གསུམ་པ་རྩོད་པ་སྤོང་པ།

གསུམ་པ་རྩོད་པ་སྤོང་པ་ལ།

ཁ་ཅིག་བར་མ་རབ་བྱུང་གི་སྡོམ་པ་མ་ཞུས་པར་བསྙེན་རྫོགས་ཀྱི་སྡོམ་པ་ཐོབ་པ་དེའི་རྒྱུད་ཀྱི་བསྙེན་རྫོགས་ཀྱི་སྡོམ་པ་ཐོབ་བྱེད་ཀྱི་ཆོ་ག་དེ་ཆོས་ཅན།སྔོན་ཆོག་ཡིན་པར་ཐལ། ཡུལ་གང་ཟག་གཅིག་གི་རྒྱུད་ལ་རབ་བྱུང་དང་བསྙེན་རྫོགས་དུས་གཅིག་ཏུ་ཐོབ་བྱེད་ཀྱི་ཐབས་ཁྱད་པར་ཅན་གྱི་བདག་ཉིད་དུ་གཏོགས་པ་ཡིན་པའི་ཕྱིར། ཁྱབ་སྟེ། དེ་དེའི་མཚན་ཉིད་ཡིན་པའི་ཕྱིར་ཏེ། མཚོ་ཊཱིཀ་ལས། མཚན་ཉིད་ནི། ཡུལ་གང་ཟག་གཅིག་གི་རྒྱུད་ལ་རབ་བྱུང་དང་བསྙེན་རྫོགས་དུས་གཅིག་ཏུ་ཐོབ་བྱེད་ཀྱི་ཐབས་ཁྱད་པར་ཅན་གྱི་བདག་ཉིད་དུ་གཏོགས་པའོ། །ཞེས་གསུངས་པའི་ཕྱིར་ཟེར་ན་མ་ཁྱབ་པ་འདྲའོ། །གོང་གི་རྟགས་གྲུབ་སྟེ། དེ་འདྲའི་དགེ་སློང་གི་སྡོམ་པ་དེ་རབ་བྱུང་གི་སྡོམ་པ་གང་ཞིག གང་ཟག་དེ་ལ་བསྙེན་རྫོགས་ཀྱི་སྡོམ་པ་ལས་གཞན་རབ་བྱུང་གི་སྡོམ་པ་ཟུར་བ་མེད་པས་དུས་གཅིག་ཏུ་ཐོབ་པ་ལས་འོས་མེད་པའི་ཕྱིར་ཞེ་ན། སྔོན་ཆོག་གི་སྐབས་སུ་རབ་བྱུང་དང་བསྙེན་རྫོགས་དུས་གཅིག་ཏུ་ཐོབ་བྱེད་ཅེས་པ་བར་མ་རབ་བྱུང་དང་བསྙེན་རྫོགས་དུས་གཅིག་ཏུ་ཐོབ་བྱེད་ལ་བྱ་བར་མཚོ་ཊཱིཀ་དང་ཟླ་ཟེར་དུ་གསུངས་སོ། །དེ་ཡང་རབ་བྱུང་དང་བསྙེན་རྫོགས་དུས་གཅིག་ཏུ་བྱེད་པ་ཙམ་གྱིས་མི་ཆོག་སྟེ། མཚོ་ཊཱིཀ༥༦ལས། གཞུང་གི་དོན་ནི་རབ་ཏུ་བྱུང་བ་བར་མའི་དགེ་བ་དང་བསྙེན་པར་རྫོགས་པ་དགེ་སློང་གི་སྡོམ་པ་དུས་ཅིག་ཅར་ཁད་ཉེ་བར་བསྒྲུབ་པར་གྱུར། ཅེས་གསུངས་པའི་ཕྱིར་ཟེར་བ་ཡོད་ཀྱང་སྔོན་ཆོག་སྐབས་སུ་བར་མ་རབ་བྱུང་དང་བསྙེན་རྫོགས་ཅིག་ཆར་ཐོབ་པར་གསུངས་པའི་གནས་ཡོད་དམ་དཔྱད་པར་བྱའོ། །བར་མ་རབ་བྱུང་མ་སྒྲུབ་པར་བསྙེན་རྫོགས་ཀྱི་སྡོམ་པ་སྐྱེ་བར་ཡང༌། གླེང་གཞིའི་སྡོམ་ལས། རབ་ཏུ་མ་བྱུང་བསྙེན་པར་རྫོགས། །ཞེས་དང༌། དེའི་སྡོམ་གྱི་དོན་བཤད་པར་ཡང༌། བཙུན་པ་ཁྱིམ་པ་རབ་ཏུ་མ་བྱུང་བ་ཞིག་བསྙེན་པར་རྫོགས་པར་བགྱིད་ན་བསྙེན་པར་རྫོགས་