ཉི་ཤུ་པ་བརྗོད་བྱ་རྗོད་བྱེད་ཀྱི་རྣམ་བཞག་བཤད་པ།

ཉི་ཤུ་པ་བརྗོད་བྱ་རྗོད་བྱེད་ཀྱི་རྣམ་བཞག་བཤད་པ་ལ།

དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། མིང་ཡིན་ན་དོན་གྱི་ངོ་བོ་ཙམ་སྟོན་པའི་སྒྲ་ཡིན་པས་ཁྱབ་ཟེར་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། དོན་གྱི་ངོ་བོ་ཙམ་སྟོན་པའི་སྒྲ་ཡིན་པར་ཐལ། མིང་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། མིང་ཡིན་པར་ཐལ། ཁྱོད་སྒྲ་མི་རྟག་པའི་མིང་ཡིན་པའི་ཕྱིར། མ་གྲུབ་ན། སྒྲ་མི་རྟག་པ་ཆོས་ཅན། ཁྱོད་ཅེས་བརྗོད་པའི་སྒྲ་ཁྱོད་ཀྱི་མིང་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། རྩ་བར་འདོད་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། དོན་གྱི་ངོ་བོ་ཙམ་སྟོན་པའི་སྒྲ་མ་ཡིན་པར་ཐལ། དོན་གྱི་ངོ་བོ་དང་ཁྱད་པར་སྦྱར་ནས་སྟོན་པའི་སྒྲ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། སྒྲ་དང་སྒྲའི་ཁྱད་པར་མི་རྟག་པ་གཉིས་སྦྱར་ནས་སྟོན་པའི་སྒྲ་ཡིན་པའི་ཕྱིར། དེར་ཐལ། སྒྲ་མི་རྟག་པ་སྟོན་པའི་སྒྲ་ཡིན་པའི་ཕྱིར། ཁ་ཅིག་ན་རེ། རྣམ་འགྲེལ་ལས།ཡི་གེ་དོན་མེད་ཅན་འགྱུར་ཞིང༌། །ཞེས་པའི་དོན་དུ་བསམ་ནས། ཡི་གེ་ཡིན་ན་རྗོད་བྱེད་ཀྱི་སྒྲ་མ་ཡིན་པས་ཁྱབ་ཟེར་ན། བ་ལང་ཞེས་པའི་སྒྲ་ཆོས་ཅན། རྗོད་བྱེད་ཀྱི་སྒྲ་མ་ཡིན་པར་ཐལ། ཡི་གེ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། མཛོད་འགྲེལ་ལས། མིང་གི་མཐའ་ནི་ཡི་གེ་སྟེ། །དཔེར་ན་བ་ལང་ཞེས་པའི་སྒྲ་ལྟ་བུའོ། །ཞེས་གསུངས་པའི་ཕྱིར་རོ། །གོང་དུ་འདོད་མི་ནུས་ཏེ། མིང་ཡིན་པའི་ཕྱིར། མ་གྲུབ་ན། དེ་ཆོས་ཅན། མིང་ཡིན་པར་ཐལ། བ་ལང་གི་མིང་ཡིན་པའི་ཕྱིར། ཁ་ཅིག་ན་རེ། ཡི་གེ་ཡིན་ན་མིང་ཡིན་པས་ཁྱབ་ཟེར་ན། མིང་ཚིག་ཡི་གེ་གསུམ་དུ་ཕྱེ་བའི་ཡི་གེ་ཆོས་ཅན། མིང་ཡིན་པར་ཐལ། ཡི་གེ་ཡིན་པའི་ཕྱིར། རྩ་བར་འདོད་མི་ནུས་ཏེ། དོན་གྱི་ངོ་བོ་མི་སྟོན་པའི་ཕྱིར། དེར་ཐལ།དེས་དོན་མི་སྟོན་པའི་ཕྱིར། རྣམ་འགྲེལ་ལས། ཡི་གེ་དོན་མེད་ཅན་འགྱུར་ཞིང༌། །ཞེས་གསུངས་པའི་ཕྱིར། ཁ་ཅིག་ན་རེ། ཆོས་དེའི་མིང་ཡིན་ན་ཆོས་དེའི་དངོས་མིང་ཡིན་པས་ཁྱབ་ཟེར་ན། ཉི་མའི་དཀྱིལ་འཁོར་ལ་ཉི་མ་ཞེས་བརྗོད་པའི་སྒྲ་ཆོས་ཅན། དེའི་དངོས་མིང་ཡིན་པར་ཐལ། མིང་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། བཏགས་མིང་ཡིན་པའི་ཕྱིར། དེ་ཆོས་ཅན།དེར་ཐལ། ཉི་མའི་དཀྱིལ་འཁོར་ལ་འབྲེལ་བ་རྒྱུ་མཚན་དུ་བྱས་ནས་བཏགས་པའི་མིང་ཡིན་པའི་ཕྱིར། རྩ་བར་འདོད་ན། ཉི་མའི་དཀྱིལ་འཁོར་ཆོས་ཅན། ཉི་མ་ཡིན་པར་ཐལ། ཉི་མ་ཞེས་བརྗོད་པའི་སྒྲ་དངོས་མིང་དུ་འཇུག་པའི་གཞི་ཡིན་པའི་ཕྱིར། ཉི་མའི་དཀྱིལ་འཁོར་ཆོས་ཅན། གང་ཟག་ཡིན་པར་ཐལ། ཉི་མ་ཡིན་པའི་ཕྱིར། འདོད་མི་ནུས་ཏེ། གཟུགས་ཡིན་པའི་ཕྱིར། ཁ་ཅིག་ན་རེ། ཆོས་དེ་ཞེས་པའི་སྒྲ་དངོས་མིང་དུ་འཇུག་པའི་གཞི་ཡིན་ན། ཆོས་དེ་ཡིན་པས་ཁྱབ་ཟེར་ན། ཀ་བའི་ལྡོག་པ་ཆོས་ཅན། ཀ་བའི་ལྡོག་པ་ཡིན་པར་ཐལ། ཀ་བའི་ལྡོག་པ་དངོས་མིང་དུ་འཇུག་པའི་གཞི་ཡིན་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཁྱོད་ཅེས་པའི་སྒྲའི་དངོས་མིང་དུ་འཇུག་པའི་གཞི་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། ཁ་ཅིག་ན་རེ། ཆོས་དེའི་མིང་ཡིན་ན་ཆོས་དེའི་དངོས་མིང་དང་བཏགས་མིང་གང་རུང་ཡིན་པས་ཁྱབ་ཟེར་ན། ཤེས་བྱ་ཞེས་བརྗོད་པའི་སྒྲ་ཆོས་ཅན། དངོས་པོའི་དངོས་མིང་དང་བཏགས་མིང་གང་རུང་ཡིན་པར་ཐལ། ཁྱོད་དངོས་པོའི་མིང་ཡིན་པའི་ཕྱིར། དེར་ཐལ། ཁྱོད་དངོས་པོའི་སྤྱི་མིང་ཡིན་པའི་ཕྱིར། རྩ་བར་འདོད་ན། ཤེས་བྱ་ཞེས་བརྗོད་པའི་སྒྲ་ཆོས་ཅན། དངོས་པོའི་དངོས་མིང་དང་བཏགས་མིང་གང་རུང་མ་ཡིན་པར་ཐལ། དངོས་པོའི་དངོས་མིང་མ་ཡིན་པ་གང་ཞིག བཏགས་མིང་མ་ཡིན་པའི་ཕྱིར། དང་པོ་མ་གྲུབ་ན། དེ་ཆོས་ཅན། དངོས་པོའི་དངོས་མིང་མ་ཡིན་པར་ཐལ། དངོས་པོའི་སྤྱི་མིང་ངམ་ཐུན་མོང་གི་མིང་ཡིན་པའི་ཕྱིར། དེར་ཐལ། ཤེས་བྱ་ཞེས་བརྗོད་པའི་སྒྲ་དེ་ཤེས་བྱའི་གསལ་བའི་དབྱེ་བ་མཐའ་དག་གི་ཐུན་མོང་གི་མིང་ཡིན་པའི་ཕྱིར། རྟགས་གཉིས་པ་མ་གྲུབ་ན། དངོས་པོ་ཆོས་ཅན། ཤེས་བྱ་མ་ཡིན་པར་ཐལ། ཁྱོད་ལ་ཤེས་བྱ་ཞེས་བརྗོད་པའི་སྒྲ་བཏགས་མིང་དུ་འཇུག་པའི་ཕྱིར། རྟགས་ཁས། ཁ་ཅིག་ན་རེ། ཆོས་དེའི་མིང་ཡིན་ན་ཆོས་དེ་ལ་འཇུག་པས་ཁྱབ་ཟེར་ན། མི་སྟོབས་ལྡན་ལ་སེངྒེ་ཞེས་བརྗོད་པའི་སྒྲ་ཆོས་ཅན། ཁྱོད་མི་སྟོབས་ལྡན་ལ་འཇུག་པར་ཐལ། ཁྱོད་མི་སྟོབས་ལྡན་གྱི་མིང་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། མི་སྟོབས་ལྡན་གྱི་བཏགས་མིང་ཡིན་པའི་ཕྱིར། དེར་ཐལ། མི་དེ་ལ་སྟོབས་ཆེ་བ་རྒྱུ་མཚན་དུ་བྱས་ནས་སེངྒེ་ཞེས་བཏགས་པ་ཡིན་པའི་ཕྱིར། རྩ་བར་འདོད་ན། མི་སྟོབས་ལྡན་ཆོས་ཅན། ཁྱོད་ལ་སེངྒེ་ཞེས་པའི་མིང་ཁྱོད་ལ་མི་འཇུག་པར་ཐལ། ཁྱོད་སེངྒེ་མ་ཡིན་པའི་ཕྱིར། ཁ་ཅིག་ན་རེ། རྗོད་བྱེད་ཀྱི་སྒྲ་ཡིན་ན་རིགས་བརྗོད་ཀྱི་སྒྲ་ཡིན་པས་ཁྱབ་ཟེར་ན། བུམ་པའི་ལྡོག་པ་ཞེས་བརྗོད་པའི་སྒྲ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། འདོད་ན། བུམ་པའི་ལྡོག་པ་ཆོས་ཅན། ཁྱོད་ཅེས་པའི་སྒྲ་རིགས་བརྗོད་ཀྱི་སྒྲ་མ་ཡིན་པར་ཐལ། ཁྱོད་རིགས་སྤྱི་མ་ཡིན་པའི་ཕྱིར། དེར་ཐལ། ཁྱོད་ཀྱི་བྱེ་བྲག་མེད་པའི་ཕྱིར། ཁ་ཅིག་ན་རེ། རིགས་བརྗོད་ཀྱི་སྒྲ་དང༌། ཚོགས་བརྗོད་ཀྱི་སྒྲ་གཉིས་འགལ་བ་ཡིན་ཟེར་ན། དེ་མི་འཐད་པར་ཐལ། རི་བོ་ཞེས་བརྗོད་པའི་སྒྲ་དེ་དེ་གཉིས་ཀའི་གཞི་མཐུན་པ་ཡིན་པའི་ཕྱིར། མ་གྲུབ་ན། རི་བོ་ཞེས་བརྗོད་པའི་སྒྲ་ཆོས་ཅན། རིགས་བརྗོད་དང་ཚོགས་བརྗོད་ཀྱི་སྒྲ་གཉིས་ཀ་ཡིན་པར་ཐལ། རིགས་བརྗོད་ཀྱི་སྒྲ་ཡིན་པ་གང་ཞིག