གསུམ་པ་དེ་གཉིས་རྫས་ཐ་དད་ལ་དཔྱད་པ།
གསུམ་པ་དེ་གཉིས་རྫས་ཐ་དད་ལ་དཔྱད་པ་ནི།
སེམས་སེམས་བྱུང་རྣམསརྫས་ཐ་དད་ཡིན་པར་ཐལ། ཀུན་བཏུས་ས་འགྲེལ་༨༤ལས། གནས་སྐབས་དེ་དག་ཕན་ཚུན་བྱེད་ལས་ཐ་དད་ཡོད་ན་ནི་མཚན་ཉིད་མི་འདྲ་བས་རྫས་ཐ་དད་དུ་གྲུབ་ཅིང༌། མེད་ན་ཡང་གནས་སྐབས་ཐ་དད་དུ་བརྟག་པ་དོན་མེད་པའི་སྐྱོན་ཅན་དུ་འགྱུར་བའི་ཕྱིར་དང༌། །ཞེས་གསུངས་པའི་ཕྱིར། འདོད་ན། རྟོག་པ་ཡིད་ཤེས་ཀྱི་འཁོར་གྱི་སེམས་བྱུང་རྣམས་ཆོས་ཅན། རྟོག་པ་ཡིད་ཤེས་དང་རྫས་ཐ་དད་ཡིན་པར་ཐལ། འདོད་པའི་ཕྱིར། འདོད་ན། གང་ཟག་གཅིག་གི་རྒྱུད་ལ་ཡིད་ཤེས་རྟོག་པ་གཅིག་མངོན་དུ་གྱུར་བའི་ཚེ་ན་རྟོག་པ་རྫས་ཐ་དད་པ་དུ་མ་ཅིག་ཆར་དུ་མངོན་དུ་གྱུར་བ་ཡིན་པར་ཐལ། རྟོག་པ་ཡིད་ཤེས་དེ་དང་མཚུངས་ལྡན་གྱི་སེམས་སེམས་བྱུང་རྣམས་རྟོག་པ་རྫས་ཐ་དད་པ་གང་ཞིག ཅིག་ཆར་དུ་མངོན་དུ་གྱུར་བ་ཡིན་པའི་ཕྱིར། འདོད་མི་ནུས་ཏེ། རྣམ་འགྲེལ་ལས། རྟོག་གཉིས་ཅིག་ཆར་མཐོང་བ་མེད། །ཅེས་གསུངས་པའི་ཕྱིར། ཟེར་བ་དང༌། ཡང་སེམས་སེམས་བྱུང་རྣམས་རྫས་གཅིག་ཡིན་པར་ཐལ། སེམས་ལས་རྫས་ཐ་དད་པའི་སེམས་བྱུང་ཞིག་མེད་པའི་ཕྱིར། དེར་ཐལ། ཁམས་གསུམ་གྱི་ཆོས་གང་ཡང་སེམས་ལས་རྫས་ལོགས་སུ་མེད་པའི་ཕྱིར། དེར་ཐལ། མདོ་ལས། ཁམས་གསུམ་པོ་འདི་དག་ནི་སེམས་ཙམ་མོ། །ཞེས་གསུངས་པའི་ཕྱིར་ཟེར་ན། དེའི་དོན་ནི། ཀུན་བཏུས་ས་འགྲེལ་༨༥ལས། ཕྱི་རོལ་གྱི་དོན་མེད་པ་ལ་དགོངས་ནས་མཚུངས་ལྡན་དང་བཅས་པའི་སེམས་ཙམ་མོ་ཞེས་སྟོན་པ་སྟེ། ཞེསགསུངས་སོ། །ཡང་སེམས་སེམས་བྱུང་རྣམས་རྫས་ཐ་དད་མ་ཡིན་པར་ཐལ། སེམས་སེམས་བྱུང་རྣམས་སྐྱེད་བྱེད་བག་ཆགས་གཅིག་གིས་སྣང་བ་ཡིན་པའི་ཕྱིར། ཁྱབ་སྟེ། གཟུང་འཛིན་གཉིས་རྫས་ཐ་དད་དུ་མ་གྲུབ་པའི་རྒྱུ་མཚན་དེ་ཡིན་པའི་ཕྱིར། དེར་ཐལ། འཛིན་པ་ལས་ལོགས་སུ་གཟུང་བ་རྫས་ཐ་དད་དུ་མ་གྲུབ་ཚུལ་ཡོད་པའི་ཕྱིར་ཟེར་ན་དཔྱད།