གནས་ལུགས་དོན་གྱི་ངོ་སྤྲོད་ཟུང་འཇུག་ལམ་གྱི་གཞུང་ཤིང་།

སྐྱབས་རྒྱལ་བ་ཀུན་དངོས་ཨོ་རྒྱན་རྗེ། །བདག་ཐ་མལ་སྣང་ངོར་མི་ཡི་གཟུགས། །མཚན་བརྗོད་པར་དཀའ་བའི་གཞན་ཕན་པ། །སྙིང་རུས་པའི་གཏིང་ནས་གསོལ་བ་འདེབས། །ཕ་ཡེ་ཤེས་སྒྱུ་མའི་སྐུ་ཅན་གྱིས། །ཐུགས་ཟག་མེད་ཀློང་ནས་བུ་ལ་གཟིགས། །འབྲེལ་ཚད་དོན་ལྡན་གྱི་བྱིན་བརྒྱུད་སྩོལ། །རྟོགས་གྲོལ་དུས་མཉམ་དུ་བྱིན་གྱིས་རློབས། །སྔོན་ཚེ་རབས་མང་པོའི་དུས་ཉིད་ནས། །བརྩེ་གདུང་གིས་འབྲེལ་བའི་དད་དམ་ཅན། །ཆོས་མཐུན་གྱི་ལྷ་གྲོགས་གཞོན་ནུ་ལགས། །ངེད་རྒན་པོས་བསླབ་བྱ་ཚིག་གསུམ་ཞུ། །བུ་དང་པོ་ཆོས་སྒོར་ཞུགས་པའི་ཚེ། །འུར་སྒྲོག་དང་ཆོས་བརྒྱད་མ་ཡིན་པའི། །ངེས་འབྱུང་གི་བློ་སྣ་ཤུགས་དྲག་དང་། །གཞན་ཕན་གྱི་སེམས་བསྐྱེད་ཟུང་འབྲེལ་དགོས། །བུ་ཡོན་ཏན་ཀུན་གྱི་གཞི་རྟེན་ནི། །སོ་ཐར་གྱི་འདུལ་ཁྲིམས་གཙང་མ་ལ། །རང་འདོད་དང་བྲལ་བའི་སེམས་བསྐྱེད་དང་། །ཚོགས་གཉིས་ཟུང་འབྲེལ་དུ་སློབ་པར་མཛོད། །བུ་ཐོས་པ་རིན་ཆེན་སྒྲོན་མེ་འདི། །ཐར་ལམ་བལྟ་བའི་མིག་དང་ནི། །གནས་ལུགས་རྟོགས་པའི་སྔོན་འགྲོ་ཡིན། །ཅིས་ཀྱང་མེད་ཐབས་མེད་དོ་ཨང་། །བུ་སྡེ་དགོན་དང་འདུ་འཛིའི་གྲོང་ཡུལ་ན། །ཆགས་སྡང་དང་ཡུལ་རྐྱེན་གྲངས་མང་བས། །ལྟ་སྒོམ་ལ་བརྟན་པ་མ་ཐོབ་བར། །གཅིག་པུ་རུ་དབེན་པར་སྡོད་ཅིག་ཨང་། །བུ་ཆོས་ལ་ཕྱོགས་རིས་མེད་མོད་ཀྱང་། །གཏན་གྱི་བློ་གཏད་ཚད་མ་དགོས། །འཕགས་ཡུལ་མཁས་པའི་ལེགས་བཤད་ནི། །ཡིད་ཆེས་གནས་སུ་ཟུང་ཞིག་ཨང་། །བུ་ཁྱད་པར་དབུ་མའི་བསྟན་བཅོས་རྣམས། །དངོས་ཞེན་འཇིག་པར་མཐུ་ཆེ་བས། །དཔལ་ལྡན་ཟླ་བའི་བཞེད་པ་ལྟར། །ཐོས་བསམ་ངེས་ཤེས་བསྐྱེད་ཅིག་ཨང་། །བུ་གསང་བ་སྒྱུ་འཕྲུལ་དྲྭ་བའི་རྒྱུད། །རྡོ་རྗེ་འཆང་གི་ཞལ་ལུང་སྟེ། །སྡེ་སྣོད་རྒྱུད་སྡེའི་སྤྱི་འགྲེལ་དང་། །ཁྱད་པར་སྡེ་གསུམ་སྤྱི་དོན་ཡིན། །བུ་ཐེག་ཆེན་གསང་སྔགས་ལམ་ཀུན་དང་། །ཁྱད་པར་ནང་རྒྱུད་སྡེ་གསུམ་གྱི། །ལྟ་གྲུབ་གོ་དོན་སློང་བ་ལ། །མེད་ཐབས་མེད་དོ་སྙིང་ལ་ཆོངས། །བུ་ཟབ་དོན་གསལ་བར་སྟོན་པ་ལ། །དགོངས་འགྲེལ་རྣམ་བཤད་མང་མོད་ཀྱང་། །རྒྱུད་དོན་མན་ངག་བཅུད་དྲིལ་ལ། །མུན་སེལ་སྐོར་གསུམ་ཁྱད་པར་འཕགས། །བུ་རིམ་གཉིས་ལམ་གྱི་མན་ངག་ལ། །བཀའ་གཏེར་ཆོས་སྒོ་གྲངས་མང་ཡང་། །ཀུན་གྱི་ཡང་སྙིང་ཟབ་པའི་བཅུད། །ཀློང་ཆེན་སྙིང་གི་ཐིག་ལེ་ཡིན། །བུ་རྟེན་འབྲེལ་སྣང་བ་མ་ལོག་པའི། །ཉེ་བརྒྱུད་དབང་བཞིའི་ཆུ་བོ་རྫོགས། །དམ་སེལ་གཡའ་དྲིས་མ་གོས་པའི། །བྱིན་རླབས་ཚན་ཁ་གཞན་ལས་འཕགས། །བུ་དེ་ཕྱིར་གཏན་གྱི་བློ་གཏད་ལ། །དགོངས་གཏེར་སྙིང་ཐིག་ལས་འོངས་པའི། །ཐུན་མོང་ཐུན་མིན་ཁྲིད་རིམ་བཞིན། །ཉམས་ལེན་སྲོག་དང་སྡོས་ཤིག་ཨང་། །བུ་བློ་འདས་རིག་པའི་ཐིག་ལེ་ལ། །དངོས་མཚན་གྲུབ་པ་རྡུལ་ཙམ་མེད། །དེ་ཕྱིར་འདི་ཡིན་ངོས་བཟུང་གི ། གཏད་སོའི་ཞེན་ཡུལ་མ་འཚོལ་ཨང་། །བུ་ཐ་མལ་ཤེས་པ་ཟང་ཐལ་ལ། །རྟག་ཏུ་འཕོ་འགྱུར་མི་མངའ་ཡང་། །དང་པོའི་ལས་ཅན་འདུ་བྱེད་ཀྱི། །དྲན་པ་རྒྱུན་ཆགས་བརྟེན་ཞིག་ཨང་། །བུ་དྲན་སྣང་ཆོས་སྐུར་ཤར་བའི་ཚེ། །ཆེད་དུ་བསྒོམ་བྱ་རྡུལ་ཙམ་མེད། །དྲན་འཛིན་གཉེན་པོའི་རྩི་དང་ཕྲོལ། །རྒྱ་ཡན་ཕྱལ་བར་སྐྱོངས་ཤིག་ཨང་། །བུ་ཆེད་དུ་བཅས་བཅོས་མ་བྱེད་པར། །གཤིས་ཀྱི་གནས་ལུགས་ཐད་ཀར་སྐྱོངས། །འདི་ཞེས་ཐད་འཛིན་ཟད་པ་འདི། །རིག་པ་རང་གི་བཞུགས་ཚུལ་ཡིན། །བུ་འགྱུ་འཕྲོའི་ཀུན་རྟོག་ཅི་སྐྱེས་ཀྱང་། །རང་ངོ་ཡེ་སྟོང་ཟང་ཐལ་ལ། །སེམས་ལས་འདས་པའི་ཡེ་ཤེས་ཀྱི། །རང་ངོ་རྗེན་པར་འཆར་བ་ཡིན། །བུ་གནས་འགྱུ་རེ་དོགས་མ་མང་བར། །ཤར་གནས་གང་དང་གང་ལ་ཡང་། །ཡིན་ལུགས་ཤེས་པའི་གདེང་ལྡན་པས། །རྩིས་མེད་གང་དགར་སྐྱོངས་ཤིག་ཨང་། །བུ་ཞེན་པ་ཟད་ན་རྟོགས་པ་ཡིན། །ཆེད་འཛིན་ཟད་ན་གནས་ལུགས་ཡིན། །ཐམས་ཅད་ཆོས་ཉིད་ཆེན་པོ་རུ། །དབྱེ་བསལ་མེད་ན་དེ་གས་ཆོག །བུ་མོས་གུས་བླ་མའི་རྣལ་འབྱོར་འདི། །བྱིན་རླབས་ཀུན་གྱི་འབྱུང་གནས་ཏེ། །ཟབ་མོའི་ལམ་གྱི་སྙིང་པོ་ཡིན། །དུས་རྣམས་ཀུན་ཏུ་མེད་ཐབས་མེད། །བུ་བླ་མར་མོས་གུས་བཅོས་མིན་དང་། །མི་རྟག་སྙིང་རྗེར་བློ་སྦྱོང་དང་། །བྱང་ཆུབ་སེམས་གཉིས་སྒོམ་པ་འདི། །ལམ་གྱི་གྲོགས་སུ་ངེས་པར་དགོས། །བུ་དེང་སང་སྙིགས་མ་ལྔ་བདོ་བས། །ཆོས་མཐུན་གྲོགས་བཟང་ཤིན་ཏུ་དཀོན། །སུ་དང་འབྲེལ་འདྲིས་ཀུན་སྤངས་ཏེ། །རང་མགོ་ཆོས་ཀྱིས་འདོན་པར་མཛོད། །བུ་རྙེད་བཀུར་མཛའ་བཤེས་ཆོས་བརྒྱད་སོགས། །གང་ཡང་བདུད་ཀྱི་བསླུ་བྲིད་ཡིན། །ཀུན་ལ་ཞེན་པ་གཏན་སྤངས་ཏེ། །གཏད་པ་བཞི་ལ་ཐུགས་གཏོད་འཚལ། །བུ་ཚེ་འདི་བློ་ཡིས་ཐོང་བ་གཅེས། །བྱ་སྤྱོད་ཆོས་དང་མཐུན་པ་གཅེས། །ཡེངས་མེད་གནས་ལུགས་སྒོམ་པ་གཅེས། །ཚེ་གང་དབེན་པར་གནས་པར་མཛོད། །བུ་ཐ་མལ་རིག་པ་རྗེན་པ་ལ། །ཆིག་ཆོད་ལམ་དུ་ཁྱེར་ཤེས་ན། །ལྟ་བསྒོམ་སྤྱོད་དང་དམ་ཚིག་སོགས། །ཐམས་ཅད་དུ་མ་རོ་གཅིག་ཡིན། །བུ་འོན་ཀྱང་དང་པོའི་ལས་ཅན་ལ། །རང་གི་ཉམས་ལ་གང་ཕན་གྱིས། །བསགས་སྦྱང་ཐུན་མོང་ལུང་བཞིན་འབད། །ལས་འབྲས་ཁྱད་དུ་མ་གསོད་ཨང་། །བུ་བྱང་ཆུབ་སེམས་དཔའི་བློ་སྦྱོང་དང་། །ཐུན་མོང་སྔགས་ཀྱི་རྣལ་འབྱོར་སོགས། །ལམ་གྱི་ཆ་ལག་གང་ལ་ཡང་། །ཉམས་ལེན་རྩི་དང་མ་བྲལ་མཛོད། །བུ་སྣང་སྟོང་རིས་སུ་མ་ཆད་པའི། །ཟུང་འཇུག་ལམ་དུ་བྱེད་པ་འདི། །གནད་ཀྱི་སྙིང་པོར་བཟུང་བྱས་ན། །གང་ཡང་གྲོགས་སུ་འཆར་བར་ངེས། །བུ་བདག་བློ་ཤིན་ཏུ་རྨོངས་ཆེས་པས། །ཆོས་མཐུན་སྨྲ་བ་བཟང་པོ་ཞིག །ཁྱོད་ལ་གསོལ་བར་མ་ནུས་ཀྱང་། །ཁྱོད་གསུང་བཟློག་པར་དཀའ་དེས་ན། །བླ་མ་ལས་ཐོས་ཆོས་ཀྱི་དོན། །ཅུང་ཟད་ཡིད་ལ་གང་ངེས་རྣམས། །གཡོ་ཟོལ་མེད་པའི་ལྷག་བསམ་གྱིས། །ཁྱོད་ལ་དྲང་པོར་གསོལ་བ་ལགས། །དེ་སྐད་ཆོས་དང་མཐུན་པའི་གཏམ། །ཆོས་མཐུན་མཆེད་ཀྱི་བཀས་བསྐུལ་ནས། །ཆོས་ལྟར་བཅོས་པའི་བྷུ་སུ་ཀུ། །ཡོན་ཏན་མགོན་པོས་ལེགས་པར་སྦྱར། །དགེ་བས་བདག་དང་འགྲོ་བ་ཀུན། །སྲིད་དང་ཞི་ལ་མི་གནས་པའི། །ཡེ་ཤེས་ཕ་རོལ་ཕྱིན་བརྙེས་ཏེ། །དོན་གཉིས་ལྷུན་གྱིས་འགྲུབ་པར་ཤོག །