གཉིས་པ་ད་ལྟར་གྱི་ཆོ་ག་བཤད་པ།

གཉིས་པ་ད་ལྟར་གྱི་ཆོ་ག་བཤད་པ་ལ།

རྩ་བར། རབ་ཏུ་བྱུང་བ་དང་བསྙེན་པར་རྫོགས་པ་དེའི་ཕྱིར། ཞེས་སོ། །འདི་ལ་སྐབས་བསྒྲུབ་པ་དང༌། དངོས་ཀྱི་དོན་གཉིས་ལས། དང་པོ་ནི། བཅོམ་ལྡན་འདས་སངས་རྒྱས་ནས་ལོ་དྲུག་ལོན་པ་ན་ད་ལྟར་གྱི་ཆོ་ག་བྱུང་སྟེ་སྒྲུབ་བྱེད་སྔར་བཤད་ཟིན་ཏོ། །ད་ལྟར་གྱི་ཆོ་གའི་གླེང་གཞི་ནི། ལུང་གཞི་ལས། སྔོན་གྱི་ཆོ་གས་རབ་ཏུ་བྱུང་ཞིང་བསྙེན་པར་རྫོགས་པ་རྣམས་ལ་མཁན་པོ་མེད་པ་དང་སློབ་དཔོན་མེད་པས་ཆོས་གོས་ལེགས་པར་མ་བགོས་ཤིང༌། སྒྲ་ཆེན་པོ་དང༌། རྒོད་བག་གི་སྤྱོད་ལམ་གྱིས་བསོད་སྙོམས་སློང་བར་བྱེད་པ་ན། མུ་སྟེགས་ཅན་འཕྱ་བར་གྱུར་པ་དང༌། དགེ་སློང་ཞིག་ན་བ་ལ་ནད་གཡོག་བྱེད་པ་མེད་པས་ཤི་བ་ལ་བརྟེན་ནས། ངའི་ཉན་ཐོས་རྣམས་གཅིག་གིས་གཅིག་བསྡུ་བའི་ཕྱིར་དང༌། ནད་པ་རྣམས་ལ་ནད་གཡོག་བྱ་བའི་ཕྱིར་མཁན་པོ་དང་སློབ་དཔོན་དག་གིས་རབ་ཏུ་འབྱུང་བ་དང་བསྙེན་པར་རྫོགས་པ་བྱ་བར་གནང་ངོ༌། །ཞེས་མཁན་སློབ་དང་བཅས་པའི་ད་ལྟར་གྱི་ཆོ་ག་འདི་གསུངས་སོ། །མཁན་པོ་དུ་ཡོད། སློབ་དཔོན་དུ་ཡོད་མི་ཤེས་ནས། སློབ་དཔོན་ནི་ལྔ། མཁན་པོ་ནི་གཉིས་སོ། །ཞེས་ལུང་གཞི་ལས་གསུངས་སོ། །སློབ་དཔོན་ལྔ་དགེ་ཚུལ་གྱི་སྐབས་སུ་འོག་ནས་སྟོན་ལ། མཁན་པོ་གཉིས་སྐབས་འདིར་བསྟན་པ་ནི། རབ་ཏུ་བྱུང་བའི་མཁན་པོ་ནི་རབ་ཏུ་བྱུང་བའི་བྱ་བ་ཐམས་ཅད་ཀྱི་སྔོན་དུ་འགྲོ་བས་དང་པོར་བསྟན་ལ། བསྙེན་རྫོགས་ཀྱི་མཁན་པོ་ནི་འདྲ་བའི་ཞར་ལ་འདྲ་བ་བསྟན་ན་ཚིག་ཉུང་བ་དང་རྟོགས་པ་སླ་བའི་ཕྱིར་ན་སྐབས་འདིར་བསྟན་པའོ། །