འཕགས་པ་བཅུ་གཅིག་ཞལ་གྱི་སྒྲིབ་ཐབས་སྨང་གནས་དང་འབྲེལ་བ་གྲུབ་ཆེན་དཔལ་མོའི་དགོངས་རྒྱན།
འཕགས་པ་བཅུ་གཅིག་ཞལ་གྱི་སྒྲིབ་ཐབས་སྨང་གནས་དང་འབྲེལ་བ་གྲུབ་ཆེན་དཔལ་མོའི་དགོངས་རྒྱན་ཞེས་བྱ་བ་བཞུཊ་སོ།།
བླ་མ་དང་མགོན་པོ་འཇིག་རྟེན་དབང་ཕྱུག་ལ་ཕྱག་འཚལ་ལོ། །ལན་གཅིག་སྨྱུང་བར་གནས་པའི་དག་བྱེད་ཀྱིས། བསྐལ་པར་བསགས་པའི་སྡིག་ལྟུང་དྲི་འཁྲུད་པའང། །མགོན་པོ་ཐུགས་རྗེའི་གཏེར་ཆེན་མཐུ་ཁོ་ནརཾ། །ངེས་པས་སྤྱང་ཆོག་འདུས་གསལ་འཇུག་བདེ་སྤྲོ། །དེ་ལ་བྱིན་རླབས་དང་འགྲོ་ཕན་ཕྲིན་ལས་མཚུངས་ཟླ་མ་མཆིས་པ་དགེ་སློང་མ་དང་ལ་མོའི་ལུགས་འཕགས་པའི་སྒྲུབ་ཐབས་སྨྱུང་བར་གནས་པའི་ཆོ་ག་དང་འབྲེལ་བར་ཉམས་སུ་ལེན་པ་ལ་གསུམ་སྟེ། སྦྱོར་བ། དངོས་གཞི། རྗེས་སོ། །དང་པོ་ནི། རྟེན་གྱི་གང་ཟག་ཁྱིམ་པའམ་རབ་བྱུང་ཕོ་མོ་སུ་ཡིན་ཀྱང་འདིའི་ཆོས་སྐོར་
རྣམས་ལེགས་པར་ཐོབ་པ་དགོས། དུས་ཁྱད་པར་ཅན་ས་ག་ཟླ་བ། དེ་ལས་ཀྱང་ཚེས་བརྒྱད་དང་། བཅོ་ལྔ་ལ་དངོས་གཞི་ཁེལ་བར་བྱ། དེ་མིན་གནས་གཙང་ཞིང་བྱི་དོར་བྱས་པར། རྟེན་གསུམ་སྤྱི་དང་ཁྱད་པར་བཅུ་གཅིག་ཞལ་གྱི་སྐུ་བརྙན་བྲིས་འབུར་གང་རིགས་བཀྲམ་པའི་མདུན་དུ། ཁེབས་ལྡན་ཁར་མཎྜལ་བ་བྱུང་དང་དྲི་བཟང་གི་ཆུས་བྱུགས་པའི་སྟེང་། རྡུལ་ཚོན་གྱིས་པདྨ་འདབ་བརྒྱད་ལྟེ་བ་དཀར། ཤར་སྔོ་སོགས་ཕྱོགས་མདོག །མཚམས་བཞི་མཛེས་ཚོན། ཕྱོགས་བཞིར་ཟླ་གདན་ལ་ཚོན་སྤུང་གིས། དབུས་སུ་དམར་པོ། ཤར་སྔོ། ལྷོ་སེར། ནུབ་དཀར། བྱང་ལྗང་། མཚམས་ཀྱི་འདབ་མ་བཞི་ལ་སེར་པོ་རེ་
བཀོད་པའམ། མ་འབྱོར་ན་མཎྜལ་ལ་འབྲུའམ་མེ་ཏོག་གི་ཚོམ་བུ་ལྔ་བཀོད་ཀྱང་རུང་། དེའི་མདུན་ནམ་གཡས་སུ་པདྨ་འདབ་བརྒྱད་བྲིས་པའམ་འབྲུ་ཚོམ་གང་རུང་གི་སྟེང་དུ་བུམ་པ་མགུལ་ཆིངས་དཀར་པོ་ཅན། དྲི་བཟང་གི་ཆུ་དང་བུམ་རྫས་ཉེར་ལྔས་སུམ་ཉིས་བཀང་བ། ཀུ་ཤའམ་ལོ་མ་དང་འབྲས་བུ་ཅན་གྱི་ཤིང་གིས་ཁ་བརྒྱན་པ་གཟུངས་རིང་གིས་བགེགས་བསྐྲད་ནས་བཞག །མདུན་ངོས་སུ་དཀྱིལ་འཁོར་པ་དང་ཆོས་སྐྱོང་སྤྱི་ལ་དཀར་གཏོར་ལྕོག་ཟླུམ་ཆེ་ཆུང་གཉིས་པད་འདབ་བཞི་ལྡན་རྒྱན་ལྔ་སྒྲོམ་ཉི་ཟླ་ནོར་བུས་མཚན་པ། དེའི་མདུན་དུ་ཚོགས་ཞིང་གི་མཆོད་པ་དཀྱིལ་འཁོར་གྱི་གཡས་ནས་དང་། བདག་བསྐྱེད་མཆོད་པ་གཡོན་ནས་འགོ་བརྩམས་པ་བཅས་ཆ་གཉིས་བཤམས། དེ་དག་གི་མདུན་ལོགས་ཅུང་དམའ་བར་མཆོད་པའི་མཎྜལ། ཁྲུས་གཞོང་། མེ་ལོང་། ཁྲུས་དར། གོས་ཟུང་རྣམས་དང་། ཀླུ་དང་གཞི་བདག་བཅས་ལ་དཀར་བཤོས་ཀླུ་སྨན་བཏབ་པའང་བཤམས། གཞན་ཡང་ཅི་འབྱོར་བའི་མཆོད་རྫས་སྤྱན་རས་གཟིགས་སྣ་ཚོགས་བཀོད་མཛེས་སུ་བྱའོ། །དེ་ནས་ཆོ་གའི་ལག་ལེན་དངོས་ལ་གསོ་སྦྱོང་བླང་བ་ནི།
སྨྱུང་གནས་སྡོད་པ་པོ་ཐམས་ཅད་ཐོ་རངས་ལངས་ལ་ཁྲུས་དང་གཙང་སྦྲ་སྔོན་དུ་འགྲོ་བས་ནམ་སེང་ལ་འཚོགས་ནས། བླ་མའམ་རྟེན་ལ་ཐུགས་རྗེ་ཆེན་པོ་དངོས་ཀྱི་འདུ་ཤེས་བསྐྱེད་དེ། ཕྱག་གསུམ་འཚལ། ཙོག་པུར་ཐལ་མོ་སྦྱར་ལ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟ་ཅང་ཤེས་ལྟ་བུ། གླང་པོ་ཆེན་པོ། བྱ་བ་བྱས་ཤིང་། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་བཀའ། ལེགས་པར་རྣམ་པར་གྲོལ་བའི་ཐུགས། ལེགས་པར་རྣམ་པར་གྲོལ་བའི་ཤེས་རབ་ཅན་དེ་རྣམས་ཀྱིས། སེམས་ཅན་ཐམས་ཅད་ཀྱི་དོན་གྱི་ཕྱིར་དང་། ཕན་པར་བྱ་བའི་ཕྱིར་དང་། གྲོལ་བར་བྱ་བའི་ཕྱིར་དང་། ནད་
མེད་པར་བྱ་བའི་ཕྱིར་དང་། མུ་གེ་མེད་པར་བྱ་བའི་ཕྱིར་དང་། བྱང་ཆུབ་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་པར་བྱ་བའི་ཕྱིར། གསོ་སྦྱོང་ངེས་པར་བླངས་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ། ཇི་སྲིད་སང་ཉི་མ་མ་ཤར་གྱི་བར་དུ། གསོ་སྦྱོང་ངེས་པར་ཡང་དག་པར་བླང་བར་བགྱིའོ། །ཞེས་པ་ལན་གཉིས་ལན་གསུམ་གྱི་བར་བཟླ་དགོས་པས་ཐ་མ་ལ་སྡོམ་པ་སྐྱེས་སྙམ་པའི་ངེས་ཤེས་བསྐྱེད། ⇨ བསླབ་བྱ་བརྗོད་པ་ནི། དེང་ནས་སྲོག་གཅོད་མི་བྱ་ཞིང་། །གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་སྤྱད་ཅིང་། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་པོ་ཉེར་བརྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་ཆེ་མཐོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་དང་ནི་རྒྱན། །གར་
དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི། །སྲོག་གཅོད་ལ་སོགས་མི་བྱེད་ལྟར། །དེ་ལྟར་སྲོག་གཅོད་ལ་སོགས་སྤངས། །བླ་མེད་བྱང་ཆུབ་མྱུར་ཐོབ་ཤོག །སྡུག་བསྔལ་མང་དཀྲུགས་སེམས་ཅན་རྣམས། །སྲིད་པའི་མཚོ་ལས་སྒྲོལ་བར་ཤོག །ལན་གསུམ་བརྗོད། དེ་ནས་ཚུལ་ཁྲིམས་རྣམ་དག་གི་གཟུངས་བཟླ་བ་ནི། ཨོཾ་ཨ་མོ་གྷ་ཤཱི་ལ། སཾ་བྷ་ར་སཾ་བྷ་ར། བྷ་ར་བྷ་ར། མ་ཧཱ་ཤུདྡྷ་ས་ཏྭ། པདྨ་བི་བྷ་ཥི་ཏ་བྷ་ཛ། དྷ་ར་དྷ་ར། ས་མནྟ། ཨ་ཝ་ལོ་ཀི་ཏེ་ཧཱུྃ་ཕཊ་སྭཱ་ཧཱ། ཞེས་ལན་ཉེར་གཅིག་བཟླའོ། །དེ་ནས་སྨོན་ལམ་དང་ཤིས་བརྗོད་ནི། སློབ་དཔོན་གྱིས་མེ་ཏོག་འཐོར་བ་དང་བཅས།ྋ ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག །ཅེས་དང་། གཞན་གནོད་གཞིར་བཅས་
སྤོང་ལ་གོམས་པའི་མཐུས། །རྨི་ལམ་ན་ཡང་སྡིག་སེམས་མི་འབྱུང་ཞིང་། །བྱང་ཆུབ་སེམས་དང་ནམ་ཡང་མི་འབྲལ་བའི། །ཚུལ་ཁྲིམས་ཕུན་སུམ་ཚོགས་པའི་བཀྲ་ཤིས་ཤོག །ཅེས་བརྗོད་པས་གྲུབ་བོ། །གཉིས་པ་དངོས་གཞི་བདག་མདུན་གྱི་ཆོ་ག་ལ། ཐོག་མར་སྐྱབས་སེམས་ནི། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ལན་གསུམ། ས་གཞི་བྱིན་བརླབ་ནི། ཐམས་ཅད་དུ་ཡང་ས་གཞི་བདག །གསེག་མ་
ལ་སོགས་མེད་པ་དང་། །ལག་མཐིལ་ལྟར་མཉམ་བཻ་ཌཱུརྱའི། །རང་བཞིན་འཇམ་པོར་གནས་གྱུར་ཅིག །ཅེས་དང་། ཚོགས་བསགས་པ་ནི། རང་ཉིད་སྐད་ཅིག་གིས་ཐུགས་རྗེ་ཆེན་པོར་གསལ་བའི་ཐུགས་ཀར་ཟླ་སྟེང་ཧྲཱིཿདཀར་པོ་གནས་པ་ལས་འོད་ཟེར་འཕྲོས། འཕགས་པ་སྤྱན་རས་གཟིགས་དབང་ཕྱུག་ལ་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བ་སྤྱན་དྲངས། མདུན་གྱི་ནམ་མཁར་པདྨའི་སྡོང་པོ་འདབ་མ་སྟོང་ལྡན་ཡངས་ཤིང་རྒྱ་ཆེ་བ་ཟླ་བའི་དཀྱིལ་འཁོར་གྱིས་མཚན་པ་ལ་བཞུགས་པར་གྱུར། ཕྱག་འཚལ་ཞིང་། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་དང་དཔལ་མོ་ནས། །བདག་ཅག་འདྲེན་པ་མཆོག་གི་
བར་བྱོན་པའི། །དབང་བསྐུར་བྱིན་རླབས་གདམས་ངག་ལེགས་འདོམས་པའི། །དངོས་
བརྒྱུད་བླ་མ་རྣམས་ལ་ཕྱག་འཚལ་ལོ། །དུས་གསུམ 
