ཉི་ཤུ་པ་ཤེས་པས་སྲིད་ལ་མི་གནས་པའི་དང༌།སྙིང་རྗེས་ཞི་ལ་མི་གནས་པའི་གཞི་ཤེས་གཉིས་ཀྱི་དོན་དང༌།སྲིད་ཞིའི་མཐའ་སོ་སོ་ནས་འགོག་བྱེད་ཀྱི་ལམ་གང་ཡིན་ཞེས་པའི་ལན།
ཉི་ཤུ་པ་ཤེས་པས་སྲིད་ལ་མི་གནས་པའི་དང༌།སྙིང་རྗེས་ཞི་ལ་མི་གནས་པའི་གཞི་ཤེས་གཉིས་ཀྱི་དོན་དང༌།སྲིད་ཞིའི་མཐའ་སོ་སོ་ནས་འགོག་བྱེད་ཀྱི་ལམ་གང་ཡིན་ཞེས་པའི་ལན།
ཤེས་པས་སྲིད་ལ་མི་གནས་པའི་དང༌། སྙིང་རྗེས་ཞི་ལ་མི་གནས་པའི་གཞི་ཤེས་གཉིས་ཀྱི་དོན་དང༌། སྲིད་ཞིའི་མཐའ་སོ་སོ་ནས་འགོག་བྱེད་ཀྱི་ལམ་གང་ཡིན་ཞེས་པའོ། །གཉིས་པ་ལན་ནི། ཐབས་ཁྱད་པར་ཅན་གྱིས་ཟིན་པའི་ཤེས་རབ་ཀྱིས་ཚུར་རོལ་ཀྱི་མཐར་མི་གནས་པའི་གཞི་ཤེས་དེ། ཤེས་པས་སྲིད་ལ་མི་གནས་པའི་གཞི་ཤེས་ཀྱི་མཚན་ཉིད། དུས་གསུམ་མཉམ་པ་ཉིད་དུ་རྟོགས་པས་ཚུར་རོལ་གྱི་མཐའ་ལ་མི་གནས་པའི་གཞི་ཤེས་དེ། འདིར་དངོས་བསྟན་གྱི་ཤེས་པས་སྲིད་ལ་མི་གནས་པའི་གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། དུས་གསུམ་མཉམ་ཉིད་དུ་ཤེས་པས་སྲིད་པ་ལ་མི་གནས་པའི་གཞི་ཤེས་ཀྱི་མཚན་ཉིད། ཆོས་ཀུན་བདེན་པའི་རང་བཞིན་མེད་པར་རྟོགས་པས་ཚུར་རོལ་ཀྱི་མཐར་མི་གནས་པའི་གཞི་ཤེས། ཞེས་གསུངས་པའི་ཕྱིར་རོ། །ཤེས་རབ་ཁྱད་པར་ཅན་གྱི་ཟིན་པའི་གཞན་དོན་ཁུར་ཁྱེར་གྱིས་བསམ་པས་ཕ་རོལ་གྱི་མཐར་ལ་མི་གནས་པའི་གཞི་ཤེས་དེ། སྙིང་རྗེས་ཞི་ལ་མི་གནས་པའི་གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། གཉིས་པ་སྙིང་རྗེ་ཆེན་པོས་ཞི་བ་ལ་མི་གནས་པའི་གཞི་ཤེས་ཀྱི་མཚན་ཉིད། མཁའ་མཉམ་སེམས་ཅན་གྱི་དོན་བྱེད་པའི་བསམ་པས་ཕ་རོལ་གྱི་མཐར་མི་གནས་པའི་གཞི་ཤེས། ཞེས་གསུངས་པའི་ཕྱིར་རོ། །གཉིས་པ་དབྱེ་བ་ནི། ཤེས་པས་སྲིད་ལ་མི་གནས་པའི་གཞི་ཤེས་ལ་རང་ཡིན་གྱི་མི་རྟག་བཅུ་དྲུག་རྟོགས་པའི་ཡེ་ཤེས་དང་སྟོང་ཉིད་རྟོགས་པའི་ཡེ་ཤེས་སོགས་ཡོད།སྙིང་རྗེས་ཞི་ལ་མི་གནས་པའི་གཞི་ཤེས་ལ་རང་ཡིན་གྱི་དམིགས་མེད་ལ་དམིགས་པའི་སྙིང་རྗེ་སོགས་གསུམ་ཡོད་དོ། །གསུམ་པ་ས་མཚམས་ནི། དམན་ལམ་སྔོན་སོང་གི་དྲུག་པ་ལྷག་བསམ་ནས་སངས་རྒྱས་ཀྱི་སའི་བར་ཏུ་ཡོད་དོ། །བཞི་བ་སྲིད་ཞིའི་མཐའ་ལྟུང་བ་འགོག་ཚུལ་ནི། ཉ་ཊཱིཀ་ལས། བྱང་འཕགས་མཉམ་གཞག་གི་ཤེར་ཕྱིན་པ་ཆོས་ཅན།ཚུ༷ར་རོ༷ལ་འཁོར་བ་ཕ༷་རོ༷ལ་མྱང་འདས་ཀྱི་མཐ༷འ་གཉིས་ལ༷་སྟེ་གཉིས་སུ་གནས་པ་མི༷ན་འཁོར་འདས་དེ་དག་གི་བར་ན་ཡང་མཚན་མར་གཟུང་ནས་གནས་པ་མིན་ཏེ། དུ༷ས་གསུམ་གྱིས་ཆོས་མདོ་རྣ༷མས་དོན་དམ་པར་སྐྱེ་བ་སོགས་མེད་པར་མཉ༷མ་པ༷་ཉི༷ད་དུ་མངོན་སུམ་དུ་ཤེ༷ས་པའི་ཡེ་ཤེས་སྙིང་རྗེ་ཆེན་པོ་ཅན་ཡིན་པའི་ཕྱི༷ར་ཞེས་མདོ་ལས་འདོ༷ད་དོ། །བྱང་སེའི་ཤེར་པ་ནི་ཚུར་རོལ་གྱི་འགྲམ་མམ། ཕ་རོལ་གྱི་འགྲམ་མམ། གཉིས་ཀའི་དབུས་ན་མི་དམིགས་ཏེ། ཞེས་ནས། རབ་འབྱོར་དུས་གསུམ་མཉམ་པ་ཉིད་ཀྱི་ཕྱིར་རོ་ཞེས་སོ། །ཞེས་དང༌། རྒྱན་གྱི་ས་འགྲེལ་ལས། མདོ་ལས། འདི་ལྟར་གང་ཅི་ཚོར་ཡང་རུང་དེ་ནི་འདིར་སྡུག་བསྔལ་ལོ། །ཞེས་གསུངས་པ་ལྟར་མ་ཤེས་པར་སྡུག་བསྔལ་ལ་བདེ་བར་འཛིན་པ་འཁྲུལ་བ་སྟེ་དེ་རྣམས་ནི་སྲིད་པའི་མཐར་ལྷུང་བའོ། །རང་ཉིད་གཅིག་པུ་ཞི་བའི་མྱ་ངན་ལས་འདས་པ་ལ་དགའ་བ་ཉན་ཐོས་དང་རང་སངས་རྒྱས་རྣམས་ཀྱི་སྒྲུབ་པ་ནི་རང་རང་གི་སྡུག་བསྔལ་ཉེ་བར་ལེན་པའི་རྒྱུ་ཉོན་མོངས་པ་རབ་ཏུ་ཞི་བ་ཙམ་ལ་འཇུག་པ་སྟེ། ཞི་བའི་མཐར་ལྷུང་བའོ། །སྙིང་རྗེའི་བདག་ཉིད་ཅན་བྱང་ཆུབ་སེམས་དཔའ་རྣམས་ཀྱི་སྒྲུབ་པ་ནི་ཤེས་རབ་ཀྱིས་རང་གཞན་གྱི་ཉེ་བར་ལེན་པ་ཀུན་ཞི་བར་བྱེད་པས་སྲིད་པའི་མཐའ་ལ་མི་གནས་ལ། སྙིང་རྗེ་ཆེན་པོས་ཕུང་པོ་ལྷག་མེད་དུའང་མི་ཟད་ཅིང་རྟག་པའི་སྒོ་ནས་གཞན་དོན་རྒྱུན་མི་འཆད་པས་ཞི་བའི་མཐའ་ལའང་མི་གནས་པའི་ཕྱིར་སྔ་མ་དག་ལས་མཆོག་ཏུ་གྱུར་བའོ། །ཞེས་དང༌། རྒྱུད་བླ་ཐོགས་འགྲེལ་གྱི་དོལ་མཆན་ལས། འདི་ནི་༼འཁོར་འདས་ལ་རྟོག་པས་༽མི་གནས་པའི་རང་བཞིན་ཡང་དག་པར་རྫོགས་པའི་བྱང་ཆུབ་རྗེས་སུ་ཐོབ་པའི་ཐབས་ཏེ། ཤེས་རབ་ཀྱིས་ནི་བྱང་ཆུབ་སེམས་དཔའ་སྲིད་པ་ལ་སྲེད་པའི་བག་ལ་ཉལ་མཐའ་དག་སྤངས་པས་ན། ༼བྱང་ཆུབ་སེམས་དཔའ་༽བདག་ལ་ཕན་པའི་ཕྱིར་༼ཤེས་རབ་ཀྱིས་༽མྱ་ངན་ལས་འདས་པ་ལ་བརྟེན་པའི་བསམ་པ་ཅན་ཡིན་པས་ཡོངས་སུ་མྱ་ངན་ལས་མི་འདའ་བའི་རིགས་ཅན་བཞིན་དུ་འཁོར་བ་ལ་སྲེད་པས་མི་གནས་ལ། སྙིང་རྗེ་ཆེན་པོས་སྡུག་བསྔལ་བའི་སེམས་ཅན་ཡོངས་སུ་མ་བཏང་པས་ནི། གཞན་ལ་ཕན་པའི་ཕྱིར་སྙིང་རྗེས་འཁོར་བ་ལ་བརྟེན་པའི་སྦྱོར་བ་ཅན་ཡིན་པས། ཞི་བ་བགྲོད་པ་གཅིག་པའི་རིགས་ཅན་༼གྱི་ཉན་ཐོས་༽བཞིན་དུ་མྱ་ངན་ལས་འདས་པ་ལ་༼ཡོན་ཏན་དུ་རྟོག་པས་༽མི་གནས་སོ། །དེ་ལྟར་ན་༼ཤེས་རབ་དང་སྙིང་རྗེའི་༽ཆོས་འདི་གཉིས་ནི་བླ་ན་མེད་པའི་བྱང་ཆུབ་ཀྱི་རྩ་བའི་གནས་སུ་བསྟན་པ་ནི། བདག་ལ་སྲེད་པ་མ་ལུས་པ་ཤེས་རབ་ཀྱིས་རྒྱུན་བཅད་དེ། སེམས་ཅན་གྱི་དོན་ལ་སྲེད་ཕྱིར་བརྩེ་ལྡན་རང་གཅིག་པུ་ཞི་བ་འཐོབ་པ་ཡིན། དེ་ལྟར་བློ་དང་བརྩེ་བ་སྟེ་བྱང་ཆུབ་ཐོབ་པའི་ཐབས་དེ་གཉིས་ལ་བསྟེན་ནས། ཐེག་ཆེན་གྱི་འཕགས་པ་འཁོར་བ་འམ་མྱ་ངན་ལས་འདས་༼པ་སྲིད་ཞི་ལ་གནས་པར་གློ་བུར་གྱི་དྲི་མ་དག་པར་བྱ་རྒྱུ་༽མི་འགྱུར་རོ། །ཞེས་དང༌། རྒྱུད་བླ་ས་འགྲེལ་ལས། མཐའ་གཉིས་ལས་གྲོལ་ཚུལ་ནི། བདག་སྲེད་མ་ལུས་ཤེས་རབ་ཀྱིས་བཅད་དེ། །སེམས་ཅན་སྲེད་ཕྱིར་བརྩེ་ལྡན་ཞི་ཐོབ་མིན། །དེ་ལྟར་བློ་བརྩེ་བྱང་ཆུབ་ཐབས་བརྟེན་ནས། །འཕགས་པ་འཁོར་བའམ་མྱ་ངན་མི་འདའ་འགྱུར། །ཞེས་པ་སྟེ། ཕུང་པོ་ལ་བདག་ཏུ་སྲེད་ཅིང་ཆགས་པ་བག་ལ་ཉལ་དང་བཅས་པ་མ་ལུས་པ་བདག་མེད་རྟོགས་པའི་ཤེས་རབ་ཀྱིས་བཅད་དེ་སྤངས་པའི་ཕྱིར་འདོད་ཆེན་པ་བཞིན་དུ་སྲིད་པའི་མཐར་ལྷུང་བ་མ་ཡིན་ལ། སྙིང་རྗེ་ཆེན་པོས་སེམས་ཅན་ཐམས་ཅད་ལ་སྲེད་ཅིང་ཆགས་པས་དེ་དག་གི་དོན་སྒྲུབ་པའི་ཕྱིར་བརྩེ་ལྡན་བྱང་ཆུབ་སེམས་དཔའ་རྣམས་ཉན་ཐོས་དང་རང་སངས་རྒྱས་བཞིན་དུ་སྡུག་བསྔལ་ཞི་བ་ཙམ་ཐོབ་པའི་མཐར་ལྷུང་བ་ཡང་མིན་པ་དེ་ལྟར་ན། བདག་མེད་རྟོགས་པའི་ཤེས་རབ་ཀྱི་བློ་དང་སེམས་ཅན་ལ་དམིགས་པའི་བརྩེ་བ་སྙིང་རྗེ་ཆེན་པོ་སྟེ། བླ་ན་མེད་པའི་བྱང་ཆུབ་ཐོབ་པའི་ཐབས་ཁྱད་པར་ཅན་གཉིས་པོ་དེ་དག་ལ་བརྟེན་ནས་གོམས་པར་བྱས་པའི་རྒྱལ་སྲས་འཕགས་པ་རྣམས་ནི། སྲིད་པ་འཁོར་བའམ་ཞི་བ་མྱ་ངན་ལས་འདས་པ་གང་རུང་གི་མཐའ་ལས་གནས་པར་མི་འགྱུར་ཞིང༌། མི་གནས་པའི་མྱ་ངན་ལས་འདས་པ་མངོན་དུ་བྱེད་དོ་ཞེས་བྱ་བའི་དོན་ནོ། །ཇི་སྐད་དུ་འཕགས་པ་ཀླུ་སྒྲུབ་ཀྱིས། ཤེས་པས་སྲིད་ལ་མི་གནས་ཤིང༌། །སྙིང་རྗེས་ཞི་ལ་མི་གནས་ཏེ། །མྱ་ངན་འདས་དང་འཁོར་མི་གནས། །མི་གནས་ཁྱོད་ལ་ཕྱག་འཚལ་བསྟོད། །ཅེས་གསུངས་པ་ལྟར་རོ། །ཞེས་གསུངས་པའི་ཕྱིར་རོ། །རིགས་ངེས་ཉན་རང་གཉིས་ཡང་དག་པའི་ཤེར་ཕྱིན་ལས་རིང་ཚུལ་ནི། ཉ་ཊཱིཀ་སྐབས་ལྔ་བ་ལས། གནས་སྐབས་ཉན་ཐོས་སུ་རིགས་ངེས་པའི་སྦྱོར་ལམ་པ་ཆོས་ཅན། རྟོགས་པ་དམན་པ་ཅན་ཡིན་ཏེ། སྲི༷ད་པ་འཁོར་བ་དང་ཞི་བ་མྱང་འདས་གང་རུང་ཞིག་ཏུ་ལྟུ༷ང་བ༷འི་རྟོགས་པ་ཅན་ཉིད་ཀྱིས་ཕྱིར་རོ། །ཞེས་དང༌། མདོ་ལུགས་མ་ལས། ཐབས་མེད་ཤེས་རབ་བྲལ་བས་སྲི༷ད་ད༷ང་ཞི༷་བ༷ར་རྟོ༷གས་པ༷འི་མཚན་འཛིན་དུ་ལྟུང་བའི་ཕྱི༷ར། ཉན་རང་གི་རྟོ༷གས་པ༷་དམ༷ན་པ༷་ཉི༷ད་ད༷ང༌། ཞེས་དང༌། ཉ་ཊཱིཀ་ལས། གནས་སྐབས་རིགས་ངེས་པའི་ཉན་ཐོས་དང་སོགས་པ་རང་རྒྱལ་འཕགས་པ་ཆོས་ཅན། ཡང་དག་པའི་ཤེར་པ་མཚན་ཉིད་པ་རང་རྒྱུད་ལ་ཡོད་པ་དང་རིང་བར་གྱུར་པ་ཡིན་ཏེ། དུས་གསུམ་བདེན་མེད་དུ་མཉམ་པ་ཉིད་ཤེས་པ་རང་རྒྱུད་ལ་མེད་པའི་ཕྱིར། དེས་ན་དེ་ཆོས་ཅན། འཁོར་འདས་གང་རུང་ལ་གནས་པ་ཡིན་པར་ཤེས་པར་བྱའོ། །སེམས་ཅན་ཀུན་ལ་སྙིང་བརྩེ་བའི་སེམས་དང༌། རང་བཞིན་མེད་རྟོགས་ཀྱི་ཤེས་རབ་ཟབ་མོ་དང་བྲལ་བའི་རང་གི་རྟོགས་པ་ཙམ་གྱི་ཤེར་པ་སྟེ་གཞི་ཤེས་ཅན་དུ་གནས་སྐབས་རིགས་ངེས་པ་ཡིན་པའི་ཕྱིར། རྟཊ་གྲུབ་སྟེ། དེ་འདྲའི་ཤེས་རབ་དང་བྲལ་ཏེ། མྱང་འདས་རྟག་པའི་དངོས་པོ་དང་འཁོར་བ་མི་རྟག་སྡུག་བསྔལ་ལ་སོགས་པའི་ཚུལ་གྱིས་ སྤང་བྱ་ཡིན་པས་དངོས་པོ་མེད་པར་རམ། གཟུགས་སོགས་དོན་དམ་གྱི་དངོས་པོ། ལྷག་མེད་ཕུང་བོའི་དངོས་པོ་མེད་པར་དམིགས་ཤིང་ཞེན་པ་ཉིད་ཀྱིས་སོ། །དེ་འདྲའི་ལམ་མདོ་བསྟན་བཅོས་སུ་བཤད་པ་མེད་དོ་ཞེ་ན། དེ་འདྲའི་ཤེས་རབ་སྙིང་རྗེ་དང་བྲལ་བས་འཁོར་འདས་ལ་གནས་པའི་ལམ་ཆོས་ཅན། སྐབས་འདིར་མདོ་བསྟན་བཅོས་ལས་མ་བསྟན་པ་མིན་ཏེ། ཀུན་ཤེས་པ་ཉིད་ཀྱི་སྐབས་སུ་གཉེན་པོ་ཀུན་ཤེས་དུས་གསུམ་མཉམ་ཉིད་དུ་ཤེས་པས་འཁོར་འདས་བར་གསུམ་ལ་མི་གནས་པར་དངོས་སུ་བསྟན་པ་ལས་བཟློག་སྟེ་ཤུགས་ལ་བསྟན་པའི་ཕྱིར་རོ། །ཞེས་ཁ་ཆེ་གཞོན་ནུ་དཔལ་ལོ། །ཞེས་གསུངས་སོ། །གཞི་ཤེས་སྤང་བྱ་ཡིན་པར་ཐལ། ཉ་ཊཱིཀ་ལས། སྤང་བྱ་གཞི་ཐམས་ཅད་