དམྱལ་བའི་གནས་བཤད་པ།
གསུམ་པ་དམྱལ་བའི་གནས་བཤད་པ་ནི། འཛམ་བུ་གླིང་འདི་ཆོས་ཅན། ཁྱོད་ཀྱི་འོག་དཔག་ཚད་སྟོང་ཕྲག་ཉི་ཤུ་ན་མནར་མེད་པའི་དམྱལ་བ་ཡོད་དེ། དེ་ན་རྔམས་དང་རྒྱར་དེ་ཙམ་གྱི་དཔག་ཚད་སྟོང་ཕྲག་ཉི་ཤུ་རེ་ཡོད་པའི་ཕྱིར། དེ་ཆོས་ཅན། ཁྱོད་ཀྱི་སྟེང་ན་དམྱལ་བ་གཞན་ཡོད་དེ། དེ་
ཡང་སོས་ལ་སོགས་པ་བདུན་པོ་ཡོད་པའི་ཕྱིར། ཚ་དམྱལ་བརྒྱད་པོ་དེ་དག་ཀུན་ཆོས་ཅན། ཁྱོད་ལས་ཐར་ཀྱང་སྡུག་བསྔལ་མྱོང་བའི་གནས་ལྷག་མ་ཉེ་འཁོར་བཞི་བཞི་སྟེ་བཅུ་དྲུག་ཡོད་དེ་དེ་རྣམས་ཀྱི་ངོས་བཞི་ན་མེ་མ་མུར། རོ་མྱགས་ཀྱི་འདམ། སྤུ་གྲིའི་ལམ། ཆུ་བོ་རབ་མེད་རྣམས་ཡོད་པའི་ཕྱིར། སྔར་བཤད་པའི་ཚ་དམྱལ་བརྒྱད་པོ་ཆོས་ཅན། ཁྱོད་རྣམས་ཀྱི་ཐད་ཀར་གཞན་གྲང་བའི་དམྱལ་བ་བརྒྱད་ཡོད་དེ། དེར་ཆུ་བུར་ཅན་ལ་སོགས་པ་རྣམས་ཡོད་པའི་ཕྱིར། ངན་སོང་གཞན་ཡི་དྭགས་ཀྱི་གནས་ཀྱང་ཡོད་དེ། ཕལ་ཆེར་ནི་རྒྱལ་པོའི་ཁབ་ཀྱི་འོག་ན་ཡོད་ཅིང་། ཁ་འཐོར་བ་རྣམས་ནི་ས་གཞི་རི་ཀླུངས་ཕལ་ཆེར་ན་ཡོད་པའི་ཕྱིར། དུད་འགྲོ་ཆོས་ཅན། ཁྱོད་ཀྱི་གནས་ཡོད་དེ། ཕལ་ཆེ་བ་ནི་ཕྱིའི་རྒྱ་མཚོའི་ནང་ན་གནས་ཤིང་། ཁ་འཐོར་བ་ནི་ལྷ་མིའི་གནས་གང་དུའང་ཡོད་པས་མ་ངེས་པའི་ཕྱིར། བཞི་པ་ཉི་ཟླའི་འཆར་ཚུལ་བཤད་པ་ལ། དངོས་དང་། དུས་ཚིགས་ཀྱི་རྣམ་གཞག་གཉིས། དང་པོ་ནི། ཉི་ཟླ་གཉིས་ཆོས་ཅན། ཁྱོད་ཀྱི་འཆར་ས་ཡོད་དེ། ལྷུན་པོའི་ཆུ་འཚམས་ཡན་ཆད་ཀྱི་ཕྱེད། གཉའ་ཤིང་འཛིན་གྱི་རྩེ་དང་མཉམ་པ་ནས་འཆར་བའི་ཕྱིར། ཟླ་བའི་དཀྱིལ་འཁོར་ཆོས་ཅན། ཁྱོད་ཀྱི་ཚད་ཡོད་དེ། ཞེང་དུ་དཔག་ཚད་ལྔ་བཅུ། མཐའ་སྐོར་དུ་དཔག་ཚད་ཕྱེད་དང་ཉིས་བརྒྱ། རྔམས་སུ་དཔག་ཚད་ཕྱེད་དང་དྲུག་དང་། གཅིག་གི་བཅོ་བརྒྱད་ཆ་གཅིག་ཡོད་པའི་ཕྱིར། དེ་ཆོས་ཅན། ཁྱོད་ཀྱི་རྒྱུ་ཡོད་དེ། ཆུ་ཤེལ་ལས་གྲུབ་ཅིང་། གསེར་གྱི་རྭ་བས་བསྐོར་བ། རིན་པོ་ཆེའི་ཐེམ་སྐས་དང་ཕ་གུ་སོགས་ཀྱིས་སྤྲས་ཤིང་། སྐྱེད་མོས་ཚལ་གྱིས་རྣམ་པར་མཛེས་པ། ལྷའི་བུ་བུ་མོ་རྣམས་རོལ་མོ་དང་གར་སྒྱུར་བ་སོགས་བྱེད་པ་ཡོད་པའི་ཕྱིར། ཉི་མ་ཆོས་ཅན། ཁྱོད་ཀྱི་ཚད་ཡོད་དེ། ཞེང་དུ་དཔག་ཚད་ལྔ་བཅུ་རྩ་གཅིག །མཐའ་སྐོར་དུ་དཔག་ཚད་བརྒྱ་ལྔ་བཅུ་རྩ་གསུམ་དང་བཅས་ཤིང་རྔམས་སུ་དཔག་ཚད་ཕྱེད་དུ་དྲུག་དང་། གཅིག་
གི་བཅོ་བརྒྱད་ཆ་གཅིག་ཡོད་པའི་ཕྱིར། དེ་ཆོས་ཅན། རྒྱུ་ཡོད་དེ། མེ་ཤེལ་ལས་གྲུབ་ཅིང་། གཞན་སྔར་དང་འདྲ་བའི་ཕྱིར། སྐར་མ་ཆོས་ཅན། ཁྱོད་ཀྱི་ཚད་ཡོད་དེ། ཆེ་བ་ལ་རྒྱང་གྲགས་བཅོ་བརྒྱད་དང་། ཆུང་བ་ལ་རྒྱང་གྲགས་གཅིག་ཡོད་པའི་ཕྱིར། ཉི་ཟླ་གཉིས་ཆོས་ཅན། གླིང་ལ་བྱ་བ་བྱེད་ཚུལ་ཡོད་དེ། སྒྲ་མི་སྙན་དུ་ནམ་ཕྱེད་པ་དང་། ལུས་འཕགས་གླིང་དུ་ཉི་མ་ནུབ་པ་དང་། འཛམ་བུ་གླིང་དུ་ཉི་མ་ཕྱེད་པ་དང་། བ་གླང་སྤྱོད་དུ་ཉི་མ་འཆར་བ་རྣམས་དུས་གཅིག་ཏུ་ཡོད་པའི་ཕྱིར། གཉིས་པ་དུས་ཚིགས་ཀྱི་རྣམ་གཞག་ལ། ཚིག་དོན། སྤྱི་དོན། མཐའ་དཔྱད་པ་དང་གསུམ་ལས། དང་པོ་ནི། ཤེས་བྱ་ཆོས་ཅན། དུས་ཚིགས་ལ་གསུམ་དུ་ཕྱེ་བའི་དབྱར་གྱི་ཟླ་བ་གཉིས་པ་ཡི་ཐ་མའི་ཚེས་དགུ་ནས་མཚན་མོ་རིང་བར་འགྱུར་ཏེ། དེ་ལྟར་མཚན་མོ་ཡུད་ཙམ་བཅོ་བརྒྱད་ཀྱི་བར་དུ་འཕེལ་བ་ལས་རིམ་གྱིས་འགྲིབས་པ་ན་དགུན་རྣམས་ཀྱི་ཟླ་བ་བཞི་པ་ལ་ཉིན་མཚན་ཡུད་ཙམ་བཅོ་ལྔར་མཉམ་པ་ལས་རིམ་གྱིས་ཉིན་མཚན་གོ་བཟློག་སྟེ་མཚན་ཐུང་ངུར་གྱུར་ནས་ཉིན་མོ་རིང་བར་འགྱུར་བའི་ཕྱིར། ཉིན་མཚན་ཆོས་ཅན། ཁྱོད་རིང་ཐུང་དུ་འགྱུར་བ་ལས་ཐེངས་གཅིག་ལས་མི་འབྱུང་སྟེ། ཆུ་ཚོད་ཀྱི་དབང་གིས་ཞག་རེ་ལ་དེ་ལྟར་འཕེལ་འགྲིབ་བྱེད་པའི་ཕྱིར། དེར་ཐལ། ཉི་མ་འཛམ་བུའི་གླིང་དུ་ལྷོ་ཕྱོགས་སུ་རྒྱུ་བའི་ཚེ་མཚན་མོ་རིང་། བྱང་ཕྱོགས་སུ་རྒྱུ་བའི་ཚེ་ཉིན་མོ་རིང་བར་འགྱུར་བའི་ཕྱིར། ཚེས་གསུམ་གྱི་ཟླ་བའི་དཀྱིལ་འཁོར་དེ་ཡོངས་སུ་མ་རྫོགས་པ་ལ་རྒྱུ་མཚན་ཡོད་དེ། དེའི་ཚེ་ཟླ་བའི་དཀྱིལ་འཁོར་དེ་ཉི་མའི་དཀྱིལ་འཁོར་དང་ཉེ་བ་ལས་ཉི་མའི་འོད་ཟླ་བའི་གཞལ་མེད་ཁང་ལ་བབས་པ་ན་ཕ་རོལ་གྱི་ངོས་སུ་ཟླ་བ་རང་གི་གྲིབ་མ་བབས་པས་འགྲིབ་པར་སྣང་བའི་ཕྱིར། དཔེར་ན། ཀ་བ་ལ་མར་མེའི་འོད་ཉེ་བ་ན་ཀ་བ་རང་གི་གྲིབ་མས་བསྒྲིབས་པས་ཅུང་ཟད་འགྱུར། །ཤིན་ཏུ་ཉེ་བ་ན་རང་གི་གྲིབ་མས་མི་སྣང་བར་འགྱུར་བའི་ཕྱིར། གཉིས་པ་སྤྱིའི་དོན་
ལ། དུས་ཚིགས་གང་ལས་བྱུང་། བྱེད་པོ་ཡོད་མེད་ལ་དཔྱད། དུས་ངོས་གཟུང་བའོ། །དང་པོ་ནི། བསྐལ་པ་མར་འགྲིབ་ཀྱི་དུས་ཤེད་བུ་དང་། ཤེད་ལས་སྐྱེས་གཉིས་ཀྱིས་སའི་ཞག་ཟོས་པས་ལུས་ཀྱི་འོད་ཉམས་ཏེ་མུན་པ་བྱུང་བས་དེའི་ཚེ་ཉི་ཟླ་སྐར་མ་རྣམས། འགྲོ་བ་སྤྱི་མཐུན་གྱི་བསོད་ནམས་ལས་བྱུང་སྟེ། གདགས་པ་ལས། སེམས་ཅན་དེ་དག་གིས་ཁམས་ཀྱི་ཟས་ཟོས་པ་དེས་ན། དེ་དག་གི་ལུས་ལ་མཁྲང་བ་དང་། ལྕི་བ་ཞུ་བར་གྱུར་ཏེ། འོད་དང་ཁ་དོག་གི་མདོག་གང་ཡིན་པ་དེ་ནི་མེད་པར་གྱུར་ཏོ། །ཞེས་དང་ཆོས་ཉིད་ཀྱིས་ན་འཇིག་རྟེན་དུ་མུན་པ་བྱུང་བ་ན། ཉི་མ་དང་ཟླ་བ་འདི་ཉིད་འཇིག་རྟེན་དུ་བྱུང་བར་གྱུར་ཏོ། །རྒྱུ་སྐར་རྣམས་དང་། མཚན་མོ་དང་། ཉིན་མོ་རྣམས་དང་། དུས་ཚིགས་རྣམས་དང་། སྐད་ཅིག་དང་། ཐང་ཅིག