་བདེ་བར་གཤེགས་པ་ཆོས་ཀྱི་སྐུ། །འགྲོ་དྲུག་སེམས་ཅན་རྣམས་ལ་སྤྱན་རས་གཟིགས། །ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ། །གཟི་བརྗིད་འོད་དཔག་མེད་ལ་ཕྱག་འཚལ་ལོ། །ཕྱག་སྟོང་འཁོར་ལོས་བསྒྱུར་བའི་རྒྱལ་པོ་སྟོང་། །སྤྱན་སྟོང་བསྐལ་པ་བཟང་པོ་སངས་རྒྱས་སྟོང་། །གང་ལ་གང་འདུལ་དེ་ལ་དེར་སྟོན་པའི། །བཙུན་པ་སྤྱན་རས་གཟིགས་ལ་ཕྱག་འཚལ་ལཾ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་
བཏུད་པ་ཡི་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །ཞེས་དང་། སྙིང་གའི་ཧྲཱིཿལས་མཆོད་པའི་ལྷ་མོ་དཔག་ཏུ་མེད་པ་སྤྲོས་ཏེ་མཆོད་པར་གྱུར། དཀྱིལ་འཁོར་ཀུན་ཏུ་རྒྱལ་བ་མཉེས་མཛད་པའི། །རིན་ཆེན་མེ་ཏོག་ལ་སོགས་མཆོད་པའི་ཚོགས། །ནམ་མཁའ་གང་བར་སེམས་ཀྱིས་མངོན་སྤྲུལ་ནས། །གཞལ་མེད་ཁང་དུ་སྤྲིན་བཞིན་གཏིབས་གྱུར་ཅིག །ཨོཾ་བཛྲ་པུཎྱེ་ཨཱཿཧཱུྃ་སྭཱ་ཧཱ། ཨོཾ་བཛྲ་དྷུ་པེ་ཨཱཿཧཱུྃ་སྭཱ་ཧཱ། ཨོཾ་བཛྲ་ཨ་ལོ་ཀེ་ཨཱཿཧཱུྃ་སྭཱ་ཧཱ། ཨོཾ བཛྲ་གནྡྷ་ཨཱཿཧཱུྃ་སྭཱ་ཧཱ། ཨོཾ་བཛྲ་ནཻ་ཝིདྱ་ཨཱཿཧཱུྃ་སྭཱ་ཧཱ། ཨོཾ་བཛྲ་ཤབྡ་ཨཱཿཧཱུྃ་སྭཱ་ཧཱ། ཞེས་མཆོད། གང་ཡང་བདག་གིས་དུས་ཀུན་ཏུ། །སྡིག་པ་བགྱིས་པ་གང་གྱུར་པ། །སྐྲག་པའི་རྨི་འདྲར་བཤགས་བགྱིད་ཅིང་། །དེང་ནས་བརྩམས་ཏེ་འབྱུང་མི་བགྱི། །དགེ་བ་རྣམས་ལ་རྗེས་ཡི་རང་། །འཁོར་ལོ་བསྐོར་ཞིང་བཞུགས་གསོལ་
འདེབས། །སངས་རྒྱས་བྱང་ཆུབ་ཡིད་ཀྱིས་བཟུང་། །ཐམས་ཅད་བྱང་ཆུབ་མཆོག་ཏུ་བསྔོ། །དེ་ཐོབ་ལམ་ལ་གནས་བགྱི་ཞིང་། །སྐྱབས་གསུམ་ལ་ནི་བདག་སྐྱབས་མཆི། །ཞེས་དང་། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག༔ སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་དང་བྲལ་བའི་བཏང་སྙོམས་ཚད་མེད་པ་ལ་གནས་པར་གྱུར་ཅིག །ཅེས་ཚད་མེད་བཞི་བསྒོམ་པའི་མཐར། ཚོགས་ཞིང་རྣམས་རང་གནས་སུ་གཤེགས་པར་གྱུར། ཞེས་མི་དམིགས་པར་བཞག་གོ། །དེ་ནས་བདག་བསྐྱེད་བཟླས་པ་དང་བཅས་པ་ནི། ཨོཾ་སྭ་བྷ་དྷརྨཿསྭ་བྷ་ཝ་ཤུདྡྷེ྅་ཧཾ། ཨོཾ་ཤུནྱ་ཏཱ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅་ཧཾ། སྟོང་པའི་ངང་ལས་པཾ་ལྗང་གུ་ལས་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཨ་ལས་ཟླ་བའི་
