གསུམ་པ་ཉམས་ན་ཕྱིར་བཅོས་པའི་ཚུལ།
གསུམ་པ་ཉམས་ན་ཕྱིར་བཅོས་པའི་ཚུལ་ནི།
ཀུན་དཀྲིས་ཆེན་པོ་ཚང་བའི་རྩ་ལྟུང་དང༌། སེམས་འདོར་དང༌། ལོག་ལྟའི་རྩ་ལྟུང་གང་བྱུང་ན་སྡོམ་པ་སླར་བླངས་དགོས་ལ། ཟག་འབྲིང་ནི་གང་ཟག་གསུམ་དང༌། ཟག་པ་ཆུང་ངུ་དང་ཉེས་བྱས་ཞེ་དྲུག་སོགས་གང་ཟག་གཅིག་གི་མདུན་དུ་བཤགས་པར་བྱ་ལ། བཤགས་ཡུལ། སོ་ཐར་བྱང་སེམས་གང་རུང་གི་སྡོམ་པ་དང་ལྡན་པ། ངག་གི་རིག་བྱེད་ཀྱི་ཚིག་དོན་ཁོང་དུ་ཆུད་ཅིང་འཛིན་ནུས་པ། བྱང་སྡོམ་མི་ལྡན་པ་ལ་དགེ་སློང་ཕ་མ་དགོས་ཤིང༌། རྟེན་རབ་བྱུང་ཡིན་ན་བཤགས་ཡུལ་རབ་བྱུང་ཡོད་ན་བྱང་སེམས་ཁྱིམ་པ་མི་རུང་ངོ༌། །རྟེན་གྱིས་ཕྱག་བྱས་དམའ་བའི་ཕྱོགས་སུ་ཙོག་བུར་འདུག་སྟེ་ཐལ་མོ་སྦྱར་ནས་བྱའོ། །དེ་མིན་ན་རྒྱལ་བ་སྲས་བཅས་ཀྱི་མདུན་དུ་བཤགས་པར་མོས་ཏེ། རྟེན་གྱི་དྲུང་དུ་བཤགས་པར་བྱ་ལ། དེ་ཡང་སྐྱབས་འགྲོ། སེམས་བསྐྱེད། ལྟུང་བཤགས། སྤྱི་བཤགས། རྡོར་སེམས་བསྒོམ་བཟླས་སོགས་ཀྱི་སྒོ་ནས་བཤགས་པར་བྱའོ། །ཆོ་ག་ནི་གཞན་ལས་ཤེས་པར་བྱའོ། །