་དང་། ཡུད་ཙམ་རྣམས་འཇིག་རྟེན་དུ་བྱུང་བར་གྱུར་ཏོ། །གཉིས་པ་ནི། ལོ་ཟླ་ཚེས་གྲངས་གཟའ་སྐར་གྱི་གོ་རིམ་གི་བྱེད་པོ་ཡོད་དེ། རང་རེའི་སྟོན་པ་ཤཱཀྱའི་རྒྱལ་པོ་དེ་ཉིད་སྐུ་ཚེ་སྔ་མ་ཞིག་ལ། དྲང་སྲོང་རྔ་བོང་དུ་གྱུར་དུས་ལོ་དྲུག་ཁྲིར་དཀའ་ཐུབ་བསྒྲུབས་པས། སྲིད་པ་གསུམ་ན་མཐུ་ཆེ་བར་གྱུར་ཏེ། ཚངས་པ་སོགས་ལྷ་རྣམས་ཀྱིས་ཞུས་པའི་ངོར་རྒྱུ་སྐར་སོགས་ཀྱི་གོ་རིམ་མཛད་པའི་ཕྱིར། ཇི་སྐད་དུ་མདོ་ཉི་མའི་སྙིང་པོ་ལས། ལོ་ནི་དྲུག་ཁྲི་ཐམ་པར་ཡང་། །རྐང་པ་གཅིག་གིས་དཀའ་ཐུབ་གནས། །ཞེས་དང་། རེ་ཞིག་དང་པོར་སྨིན་དྲུག་ཅེས། །རྒྱུ་སྐར་དཀྱིལ་འཁོར་ཐམས་ཅད་ལ། །ནངས་ཀྱི་དང་པོར་གཞག་པར་བྱ། །ཞེས་འབྱུང་བའི་ཕྱིར། གསུམ་པ་ནི། སྐྱེས་བུ་གཅིག་གི་མིག་འཛུམ་བཅོ་བརྒྱད་ལ་མཐར་གནས་གཅིག །དེ་སུམ་ཅུ་ལ་སྐད་ཅིག་གཅིག །དེ་བཅུ་གཉིས་ལ་ཡུད་ཙམ་གཅིག །དེ་སུམ་ཅུ་ལ་ཉིན་ཞག་གཅིག །དེ་བཅོ་ལྔ་ལ་ཕྱོགས་གཅིག །དེ་གཉིས་ལ་ཟླ་བ་གཅིག །དེ་གཉིས་ལ་ཚིགས་པ་གཅིག །དེ་གསུམ་ལ་བགྲོད་པ་གཅིག །དེ་གཉིས་ལ་ལོ་
གཅིག་ཏུ་འཇོག་པའི་ཕྱིར། ཇི་སྐད་དུ་འཆི་མེད་མཛོད་ལས། མིག་འཛུམ་བཅོ་བརྒྱད་མཐར་གནས་ལ། །དེ་སུམ་ཅུ་ལ་སྐད་ཅིག་བགྲང་། །དེ་ནི་བཅུ་གཉིས་ཡུད་ཙམ་ཡིན། །དེ་སུམ་ཅུ་ལ་ཉིན་ཞག་གཅིག །དེ་དག་བཅོ་ལྔ་ཕྱོགས་སུ་གྲགས། །སྔ་ཕྱིའི་ཕྱོགས་ནི་དཀར་ནག་གཉིས། །དེ་གཉིས་བསྡོམས་པ་འཇལ་བྱེད་དེ། །ཆུ་ཟླ་ལ་སོགས་གཉིས་གཉིས་ལ། །དེ་ཚིགས་དེ་གསུམ་བགྲོད་པ་གཅིག །ལྷོ་བྱང་བགྲོད་པ་གཉིས་ལ་ལོ། །ཞེས་གསུངས་པའི་ཕྱིར། དེ་ཡང་ལོའི་སྐད་དོད་ཝཪྵ་ཞེས་པ་ངེས་ཚིག་གིས་བཤད་ན་བཞིར་འགྱུར་ཏེ། ཡོངས་བགྲང་། གྲང་བཞི། རང་སྐྱོབ། འདོར་བྱེད་ཅེས་བྱ་བ་ཡིན་པའི་ཕྱིར། ཇི་སྐད་དུ་འཆི་མེད་མཛོད་ལས། ཡོངས་བགྲང་བགྲང་བཞི་རང་སྐྱོབ་དང་། །འདོར་བྱེད་ཅེས་བྱ་ལོ་ཡི་མིང་། །ཞེས་གསུངས་པའི་ཕྱིར། སྤྱིར་རྒྱ་གར་ན་རྒྱལ་པོ་རང་རང་གི་རྒྱལ་སྲིད་ཀྱི་ལོ་ལ་མངའ་རིས་ཀྱི་བུ་ལོན་སྦྱངས་ནས། ལོ་དེ་ནས་མགོ་འཛིན་པ་ཤས་ཆེ་སྟེ། ལུགས་ཀྱི་བསྟན་བཅོས་རྣམས་སུ། གཡུལ་བརྟན་འོག་དུ་ཉིས་སྟོང་ལོན། །ཞེས་སོགས་འབྱུང་བ་ལྟར་ཡིན་པའི་ཕྱིར། འོན་ཀྱང་གསུང་རབ་ལས་ནི། ལོ་དྲུག་ཅུར་བྱེད་དེ། བདེ་མཆོག་བསྟོད་འགྲེལ་ལས། རབ་བྱུང་རྣམ་བྱུང་དཀར་པོ་དང་། ཞེས་སོགས་འབྱུང་བའི་ཕྱིར། ལོ་དེ་ལ་དུས་ཚིགས་ཇི་ཙམ་དུ་འབྱེད་ཚུལ་ཡོད་དེ། གསུམ། བཞི། ལྔ། དྲུག་རྣམས་སུ་འབྱེད་པའི་ཕྱིར། གསུམ་དུ་འབྱེད་པའི་རྒྱུ་མཚན་ཡོད་དེ། སེམས་ནི་ཚ་བར་མཚུངས་པས་དཔྱིད་དུ་བསྡུས། སྟོན་ནི་ཆར་འབབ་པས་དབྱར་དུ་བསྡུས་ཏེ། དགུན། དཔྱིད། དབྱར་གྱི་དུས་གསུམ་དུ་འཆད་རིགས་པའི་ཕྱིར། དེ་ཡང་ཡོད་དེ། མགོ །རྒྱལ། མཆུ། དབོའི་ཟླ་བ་བཞི་དང་པོ། ནག་པ། ས་ག །སྣྲོན། ཆུ་སྟོད་ཀྱི་ཟླ་བ་བཞི་གཉིས་པ། གྲོ་ཞུན། ཁྲུམས། ཐ་སྐར། སྨིན་དྲུག་གི་ཟླ་བ་བཞི་གསུམ་པར་འཇོག་པའི་ཕྱིར། བཞིར་འཇོག་རིགས་ཏེ། དབྱར་དགུན་སྟོན་
དཔྱིད་དུ་མ་ཕྱེ་ནས་བཞིར་འཇོག་པའི་ཕྱིར། ཇི་སྐད་དུ། རྒྱ་ལས་འགྱུར་བའི་མྱང་འདས་ལས། ཟླ་བ་གསུམ་ནི་དཔྱིད་ཀྱི་དུས། །ཟླ་བ་གསུམ་ནི་དབྱར་གྱི་དུས། །ཟླ་བ་གསུམ་ནི་སྟོན་གྱི་ཕྱོགས། །ཟླ་བ་གསུམ་ནི་དགུན་ཞེས་བྱ། །ཞེས་པ་དང་། སོ་ཐར་གྱི་མདོ་ལས། བྱིན་འཕྲོག་སྟོན་ཟླ་ཐ་ཆུང་དང་། ཞེས་འབྱུང་བའི་ཕྱིར། དུས་ཚིགས་ལ་ལྔར་འབྱེད་རིགས་ཏེ། འདུལ་བ་ལུང་ལས། དུས་ཚོད་ནི་ལྔ་སྟེ། དགུན་གྱི་དུས་དང་། དཔྱིད་ཀྱི་དུས་དང་། དབྱར་གྱི་དུས་དང་། དབྱར་ཐུང་ངུའི་དུས་དང་། དབྱར་རིང་པོའི་དུས་སོ། །ཞེས་བཤད་པའི་ཕྱིར། དུས་ཚིགས་ལ་དྲུག་ཏུ་འབྱེད་རིགས་ཏེ། མྱང་འདས་ལས་གཉིས་གཉིས་དུས་ཚིགས་གཅིག་བྱས་ནས། །ལོ་གཅིག་དུས་ཚིགས་དྲུག་ཏུ་བསྒྱུར། །ཞེས་དང་། ཡན་ལག་བརྒྱད་པ་ལས། དགུན་ཟླ་ར་བ་སོགས་གཉིས་གཉིས། །རིམ་བཞིན་དུས་ནི་དྲུག་ཏུ་འདོད། །ཅེས་བཤད་པའི་ཕྱིར། དུས་ཚིགས་ལ་གསུམ་དུ་ཕྱེ་བ་ལ་ཆོས་ཅན། དགོས་པ་ཡོད་དེ། ཕྱག་དར་ཁྲོད་པའི་གོས་ཤེས་པའི་ཆེད་ཡིན་པའི་ཕྱིར། བཞིར་ཕྱེ་བ་ལ་ཆོས་ཅན། དགོས་པ་ཡོད་དེ། བོད་ཀྱི་ཐ་སྙད་དུ་རབ་འབྲིང་ཐ་གསུམ་དང་། རྒྱ་གར་བས་དགུན་དཔྱིད་དབྱར་སྟོན་བཞིར་ཕྱེ་བའི་ལུགས་དང་མཐུན་པའི་ཆེད་ཡིན་པའི་ཕྱིར། ཆོས་རྗེ་བསོད་གྲགས་པས། འཇིག་རྟེན་དང་མཐུན་པར་དགུན་དཔྱིད་དབྱར་སྟོན་ཏེ་བཞི་གསུངས། དགོས་པ་ནི་གསུང་རབ་ལས། རབ་འབྲིང་། ཐ་ཆུང་གསུམ་གསུངས་ཞེས་པ་ནི་མི་འཐད་དེ། རྒྱ་དཔེ་ན། དེ་འདྲའི་སྐད་དོད་མེད་པའི་ཕྱིར། རྒྱ་དཔེ་ལ། པཱ་ལ་གུ་ནི་ཞེས་པ་བོད་སྐད་དུ་ལོ་ཙཱ་བ་རྣམས་ཀྱིས་དབོ་ཅན་ཞེས་པ་ཐོན་ཡོང་རྒྱུ་ལ། བོད་དང་བསྟུན་ནས་དཔྱིད་རར་བསྒྱུར་བའི་ཕྱིར། དུས་ཚིགས་ལ་ལྔར་ཕྱེ་བ་ལ་ཆོས་ཅན། དགོས་པ་ཡོད་དེ། དབྱར་ཐུང་ངུ་ཤེས་པའི་ཆེད་ཡིན་པའི་ཕྱིར། དུས་ཚིགས་ལ་དྲུག་ཏུ་ཕྱེེ་བ་ལ་ཆོས་ཅན། དགོས་པ་ཡོད་དེ། ཞག་མི་ཐུབ་ཤེས་པའི་ཆེད་ཡིན་པའི་ཕྱིར། ལོ་མགོ་ངོས་འཛིན་ཚུལ་