པར་བགྱིའམ་མ་རྫོགས་པ་ཞེས་བགྱི། ཨུ་པ་ལི་བསྙེན་པར་རྫོགས་མོད་ཀྱི། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པར་འགྱུར་རོ། །ཞེས་དང༌། མཚོ་ཊཱིཀ་༦༡ལས། རབ་ཏུ་བྱུང་བ་མ་བྱས་པ་ལ་དགེ་སློང་གི་སྡོམ་པ་སྐྱེ་བར་གསུངས་པས་དགེ་ཚུལ་གྱི་སྡོམ་པ་སྐྱེ་བ་ལྟ་ཅི་སྨོས། རིགས་པས་ཀྱང་རབ་ཏུ་བྱུང་བ་ནི་མཁན་པོ་ཁོ་ན་ལས་ཐོབ་ལ། མཁན་པོ་མེད་པར་སྡོམ་པ་སྐྱེ་བར་གསུངས་པས་གནོད་དོ། །དེ་ཡང་ཊཱི་ཀ་ལས། རབ་ཏུ་འབྱུང་བ་ནི་མཁན་པོ་ཁོ་ན་ལས་འགྱུར་ལ། ཞེས་དང༌། མཁན་པོ་མེད་པ་ཉིད་ལ་ཡང་ངོ༌། །ཞེས་སོ། །ཞེས་གསུངས་པའི་ཕྱིར། བར་མ་རབ་བྱུང་མ་བྱས་པར་དགེ་ཚུལ་དང་དགེ་སློང་གི་སྡོམ་པ་སྐྱེ་ཡང་དེ་རབ་བྱུང་གི་སྡོམ་པ་མ་ཡིན་པས། དེ་འདྲ་བའི་ཆོ་ག་དེ་རབ་བྱུང་དང་བསྙེན་རྫོགས་དུས་གཅིག་ཏུ་ཐོབ་བྱེད་མིན་ནོ་ཟེར་ན། དེ་མི་འཐད་པར་ཐལ། མཚོ་ཊཱིཀ་མཆན་༦༡ལས། སྔར་རབ་ཏུུ་བྱུང་བ་མ་བྱས་ཀྱང༌། ད་ལྟ་དགེ་ཚུལ་གྱི་སྡོམ་པ་བླངས་པས་རབ་ཏུ་བྱུང་བ་དགེ་ཚུལ་གྱི་སྡོམ་པ་སྐྱེའོ། །ཞེས་གསུངས་པའི་ཕྱིར་དང༌། དེ་ལྟ་མིན་ན་ཁྱིམ་པ་ལ་དགེ་སློང་རྣམ་དག་སྲིད་པར་ཐལ་བ་སོགས་སྐྱོན་མང་བོ་འོང་ངོ༌། །བུ་སྟོན་གྱི་འདུལ་ཊཱིཀ་སྙིང་བོ་རབ་གསལ་ལས། ཚུར་ཤོག་དང་གསོལ་བཞིའི་ལས་ཀྱིས་ཅིག་ཅར་རབ་ཏུ་བྱུང་བ་ལ་རབ་བྱུང་དང་བསྙེན་རྫོགས་ཅིག་ཅར་ཐོབ་ལ། ཐམས་ཅད་ལ་མ་ངེས་ཏེ། སངས་རྒྱས་དང་རང་སངས་རྒྱས་ལྔ་སྡེ་བཟང་བོ་སོགས་རབ་བྱུང་སྔར་དང་བསྙེན་རྫོགས་ཕྱིས་ཐོབ་པའི་ཕྱིར། ཞེས་སངས་རྒྱས་སོགས་རབ་བྱུང་དང་བསྙེན་རྫོགས་རིམ་གྱིས་མནོས་པར་བཤད་དོ། །རིམ་གྱིས་མནོས་པའི་ཚུལ་ནི། སྟོན་པ་སངས་རྒྱས་གྱིས་མཆོད་རྟེན་རྣམ་དག་དྲུང་ནས་དབུ་སྐྲ་བསིལ་བ་སོགས་རབ་བྱུང་གི་ཆ་ལུགས་ཁྱད་པར་ཅན་སྒྲུབ་པ་ན་རབ་ཏུ་བྱུང་བ་དང༌། སངས་རྒྱས་ཐོབ་པ་ན་གཟོད་བསྙེན་པར་རྫོགས་པར་འདོད་དོ། །དེ་ལྟར་ལུང་རྣམ་འབྱེད་ཉེས་བྱས་ཀྱི་སྐབས་ལས། བཅོམ་ལྡན་འདས་མངོན་པར་བྱུང་ནས་