ཟེ་ཆེན་མ་ཧཱ་པཎྜི་ཏ་ལ་བསྔགས་པ།

༄༅། །ཟེ་ཆེན་མ་ཧཱ་པཎྜི་ཏ་ལ་བསྔགས་པ། བླ་མ་འཇམ་པའི་དབྱངས་ལ་ཕྱག་འཚལ་ལོ། །ཀུན་ཕན་ཟླ་བ་བདུད་རྩིའི་ལང་ཚོ་ཡིས། །ཀུན་མཁྱེན་བསྟན་པའི་ཀུ་མུཏ་བཞད་མཛད་ཅིང་། །ཀུན་ཏུ་བཟང་པོའི་རྣམ་ཐར་རྗེས་སྒྲུབ་པའི། །ཀུན་གཟིགས་མཐུ་སྟོབས་རྣམ་པར་རྒྱལ་བས་སྐྱོངས། །ཁྱད་པར་སྙིགས་ལྔའི་འགྲོ་ལ་རྗེས་བརྩེའི་གར། །ཁྱབ་བདག་པདྨ་ཀ་རའི་གདུང་འཚོབ་ཕུལ། །ཁྱུ་མཆོག་སེང་གེའི་འགྲོས་ལྡན་མཚུངས་ཟླས་དབེན། །ཁྱོད་ནི་སྙིགས་དུས་རྒྱལ་བ་གཉིས་པར་གྲུབ། །གངས་ཅན་མཁས་གྲུབ་ཡོངས་ཀྱི་གཙུག་ནོར་གྱིས། །གང་ཞབས་ཏོག་གི་བློ་གྲོས་བསྙེན་བྱས་རྒྱུའི། །གངྒཱའི་རྒྱུན་ལྟར་ཕྲིན་ལས་ཟབ་མོའི་ཚུལ། །གང་དག་གཟུར་གནས་མཆིས་ན་མི་བསྔགས་སུ། །ངེས་དོན་མཐར་ཐུག་འཁོར་ལོ་བར་ཐ་དང་། །ངེས་གསང་སྙིང་པོ་ནང་རྒྱུད་སྡེ་གསུམ་དོན། །ངེས་པར་སེང་གེའི་སྒྲ་བསྒྲགས་ཀླུ་སྒྲུབ་དངོས། །ངེས་ལེགས་ཐར་པ་བགྲོད་པའི་ལམ་སྟོན་རྨད། །གཅིག་པུ་ཙམ་མིན་ཕྱོགས་གྲངས་ཤེས་བྱའི་ཆབ། །གཅིག་ཏུ་བརྩོན་པའི་ཧུབ་ཀྱིས་དྲངས་པའི་བཅུད། །གཅིག་བསྡུས་ལེགས་བཤད་མི་ཟད་སྐྱུག་མཁས་པ། །གཅིག་ཆོག་ཨཱཪྱ་དཱེ་ཝའི་མཆེད་ཟླ་ཉིད། །ཆོས་ཀུན་དྲང་ངེས་རྣམ་འབྱེད་ལ་མཁས་པས། །ཆོས་ཉིད་ཟབ་མོའི་མཐར་ཐུག་འགྲོ་ལ་སྟོན། །ཆོས་ཀྱི་རྒྱལ་པོ་འཕགས་པ་ཐོགས་མེད་དངོས། །ཆོས་སྤྱན་ལྡན་པ་ཡོངས་ཀྱིས་མགྲིན་གཅིག་བསྔགས། །འཇིག་ལྟའི་བྲག་རི་རྨང་ནས་འགྱེལ་བྱེད་ཅིང་། །འཇིག་ཚོགས་སྨྲ་བའི་དམ་བཅའ་རྡུལ་ཕྲན་དུ། །འཇིག་ནུས་རིགས་པའི་རྩེ་བརྒྱ་གདེངས་མཛད་པའི། །འཇིགས་བྲལ་ལྷ་དབང་ཆོས་ཀྱི་གྲགས་པར་ངེས། །ཉེས་པའི་དྲི་བྲལ་མཁྱེན་པའི་དཀྱིལ་འཁོར་རྫོགས། །ཉམ་ཐག་འགྲོ་ལ་ལྷག་པར་བརྩེ་བས་དགོངས། །སྙིང་པོའི་བསྟན་པའི་པད་ཚལ་བཞད་ནུས་པའི། །ཉིན་མོར་བྱེད་པ་ཤཱནྟ་དེ་ཝར་གྲུབ། །བརྟན་མཁས་ཡོན་ཏན་བྱེད་པའི་དཔལ་གྱིས་མཐོ། །སྟོན་པས་ལེགས་གསུང་ཆོས་ཀུན་ཐུགས་སུ་ཆུབ། །བསྟན་པ་རིན་ཆེན་ཁོང་པའི་སྙིང་ལྟར་བཅང་། །བསྟན་འགྲོའི་དཔལ་མགོན་དབྱིག་གཉེན་རྣམ་ཐར་འཛིན། །ཐེག་དམན་ལམ་དུ་དུས་རིང་དུབ་བའི་འགྲོ། །ཐེག་མཆོག་ངལ་སོའི་སྟེགས་ལ་འགོད་མཛད་པའི། །ཐེག་ཆེན་རྣལ་འབྱོར་རྨད་བྱུང་ཟླ་བའི་ཞབས། །ཐེག་སྒོ་དབྱེ་སླད་སླར་ཡང་བྱོན་པར་ངེས། །དོན་མེད་ཆོས་བརྒྱད་འཆིང་བས་བཅིངས་མིན་པར། །དོན་ལྡན་ལྷག་པའི་ལྷ་ཡིས་རྗེས་བསྐུལ་ཚེ། །དོན་ཆེན་བསྟན་པའི་བྱ་བར་ཆེས་བརྩོན་པའི། །དོན་དམ་གཟིགས་པ་ཕྱོགས་ཀྱི་གླང་པོར་མཐུན། །ནོར་མཆོག་འཕགས་པའི་ཡོན་གྱིས་ཆེས་འབྱོར་པས། །ན་གཞོན་བྱིས་པའི་དུས་ན་རྒན་པོའི་བློ། །རྣམ་དག་འཁོར་ལོ་གསུམ་གྱི་ཕྲིན་ལས་རྒྱུན། །ནམ་མཁའ་མཛོད་ཀྱི་སྒོ་འཕར་འབྱེད་དེ་མཚར། །དཔག་མེད་ཏིང་འཛིན་གཟུངས་སྤྲིན་མངོན་ཤེས་མངའ། །སྤ་ལོ་ཚུལ་འཆོས་སྒྱུ་སོགས་དྲི་ཡིས་དབེན། །དཔེ་བྲལ་ཤཱཀྱའི་སྲས་ཀྱི་གདུང་འཚོ བ་ཕུལ། །དཔལ་ལྡན་ཞི་འཚོའི་རྣམ་ཐར་རྗེས་སུ་སྙེགས། །འཕགས་བོད་མཁས་གྲུབ་བྱེ་བའི་ཐུགས་ཀྱི་བཅུད། །འཕགས་བཞི་བསྐྱེད་པའི་ཡུམ་གྱུར་ཤེར་ཕྱིན་ལས། །འཕགས་ཆོས་སྣང་བཞིིའི་ཡེ་ཤེས་ཚད་ཕེབས་པའི། །འཕགས་པའི་ལམ་སྟོན་ཟླ་བྲལ་པད་འབྱུང་དངོས། །བྱང་ཆུབ་སེམས་ཀྱིས་ཐུགས་རྒྱུད་ཡོངས་སུ་གྲོལ། །འབད་རྩོལ་མཐའ་དག་བསྟན་འགྲོར་སྨན་པའི་ཐབས། །འབྲེལ་བ་ཐོབ་ཚད་ངན་སོང་སྐྱེ་སྒོ་གཅོད། །བོད་ཆེན་འདྲེན་པ་འཁྲི་སྡེའི་གཟུགས་ཟླར་འོས། །མེ་ལོང་ངོགས་སུ་སྣང་བའི་གཟུགས་བརྙན་བཞིན། །མ་འགགས་གང་འདུལ་སྒྱུ་མའི་རོལ་རྩེ་དགྱེས། །མུ་མཐའ་བྲལ་བའི་འགྲོ་ཀུན་འདྲེན་མཛད་པས། །མི་ཤིགས་གསང་གསུམ་རྡོ་རྗེའི་ངོ་མཚར་རྨད། །བརྩེ་ཆེན་ཐུགས་རྗེའི་གཏེར་གྱི་རིག་སྔགས་གྲུབ། །རྩོལ་མེད་ཕྲིན་ལས་འཇུག་པ་མཁའ་དང་མཉམ། །བརྩེ་བའི་ཡུལ་གྱུར་སྲིད་མཚོ་དོང་སྤྲུགས་ཕུལ། །བརྩོན་པའི་གོ་ཆ་སྲས་བཅས་རྒྱལ་རྣམས་བཞིན། །ཚེ་རབས་ཀུན་ཏུ་རྒྱལ་བའི་ཆོས་མཛོད་འཛིན། །ཚུལ་ཁྲིམས་དག་པས་ལྷར་བཅས་སྐྱེ་དགུས་བཏུད། །མཚུངས་ཟླ་བྲལ་བའི་ཡོན་ཏན་འབྱོར་པའི་གཏེར། །ཚུར་མཐོང་བྱིས་པའི་བློ་ཡིས་གཞལ་བྱ་ཅི། །མཛད་སྤྱོད་ཀུན་ལ་འཁྲུལ་པའི་དྲི་མ་བྲལ། །འཛད་མེད་བློ་དང་སྤོབས་པས་གདུལ་འགྲོ་སྐྱོངས། །མཛེས་པའི་སྐུ་མཐོང་ཙམ་གྱིས་སྲིད་ལམ་དགག །ཛེ་ཏའི་ཚལ་བཞུགས་རྒྱལ་བའི་མཆེད་ཟླར་གྱུར། །ཝ་ལེར་དད་པའི་ཡིད་མཁར་འགོག་མེད་དུ། །ཝལ་ཝལ་གསང་གསུམ་ཡོན་ཏན་ཉེར་བཀོད་ནས། །ཝ་ཆུའི་རྒྱུན་བཞིན་གསོལ་འདེབས་སྐལ་བཟང་ལ། །ཝ་གི་ཤྭ་རི་གྲུབ་པའི་དགེ་མཚན་བྱིན། །ཞི་དང་ཁྲོ་སོགས་རབ་འབྱམས་དཀྱིལ་འཁོར་ལྷ། །ཞིང་ཁམས་རྒྱ་མཚོར་སྤྲོ་བསྡུའི་བྱེད་པོ་མཆོག །ཞུ་མཆེད་བསྟོད་དབྱངས་རྒྱ་མཚོས་རྗེས་བསྐུལ་ན། །གཞུ་ལྟར་འཁྱོགས་པའི་དམན་པ་བདག་ལ་དགོངས། །གཟུང་འཛིན་འཆིང་བ་ཀུན་ལས་རྣམ་གྲོལ་བའི། །གཟོད་ནས་ཞི་བ་གཉུག་མའི་རྒྱལ་ཁམས་ཆེ། །ཟབ་གསལ་གཉིས་མེད་རྟོགས་པའི་ཡེ་ཤེས་ཀྱིས། །གཟུངས་སྤོབས་བློ་གྲོས་སྒོར་བརྒྱ་འབྱེད་བྱིན་རློབས། །འལ་འོལ་བྱིས་པའི་འབྲིད་མཁས་སྨྲིག་རྒྱུ་ལྟའི། །འོལ་སྣང་ཚེ་འདིར་ཞེན་པའི་གདོས་ཐག་ཀུན། །འ་འུར་ངེས་འབྱུང་མཚོན་ཆས་མྱུར་བཅད་