གྲོལ་བ་སྤྱིའི་ངོ་བོ་བསྟན་པ།
༈ སྤྱི་དོན་བདུན་པ་མཐར་ཕྱིན་འབྲས་བུའི་ཚུལ་བསྟན་པ་ལ་གསུམ་སྟེ། ༡ གྲོལ་བ་སྤྱིའི་ངོ་བོ་བསྟན་པ། ༢ མྱ་ངན་འདས་པའི་རང་བཞིན་བཤད་པ། ༣ ལྷུན་གྲུབ་རིན་པོ་ཆེའི་རྣམ་པར་བཞག་པའོ། །(1) དང་པོ་ལ་རང་དོན་གྲོལ་བ་དང་། གཞན་དོན་ཐུགས་རྗེའོ། །དང་པོ་ལ་བཞི་སྟེ། ངོ་བོ་ནི། འཁོར་བའི་ཆོས་འཁྲུལ་སྣང་འཁྲུལ་རྐྱེན་དང་བཅས་པ་སྦུག༷ས་(སྦུབས)གཉིས་ལས་གྲོལ་བའོ། །ངེས་ཚིག་ནི། འཁྲུལ་སྣང་ཆ་དང་བཅས་པ་དག་པའོ། །དབྱེ་ན། ཡུལ་ལས་གྲོལ་བ་ཕྱིར་སྣང་འཁྲུལ་པའི་རྒྱུ་རྐྱེན་མེད་པས་ལུས་ལས་གྲོལ་བ་འབྱུང་བཞི་བརྡོས་པའི་སྦུག༷ས་(སྦུབས་)ལས་འདས་པ། སེམས་ལས་གྲོལ་བ་ཚོགས་བརྒྱད་ཀུན་གཞིའི་བརྟེན་པ་དང་བྲལ་བ་གསུམ་མོ། །ཀུན་གཞི་མེད་དེ་འཁོར་འདས་བརྟན་དུས་ཀུན་གཞིར་བཞག་པ་ལ་ད་འཁོར་བ་མི་བརྟན་པས་མྱང་འདས་ཀྱི་ཆོས་གཅིག་པུ་ལྷུན་གྲུབ་རྣམ་དབྱེར་མེད་པར་རང་ས་ཟིན་པའི་ཕྱིར་རོ། །དེའང་དྲི་བཅས་ཀྱི་རིག་པ་ལ་ཀུན་གཞིར་བཞག་པ་དེ་དྲི་མ་མེད་དུས་ཆོས་སྐུར་གནས་པ་ཡིན་ནོ། །དཔེ་ནི། མདུད་པའི་འཆིང་གྲོལ་བའོ། །གཞན་དོན་ཐུགས་རྗེ་ནི། གྲོལ་ནས་རྒྱུན་ཆད་མེད་པར་ལྷུན་གྲུབ་རྩོལ་མེད་དུ་འབྱུང་སྟེ། ཐུགས་རྗེའི་ངོ་བོ། གཟུགས་སྐུ་གཉིས་ཀྱི་རོལ་པ་ཡེ་ཤེས་དང་བཅས་པས་གང་ལ་གང་འདུལ་དུ་དོན་མཛད་པ་དང་། ངེས་ཚིག །འཁོར་བ་ལས་ཞི་བར་འདྲེན་ཞིང་སྡུག་བསྔལ་ལས་སྐྱོབ་པའི་ཕྱིར་ཐུགས་རྗེའོ། །དབྱེ་ན། ཇི་ལྟ་བ་དང་
ཇི་སྙེད་པ་ཡེ་ཤེས་གཉིས་ཀྱིས་དོན་མཛད་པ་སྟེ། རྟོག་མེད་དང་རྟོག་བཅས་ཞེས་དམིགས་ཡུལ་ཆོས་ཅན་ཆོས་ཉིད་གཉིས་ལ་ལྟོས་ནས་བཏགས་པའོ། །དཔེ་ནི། འདྲེན་པ་ལྕགས་ཀྱུ་ལྟ་བུའོ། །གྲོལ་བས་གྲུ་དང་། མ་རིག་སེལ་བས་ཉི་མ་དང་། ཉོན་མོངས་པའི་ནད་འཇོམས་པས་སྨན་དང་། ཐབས་སྟོན་པས་ལམ་ལྟ་བུའོ། །དེ་ཡང་། ཀུན་གསལ་ལས། འཁོར་བའི་ཆོས་ལ་མི་གནས་པར། །མྱ་ངན་འདས་པའི་དོན་ལ་གནས། །གྲོལ་བ་རང་གི་ངོ་བོར་བཤད། ༨༩ །སྡུག་བསྔལ་ནད་སེལ་སྨན་དང་སྨན་པ་བཞིན། །ཞེས་སོ། །