ལོ་བཅུ་གཉིས་ལོན་ཞིང་སངས་རྒྱས་ནས་ལོ་དྲུག་ལོན་ནས་སེར་སྐྱའི་གནས་སུ་བྱིན་ཏེ། འཆར་ཀས་ཁྲིའུ་ལ་ལུས་ཐམས་ཅད་ཀྱི་ལྗིད་ཀྱིས་ཕབ་སྟེ་འདུག་པ་དང༌། ཞེས་དང༌། མདོ་མཛངས་བླུན་ལས། ཉིད་ཀྱི་དབུ་སྐྲ་ཉིད་ཀྱིས་བསིལ་ནས་རབ་ཏུ་བྱུང་བའོ། །ཞེས་དང༌། གླེང་འབུམ་དུ། ཡང་གཞོན་ནུ་དོན་འགྲུབ་རབ་ཏུ་བྱུང་ནས་དཀའ་བ་སྤྱད་པར་གསུངས་པ་སོགས་ཀྱི་སྒོ་ནས་མཚོ་ཊཱིཀ་ལྟར་ན་སྔོན་ཆོག་བརྒྱད་བཞག་པ་དང་མཚན་ཉིད་དེ་ལྟར་བཞག་པ་ལ་དཔྱད་པར་བྱ་བ་ཡོད་ཀྱང་རང་ལུགས་སྔོན་ཆོག་ལ་གསོལ་བཞིས་ཁྱབ་པ་དང༌། བར་མ་རབ་བྱུང་སྔོན་དུ་མ་སོང་བར་ད་ཆོག་གི་སྒོ་ནས་བསྙེན་པར་རྫོགས་པ་ཡོད་ཀྱང་དེ་ལ་མཁན་སློབ་ཡོད་ལ་སྔོན་ཆོག་ལ་དེ་མེད་པས་མི་འདྲ་ཞེས་ལན་གནང་དགོས་སོ། །སྔོན་ཆོག་ལ་དབྱེ་བ་དུ་མ་ཡོད་དེ། རང་གི་རྣམ་བཤད་ལས། སྔོན་གྱི་ཆོ་ག་ཞེས་བྱ་བ་ནི་ད་ལྟར་གྱི་ཆོ་ག་ལས་སྔ་རོལ་ཏུ་འདི་ལྟ་བུའི་རབ་ཏུ་དབྱེ་བ་ཅན། ཞེས་གསུངས་པའི་ཕྱིར་ཟེར་ན་ལྟ་བུ་ཞེས་པ་བྱེ་བྲག་མཚོན་པའི་ཚིག་མིན་པར། འདི་ལྟ་བུ་ཞེས་པ་རྣམ་པའི་དོན་ཡིན་པར། ཊཱི་ཀ་རང་ལས། སྔོན་གྱི་ཆོ་གའི་རྣམ་པ་ནི་འདི་ལྟ་བུར་རིག་པར་བྱའི། རྣམ་པ་གཞན་ནི་མ་ཡིན་ནོ། །ཞེས་གསུངས་ལ། དེ་ཡང་དབྱེ་བ་ཙམ་ཡོད་ལ། གསོལ་བཞི་མ་ཡིན་པའི་སྔོན་ཆོག་མེད་པས་འགལ་བ་མེད་པ་འདྲའོ། །གསོལ་བཞི་ལས་གཞན་པའི་སྔོན་ཆོག་ཡོད་པར་ཐལ། མཚོ་ཊཱིཀ་ལས། ལྟ་བུ་ནི་སྔོན་གྱི་ཆོ་གའོ། །ཞེས་སྔོན་གྱི་ཆོ་ག་གཅིག་ཁོ་ན་ཡིན་ན་ནི། ལྟ་བུ་ཞེས་དུ་མའི་ནང་ནས་བྱེ་བྲག་ལ་མཚོན་པའི་ཚིག་ཏུ་གསུངས་པ་དང་འགལ་ལོ། །ཞེས་གསུངས་པའི་ཕྱིར་ཟེར་ན་མ་ཁྱབ་པ་འདྲ་སྟེ། དཔེར་ན་མི་རྟག་པ་ནི་དངོས་པོ་ལྟ་བུ་ཞེས་ཟེར་ན་དངོས་པོ་མ་ཡིན་པའི་མི་རྟག་པ་ཡོད་མི་དགོས་པ་དང་འདྲའོ། །མཚོ་ཊཱིཀ་ལས། སྔོན་ཆོག་མང་པོར་འོང་བའི་འཐད་པ་ནི། སངས་རྒྱས་ཀྱིས་གདུལ་བྱ་འདུལ་བའི་ཐབས་ཀྱི་བྱེ་བྲག་མང་དུ་མཁྱེན་པའི་ཕྱིར་རོ། །ཞེས་གསུངས་པ་ལ་དཔྱད་པར་བྱའོ། །