རྫོགས་ལྡན་གྱི་ཆོས་སྐྱོན་མེད་རྣམ་དག་ཏུ་བསྟན་པ།

ལྔ་བ་རྫོགས་ལྡན་གྱི་ཆོས་སྐྱོན་མེད་རྣམ་དག་ཏུ་བསྟན་པ་ནི། རྫོགས་ལྡན་ཆོས་ནི་དྲི་མེད་རྒྱལ་བའི་བཀའ། །ས་བཅུའི་དབང་ཕྱུག་རྣམས་དང་ཤིང་རྟ་ཡི། །སྲོལ་འབྱེད་ཆེན་པོ་རྣམས་ཀྱི་ལེགས་གསུངས་པ། །སྐྱོན་མེད་ཡོན་ཏན་མཆོག་མངའ་རྣམས་ཡིནན། །དེ་ཡི་ལུགས་ལ་ཐམས་ཅད་རང་སྟོང་མིན། །རང་སྟོང་གཞན་སྟོང་ལེགས་པར་རྣམ་ཕྱེ་ནས། །ཀུན་རྫོབ་གང་ཡིན་ཐམས་ཅད་རང་སྟོང་དང༌། །དོན་དམ་གང་ཡིན་གཞན་སྟོང་ཉིད་དུ་གསུངས། །རྩ་བར། རྫོགས་ལྡན་ཆོས་ནི་དྲི་མེད་རྒྱལ་བའི་བཀའ། ཞེས་པ་ནས་དོན་དམ་གང་ཡིན་གཞན་སྟོང་ཉིད་དུ་གསུངས། ཞེས་པའི་བར་ཤོ་ལོ་ཀ་གཉིས་བྱུང༌། དེའི་དོན་ནི། རྫོ༵གས་ལྡ༵ན་གྱི་ཆོ༵ས་ནི༵་དྲི༵་མ་མེད༵་པའི་རྒྱལ༵་བའི༵་ལེགས་པར་གསུང་བའི་བཀ༵འ་དང༌། རྗེ་བཙུན་བྱམས་མགོན་སོགས་ས༵་བཅུ༵འི་དབང༵་ཕྱུག༵་རྣམས༵་ད༵ང༌། དབུ་མ་པ་ཆེན་པོ་ཐོགས་མེད་སོགས་ངེས་དོན་དབུ་མ་ཆེན་པོའི་ཤིང༵་རྟ༵འི༵་སྲོ༵ལ་འབྱེད༵་ཆེན༵་པོ༵་རྣམས༵་ཀྱིས༵་ལེགས༵་པར་གསུ༵ངས་པ༵་ཡིན་པ་དང་ཉེས་སྐྱོན༵་མེད༵་ཅིང་ཡོན༵་ཏན༵་མཆོག༵་ཏུ་མངའ༵་བ་རྣམ༷ས་དེ་ཡིན༵་ནོ༵། །དེ་ཡང་འཇམ་དཔལ་གྱི་རང་གི་ལྟ་བ་མདོར་བསྟན་སོགས་དང༌། ཀླུ་སྒྲུབ་ཀྱི་བསྟོད་ཚོགས་དྲུག་སོགས་དང༌། རིགས་ལྡན་པད་དཀར་གྱི་རྒྱས་འགྲེལ་དྲི་མེད་འོད་དང༌། བྱམས་མགོན་གྱི་བྱམས་ཆོས་སྡེ་ལྔ་དང༌། ཐོགས་མེད་ཀྱི་རྒྱུད་བླ་ཐོགས་འགྲེལ་སོགས་ནས་ངེས་གསང་དབུ་མ་ཆེན་པོ་རྫོགས་ལྡན་གྱི་ཆོས་འདི་རྒྱ་ཆེར་བསྟན་པ་ཡིན་ནོ། །རྫོགས་ལྡན་ཆོས་མཆོག་དེ༵་ཡི༵་ལུགས༵་ལ༵་ཆོས་དང་ཆོས་ཉིད་ཐམས༵་ཅད༵་རང༵་སྟོང༵་མིན༵་པས་ན་རང༵་སྟོང༵་དང་གཞན་༵སྟོང༵་ལེགས༵་པར༵་རྣམ༵་པར་ཕྱེ༵་ནས༵་ཀུན༵་རྫོབ༵་གང༵་ཡིན༵་པ་ཐམས་༵་ཅད༵་ར༷ང་སྟོང༵་ཡིན་པ་དང༵༌། དོན༵་དམ༵་བདེན་པ་གང༵་ཡིན༵་པ་དེ་ནི་རང་སྟོང་མ་ཡིན་པར་གཞན༵་སྟོང༵་ཉིད༵་དུ༵་རྫོགས་ལྡན་ཆོས་ལས་གསུ༵ངས་ཏེ། རྗེ་བཙུན་བྱམས་པས་ངོ་བོ་ཉིད་དང་བོ་གཉིས་ཀུན་རྫོབ་རང་སྟོང་དང་ཕྱི་མ་དོན་དམ་གཞན་སྟོང་ཡིན་པ་ལ་དགོངས་ནས་དབུས་མཐར། གང་ཟག་དང་ནི་ཆོས་རྣམས་ཀྱི། །དངོས་པོ་མེད་འདིར་སྟོང་བ་ཉིད། །དངོས་མེད་པ་ཡི་དངོས་ཡོད་པ། །དེ་ནི་དེ་ལས་སྟོང་ཉིད་གཞན། །ཞེས་དང༌། རྒྱུད་བླ་མ་ལས། རྣམ་དབྱེ་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེ་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་གསུངས་པ་དང༌། རྒྱུད་བླ་ཐོགས་འགྲེལ་དུ་མདོ་དྲངས་པ་ལས། གང་ཞིག་གང་ན་མེད་པ་དེ་ནི་དེས་སྟོང་ངོ༌། །གང་ཞིག་ལྷག་མར་གྱུར་པ་དེ་ནི་དེ་ལ་རྟག་པར་ཡོད་དོ། །ཞེས་གསུངས་པ་དང༌། སྟོང་པ་ཉིད་ཆེན་པོའི་མདོ་ལས། གང་ན་གང་མེད་པ་དེ་ནི་དེས་སྟོང་ངོ༌། །ཞེས་ཡང་དག་པ་ཇི་ལྟ་བ་དེ་བཞིན་དུ་རབ་ཏུ་ཤེས་ལ་དེ་ལ་ལྷག་མར་གྱུར་པ་གང་ཡིན་པ་དེ་ནི་འདི་ན་ཡོད་དོ། །ཞེས་ཡང་དག་པར་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེས་དང༌། མྱང་འདས་ཆེན་པོའི་མདོ་ལས། མྱ་ངན་ལས་འདས་པ་ནི་མི་སྟོང་བ་ཉིད་དོ། །དེ་ལས་གཞན་ནི་སྟོང་བའི་སྟོང་བ་ཉིད་དོ། །ཞེས་དང༌། དཀོན་མཆོག་སྤྲིན་མདོ་ལས། རིགས་ཀྱི་བུ་གལ་ཏེ་དོན་དམ་པ་མེད་ཟིན་ན་ཚངས་པར་སྤྱོད་པ་དོན་མེད་པར་འགྱུར་རོ། །དེ་བཞིན་གཤེགས་པ་རྣམས་འབྱུང་བ་ཡང་དོན་མེད་པར་འགྱུར་རོ། །གང་གི་ཕྱིར་དོན་དམ་པ་ཡོད་པས་ན།

བྱང་ཆུབ་སེམས་དཔའ་རྣམས་དོན་དམ་པ་ལ་མཁས་པ་ཞེས་བྱའོ། །ཞེས་ཀུན་རྫོབ་རང་སྟོང་དང༌། དོན་དམ་གཞན་སྟོང་དུ་གསུངས་པ་དང༌། འཕགས་པ་ཀླུ་སྒྲུབ་ཀྱི་ཆོས་དབྱིངས་བསྟོད་པ་ལས། སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་གང༌། །དེ་དག་ཀུན་གྱིས་ཉོན་མོངས་ལྡོག །ཁམས་ཏེ་ཉམས་པར་བྱེད་མ་ཡིན། །ཞེས་ཉོན་མོངས་ཀུན་རྫོབ་རང་སྟོང་དང༌། ཁམས་དོན་དམ་གཞན་སྟོང་ལ་དགོངས་ཏེ་གསུངས་པ་དང༌། སྒོམ་རིམ་ལས། མ་སྐྱེས་པ་ཡི་སྟོང་ཉིད་གཅིག །གཅིག་ནི་སྐྱེས་པའི་སྟོང་པ་སྟེ། །མ་སྐྱེས་པ་ཡི་སྟོང་ཉིད་མཆོག །སྐྱེས་པའི་སྟོང་བ་འཇིག་པ་ཡིན། །ཞེས་དང༌། ཀླུ་སྒྲུབ་ཀྱི་བྱང་ཆུབ་སེམས་འགྲེལ་ལས། །དགེ་དང་མི་དགེ་རྣམ་རྟོག་ནི། །རྒྱུན་ཆད་པ་ཡི་མཚན་ཉིད་ཅན། །སངས་རྒྱས་རྣམས་ཀྱིས་སྟོང་ཉིད་གསུངས། །གཞན་ནི་སྟོང་བར་མི་བཞེད་དོ། །ཞེས་དོན་དམ་མ་སྐྱེས་པའི་སྟོང་ཉིད་གཞན་སྟོང༌། ཀུན་རྫོབ་སྐྱེས་པའི་སྟོང་ཉིད་རང་སྟོང་ཉིད་ཀྱི་དབྱེ་བ་གསུངས་པ་དང༌། མགོན་པོ་བྱམས་པས་ངོ་བོ་ཉིད་གསུམ་ལ་རིམ་པར་དགོངས་ཏེ། དབུས་མཐར། དངོས་མེད་དེ་ཡི་དངོས་མ་ཡིན། །རང་བཞིན་གྱིས་ནི་སྟོང་བར་འདོད། །ཅེས་དང༌། མདོ་སྡེ་རྒྱན་དུ། མེད་པའི་སྟོང་བ་ཉིད་ཤེས་ཤིང༌། །དེ་བཞིན་ཡོད་པའི་སྟོང་ཉིད་དང༌། །རང་བཞིན་སྟོང་བ་ཉིད་ཤེས་ན། །སྟོང་ཉིད་ཤེས་པ་ཞེས་བརྗོད་དོ། །ཞེས་སོགས་རྒྱ་ཆེར་གསུངས་པའི་ཕྱིར་རོ། །