བཞི་པ་བསྟན་བཅོས་བརྩམས་པའི་དགེ་བ་བསྔོ་བ།
བཞི་པ་བསྟན་བཅོས་བརྩམས་པའི་དགེ་བ་བསྔོ་བ་ནི།
རྩ་བར། སློབ་དཔོན་ཀླུ་སྒྲུབ་ལུགས་བཟང་བསྙད་ལས་བདག་གི་བསོད་ནམས་ཕྱོགས་ཀྱི་མཐར། །
ཁྱབ་ཅིང་ཡིད་མཁའ་ཉོན་མོངས་ཀྱིས་སྔོར་སྟོན་ཀའི་རྒྱུ་སྐར་ལྟར་དཀར་བའམ། །
སེམས་ཀྱི་སྦྲུལ་ལ་གདེངས་ཀའི་ནོར་བུ་དང་འདྲ་གང་ཞིག་ཐོབ་པ་དེས། །
འཇིག་རྟེན་མ་ལུས་དེ་ཉིད་རྟོགས་ནས་མྱུར་དུ་བདེ་གཤེགས་སར་བགྲོད་ཤོག །
ཅེས་སློ༷བ་དཔོ༷ན་འཕགས་པ་ཀླུ༷་སྒྲུ༷བ་ཀྱི་དབུ་མའི་ལུ༷གས་བཟ༷ང་པོ་དེ་ཉིད་ལུང་དང་རིགས་པའི་ཚོགས་ཤིན་ཏུ་གསལ་བའི་སྒོ་ནས་བསྙ༷ད་པ་སྟེ་བཤད་པ་ལ༷ས་བྱུང་བའི་བད༷ག་གི༷ས་བསོ༷ད་ན༷མས་རྒྱ་ཆེན་པོ་བསགས་པ་དེ་ནི་ཕྱོ༷གས་ཀྱི༷་མཐ༷ར་ཁྱ༷བ་ཅི༷ང་ཡི༷ད་ཀྱི་ནམ་མཁ༷འ་ཉོ༷ན་མོ༷ངས་པའི་ཚོགས་ཀྱི༷ས་སྔོ༷ར་རམ་གནག་པར་བྱས་པའི་དཀྱིལ་དུ་སྟོ༷ན་ཀ༷འི་རྒྱུ༷་སྐ༷ར་ལྟ༷ར་ཤིན་ཏུ་དཀ༷ར་བ་ཐོབ་པ༷འ༷མ། རྩོམ་པ་པོའི་སེ༷མས་ཀྱི༷་སྦྲུ༷ལ་ལ༷་སྟེ་རྩོམ་པ་པོའི་སེམས་ཀྱི་སྦྲུལ་གྱི་གདེ༷ངས་ཀ༷འི་ནོ༷ར་བུ༷་ད༷ང་འདྲ༷་བ་ག༷ང་ཞི༷ག་ཐོ༷བ་པ༷་དེ༷ས། སེམས་ཅན་གྱི་འཇི༷ག་རྟེ༷ན་མ༷་ལུ༷ས་པ་རྣམས་ཀྱིས་ཟབ་མོའི་དེ༷་ཁོ་ན་ཉི༷ད་ཇི་ལྟ་བ་བཞིན་དུ་རྟོ༷གས་ན༷ས་མྱུ༷ར་དུ༷་བདེ༷་བརགཤེ༷གས་པའི་ས༷་ཀུན་ཏུ་འོད་ཅེས་བྱ་བར་བགྲོ༷ད་པར་ཤོ༷ག་ཅིག་ཅེས་སྨོན་པའོ། །
བཞི་པ་མཇུག་གི་དོན་ལ་གཉིས།
སློབ་དཔོན་གང་གིས་མཛད་པ། ལོ་པཎ་གང་གིས་བསྒྱུར་བ་དང་གཉིས། དང་པོ་ནི། རྩ་བར། དབུ་མ་ལ་འཇུག་པའི་བཤད་པ་ཟབ་པ་དང་རྒྱ་ཆེ་བའི་ཚུལ་གསལ་བར་བྱེད་པ། སློབ་དཔོན་ཟླ་བ་གྲགས་པ་ཐེག་པ་མཆོག་ལ་ཐུགས་གཞོལ་བ། མི་འཕྲོགས་པའི་མཁྱེན་རབ་དང་ཐུགས་རྗེ་མངའ་བ། རི་མོར་བྲིས་པའི་བ་དྲུས་མ་ལས་འོ་མ་བཞོས་པས་བདེན་པར་ཞེན་པ་བཟློག་པར་མཛད་པས་སྦྱར་བ་རྫོགས་སོ། །ཞེས་དབུ༷་མ༷་ལ༷་འཇུ༷ག་པ༷་འཕགས་པ་ཀླུའི་ལུགས་ཀྱི་ཟ༷བ་པ༷་ད༷ང་རྒྱ༷་ཆེ༷་བ༷འི་ཚུ༷ལ་གས༷ལ་བ༷ར་བྱེ༷ད་པ༷། ཡུལ་ས་མན་ཏར་སྐུ་འཁྲུངས་པའི་སློ༷བ་དཔོ༷ན་ཆེན་པོ་དཔལ་ལྡན་ཟླ༷་བ༷་གྲ༷གས་པ༷། རིག་པ་འཛིན་པ་དང་སྒྱུ་མ་ལྟ་བུའི་ཏིང་ངེ་འཛིན་བརྙེས་པར་གྲགས་པ། བླ་ན་མེད་པ་ཐེ༷ག་པ༷་མཆོ༷ག་ལ༷་ཐུ༷གས་རབ་ཏུ་གཞོ༷ལ་བ༷། མི་མཐུན་པའི་ཕྱོགས་ཀྱིས་མི༷་འཕྲོ༷གས་པ༷འི་མཁྱེ༷ན་ར༷བ་ད༷ང༌། ཐུ༷གས་རྗེ༷་ཕུལ་དུ་བྱུང་བ་མང༷འ་བ༷། རི༷་མོ༷ར་བྲི༷ས་པ༷འི་བ༷་དྲུ༷ས་མ༷་ལ༷ས་འོ༷་མ༷་བཞོ༷ས་པ༷ས་སེམས་ཅན་གྱི་བདེ༷ན་པ༷ར་ཞེ༷ནཔ༷་བཟློ༷ག་པ༷ར་མཛ༷ད་པ༷ས་སྦྱ༷ར་བ༷་རྫོ༷གས་སོ༷། །
གཉིས་པ་ལོ་པཎ་གང་གིས་བསྒྱུར་བ་ནི།
ཁ༷་ཆེ༷འི་ཡུ༷ལ་གྱི༷་གྲོ༷ང་ཁྱེ༷ར་དཔེ༷་མེ༷ད་ཀྱི༷་དབུ༷ས་རི༷ན་ཆེ༷ན་སྦ༷ས་པ༷འི་གཙུ༷ག་ལ༷ག་ཁ༷ང་དུ༷་ཁ༷་ཆེ༷འི་རྒྱ༷ལ་པོ༷་དཔ༷ལ་འཕ༷གས་པ༷་ལྷ༷འི་སྐུ༷་རི༷ང་ལ༷། རྒྱ༷་ག༷ར་གྱི༷་མཁ༷ན་པོ༷་ཏི༷་ལ༷་ཀ༷་ཀ༷་ལ༷་ཤ༷་སྟེ་ཐིག་ལེའི་བུམ་པ་ད༷ང༌། བོ༷ད་ཀྱི༷་ལོ༷་ཙཱ༷་བ༷་ཚ༷བ་ཉི༷་མ༷་གྲ༷གས་ཀྱི༷ས་ཁ༷་ཆེ༷འི་དཔེ༷་ད༷ང་མཐུ༷ན་པ༷ར་བསྒྱུ༷ར། ཕྱི༷ས་ར༷་ས༷་ར༷་མོ༷་ཆེ༷ར་རྒྱ༷་ག༷ར་གྱི༷་མཁ༷ན་པོ༷་ཀ༷་ན༷་ཀ༷་ཝ༷རྨ༷་སྟེ་གསེར་གྱི་གོ་ཆ་ད༷ང༌། ལོ༷་ཙཱ༷་བ༷་དེ༷་ཉི༷ད་ཀྱི༷ས་ཉི༷་འོ༷ག་ཤ༷ར་ཕྱོ༷གས་པ༷འི་དཔེ༷་ད༷ང་གཏུ༷གས་ཤི༷ང༌། ལེ༷གས་པ༷ར་བཅོ༷ས་ན༷ས་འཆད་ཉན་གྱིས་གཏ༷ན་ལ༷་ཕ༷བ་པ༷འོ༷། །བོད་ཀྱི་མཁས་དབང་མང་པོས་མཛད་པའི་དབུ་མ་འཇུག་པའི་འགྲེལ་བ་མང་དུ་ཡོད་པའི་ལུགས་གཅིག་གི་རྗེས་སུ་འབྲང་བ་མ་ཡིན་པར་དབུ་མ་འཇུག་པའི་རང་འགྲེལ་དང་འཇུག་ཊཱིཀ་རབ་གསལ་སྣང་བའི་རྒྱན་སོགས་རྒྱ་བོད་ཀྱི་གཞུང་ལུགས་མང་པོ་ལ་བརྟེན་ནས་ཟླ་བའི་འཇུག་པ་རྩ་འགྲེལ་འདི་གཞུང་ལུགས་ཧ་ཅང་གལ་ཆེ་བ་ཡིན་པས་གཞུང་འདི་སྤེལ་བ་ཡིན་ལ། དེ་