སྨོན་སེམས་ཀྱི་བསླབ་བྱ་བརྒྱད།

སྨོན་སེམས་ཀྱི་བསླབ་བྱ་བརྒྱད་ལས།

ཚེ་འདིར་སེམས་བསྐྱེད་མི་ཉམས་ཤིང་འཕེལ་བའི་ཐབས་བཞི་ནི། སེམས་བསྐྱེད་ཀྱི་ཕན་ཡོན་དྲན་པ་དང༌། ཉིན་མཚན་ལན་དྲུག་ཏུ་སེམས་བསྐྱེད་པ་དང༌། སེམས་ཅན་བློས་མི་སྤོང་བ་དང༌། བསོད་ནམས་དང་ཡེ་ཤེས་ཀྱི་ཚོགས་བསགས་པ་དང་བཞིའོ། །སེམས་ཅན་བློས་མི་སྤོང་བ་ནི། ལམ་རིམ་བདུད་རྩིའི་ཉིང་ཁུ་ལས། སེམས་ཅན་བློས་མི་སྤོང་བ་ལ་གཉིས་ཡོད། ཁྱུ་རིལ་དུ་བློས་སྤོང་བ་དང༌། སྒོ་ཐད་དུ་བློས་སྤོང་བའོ། །དང་པོ་ནི་ཆོས་ལ་འཇུག་པའི་བློ་ལོག་པ་སྟེ་ངས་རང་དོན་གཞན་དོན་གང་ཡང་མི་ཡོང་འཇིག་རྟེན་ཕལ་བར་བྱ་སྙམ་པ་དང༌། ཐེག་ཆེན་ལ་བློ་ལོག་པ་སྟེ་སེམས་ཅན་གྱི་དོན་སྒྲུབ་མི་ནུས་པས་བདག་ཉན་རང་གི་ཐེག་པར་སེམས་བསྐྱེད་དགོས་སྙམ་པ་ལྟ་བུ་ཡིན། སྒོ་ཐད་དུ་བློས་སྤངས་པ་ནི། རང་དང་འགལ་བ་ཁ་ཅིག་ཁྱོད་ལ་ཕན་ཐོགས་པའི་དུས་བྱུང་ཀྱང་གནས་སྐབས་མཐར་ཐུག་གང་ལ་ལྟོས་ཀྱང་ཕན་མི་འདོགས་སྙམ་དུ་སྙིང་བརྩེ་ལྷན་གྱིས་བྲལ་བ་དེ་ཡིན། དེ་ལྟར་ཁྱུ་རིལ་གྱི་བློས་སྤངས་སམ་སྒོ་ཐད་ཀྱི་བློས་སྤངས་ཀྱང་རུང་སྟེ་གཉེན་པོས་མ་སླེབ་པར་ཐུན་ཚོད་གཅིག་འདས་ན་སེམས་བསྐྱེད་གཏོང་བ་ཡིན་པར་འདུག ཅེས་གསུངས་སོ། །སྐྱེ་བ་ཀུན་ཏུ་སེམས་བསྐྱེད་དང་མི་འབྲལ་བའི་རྒྱུ་བཞི་ནི། ལྷན་ཐབས་འོད་བརྒྱ་འབར་བ་ལས། གནས་སྐབས་སུ་སྐྱེ་བ་ཐམས་ཅད་དུ་བྱང་ཆུབ་ཀྱི་སེམས་མི་བརྗེད་པའི་རྒྱུ་ནི། དཀར་ཆོས་བཞི་ལ་བསླབ། བརྗེད་པའི་རྒྱུ་ནག་པོའི་ཆོས་བཞི་སྤོང༌། དེ་ཡང་ནག་པོ་རེའི་གཉེན་པོར་དཀར་པོ་རེ་འབྱུང་སྟེ། ཟུང་བཞི་ཡ་བརྒྱད་ཀྱི་བསླབ་བྱ་ཟེར། དཀར་ཆོས་བཞི་ལ་བསླབས་ན། ནག