ནས། །འོད་གསལ་སྒོམས་ལ་མི་ཚེ་འཁྱོལ་བྱིན་རློབས། །ཡེ་ཤེས་མངོན་སུམ་སྟོན་པའི་མན་ངག་བཅུད། །ཡེ་བབ་སོར་བཞག་ཀློང་ཆེན་དགོངས་པའི་གནད། ཡིན་ལུགས་ཅོག་བཞག་བཞི་ཡི་གསེང་ལམ་ནས། །ཡིད་དཔྱོད་གྲུབ་མཐའ་ཞིག་པར་བྱིན་གྱིས་རློབས། །རང་རིག་སྐུ་གསུམ་དགོངས་ཀློང་མངོན་གྱུར་ནས། །རང་སྣང་རིས་མེད་མཉམ་པ་ཆེན་པོའི་ངང་། །རང་གཞན་དོན་གཉིས་འབད་མེད་ལྷུན་གྲུབ་ཏེ། །རང་བྱུང་པདྨ་རྒྱལ་པོའི་སྐུ་འགྲུབ་ཤོག །ལེགས་ལྡན་འགྲོ་ལ་བླང་དོར་སྟོན་པའི་མིག །ལམ་མཆོག་མཐར་ཐུག་རྒྱལ་བསྟན་རིན་པོ་ཆེ། །ལོག་རྟོག་དབང་གིས་ནམ་ཡང་མི་བ སྒྲིབ་པར། །ལུང་རིགས་མཐུ་ཡིས་སྲིད་མཐར་གསལ་གྱུར་ཅིག །ཤེས་རབ་ཟབ་མོས་བླང་དོར་གནས་འབྱེད་ཅིང་། །ཤེས་བཞིན་བྱ་རས་རང་རྒྱུད་ལེགས་བརྟགས་པའི། །ཤེས་ལྡན་སྐྱེ་བོའི་ཚོགས་ཀྱིས་ཕྱོགས་ཀུན་ཁྱབ། །ཤེས་དོན་སྒྲུབ་པས་མཐོ་རིས་མཛེས་བྱེད་ཤོག །སངས་རྒྱས་བྱིན་རླབས་གདུལ་བྱའི་རྒྱུད་ལ་ཞུགས། །སེམས་ཅན་དཀར་པོའི་བག་ཆགས་རྣམ་པར་འཕེལ། །སུ་ཡང་མི་ཤིས་རྒུད་པའི་མིང་མི་གྲགས། །ས་གསུམ་འཇིག་རྟེན་དགའ་བའི་བཀྲ་ཤིས་ཤོག །ཧ་པོ་གང་ལས་དཀར་བའི་ལེགས་བྱས་མཐུ། །ཧ་རིའི་ལྗོན་པའི་བསུང་བཞིན་འགྲོ་ཚོགས་ལ། །ཧ་ཧ་སིམ་པ་སྟེར་བའི་དགེ་མཚན་གྱིས། །ཧེ་རུ་ཀཿདཔལ་བླ་མ་མཉེས་གྱུར་ཅིག །ཨེ་མ་ངོ་མཚར་ཡི་གེའི་ཕྱི་མོ་ཡིས། །ཨ་ཏིའི་བསྟན་བདག་ཟེ་ཆེན་པཎྜི་ཏ། །ཨ་ལ་ལ་ཞེས་མཆོག་ཏུ་གུས་པའི་བློས། །ཨ་ཧོ་བསྔགས་པའི་ཕྲེང་བ་བསྟར་བ་པོ། །ཨ་གྲོ་བན་ཆུང་པདྨ་རྣམ་རྒྱལ་ཏེ། །ཨ་དོན་སྐྱེ་མེད་སྒོམ་པའི་རྗེས་ཐོབ་ཏུ། །ཨ་མཚར་བློ་གསལ་ཚོགས་རྣམས་དགའ་སྐྱེད་སླད། །ཨ་ཏིའི་སྒོམ་གྲྭ་པདྨ་འོད་ནས་སོ།། །།