ཚོགས་བརྗོད་ཀྱི་སྒྲ་ཡིན་པའི་ཕྱིར། དང་པོ་མ་གྲུབ་ན། རི་བོ་ཆོས་ཅན། ཁྱོད་ཅེས་པའི་སྒྲ་རིགས་བརྗོད་ཀྱི་སྒྲ་ཡིན་པར་ཐལ། ཁྱོད་རིགས་སྤྱི་ཡིན་པའི་ཕྱིར། གཉིས་པ་མ་གྲུབ་ན། རི་བོ་ཆོས་ཅན། ཁྱོད་ཅེས་པའི་སྒྲ་ཚོགས་བརྗོད་ཀྱི་སྒྲ་ཡིན་པར་ཐལ། ཁྱོད་ཚོགས་སྤྱི་ཡིན་པའི་ཕྱིར། ཁ་ཅིག་ན་རེ། ཆོས་བརྗོད་ཀྱི་སྒྲ་དང་ཆོས་ཅན་བརྗོད་པའི་སྒྲ་གཉིས་འགལ་ཟེར་ན། དེ་མི་འཐད་པར་ཐལ། སྒྲ་མི་རྟག་ཅེས་བརྗོད་པའི་སྒྲ་དེ་དེ་གཉིས་ཀའི་གཞི་མཐུན་པ་ཡིན་པའི་ཕྱིར། མ་གྲུབ་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། དེ་གཉིས་ཀ་ཡིན་པར་ཐལ། ཆོས་བརྗོད་ཀྱི་སྒྲ་ཡིན་པ་གང་ཞིག ཆོས་ཅན་བརྗོད་པའི་སྒྲ་ཡིན་པའི་ཕྱིར། རྟགས་དང་པོ་མ་གྲུབ་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། ཆོས་བརྗོད་ཀྱི་སྒྲ་ཡིན་པར་ཐལ། མི་རྟག་པ་ལ་ལྟོས་ཏེ་ཆོས་བརྗོད་ཀྱི་སྒྲ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། སྒྲ་ཁྱད་གཞི་དང་མི་རྟག་པ་དེའི་ཁྱད་ཆོས་ལྟ་བུར་བརྗོད་པའི་སྒྲ་ཡིན་པའི་ཕྱིར། རྟགས་གཉིས་པ་མ་གྲུབ་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། ཆོས་ཅན་བརྗོད་པའི་སྒྲ་ཡིན་པར་ཐལ། སྒྲ་ལ་ལྟོས་ཏེ་ཆོས་ཅན་བརྗོད་པའི་སྒྲ་ཡིན་པའི་ཕྱིར། དེར་ཐལ། སྒྲ་ཁྱད་གཞི་དང་མི་རྟག་པ་དེའི་ཁྱད་ཆོས་ལྟ་བུར་བརྗོད་པ་ཡིན་པའི་ཕྱིར། ཁ་ཅིག་ན་རེ། སྤྱིར་ཆོས་བརྗོད་ཀྱི་སྒྲ་དང་ཆོས་ཅན་བརྗོད་པའི་སྒྲ་གཉིས་མི་འགལ་ཀྱང་གཞི་གཅིག་ལ་ལྟོས་ཏེ་དེ་གཉིས་འགལ་བ་ཡིན་ཟེར་ན། དེ་མི་འཐད་པར་ཐལ། གཞི་གཅིག་ལ་ལྟོས་ཏེ་དེ་གཉིས་ཀྱི་གཞི་མཐུན་ཡོད་པའི་ཕྱིར། དེར་ཐལ། བྱས་པ་གཅིག་པོ་ལ་ལྟོས་ནས་དེ་གཉིས་ཀྱི་གཞི་མཐུན་ཡོད་པའི་ཕྱིར། དེར་ཐལ། བྱས་པ་བྱས་པ་ཡིན་ནོ། །ཞེས་བརྗོད་པའི་སྒྲ་དེ་ཡིན་པའི་ཕྱིར།