་པོ་བཞི་སྤོང་བ་དེའི་ཁོངས་སུ་འདུས་པས་ལོགས་ན་མེད། ཅེས་གསུངས་པ་ལྟར་ནག་ཆོས་བཞི་སྤོང་ཞིང་དཀར་ཆོས་བཞི་ལ་བསླབ་ཚུལ། མཁན་པོ་སོགས་མཆོད་འོས་ལ་དེར་ཤེས་བཞིན་དུ་རྫུན་གྱིས་དབུ་བསྐོར་བ་ནག་ཆོས་ཀྱི་གཉེན་པོར། སེམས་ཅན་ཀུན་ལ་བཞད་གད་ཀྱི་ཕྱིར་སོགས་ཤེས་བཞིན་དུ་རྫུན་མི་སྨྲ་བའི་དཀར་ཆོས་ཏེ་ཟུང་གཅིག བྱང་སེམས་ལ་ཁོང་ཁྲོས་མི་སྙན་པར་བརྗོད་པ་ནག་ཆོས་ཀྱི་གཉེན་པོར། བྱང་ཆུབ་སེམས་དཔའ་ཐམས་ཅད་ལ་བསྟོད་པར་བྱེད་པ་དཀར་པོའི་ཆོས་ཏེ་ཟུང་གཉིས། གཞན་འགྱོད་པའི་གནས་མ་ཡིན་པ་དགེ་བ་བྱེད་པ་ལ་འགྱོད་པ་བསྐྱེད་པ་ནག་པོའི་ཆོས་ཀྱི་གཉེན་པོར། རང་གིས་ཅི་ནུས་ཅི་ལྕོགས་ཀྱིས་སེམས་ཅན་འབྲེལ་ཡོད་ཐམས་ཅད་ཐེག་པ་གསུམ་གྱི་དགེ་བ་ལ་འགོད་པ་དཀར་ཆོས་ཏེ་ཟུང་གསུམ། སེམས་ཅན་གང་ཡང་རུང་བ་ལ་ལྷག་བསམ་མིན་པའི་གཡོ་སྒྱུ་བྱེད་པ་ནག་ཆོས་ཀྱི་གཉེན་པོར། སེམས་ཅན་ཀུན་ལ་གཡོ་སྒྱུ་མེད་པར་ལྷག་པའི་བསམ་པས་གནས་པ་དཀར་ཆོས་ཏེ་ཟུང་བཞིའོ། །དེ་ལྟར་བསླབ་པ་བརྒྱད་འཇོག་རིགས་ཏེ། ལམ་རིམ་བདུད་རྩིའི་ཉིང་ཁུ་ལས། ཡང་སེམས་བསྐྱེད་པའི་ཕན་ཡོན་དྲན་པ་དང་ཉིན་མཚན་དུས་དྲུག་ཏུ་སེམས་བསྐྱེད་ལེན་པ་ཡང་བསླབ་བྱར་བསྡུས་ཏེ། སེམས་ཅན་མི་སྤོང་བ་དང༌། ཚོགས་གཉིས་ལ་བསླབ་པ། ཟུང་བཞི་རེ་རེ་སྟེ་བསླབ་བྱ་བརྒྱད་ཟེར་བའང་ཡོད་པས་ཇི་ལྟར་འོས་པར་སྦྱར་བར་བྱའོ། །ཞེས་གསུངས་སོ། །བསླབ་བྱ་འདི་རྣམས་ལ་སློབ་པར་འདོད་པའི་བསམ་པ་དང༌། བྱང་ཆུབ་འདོད་པའི་བསམ་པ་དང༌། སེམས་ཅན་གྱི་དོན་བྱ་བའི་བསམ་པ་ཕུན་སུམ་ཚོགས་པ་གསུམ་གྱིས་བསླབ་པ་ལ་སྙིང་ཐག་པ་ནས་གུས་པར་བྱས་ཏེ་ཇི་ལྟར་བཅས་པ་ལས་མི་འདའ་བར་བསླབ་པར་བྱའོ། །