ལ། ཤེས་བྱ་ཆོས་ཅན། ལོ་མགོ་འཛིན་ཚུལ་ཡོད་དེ། ཧོར་ཟླ་བཅུ་པའི་མར་ངོའི་ཚེས་བཅུ་དྲུག་ནས་འཛིན་པའི་ཕྱིར། དེར་ཐལ། དགུན་ནས་འཛིན་དགོས་པའི་ཕྱིར། དེར་ཐལ། དགེ་སློང་གི་ལོ་དྲི་བ་ལས། དུས་དུ་ཡོད་ཅེ་ན་ལྔའོ། །ལྔ་པོ་དག་གང་ཞེ་ན། དགུན་དང་། སོ་ཀ་དང་། དབྱར་དང་། དབྱར་ཐུང་ངུ་དང་། དབྱར་རིང་པོ་ཞེས་བྱའོ། །ཞེས་དང་། རྒྱ་ཆེར་འགྲེལ་ལས། དུས་ཚིགས་དྲུག་པོ་དགུན་དང་། དགུན་སྨད་དང་། དཔྱིད་དང་། སོ་ག་དང་། ཞེས་སོགས་གསུངས་པའི་ཕྱིར། དབྱར་གྱི་ཟླ་བ་གཉིས་པ་ཡི། །ཐ་མའི་ཚེས་དགུ་ནས་མཚན་རིང་། དགུན་རྣམས་ཀྱི་ནི་བཞི་པ་ལ། ཞེས་སོགས་ཀྱི་གཞུང་འདིའི་ཤུགས་ལ་ཉིན་མཚན་རིང་བ་མཐར་ཐུག་པའི་དུས་སུ་དབྱར་དགུན་གྱི་ཉི་མ་ལྡོག་པ་བསྟན་ཀྱང་། རང་གཞན་གྱི་མཁས་པ་མང་པོ་ཉིན་མོ་བཟློག་ཅེས་པ་མཚན་མོ་ལས་བཟློག་སྟེ་ཉིན་མོ་རིང་དུ་སོང་བ་མ་དགོངས་པར། ཉི་ལྡོག་ལ་བསྙེགས་པའི་བཤད་པ་མཛད་པས། དཔྱིད་དང་སྟོན་གྱི་དུས་སུ་ཉི་མ་ལོག་དགོས་པ་ལྟ་བུའི་མུ་ཅོར་གྱི་གཏམ་གྱིས་ཤེས་ལྡན་རྣམས་ལྟ་ཅི་སྨོས། བོད་ཀྱི་གནག་རྫི་རྒན་པོ་རྣམས་ཀྱང་ཁྲེལ་བའི་གནས་སོ། །ཀར་ལུགས་པ་ཁ་ཅིག །ཟླ་བ་བརྒྱད་པར་ལོ་མགོ་འཛིན་པ་སོགས་ནི་དཔྱད་པ་བྱ་བའི་ཡུལ་ཡིན་ནོ། །ས་སྐྱ་པའི་མཁས་པ་ཁ་ཅིག །དབྱར་གྱི་ཟླ་བ་གཉིས་པ་ཁྲུམས་ཀྱི་ཟླ་བ་ཡི་ཐ་མ་མར་ངོ་སྔོན་དུ་སོང་བའི་ཡར་ངོའི་ཚེས་བརྒྱད་ལ་དབྱར་ཉི་ལྡོག་སྟེ། ཞེས་སྨྲ་བ་ནི་མི་འཐད་དེ། དེ་ལྟར་ན་ཁྲུམས་ཟླ་ཟླ་བ་བརྒྱད་པ་ཡིན་པ་གང་ཞིག །ཟླ་བ་བརྒྱད་པ་ལ་དབྱར་ཉི་ལྡོག་པ་མི་སྲིད་པའི་ཕྱིར། དེར་ཐལ། ཟླ་བ་བརྒྱད་པ་ལ་སྟོན་ཉིན་མཚན་མཉམ་པ་གང་ཞིག །དབྱར་ཉི་ལྡོག་པའི་ཚེ། ཉི་མ་རིང་བའི་མཐར་ཐུག་པའི་དུས་ཡིན་པའི་ཕྱིར། ཟླ་ཤོལ་འབྱུང་བའི་རྒྱུ་མཚན་ཡོད་དེ། ཚེས་ཞག་གིས་ཉིན་ཞག་གི་དོད་མ་ཐུབ་པ་ལ་བརྟེན་ནས། ལོ་ལྔ་ལྔ་ལ་
ཟླ་ཤོལ་རེ་རེ་འདོན་པ་དང་། ཚེས་ཞག་གིས་ཁྱིམ་ཞག་གི་དོད་ཐུབ་པ་ལ་བརྟེན་ནས། ལོ་གཉིས་དང་ཟླ་བ་ཕྱེད་པར་དགུ་ནས་འདོན་པའི་ལུགས་གཉིས་ཡོད་པའི་ཕྱིར། དང་པོ་གྲུབ་སྟེ། ལོ་རེ་ལ་ཚེས་ཞག་དྲུག་དྲུག་ལྷག་པ་གང་ཞིག །དེ་བསགས་པས་ལོ་ལྔ་ན་ཞག་སུམ་ཅུར་ལོངས་པའི་ཕྱིར། དང་པོ་གྲུབ་སྟེ། ཉིན་ཞག་གི་ཟླ་བ་གཉིས་དང་། ཚེས་ཞག་གི་ཟླ་བ་གཉིས་དོ་བསྡོས་པ་ན་ཚེས་ཟླས་ཉི་ཟླའི་དོད་མ་ཐུབ་པས་ཉིན་ཞག་གཅིག་ལྷག་པའི་དོད་མཉམ་ལ་ཚེས་ཞག་གཅིག་བསྣན་པས་རགས་རྩིས་ལ་ཡུན་མཉམ་ཡང་། ཞག་གྲངས་གཅིག་གིས་ཚེས་ཟླ་དེ་མང་བས་དེ་འདྲའི་ཞག་རེ་བསགས་པས་ལོ་གཅིག་ལ་ཞག་དྲུག་ལྷག་པའི་ཕྱིར། ཞག་མི་ཐུབ་ཅེས་པ་འདིའི་དོན་དུ་འཆད་དགོས་ལ། དེ་ལྟ་བུའི་གནད་མ་ཤེས་པར་རང་གཞན་གྱི་མཚན་ཉིད་པ་རྒན་པོ་རྣམས། ཞག་མི་ཐུབ་ཀྱི་བཤད་པ་སྣ་ཚོགས་བྱེད་པ་ནི་རྩིས་ཀྱི་གཙུག་ལག་ལ་བྱང་བ་ཞིག་གིས་བལྟས་ན་ཤིན་ཏུ་ནོངས་པའི་གནས་སོ། །དེ་ཡང་ལོ་ལྔ་ནས་ཟླ་ཤོལ་འབྱུང་སྟེ། གཞུང་དམ་པའི་གླེང་གཞིའི་སྐབས་ལས། སྟོན་པ་གཉན་ཡོད་ཀྱི་རྒྱལ་བྱེད་ཚལ་ན་བཞུགས་པའི་ཚེ་ན་དགེ་སློང་རྣམས་ལ་ལོ་ལྔ་ལྔ་ན་ཤོལ་དོར་ཅིག །ཅེས་གསུངས་ནས་ལོ་ལྔ་ལྔ་ན་ཤོལ་དོར་རོ། །ཞེས་གསུངས་པའི་ཕྱིར། གོང་གི་རྩ་རྟགས་གཉིས་པ་གྲུབ་སྟེ། ལོ་གཅིག་ལ་ཞག་བཅུ་གཅིག་འབྲང་བཅས་རེ་ལྷག་པ་གང་ཞིག །དེ་བསགས་པས་ལོ་གཉིས་དང་ཟླ་བ་ཕྱེད་དང་དགུན་ཟླ་གཅིག་ཏུ་ལོངས་པའི་ཕྱིར། དང་པོ་གྲུབ་སྟེ། ཁྱིམ་ཟླ་རེ་དང་ཚེས་ཟླ་རེ་དང་བསྡོས་པས་ཞག་རེ་བག་མེད་རེ་མ་ཐུབ་པས། དེ་གཉིས་དོད་མཉམ་པ་ལ་ཞག་རེ་བག་མེད་རེ་བསྣན་པས། དོན་ལ་ཡུན་མཉམ་ཡང་། བག་མེད་རེ་ལྷག་པ་དེ་བསགས་པས། ལོ་གཅིག་ལ་ཞག་བཅུ་གཅིག་འབྲང་བཅས་ལྷག་པའི་ཕྱིར། གཉིས་པ་གྲུབ་སྟེ། ལོ་གཉིས་ལ་ཞག་ཉི་ཤུ་རྩ་
གཉིས་ལྷག་པ་གང་ཞིག །དེའི་རིགས་པས་ཟླ་བ་ཕྱེད་དང་དགུ་ན་ཞག་བརྒྱད་ལྷག་པ་རྣམས་བསྡོམས་པས་ཟླ་བ་གཅིག་ཏུ་འགྱུར་བའི་ཕྱིར། ཉིན་མཚན་གྱི་ཁྱད་པར་གཞག་ཏུ་ཡོད་དེ། སྐྱ་རེངས་ཤར་ནས་འོད་དམར་གྱི་བར་ཉིན་མོ་དང་། དེ་ནས་མཚན་མོའི་མཐའི་སྐད་ཅིག་མའི་བར་མཚན་མོར་འཇོག་པའི་ཕྱིར། འདི་དག་ནི་འདུལ་མངོན་གྱི་ལུགས་གཙོ་བོར་བཀོད་པ་ཡིན་ལ། རྒྱ་གར་གྱི་མཁས་པས་གཞན་གྱི་བཞེད་པ་དང་། དུས་ཀྱི་འཁོར་ལོ། དབྱངས་འཆར། ནག་རྩིས་སོགས་སྒོ་བསྟུན་པའི་ལེགས་པའི་ཆ་ཕྱོགས་གཅིག་ཏུ་བསྡུས་ནས། ཕྱོགས་བྲལ་གྱི་གསུང་རབ་ལ་སྦྱངས་པའི་མཁས་པ་རྣམས་སྤྲོ་བ་སྐྱེད་པར་ནུས་མོད། གསུང་རབ་ཕྱོགས་རེ་ལ་ཞེན་པའི་དེང་སང་གི་རིགས་ལམ་པ་རྣམས་ལ་བྱིས་པ་ལ་ལྷ་ཁང་བསྟན་པ་ལྟར་དགོས་ནུས་མི་འབྱུང་བས་དེ་ཙམ་ལས་མ་སྤྲོས་སོ། །སྨྲས་པ། ལེགས་པར་བཤད་པའི་དབྱངས་ཀྱི་འགྱུར་ཁུགས་ཅན། ཁུངས་ལྡན་མཁས་པའི་གཏམ་གྱི་རྒྱུད་མང་དང་། །ལྷན་ཅིག་བརྡུངས་ཚེ་དྲི་ཟའི་པི་ཝང་མཁན། །སྐྱེངས་ཏེ་ལྷོ་ཕྱོགས་རྒྱ་མཚོའི་མཐའ་རུ་བྲོོས། །ཚུལ་འདིའི་ཕྲ་ཞིབ་དཀའ་བའི་གནད་རྣམས་ལ། །འགྲེལ་བཤད་བྱེད་པོ་ཕལ་ཆེར་མི་སྨྲ་བའི། །བརྟུལ་ཞུགས་འཛིན་ཞིང་འགའ་ཞིག་མུ་ཅོར་ཚིག །བོང་བུའི་སྐད་གསང་ལྟ་བུར་སྒྲོག་པ་མཐོང་། །དེ་འདྲའི་དགོངས་དོན་ལོག་པར་བཀྲལ་བ་དག །གཅིག་ཏུ་སངས་རྒྱས་བསྟན་ལ་རྨ་འབྱིན་མོད། །འོན་ཀྱང་འབྲི་སྟག་ཕྱག་རྒྱའི་ཁྱུ་མཐོང་ཚེ། །མང་དུ་ཐོས་པས་ཅུང་ཟད་རྗེས་ཡི་རང་། ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་མཐའ་དཔྱད་པ་ལ། ཆོས་རྗེ་བསོད་ནམས་གྲགས་པ་རྗེས་འབྲང་དང་བཅས་པ་རྣམས་ན་རེ། དུས་བཞི་ཅིག་ཅར་བ་ཡིན་ཏེ། འཛམ་བུ་གླིང་དུ་དགུན་ཡོད་པའི་དུས་སུ་གླིང་གཞན་གསུམ་དུའང་དགུན་གྲུབ་པའི་
ཕྱིར། ཟེར་ན། འཛམ་བུ་གླིང་དུ་དགུན་གྲུབ་པའི་དུས་ཡིན་ན། སྒྲ་མི་སྙན་དུ་དགུན་གྲུབ་པའི་དུས་ཡིན་དགོས་པར་ཐལ། འདོད་པའི་ཕྱིར། འདོད་ན། འཛམ་བུ་གླིང་དུ་དགུན་གྲུབ་པའི་དུས་མེད་པར་ཐལ། དེར་དེ་གྲུབ་མ་ཐག་པའི་དུས་མེད་པའི་ཕྱིར། དེར་ཐལ། དེར་ཧོར་ཟླ་བཅུ་པའི་ཚེས་བཅུ་དྲུག་གི་སྐྱ་རེངས་དང་པོ་ཤར་མ་ཐག་པའི་དུས་དེ་འཛམ་བུ་གླིང་དུ་དགུན་གྲུབ་མ་ཐག་པའི་དུས་མ་ཡིན་པ་གང་ཞིག །འཛམ་བུ་གླིང་དུ་ཧོར་ཟླ་བཅུ་པའི་ཚེས་བཅུ་དྲུག་གི་སྐྱ་རེངས་དང་པོ་ཤར་བ་དང་། འཛམ་བུ་གླིང་དུ་དགུན་གྲུབ་པ་དུས་མཉམ་པའི་ཕྱིར། དང་པོ་མ་གྲུབ་ན། སྒྲ་མི་སྙན་དུ་ཧོར་ཟླ་བཅུ་པའི་ཚེས་བཅུ་དྲུག་གི་སྐྱ་རེངས་དང་པོ་ཤར་མ་ཐག་པའི་དུས་དེ། སྒྲ་མི་སྙན་དུ་དགུན་གྲུབ་མ་ཐག་པའི་དུས་ཡིན་པར་ཐལ། སྒྲ་མི་སྙན་དུ་ཧོར་ཟླ་བཅུ་པའི་ཚེས་བཅུ་དྲུག་ནས་ཧོར་ཟླ་བཅུ་གཅིག་པའི་ཚེས་བཅོ་ལྔའི་བར་དེ་དགུན་ཟླ་དང་པོར་འཇོག་པའི་ཕྱིར། འདོད་ན། གླིང་བཞིར་ཉི་མ་ཅིག་ཅར་དུ་འཆར་བར་ཐལ། འཛམ་བུ་གླིང་དུ་ཉི་མ་ཤར་བའི་ཚེ་སྒྲ་མི་སྙན་དུ་ཉི་མ་འཆར་བའི་ཕྱིར། དེར་ཐལ། འཛམ་བུ་གླིང་དུ་ཧོར་ཟླ་བཅུ་པའི་ཚེས་བཅུ་དྲུག་གི་ཉི་མ་ཤར་མ་ཐག་པའི་དུས་སུ། སྒྲ་མི་སྙན་དུ་ཧོར་ཟླ་བཅུ་པའི་ཚེས་བཅུ་དྲུག་གི་ཉི་མ་ཤར་མ་ཐག་པ་ཡིན་པའི་ཕྱིར། མ་གྲུབ་ན། དེར་ཐལ། འཛམ་བུ་གླིང་དུ་ཧོར་ཟླ་བཅུ་པའི་ཚེས་བཅུ་དྲུག་གི་སྐྱ་རེངས་དང་པོ་ཤར་མ་ཐག་པའི་དུས་དེ། སྒྲ་མི་སྙན་དུ་ཧོར་ཟླ་བཅུ་པའི་ཚེས་བཅུ་དྲུག་གི་སྐྱ་རེངས་དང་པོ་ཤར་མ་ཐག་པ་ཡིན་པའི་ཕྱིར། དེར་ཐལ། དེ་དེར་དགུན་གྲུབ་མ་ཐག་པའི་དུས་ཡིན་པའི་ཕྱིར། མ་གྲུབ་ན། འཛམ་བུ་གླིང་དུ་ཧོར་ཟླ་བཅུ་པའི་ཚེས་བཅུ་དྲུག་གི་སྐྱ་རེངས་དང་པོ་ཤར་མ་ཐག་པའི་དུས་ཆོས་ཅན། སྒྲ་མི་སྙན་དུ་དགུན་གྲུབ་པའི་དུས་ཡིན་པར་ཐལ། འཛམ་བུ་གླིང་དུ་དགུན་གྲུབ་མ་ཐག་པའི་དུས་ཡིན་པའི་ཕྱིར། འཁོར་གསུམ། གཞན་ཡང་། འཛམ་བུ་གླིང་དུ་དབྱར་ཉི་རིང་བ་མཐར་ཐུག་
པའི་དུས་སུ་སྒྲ་མི་སྙན་དུ་དབྱར་ཉི་རིང་བ་མཐར་ཐུག་པའི་དུས་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། འཛམ་བུ་གླིང་དུ་ཉིན་མོ་རིང་བ་མཐར་ཐུག་པའི་དུས་སུ་འཛམ་བུ་གླིང་དུ་མཚན་མོའང་རིང་བ་མཐར་ཐུག་པའི་དུས་ཡིན་པར་ཐལ། འདོད་པའི་ཕྱིར། འདོད་ན། དགུན་ཟླ་ཐ་ཆུང་གི་ཡར་ངོའི་ཚེས་བརྒྱད་ལ་འཛམ་བུ་གླིང་དུ་མཚན་མོ་ཡུད་ཙམ་བཅོ་བརྒྱད་ཡོད་པ་ལྟར། ཉིན་མོའང་ཡུད་ཙམ་བཅོ་བརྒྱད་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། གདགས་པ་ལས། དགུན་ཟླ་ཐ་ཆུང་ཡར་གྱི་ངོའི་ཚེས་བརྒྱད་ལ་མཚན་མོ་ཡུད་ཙམ་བཅོ་བརྒྱད། ཉིན་མོ་ཡུད་ཙམ་བཅུ་གཉིས་ཡོད། ཚེས་དགུ་ཕན་ཆད་ནས་མཚན་མོ་ནི་བྲི། ཉིན་མོ་ནི་བསྐྱེད་དེ། ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ནམ་ཕྱེད་ཉི་མ་ནུབ་པ་དང་། ཞེས་སོགས་ཀྱི་དོན། སྟོན་དཔྱིད་ཉིན་མཚན་མཉམ་པ་ཞག་གཅིག་ཁོ་ན་ལ་འབྱུང་བའི་དོན་ཡིན་པས་སྐྱོན་མེད་དོ། །ཟེར་ན། འོ་ན། སྟོན་ཉིན་མཚན་མཉམ་ནས་ཞག་གཉིས་སོང་བའི་སྐབས་སུ། ཉིན་མཚན་རིང་ཐུང་དོད་མི་མཉམ་པ་སྐྱེས་བུ་མཐའ་དག་གིས་མངོན་སུམ་དུ་ཤེས་པ་ཞིག་འབྱུང་བར་ཐལ། འདོད་པའི་ཕྱིར། འདོད་མི་ནུས་ཏེ། ཡུད་ཙམ་གྱི་འཕེལ་འགྲིབ་རིམ་གྱིས་བྱེད་དགོས་པའི་ཕྱིར་དང་། ཞག་གཅིག་གཉིས་ཀྱི་བར་ལ་ཉིན་མཚན་གྱི་རིང་ཐུང་མངོན་པ་མངོན་སུམ་དུ་མི་འབྱུང་བ་དིང་སང་གི་བཙུན་ཆུང་བསྡུས་གྲྭ་པ་ཡན་ཆད་ཀྱིས་ཀྱང་ཤེས་པའི་ཕྱིར། དུས་བཞི་ཅིག་ཅར་བ་ལ་ཞེན་པ་ཁ་ཅིག་ན་རེ། འཛམ་བུ་གླིང་དུ་ཉི་མ་བྱང་བགྲོད་མཐར་ཐུག་པའི་ཚེ་སྒྲ་མི་སྙན་དུ་ལྷོ་བགྲོད་མཐར་ཐུག་པ་འབྱུང་བར་ཐལ། དམ་བཅའ་འཐད་པའི་ཕྱིར། འདོད་ན། ཉི་མས་ཉིན་ཞག་ཕྲུགས་གཅིག་ལ་རི་རབ་ལ་བསྐོར་བའི་ཚེ་འཁྱོག་པོར་བསྐོར་བར་ཐལ། འདོད་པའི་ཕྱིར་ཟེར་ན། རང་ལུགས་ལ་འདོད་ལན་འདེབས་ལ། ཁོས། དེ་མི་འཐད་དེ།
དུས་འཁོར་བ་ལྟར་མཐོ་དམན་དང་། སྒང་གཤོངས་སོགས་མི་བྱེད་པར་ཐད་ཀར་རྒྱུས་ཆོག་པའི་ཕྱིར། ཟེར་བ་ནི། དུས་འཁོར་དང་། གོ་ལའི་རྣམ་གཞག་མ་ཐོས་པའི་གཏམ་ཡིན་ཞིང་། ཆོས་མངོན་པ་འཆད་པའི་སྐབས་སུ་དུས་འཁོར་སོགས་ལུགས་མི་གཅིག་པའི་ཁུངས་འདྲེན་པ་ནི། མུ་ཏོ་བའི་ཕྱེ་དང་འདྲ་བས་ཁོ་བོ་ནི་མི་སྨྲའོ། །བསྡུས་གྲྭ་མ་ཆགས་པ་ཁ་ཅིག་ན་རེ། གླིང་བཞིར་དུས་བཞི་ཅིག་ཅར་དུ་འབྱུང་ཟེར་ན། འཛམ་བུ་གླིང་དུ་དུས་བཞི་ཅིག་ཅར་དུ་འབྱུང་བར་ཐལ། གླིང་བཞིར་དུས་བཞི་ཅིག་ཅར་དུ་འབྱུང་བའི་ཕྱིར། འདོད་ན། འཛམ་བུ་གླིང་དུ་དབྱར་དགུན་ཅིག་ཅར་དུ་འབྱུང་བར་ཐལ། འདོད་པའི་ཕྱིར། འདོད་ན། འཛམ་བུ་གླིང་པའི་མིས་ཚ་གྲང་གི་རེག་བྱ་ཅིག་ཅར་དུ་མྱོང་པར་ཐལ་ལོ། །འདོད་ན། ཚ་གྲང་གཉིས་པོ་གཅིག་གིས་གཅིག་གི་གོ་ས་འགོག་ནུས་པ་མ་ཡིན་པར་ཐལ། འདོད་པའི་ཕྱིར། འདོད་མི་ནུས་སོ། །