བཞི་བ་དེ་གཉིས་ཀྱི་དབྱེ་བ་བཤད་པའི་མཐའ་དཔྱད་པ།

བཞི་བ་དེ་གཉིས་ཀྱི་དབྱེ་བ་བཤད་པའི་མཐའ་དཔྱད་པ་ལ།

སེམས་ཀྱི་དབྱེ་བའི་སྐོར་ལ་དཔྱད་པ་དང༌། སེམས་བྱུང་གི་དབྱེ་བའི་སྐོར་ལ་དཔྱད་པ་གཉིས། དང་པོ་ནི། ཀུན་གཞི་རྣམ་ཤེས་ཆོས་ཅན། ཡུལ་གྱི་རྣམ་པ་མི་གསལ་བ་ཡིན་པར་ཐལ། སུམ་ཅུ་པ་ལས། རྣམ་པར་རིག་པ་མི་རིག་པ། །ཞེས་གསུངས་པའི་ཕྱིར། འདོད་མི་རིགས་པར་ཐལ། དེའི་མི་རིག་པ་ཞེས་པའི་དོན་འདི་དང་འདིའོ་ཞེས་མི་རིག་པ་ལ་བྱེད་དགོས་པའི་ཕྱིར། དེར་ཐལ། སུམ་ཅུ་པའི་བཤད་པ་༡༥༩ལས། ལེན་པ་འདི་ལ་འདིའོ་ཞེས་རིག་པར་མི་ནུས་པས་དེའི་ཕྱིར་མི་རིག་ཅེས་བྱའོ། །ཞེས་གསུངས་པའི་ཕྱིར། འདོད་མི་རིགས་པར་ཐལ། དེའི་དོན་རྣམ་པ་མི་གསལ་བ་ལ་བྱེད་དགོས་པའི་ཕྱིར། དེར་ཐལ། ཐེག་མཆོག་དབུ་མའི་ཟིན་བྲིས་༧༣ལས། འོན་ཀྱང་ཡུལ་གྱི་རྣམ་པ་མི་གསལ་བས་ན་མ་རིག་པའོ། །ཞེས་གསུངས་པའི་ཕྱིར། འདོད་ན། ཀུན་གཞི་རྣམ་ཤེས་ཆོས་ཅན། རང་ཡུལ་གསལ་བར་སྣང་བ་ཡིན་པར་ཐལ། རྟོག་མེད་ཀྱི་ཤེས་པ་ཡིན་པའི་ཕྱིར། དེར་ཐལ། སྤྱོར་དྲུག་སྤྱི་དོན་༥༠ལས། རིག་པ་གསལ་དང་ངེ་བའི་རྟོག་མེད་ཅིག་མངོན་དུ་གྱུར་ཏེ། དེ་ནི་འདིར་ཀུན་གཞི་རྣམ་ཤེས་དང༌། ཞེས་གསུངས་པའི་ཕྱིར་ཟེར་ན་དཔྱད། ཡང་ཀུན་གཞི་རྣམ་ཤེས་ལ་རྣམ་སྨིན་ཞིག་དགོས་པར་ཐལ། སུམ་ཅུ་པ་ལས། དེ་ལ་ཀུན་གཞི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །ཞེས་གསུངས་པའི་ཕྱིར། འདོད་ན། ལྷག་མེད་དགྲ་བཅོམ་པའི་ཀུན་གཞི་རྣམ་ཤེས་ཆོས་ཅན། རྣམ་སྨིན་ཡིན་པར་ཐལ། ཀུན་གཞི་རྣམ་ཤེས་ཡིན་པའི་ཕྱིར། འདོད་ན། དེ་མི་རིགས་པར་ཐལ། ལྷག་མེད་དགྲ་བཅོམ་པ་ལ་རྣམ་སྨིན་གྱི་ཕུང་པོའི་ལྷག་མ་མེད་པའི་ཕྱིར། དེར་ཐལ། ལྷག་མེད་དགྲ་བཅོམ་ཞེས་པའི་ལྷག་མེད་ཡིན་ཚུལ་ཡོད་པའི་ཕྱིར། ཡང་གོང་དུ་ལྷག་མེད་དགྲ་བཅོམ་པའི་ཀུན་གཞི་རྣམ་ཤེས་མེད་པར་ཐལ། དགྲ་བཅོམ་ཐོབ་པ་དེའི་ཚེ་ཀུན་གཞི་རྣམ་ཤེས་བཟློག་པ་ཡིན་པའི་ཕྱིར། དེར་ཐལ། སུམ་ཅུ་པ་ལས། དགྲ་བཅོམ་ཉིད་ན་དེ་བཟློག་གོ །ཞེས་གསུངས་པའི་ཕྱིར། འདོད་མི་ནུས་པར་ཐལ། དགྲ་བཅོམ་པའི་རྒྱུད་ལ་ཀུན་གཞི་རྣམ་ཤེས་ཡོད་པའི་ཕྱིར་ཏེ། ཀུན་བཏུས་ས་འགྲེལ་༡༣༤ལས། དགྲ་བཅོམ་པའི་ཀུན་གཞི་ལ་མ་ཁྱབ་པའི་ཕྱིར་རོ། །ཞེས་དང༌། ཟིན་བྲིས་༧༢ལས། ཇི་སྲིད་སངས་མ་རྒྱས་ཀྱི་བར་དུ་ཀུན་གཞི་ཡོད་ཀྱང་སོ་སོ་སྐྱེ་བོའི་ཀུན་གཞི་དང་ཆེས་མི་འདྲ་བ་ཡིན་ནོ། །ཞེས་གསུངས་སོ། །ཉོན་ཡིད་ཡིན་ན་ཀུན་གཞི་རྣམ་ཤེས་ལ་དམིགས་ནས་ངར་སེམས་པའི་རྣམ་པ་ཅན་འཁོར་ཉོན་མོངས་པ་བཞི་དང་འགྲོགས་པའི་གཙོ་སེམས་ཡིན་པས་ཁྱབ་པར་ཐལ། ཀུན་གཞི་རྣམ་ཤེས་ལ་དམིགས་ནས་ངར་སེམས་པའི་རྣམ་པ་ཅན་འཁོར་ཉོན་མོངས་བ་བཞི་དང་འགྲོགས་པའི་གཙོ་སེམས་དེ། ཉོན་ཡིད་ཀྱི་མཚན་ཉིད་ཡིན་པའི་ཕྱིར། འདོད་ན། ཉོན་ཡིད་ཡིན་ན་ངར་སེམས་པ་ཡིན་དགོས་པར་ཐལ། འདོད་པའི་ཕྱིར། འདོད་ན། བདག་མེད་རྟོགས་པའི་རྗེས་དཔག་མངོན་དུ་གྱུར་བའི་སོ་སོའི་སྐྱེ་བོའི་རྒྱུད་ལ་ཉོན་ཡིད་མངོན་གྱུར་དུ་མེད་པར་ཐལ། ངར་སེམས་པ་མངོན་གྱུར་བ་མེད་པའི་ཕྱིར། འདོད་ན། དེ་མི་རིགས་པར་ཐལ། བྱིས་པ་སོ་སོ་སྐྱེ་བོ་དག་ལ་ཉོན་ཡིད་རྟག་ཏུ་མངོན་དུ་གྱུར་བ་ཡིན་པའི་ཕྱིར་ཏེ། ཀུན་བཏུས་ས་འགྲེལ་༡༥༣ལས། བྱིས་པ་རྣམས་ཀྱི་རྒྱུད་ལ་ང་དགེ་བ་བྱེད་དོ་ཞེས་པ་ལ་སོགས་པ་ངར་འཛིན་རྟག་ཏུ་འབྱུང་ལ། ཞེས་གསུངས་པའི་ཕྱིར། འདོད་ན། བདག་མེད་རྟོགས་པའི་རྗེས་དཔག་མངོན་དུ་གྱུར་བའི་སོ་སོའི་སྐྱེ་བོའི་རྒྱུད་ལ་ཉོན་ཡིན་མངོན་གྱུར་དུ་ཡོད་པར་ཐལ། བྱིས་པ་སོ་སོ་སྐྱེ་བོ་དག་ལ་ཉོན་ཡིད་རྟག་ཏུ་མངོན་དུ་གྱུར་བ་ཡིན་པའི་ཕྱིར། རྟགས་ཁས། དེ་མི་རིགས་པར་ཐལ། བདག་མེད་རྟོགས་པའི་རྗེས་དཔག་དེ་ཉོན་ཡིད་ཀྱི་ཞེན་ཡུལ་མེད་པར་རྟོགས་པའི་བློ་ཡིན་པའི་ཕྱིར། དེ་འདོད་ན། བདག་མེད་རྟོགས་པའི་རྗེས་དཔག་མངོན་དུ་གྱུར་ཚེ་ཉོན་ཡིན་མངོན་གྱུར་བ་བཟློག་དུས་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཉོན་ཡིད་བཟློག་དུས་དགྲ་བཅོམ་ཐོབ་པ་དང༌། འགོག་པ་ལ་སྙོམས་པར་འཇུག་པ་དང༌། འཇིག་རྟེན་ལས་འདས་པའི་ལམ་ཐོབ་གསུམ་ལས་གཞན་མེད་པའི་ཕྱིར། དེར་ཐལ། སུམ་ཅུ་པ་ལས། རེག་སོགས་ཀྱང་དེ་དགྲ་བཅོམ་མེད། །འགོག་པའི་སྙོམས་པར་འཇུག་ན་མེད། །འཇིག་རྟེན་འདས་པའི་ལམ་ནའང་མེད། །ཞེས་གསུངས་པའི་ཕྱིར་རོ། །འཇུག་ཤེས་དྲུག་པོ་གང་རུང་ཡིན་ན་རང་ཡུལ་གཟུགས་སོགས་ལ་སོ་སོར་འཇུག་པས་ཁྱབ་པར་ཐལ། རང་ཡུལ་གཟུགས་སོགས་ལ་སོ་སོར་འཇུག་པའི་རྒྱུན་མི་བརྟན་པར་གྱུར་པའི་གཙོ་སེམས་དེ། འཇུག་ཤེས་ཀྱི་མཚན་ཉིད་ཡིན་པའི་ཕྱིར། འདོད་ན། མིག་གི་རྣམ་པར་ཤེས་པ་ཡིན་ན་རང་ཡུལ་གཟུགས་སོགས་ལ་སོ་སོར་འཇུག་པས་ཁྱབ་པར་ཐལ། དེ་ཡིན་ན་འཇུག་ཤེས་ཡིན་པའི་ཁྱབ་པས་ཕྱིར། འདོད་ན། སངས་འཕགས་ཀྱི་མིག་གི་རྣམ་པར་ཤེས་པ་ཆོས་ཅན། དེར་ཐལ། དེའི་ཕྱིར། འདོད་མི་རིགས་པར་ཐལ། སངས་འཕགས་ཀྱི་མིག་ཤེས་དོན་ལྔ་བོ་སོགས་ཆོས་ཐམས་ཅད་ལ་འཇུག་པ་ཡིན་པའི་ཕྱིར། དེར་ཐལ། མདོ་སྡེ་རྒྱན་ལས། དབང་པོ་ལྔ་རྣམས་གཞན་གྱུར་ན། །དོན་ཀུན་འཇུག་དང་ཐམས་ཅད་ཀྱི། །ཞེས་དང༌། དེའི་ས་འགྲེལ་༡༨༠ལས། དབང་པོ་ལྔ་གཞན་དུ་གྱུར་ན་དབང་པོ་ལྔ་བོ་ཐམས་ཅད་དོན་ལྔ་བོ་ཐམས་ཅད་ལ་འཇུག་པ་དང༌། ཞེས་གསུངས་པ་དང༌། འཛམ་བུ་གླིང་གི་སྦྲུལ་དང༌། བ་གླང་སྤྱོད་ཀྱི་མིའི་མིག་གི་རྣམ་པར་ཤེས་པས་དཔྱད་དོ། །