ཡང་ཚིག་སྦྱོར་གྱིས་མ་བརྒྱན་པར་གོ་ནུས་སུ་བཀོད་ལ། དཔེར་ན་མཛོད་ལྟ་བུ་འཆད་ཚེ་གཙོ་བོར་ཁ་ཆེ་བྱེ་བྲག་སྨྲ་བའི་ལུགས་སུ་འཆད་དགོས་ལ། དེ་ཡང་བཀྲལ་ཚུལ་ཅུང་མི་འདྲ་བ་དག་རང་ལུགས་ཀྱི་དམ་པ་གོང་མའི་བཞེད་ཚུལ་ལྟར་ལུང་རིགས་དང་ལྡན་ན་བཤད་དགོས་པ་ལྟར་གཞན་སྟོང་གི་ལུགས་ལྟར་མ་ཡིན་པར་དཔལ་ལྡན་ཟླ་བ་གྲགས་པའི་ལུགས་ཇི་ལྟ་བ་བཞིན་བྲིས་ལ། ཁ་ཅིག་འཇུག་པ་འདིའི་སྐབས་སུ་གཞན་སྟོང་བསྟན་པར་འདོད་པ་ཡོད་ཀྱང་བཤད་པ་ཡང་དག་ཏུ་མ་མཐོང་ངོ། །གཞན་སྟོང་སྙིང་པོ་ལས། ཁྱད་པར་ཐལ་འགྱུར་བ་རྣམས་ནི་གྲུབ་མཐའི་རྣམ་གཞག་འཇོག་བཞིན་དུ། གཞན་གྱི་རྩོད་པ་ལ་འཛེམ་པའི་ཕྱིར་གང་ཡང་ཁས་མི་ལེན་པ་དང༌། ངེས་ཤེས་མ་སྐྱེས་ཀྱང་ལོག་རྟོག་ཟློག་པར་འདོད་པ་སོགས་འཁྲུལ་བ་ཡིན་ལ། གཟུང་འཛིན་གྱིས་བསྡུས་པའི་ཆོས་ཐམས་ཅད་བདེན་པར་མེད་པ་དང༌། བདེན་མེད་ཙམ་དེ་ཡང་བདེན་པར་མ་གྲུབ་པ་སོགས་ནི་མ་ནོར་བ་ཡིན་ནོ། །ཞེས་གསུངས་པ་ལས། གང་ཡང་ཁས་མི་ལེན་པ། ཞེས་པ་ནི་སྔ་རྒོལ་དང་ཕྱི་རྒོལ་གཉིས་ཀའི་མཐུན་སྣང་དུ་གྲུབ་པའི་ཆོས་ཅན་དང་རྟགས་དང་ཆོས་སོགས་མི་དགོས་པར་ཕྱི་རྒོལ་གྱི་ཁས་བླངས་ཀྱིས་གྲུབ་པ་ལས་ཐལ་འགྱུར་བ་རང་ལ་ཆོས་ཅན་སོགས་མཐུནསྣང་བ་གྲུབ་དགོས་པའི་ཁས་ལེན་མེད་པ་ལ་ཟླ་བའི་རང་གཞུང་དང་བསྟུན་ན་བཤད་དགོས་པརསྣང་ངོ། །ཡང་དེར་ངེས་ཤེས་མ་སྐྱེས་ཀྱང་ལོག་རྟོག་ཟློག་པར་འདོད་པ། ཞེས་པའི་དོན་ནི་ངེས་ཤེས་མ་སྐྱེས་ཀྱང་གནོད་བྱེད་དམ་ནང་འགལ་མཐོང་བའི་ཚེ་ལོག་རྟོག་ཀུན་བཏགས་མངོན་གྱུར་བཟློག་པ་ཡིན་པར་འདོད་པ་ཡིན་ནམ་དཔྱད་དགོས་སོ། །སྤྱིར་རྗེ་བཙུན་ཏཱ་ར་ནཱ་ཐའི་བླ་མ་མང་ཆེ་བ་བཀའ་བརྒྱུད་པ་སོགས་ཡིན་པས་དམ་པ་གང་གི་གསུང་ན་ས་བཀའི་གསུང་སྒྲོས་མང་དུ་སྣང་ངོ། །འཇུག་པའི་རང་ལུགས་དང་དཔལ་ལྡན་ཇོ་ནང་གི་འདོད་པ་གཉིས་ལ་ཁྱད་པར་གཙོ་བོ་བཅུ་ནི། ༡ ཕྱི་དོན་འདོད་མི་འདོད་དང༌། ༢ ཀུན་གཞི་མི་འདོད་དང་འདོད་པའི་ཁྱད་པར། ༣ རང་རིག་མི་འདོད་པ་དང་འདོད་པའི་ཁྱད་པར། ༤ ཚད་མ་གསར་རྟོགས་མི་དགོས་པ་དང་དགོས་པའི་ཁྱད་པར། ༥ ཆོས་ཀྱི་བདག་འཛིན་ཉོན་སྒྲིབ་ཏུ་འདོད་མི་འདོད་དང༌། ༦ ཐེག་གསུམ་ཀྱི་ཐར་བ་ཐོབ་པ་ལ་ཆོས་ཀྱི་བདག་མེད་རྟོགས་དགོས་མི་དགོས་དང༌། ༧ དོན་དམ་བདེན་པ་རང་བཞིན་གྱིས་གྲུབ་པའི་སྟོང་མི་སྟོང་གི་ཁྱད་པར་དང༌། ༨ རང་མཚན་གྱིས་གྲུབཔ་མེད་པ་དང་ཡོད་པའི་ཁྱད་པར་དང༌། ༩ ཡང་ལོག་གི་ཀུན་རྫོབ་མི་འདོད་པ་དང་འདོད་པའི་ཁྱད་པར་དང༌། ༡༠ དེ་བཞིན་གཤེགས་པའི་སྙིང་པོ་སྟོན་པའི་མདོ་སོགས་འཁོར་ལོ་ཐ་མ་དྲང་དོན་ངེས་དོན་གྱི་མདོར་འདོད་པའི་ཁྱད་པར་སོགས་ཡོད་དོ། །རྗེ་བདག་ཉིད་ཆེན་པོའི་བཞེད་པའི་ཐལ་འགྱུར་བའི་དཀའ་གནས་བརྒྱད་ནི། ༡ ཚོགས་དྲུག་ལས་ངོ་བོ་ཐ་དད་པའི་ཀུན་གཞི་རྣམ་ཤེས་དང༌། ༢ རང་རིག་དང༌། ༣ རང་རྒྱུད་ཀྱི་སྦྱོར་བ་ཁས་མི་ལེན་པ་གསུམ་དང༌། ༤ ཕྱིདོན་ཁས་ལེན་པ་དང༌། ༥ ཉན་རང་གི་ཐར་བ་ཐོབ་པ་ལ་རང་བཞིན་མེད་པར་རྟོགས་དགོས་པར་འདོད་པ་དང༌། ༦ ཆོས་ཀྱི་བདག་འཛིན་ཉོན་སྒྲིབ་ཏུ་འདོད་པ་དང༌། ༧ ཞིག་པ་དངོས་པོ་འདོད་པ་དང༌། ༨ དེའི་རྒྱུ་མཚན་གྱིས་དུས་གསུམ་དངོས་པོར་འདོད་པ་དང་བརྒྱད་བཤད་དོ། །དབུ་མ་འཇུག་པའི་རྩ་བའི་ཚིག་གི་གོ་རིམ་དང་སྒྲ་གདངས་སོགས་མ་བསྒྱུར་བར་ཇི་བཞིན་བཤད་ཡོད་དོ། །འོན་ཀྱང་འཇུག་ཊཱིཀ་རབ་གསལ་སྣང་བའི་རྒྱན་གྱིས་རྗེ་བློ་བཟང་གྲགས་པ་དང་ཀུན་མཁྱེན་འཇམ་དབྱངས་བཞད་པ་ལྟར་བཤད་ལ། དེ་ལས་གཞན་པའི་ཇོ་ནང་བའི་མཁས་དབང་ཁྲོད་ན་འཇུག་འགྲེལ་བརྩམས་ཡོད་པ་མ་མཐོང་བས་ཇོ་ནང་གི་སྔོན་བྱོན་དམ་པ་གོང་མས་ཟླ་བ་གྲགས་པའི་རང་ལུགས་ཀྱི་བཤད་པ་ཇི་ལྟ་བ་བཞིན་དུ་ཟླ་བ་གྲགས་པའི་རྩ་འཇུགབཞི་གསུམ་གྱི་འགྲེལ་བ་ལ་རྟེན་ནས་བློས་གང་ནུས་ཀྱིས་བཤད་པའོ།། །།
