མཁའ་འགྲོའི་བྱ་འབོད་རིན་ཆེན་སྦུར་ལེན།

ཡང་གསང་ཌཱཀྐིའི་ཐུགས་ཐིག་ཆ་ལག་ཏུ་མཁའ་འགྲོའི་བྱ་འབོད་རིན་ཆེན་སྦུར་ལེན་བི་ཛ་ཧ་རཾ་ཏིསྨ༔ དམར་འགྱེད་ཀྱི་མཇུག་ཏུ་བྱ་འབོད་ནི༔ ཕཊཿ རྐང་དུང་སེང་ལྕམ་ང་རོ་ཡིས༔ མགྲོན་འབོད་ཌཱ་དྲིལ་རོལ་མོ་བསྒྲགས༔ རིགས་ལྔའི་མཁའ་འགྲོ་བྱ་རྒོད་ཀྱི༔ རྣམ་པར་གནས་འདིར་འདུས་པར་བསམ༔ ཕཊཿ ཀྱེ་མ་མི་མིན་ཡེ་ཤེས་མཁའ་འགྲོ་མ༔ དབུས་སངས་རྒྱས་རིགས་ཀྱི་མཁའ་འགྲོ་མ༔ མ་མཁའ་འགྲོ་བྱེ་བ་འབུམ་དང་བཅས༔ ཁྱེད་བྱ་རྒོད་མཐིང་ཀའི་ཚུལ་དུ་སྤྲུལ༔ ཡུལ་འདི་རུ་འུར་འུར་ཤིག་ཤིག་བྱོན༔ ལུས་ཤ་ཁྲག་དམར་གྱི་ཚོགས་ལ་རོལ༔ རྐྱེན་ཟ་འདྲེ་ཤི་གཤེད་རྡུལ་དུ་རློགས༔ སེམས་སྐྱེ་མེད་ཆོས་ཀྱི་དབྱིངས་སུ་སྤོར༔ དོན་ཆོས་དབྱིངས་ཡེ་ཤེས་དངོས་གྲུབ་སྩོལ༔ བཾ་བུདྡྷ་ཌཱཀྐི་ནི་ཀྲི་ཏ་མུ་ཁ་བཛྲ་ཨ་ཝེ་ཤ་ཡ་ཨ་ཨ་ཕཻཾ་ཕཻཾ་ཛ་ཛ༔ ཕཊཿ ཀྱེ་མ་མི་མིན་ཡེ་ཤེས་མཁའ་འགྲོ་མ༔ ཤར་རྡོ་རྗེ་རིགས་ཀྱི་མཁའ་འགྲོ་མ༔ མ་མཁའ་འགྲོ་བྱེ་བ་འབུམ་དང་བཅས༔ ཁྱེད་བྱ་ཆེན་ཐང་དཀར་ཚུལ་དུ་སྤྲུལ༔ ཡུལ་འདི་རུ་འུར་འུར་ཤིག་ཤིག་བྱོན༔ ལུས་ཤ་ཁྲག་དམར་གྱི་ཚོགས་ལ་རོལ༔ རྐྱེན་ཟ་འདྲེ་ཤི་གཤེད་རྡུལ་དུ་རློགས༔ སེམས་སྐྱེ་མེད་ཆོས་ཀྱི་དབྱིངས་སུ་སྤོར༔ དོན་མེ་ལོང་ཡེ་ཤེས་དངོས་གྲུབ་སྩོལ༔ ཧ་བཛྲ་ཌཱཀྐི་ནི་ཀྲི་ཏ་མུ་ཁ་བཛྲ་ཨ་ཝེ་ཤ་ཡ་ཨ་ཨ་ཕཻཾ་ཕཻཾ་ཛ་ཛ༔ ཕཊཿ ཀྱེ་མ་མི་མིན་ཡེ་ཤེས་མཁའ་འགྲོ་མ༔ ལྷོ་རིན་ཆེན་རིགས་ཀྱི་མཁའ་འགྲོ་མ༔ མ་མཁའ་འགྲོ་བྱེ་བ་འབུམ་དང་བཅས༔ ཁྱེད་བྱ་རྒོད་ཐང་སེར་ཚུལ་དུ་སྤྲུལ༔ ཡུལ་འདི་རུ་འུར་འུར་ཤིག་ཤིག་བྱོན༔ ལུས་ཤ་ཁྲག་དམར་གྱི་ཚོགས་ལ་རོལ༔ རྐྱེན་ཟ་འདྲེ་ཤི་གཤེད་རྡུལ་དུ་རློགས༔ སེམས་སྐྱེ་མེད་ཆོས་ཀྱི་དབྱིངས་སུ་སྤོར༔ དོན་མཉམ་ཉིད་ཡེ་ཤེས་དངོས་གྲུབ་སྩོལ༔ རི་རཏྣ་ཌཱཀྐི་ནི་ཀྲི་ཏ་མུ་ཁ་བཛྲ་ཨ་ཝེ་ཤ་ཡ་ཨ་ཨ་ཕཻཾ་ཕཻཾ་ཛ་ཛ༔ ཕཊཿ ཀྱེ་མ་མི་མིན་ཡེ་ཤེས་མཁའ་འགྲོ་མ༔ ནུབ་པདྨ་རིགས་ཀྱི་མཁའ་འགྲོ་མ༔ མ་མཁའ་འགྲོ་བྱེ་བ་འབུམ་དང་བཅས༔ ཁྱེད་བྱ་རྒོད་ཐང་དམར་ཚུལ་དུ་སྤྲུལ༔ ཡུལ་འདི་རུ་འུར་འུར་ཤིག་ཤིག་བྱོན༔ ལུས་ཤ་ཁྲག་དམར་གྱི་ཚོགས་ལ་རོལ༔ རྐྱེན་ཟ་འདྲེ་ཤི་གཤེད་རྡུལ་དུ་རློགས༔ སེམས་སྐྱེ་མེད་ཆོས་ཀྱི་དབྱིངས་སུ་སྤོར༔ དོན་སོར་རྟོག་ཡེ་ཤེས་དངོས་གྲུབ་སྩོལ༔ ནི་པདྨ་ཌཱཀྐི་ནི་ཀྲི་ཏ་མུ་ཁ་བཛྲ་ཨ་ཝེ་ཤ་ཡ་ཨ་ཨ་ཕཻཾ་ཕཻཾ་ཛ་ཛ༔ ཕཊཿ ཀྱེ་མ་མི་མིན་ཡེ་ཤེས་མཁའ་འགྲོ་མ༔ བྱང་ལས་ཀྱི་རིགས་ཀྱི་མཁའ་འགྲོ་མ༔ མ་མཁའ་འགྲོ་བྱེ་བ་འབུམ་དང་བཅས༔ ཁྱེད་བྱ་རྒོད་ཐང་ལྗང་འབུམ་དུ་སྤྲུལ༔ ཡུལ་འདི་རུ་འུར་འུར་ཤིག་ཤིག་བྱོན༔ ལུས་ཤ་ཁྲག་དམར་གྱི་ཚོགས་ལ་རོལ༔ རྐྱེན་ཟ་འདྲེ་ཤི་གཤེད་རྡུལ་དུ་རློགས༔ སེམས་སྐྱེ་མེད་ཆོས་ཀྱི་དབྱིངས་སུ་སྤོར༔ དོན་བྱ་གྲུབ་ཡེ་ཤེས་དངོས་གྲུབ་སྩོལ༔ ས་ཀརྨ་ཌཱཀྐི་ནི་ཀྲི་ཏ་མུ་ཁ་བཛྲ་ཨ་ཝེ་ཤ་ཡ་ཨ་ཨ་ཕཻཾ་ཕཻཾ་ཛ་ཛ༔ ཕཊཿ ཀྱེ་མ་མི་མིན་ཡེ་ཤེས་མཁའ་འགྲོ་མ༔ འོག་ས་སྤྱོད་རིགས་ཀྱི་མཁའ་འགྲོ་མ༔ མ་མཁའ་འགྲོ་བྱེ་བ་འབུམ་དང་བཅས༔ ཁྱེད་བྱ་རྒོད་ཐང་ནག་འབུམ་དུ་སྤྲུལ༔ ཡུལ་འདི་རུ་འུར་འུར་ཤིག་ཤིག་བྱོན༔ ལུས་ཤ་ཁྲག་དམར་གྱི་ཚོགས་ལ་རོལ༔ རྐྱེན་ཟ་འདྲེ་ཤི་གཤེད་རྡུལ་དུ་རློགས༔ སེམས་སྐྱེ་མེད་ཆོས་ཀྱི་དབྱིངས་སུ་སྤོར༔ དོན་རང་གྲོལ་ཡེ་ཤེས་དངོས་གྲུབ་སྩོལ༔ ཨོཾ་བི་ཤྭ་ཛྙཱ་ན་ཌཱཀྐི་ནི་ཀྲི་ཏ་མུ་ཁ་བཛྲ་ཨ་ཝེ་ཤ་ཡ་ཨ་ཨ་ཕཻཾ་ཕཻཾ་ཛ་ཛ༔ ཕཊཿ ཀྱེ་ཕྱོགས་བཞི་མཚམས་བརྒྱད་སྟེང་འོག་ནས༔ ཡེ་ཤེས་འཇིག་རྟེན་མཁའ་འགྲོ་དང༔ དམ་ཚིག་ཤ་ཟ་མཁའ་འགྲོ་མ༔ ཁྱེད་རྣམས་བྱ་ཆེན་བྱ་ཕྲན་དང༔ མི་མིན་ཀེང་རུས་གཟུགས་སུ་སྤྲུལ༔ དུར་ཁྲོད་བམ་གྱི་ཚོགས་ལ་རོལ༔ ཤ་ཟོ་ཁྲག་འཐུང་རུས་པ་མུར༔ སྐྲ་སེན་ལྤགས་པ་ཀླད་རྐང་རུས༔ ལྷག་མ་མེད་པར་འདི་བཞེས་ཤིག༔ ཏིལ་འབྲུ་ཙམ་ཡང་མེད་པར་མཛོད༔ འབྲེལ་བ་ཐོགས་ཚད་སངས་རྒྱས་ནས༔ བུ་ལོན་ཤ་འཁོན་བྱང་གྱུར་ཅིག༔ ག་ཏེ་མ་ཎི་སིདྡྷི་སོགས༔ གཟུངས་སྔགས་དུ་མའི་འཛབ་དབྱངས་སྒྲོགས༔ བྱ་རྒོད་ཕྱོགས་མཚམས་ཀུན་ནས་ལྡིང༔ ཕུང་པོ་ལྷག་ཤུལ་མེད་པར་བྱེད༔ ཡེ་ཤེས་ཌཱཀྐིའི་ཐ་ཚིག་ཡོད༔ ཐོད་པ་བྷ་དྲའི་ཁྱད་ཆོས་ཡིན༔ མི་བསླུ་མི་བསླུ་བསླུ་མི་འགྱུར༔ བརྟུལ་ཞུགས་སྙིང་རྗེའི་ཐབས་ལྡན་ན༔ སྦྱིན་བྱ་སྦྱིན་བྱེད་སྦྱིན་ཡུལ་ཀུན༔ ཚོགས་གཉིས་རབ་རྫོགས་སངས་རྒྱས་ཐོབ༔ འདི་ལས་ཚེགས་ཆུང་དོན་ཆེ་མེད༔ དེ་ཕྱིར་རྗེས་འཇུག་ཉམས་ལེན་མཛོད༔ ས་མ་ཡཱ༔ གུ་ཧྱ༔ བརྡ་ཐིམ༔ ཞེས་པའི་བྱ་འབོད་ཤ་ཁྲག་སྟོན་འགྱེད་འདི༔ རང་སློབ་འཇམ་དབྱངས་ཉི་མ་ཞེས༔ འཇིགས་མེད་བརྟུལ་ཞུགས་ལམ་དུ་སློང༔ དུར་ཁྲོད་བམ་རོ་དམར་འགྱེད་ཚེ༔ སྤྲུལ་མིང་ས་ར་ཧི་ཏ་ཡིས༔ རིག་རྩལ་གསང་བའི་སྒྲོམ་ནས་བཏོན༔ སྐལ་ལྡན་དེ་ལ་གཏད་རྒྱས་བཏབ༔ འཁྲུལ་མེད་བཙན་ས་ཟིན་པར་ཤོག༔ མངྒ་ལ༔ ཤུ་བྷཾ༔