ལྔ་བ་དེ་དག་གི་རྣམ་པ་བཅུ་དྲུག་བཤད་པ།
ལྔ་བ་དེ་དག་གི་རྣམ་པ་བཅུ་དྲུག་བཤད་པ་ལ།
སྡུག་བདེན་གྱི་རྣམ་པ་བཞི་ནི། སྡུག་བདེན་ཆོས་ཅན། མི་རྟག་པ་ཡིན་ཏེ། རེས་འགའ་སྐྱེ་བའི་ཕྱིར། སྡུག་བསྔལ་བ་ཡིན་ཏེ།ལས་ཉོན་གྱིས་གཞན་དབང་ཅན་ཡིན་པའི་ཕྱིར། སྟོང་པ་ཡིན་ཏེ། ཉེར་ཕུང་ལ་དབང་བསྒྱུར་བ་པོ་གང་ཟག་གི་བདག་གིས་སྟོང་པའི་ཕྱིར། བདག་མེད་ཡིན་ཏེ། གང་ཟག་གི་བདག་ཏུ་གྲུབ་པ་མེད་པའི་ཕྱིར། སྡུག་བདེན་གྱི་རྣམ་པ་བཞི་རྟོགས་པའི་ཡེ་ཤེས་བཞི་ནི་སྡུག་བདེན་གྱི་གནས་ཚུལ་གཙང་བདེ་རྟག་བདག་ཏུ་འཛིན་པའི་སྡུག་བདེན་ལ་ལོག་ཞུགས་ཀྱི་གཉེན་པོའོ། །