འདིར་སྨྲས་པ།
འགྲོ་རྣམས་ཞི་བསིལ་ཕན་བདེའི་གནས་མཆོག་ཏུ། །
བགྲོད་པའི་ཆོས་སྒོ་སྐལ་ལྡན་མོས་པ་བཞིན། །
སྣ་ཚོགས་གྲངས་མེད་དཔག་པར་མི་ནུས་པ། །
བཅོམ་ལྡན་ཐུགས་བརྩེས་ལེགས་པར་འདོམས་པར་མཛད། །
ཡུམ་གསུམ་ངེས་དོན་ཟབ་མོའི་རྨད་བྱུང་མདོར། །
སྟོན་པ་རྣམ་འདྲེན་ཤཱཀྱའི་རྒྱལ་པོ་ཡིས། །
གསུང་དབྱངས་དྲུག་ཅུའི་ཚངས་པའི་སྒྲ་བརྒྱ་དེས། །
བྱམས་བརྩེས་འགྲོ་ལ་ཇི་བཞིན་གསལ་བར་བསྟན། །
ཟབ་དོན་ཇི་བཞིན་འགྲེལ་ལ་ཟླ་མེད་པ། །
རྒྱལ་བའི་ལུང་བསྟན་དཔལ་མགོན་ཀླུ་སྒྲུབ་ཀྱིས། །
ལུང་རིགས་འོད་སྟོང་གཟི་འོད་སྣང་བ་ཡིས། །
རྟེན་འབྲེལ་ཟབ་མོའི་པད་ཚལ་རྒྱས་པར་བྱས། །
ཀླུ་སྒྲུབ་མཆོག་གི་ཟབ་རྒྱས་དབུ་མའི་ལམ། །
འཕགས་པ་ལྷ་ཡིས་ཡང་དག་རྟོགས་པ་ཡི། །
རྟེན་འབྲེལ་ཟབ་མོའི་གནས་ཚུལ་ཚུལ་ཇི་བཞིན། །
འགྲོ་ལ་ཕན་ཕྱིར་ལེགས་པར་བཤད་པ་མཛད། །
སངས་རྒྱས་བསྐྱངས་ཀྱིས་རང་མཚན་གྱིས་གྲུབ་པ། །
བདེན་གཉིས་གང་དུ་ཅུང་ཟད་མེད་མོད་ཀྱང༌། །
རྟེན་ཅིང་འབྲེལ་འབྱུང་རྣམ་བཞག་གནོད་པ་མེད། །
ཐལ་འགྱུར་ལུགས་སུ་ཡང་དག་གསལ་བར་མཛད། །
ཀླུ་ཡི་དགོངས་པ་རང་མཚན་རང་རྒྱུད་དུ། །
གྲུབ་པའི་རྣམ་བཞག་ལེགས་ལྡན་འབྱེད་ཀྱིས་བཀྲལ། །
ལུགས་འདི་ཟླ་གྲགས་ལུང་རིགས་རྡོ་རྗེ་ཡིས། །
བཀག་ནས་ཐལ་འགྱུར་ཀུན་དའི་ཚལ་དུ་བཞད། །
ཆོས་ཟབ་བདག་བློས་མ་དཔོགས་པར། །
ལོག་པའི་ཉེས་བཤད་ཉེས་པའི་ཚོགས། །
ཆོས་སྤྱན་ལྡན་ལ་བཟོད་པར་ཞུ། །
བདག་གི་དྲི་མར་མ་གྱུར་ཅིག །
ཟབ་རྒྱས་ཆོས་ཚུལ་བཤད་པའི་རབ་དཀར་ཅི་མཆིས་པས། །
འགྲོ་རྣམས་སྒྲིབ་གཉིས་རྒུད་པ་མཐའ་དག་ཀུན་བསལ་ཏེ། །
སྐུ་བཞིའི་རིན་ཆེན་གླིང་དུ་དེད་དཔོན་མགོན་པོ་མཆོག །
