སྙིང་པོའི་མདོ་བཅུ།
སྙིང་པོའི་མདོ་བཅུ་ནི།
དེ་བཞིན་གཤེགས་པའི་སྙིང་པོའི་མདོ། རྣམ་པར་མི་རྟོག་པ་ལ་འཇུག་པའི་གཟུངས༌། ལྷ་མོ་དཔལ་ཕྲེང་སེང་གེའི་སྒྲའི་མདོ། རྔ་བོ་ཆེན་པོའི་མདོ། སོར་མོའི་ཕྲེང་བ་ལ་ཕན་པའི་མདོ། སྟོང་ཉིད་ཆེན་པོའི་མདོ། དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོ། དེ་བཞིན་གཤེགས་པའི་ཡོན་ཏན་དང༌། ཡེ་ཤེས་བསམ་གྱི་མི་ཁྱབ་པ་བསྟན་པའི་མདོ། སྤྲིན་ཆེན་པོའི་མདོ་རྒྱས་པ། མྱང་འདས་ཆེན་པོའི་མདོ་རྒྱས་བསྡུས་གསུམ་གཅིག་ཏུ་བྱས་པ་སྟེ། སྙིང་པོའི་མདོ་བཅུ་ཡིན་པར་ཆོས་རྗེ་ཀུན་མཁྱེན་གྱིས་ཞུ་དོན་སྣང་བ་ལས་གསུངས་སོ། །སྤྱིར་སྙིང་པོའི་མདོ་རྣམས་ངེས་དོན་གྱི་མདོ་ཡིན་མོད་ངེས་དོན་མདོ་བཅུ་དང་སྙིང་པོའི་མདོ་བཅུ་ཞེས་པའི་ངེས་དོན་གྱི་མདོ་ནི་སྙིང་པོའི་མདོ་མ་ཡིན་ཏེ། ངེས་དོན་དོན་དམ་བདེན་པ་བསྟན་བྱའི་གཙོ་བོར་བྱས་ནས་བསྟན་པ་ལས་སེམས་ཅན་ཀུན་གྱི་གཞི་རྒྱུད་བདེ་གཤེགས་སྙིང་པོ་རང་ཆས་སམ་ཆོས་ཉིད་ཀྱི་ཚུལ་དུ་ཡོད་པར་གསལ་བར་མ་བསྟན་པ་སྐབས་འདིའི་ངེས་དོན་གྱི་མདོའི་དོན་ཡིན་ལ། དེ་གསལ་བར་བསྟན་པ་སྐབས་འདིའི་སྙིང་པོའི་མདོའི་དོན་ནོ། །