ་མི་སབ་བོ། །དེ་མིན་བསྟོད་པ་ཡན་ཆད་གཞུང་ལྟར་རོ། །ལས་འགྲིགས་གཏོར་ཟློག་འདོན་ལུགས་གཞུང་དང་མཚུངས། །རྒྱུན་ཁྱེར་ཤིན་ཏུ་བསྡུས་པའི་ཉམས་ལེན་ནི། །ཧ་ལ་སྣ་ཚོགས་ལས་གྲུབ་ཅེས་པ་ཡི། །མངོན་རྟོགས་ཤིན་ཏུ་བསྡུས་པ་ཆག་མེད་དང་། །སྔ་དྲོ་སྲུང་དམིགས་བསྲུང་སྔགས་ཅི་ནུས་བཟླ། །དགོང་མོ་ཟློག་དམིགས་ཟློག་སྔགས་ཅི་འགྲུབ་དང་། །ཉིན་གུང་མཚན་སོགས་བསྙེན་པ་ཅི་ནུས་འབད། །འགྲོ་འདུག་ལ་སོགས་སྤྱོད་ལམ་གང་བྱེད་ཚེ། །བསྐྱེད་རྫོགས་ཟུང་འཇུག་ངང་ལ་བསྙེན་པ་བྱ། །རབ་ཏུ་དགུ་གསུམ་ཐ་མ་ཉེར་དགུ་ལ། །དམར་
གཏོར་དང་ནི་བསྐུལ་པ་གང་རུང་ཞིག །ཆག་མེད་བྱེད་པ་འདི་ཡི་དམ་ཚིག་ཡིན། །ཀརྨ་ཚེ་བརྟན་མཆེད་གྲོགས་རྣམ་གསུམ་གྱིས། །བསྐུལ་ཚེ་རཱ་ག་ཨ་སྱས་འཕྲལ་དུ་སྨྲས། །འགལ་འཁྲུལ་མཆིས་བཤགས་དགེ་བ་བྱང་ཆུབ་བསྔོ། །ཡི་གེ་པ་ཡང་བསྐུལ་པ་པོ་དེས་བྱས། །མངྒ་ལཾ། དགེའོ།། དགེའོ།། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།