རྒྱལ་བ་གོ་འཕངས་རང་མིན་མྱུར་དུ་ཐོབ་པར་སྨོན། །
དེ་མ་ཐོབ་པའི་སྐྱེ་བ་ཀུན་ཏུ་ཡང༌། །
བཤེས་གཉེན་མཆོག་གིས་ཚུལ་བཞིན་རྗེས་བཟུང་སྟེ། །
ཀུན་མཁྱེན་ལམ་མཆོག་སྒྲུབ་ལ་གེགས་མེད་པར། །
འཇུག་པས་ས་ལམ་མ་ནོར་བགྲོད་པར་ཤོག །
ཞི་བདེ་མ་ལུས་འབྱུང་བའི་གནས་གཅིག་པུ། །
ཐུབ་པའི་ལུང་རྟོགས་འདོད་འཇོའི་དཔག་བསམ་ཤིང༌། །
བཤད་སྒྲུབ་འཛིན་པའི་ངུར་སྨྲིག་རྒྱ་མཚོ་ཆེ། །
གཏན་བདེའི་དཔལ་གྱིས་ས་གསུམ་ཁྱབ་གྱུར་ཅིག །
ཅེས་དབུ་མ་ལ་འཇུག་པའི་ཚིག་དོན་ཟླ་བ་གྲགས་པའི་དགོངས་རྒྱན་རིན་ཆེན་སྒྲོན་མེ་ཞེས་བྱ་བ་འདི་ནི་སྔར་བློ་ལྡན་དུ་མས་བསྐུལ་བ་ལ་བརྟེན་ནས་དཔལ་ལྡན་ཟླ་བ་གྲགས་པའི་ལུགས་ལས་བརྩམས་ནས་རང་དང་སྐལ་བ་མཉམ་པ་ལ་ཕན་ཕྱིར་དུ་བཤད་པ་དང༌། རང་ཡང་ཟབ་མོ་རང་སྟོང་གི་ལྟ་བ་ལ་བག་ཆགས་ཁྱད་པར་ཅན་འཇོག་པའི་ཆེད་དུ། ངག་དབང་དངོས་གྲུབ་དཔལགྱིས་རང་ལོ་ལྔ་བཅུ་ང་གཉིས་པ་རབ་བྱུང་བཅུ་བདུན་པའི་འཕར་བ་ལྕགས་གླང་ལོའི་མགོ་ཟླ་བའིནང་དུ་ཉིན་ཉི་ཤུ་ལྷག་ལ་དཔེ་ཁྲིད་དུ་མའི་ཞར་ལ་བྲིས་ནས་ཚེས་ཉེར་ལྔ་ལ་མཇུག་རྫོགས་པར་བྲིས་པའོ།། །།འདིས་ཀྱང་ཀུན་མཁྱེན་རྒྱལ་བའི་བསྟན་པ་ཕྱོགས་ཀུན་ཏུ་དར་ཞིང་རྒྱས་ལ་ཡུནརིང་དུ་གནས་པར་གྱུར་ཅིག། དགེའོ། །རྒྱལ་བར་གྱུར་ཅིག། །།
པར་བྱང་སྨོན་ཚིག
ཆོས་ཚུལ་ཟབ་མོའི་གནས་ཀུན་རབ་གསལ་བའི། །
རྒྱལ་བསྟན་མི་ནུབ་རྒྱལ་མཚན་འཛིན་པའི་དཔྱིད། །
སྐྱེས་བུ་དམ་པའི་མཛད་འཕྲིན་ཡང་སྙིང་ཉིད། །
གསུང་གི་རྣམ་དཀར་པདྨ་དཀར་བོའི་ཕྲེང༌། །
སྐལ་ལྡན་གདུལ་བྱའི་བློ་གྲོས་གསོས་སྨན་དུ། །
པར་བསྐྲུན་བྱས་པའི་རྣམ་དཀར་ཆུ་ཀླུང་འདི། །
དུས་གསུམ་བསགས་པའི་མཚོ་ཆེན་དང་འདྲེས་ནས། །
འགྲོ་རྣམས་སྲིད་པའི་ཚ་གདུང་སེལ་བར་སྨོན། །
ཞེས་པ་འདི་ཡང་བཙུན་པ་ངག་དབང་དངོས་གྲུབ་དཔལ་གྱིས་སྨྲས་པའོ། །