ཡོངས་སུ་ཤེས་པའི་གཞི་ཤེས་ཁོང་དུ་ཆུད་པ་མེད་པར་དེའི་གཉེན་པོ་ལམ་ལེགས་པར་ཡོངས་སུ་ཤེས་པ་མེད་དེ། གཉེན་པོ་ནི་སྤང་བྱ་ལ་ལྟོས་ནས་བཞག་པས་སོ། །ཞེས་དང༌། སྤང་བྱར་མི་འཐད་དེ་གཉེན་པོར་འགྱུར་བས་སོ། །ཞེ་ན། ཆོས་ཅན། མ་དད་པ་ལ་སོགས་པའི་གཉེན་པོ་ཡིན་ཏེ། སངས་རྒྱས་ལ་དམིགས་པའི་བསོད་ནམས་ཀྱི་ཚོགས་ཀྱི་རྒྱུ་ཡིན་པ་ཉིད་ཀྱིས་སོ། །དེ་ལྟ་མོད་ཀྱི་སྤང་བྱ་རྣམ་པ་ཐམས་ཅད་དུ་སྟེ་དྲུངས་འབྱིན་བྱེད་མིན་པས་སམ་གཉེན་པོ་ཁོ་ན་མ་ཡིན་པས་སྤང་བྱར་ཡང་འགྱུར་བ་ལ་འགལ་བ་མེད་དོ། །ཞེས་གསུངས་པའི་ཕྱིར་ཟེར་ན། དེ་ལ་སྤང་བྱ་དང་གཉེན་པོ་གཉིས་ཀྱི་ཡིན་པ་མེད་པར་ཐལ། རྣམ་འགྲེལ་ལས། གང་གི་སྐྱོན་མཐོང་རྣམ་པར་སུན་འབྱིན་གཉེན། །ཞེས་དང༌། གནོད་བྱ་གནོད་བྱེད་ངོ་བོའི་ཕྱིར། །འདི་ནི་སྒྲོ་འདོགས་དབེན་པ་ལ། །འཇུག་ཅེས་བྱ་བར་ཤེས་པ་ཡིན། །ཞེས་གསུངས་པའི་ཕྱིར་ཟེར་ན་དཔྱད་དོ། དབུ་མ་བཞི་བརྒྱ་བ་ལས། ཡུལ་ནི་དགེ་བས་ཡིད་འོང་ན། །དེ་ཡང་ངན་པར་བརྩི་བ་ཡིན། །ཞེས་སོགས་ཀྱིས་ཀུན་འབྱུང་དུ་གྱུར་བའི་དགེ་བ་ཟག་བཅས་རྣམས་གཉེན་པོ་ཡིན་མིན་དཔྱད། བྱང་སེམས་ཀྱི་རྒྱུད་ཀྱི་དུས་གསུམ་མཉམ་ཉིད་དུ་རྟོགས་པའི་བློ་ཆོས་ཅན། འཁོར་བའི་སྐྱོན་མཐོང་བའི་བློ་ཡིན་པར་ཐལ། སྲིད་མཐའ་འགོག་བྱེད་ཡིན་པའི་ཕྱིར། མ་ཁྱབ་སྙམ། ཁྱབ་སྟེ། སྲིད་མཐའ་འགོག་བྱེད་ལ་འཁོར་བའི་སྐྱོན་མཐོང་བའི་བློ་ཞིག་དགོས་པའི་ཕྱིར་ཏེ། དབུ་མ་སྙིང་པོ་ལས། སྐྱོན་མཐོང་ཕྱིར་ན་སྲིད་པ་མིན། །ཞེས་གསུངས་པའི་ཕྱིར་ཟེར་ན་འཁོར་བའི་སྐྱོན་མཐོང་ཚུལ་ལ་དཔྱད་པར་བྱའོ། །སྲིད་མཐའ་ལ་མི་གནས་པའི་གང་ཟག་ལ་འཁོར་བའི་སྐྱོན་མཐོང་བའི་ཁྱབ་པ་ཡོད་མེད་དཔྱད་པར་བྱའོ། །