དཀྱིལ་འཁོར་གྱི་སྟེང་དུ་ཧྲཱིཿདཀར་པོ། དེ་ལས་འོད་ཟེར་འཕྲོས་པས་སེམས་ཅན་གྱི་སྡིག་སྒྲིབ་སྦྱངས་ཏེ་ཇོ་བོའི་སྐུར་གྱུར་པ་རྣམས་འོད་དུ་ཞུ། སྔར་སྤྲོས་པའི་འོད་དང་འགྲོགས་ནས་ཚུར་འདུས་ཧྲཱིཿལ་ཐིམ་པས་ཧྲཱིཿདེ་གསེར་གྱི་པདྨ་འདབ་མ་བརྒྱད་པ་ལྟེ་བར་ཧྲཱིཿས་མཚན་པ། དེ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུ་བྱུང་ནས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་རས་གཟིགས་ཀྱི་རྣམ་པར་བྱོན་ནས་ཧྲཱིཿལ་ཐིམ་པས་སྐད་ཅིག་གིས་པདྨ་ཧྲཱིཿདང་བཅས་པ་ཡོངས་སུ་གྱུར་པ་ལས་བདག་ཉིད་འཕགས་པ་སྤྱན་རས་གཟིགས་དབང་ཕྱུག་བཞེངས་པ། སྐུ་མདོག་སྟོན་ཀའི་ཟླ་བ་ལྟར་ཆེས་དཀར་བ། ཞལ་བཅུ་གཅིག་གི་རྩ་ཞལ་དཀར་བ། གཡས་ལྗང་། གཡོན་དམར་བ། དེའི་སྟེང་མ་དབུས་ལྗང་། གཡས་དམར། གཡོན་དཀར་བ། དེའི་སྟེང་མ་དབུས་དམར།
གཡས་དཀར། གཡོན་ལྗང་བ། དེ་རྣམས་འཛུམ་ཞིང་ཞི་བ། དེའི་སྟེང་ན་ཁྲོ་ཞལ་ནག་པོ་མཆེ་བ་གཙིགས་ཤིང་ཁྲོ་གཉེར་དང་ལྡན་པ་སྤྱན་གསུམ་པ། རལ་པ་དམར་གསེར་གྱེན་དུ་བསྒྲེང་བ། དེའི་སྤྱི་བོར་ཞི་ཞལ་དམར་པོ་གཙུག་ཏོར་དང་བཅས་ཤིང་རྒྱན་སྤངས་པ་མགུལ་བ་དང་བཅས་པའོ། །རྩ་ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་གཉིས་པས་བགྲང་ཕྲེང་། གསུམ་པས་མཆོག་སྦྱིན་གྱི་ཕྱག་རྒྱ་ལས་བདུད་རྩིའི་རྒྱུན་འཛག་པས་ཡི་དྭགས་ཀྱི་བཀྲེས་སྐོམ་སེལ་བ། བཞི་པས་འཁོར་ལོ་འཛིན་པ། གཡོན་གྱི་གཉིས་པ་ན་གསེར་གྱི་པདྨ་ཡུ་བ་དང་བཅས་པ། གསུམ་པ་ན་རིལ་པ་སྤྱི་བླུགས། བཞི་པ་ན་མདའ་གཞུ་འཛིན་པ། ཕྱག་ལྷག་མ་དགུ་བརྒྱ་དང་དགུ་བཅུ་རྩ་གཉིས་པདྨའི་འདབ་མ་ལྟར་འཇམ་ཞིང་མཆོག་སྦྱིན་མཛད་པ། ཕྱག་ཐམས་ཅད་ཀྱི་མཐིལ་ན་སྤྱན་རེ་རེ་ཡོད་པ། རི་དྭགས་ཀྱི་པགས་
པས་ནུ་མ་གཡོན་པ་བཀབ་པ། རས་བཟང་པོའི་ཤམ་ཐབས་དང་ནོར་བུས་སྤྲས་པའི་གསེར་གྱི་སྐ་རགས་ཅན། རིན་པོ་ཆེའི་དབུ་རྒྱན། རྣ་རྒྱན། མགུལ་རྒྱན། ཕྱག་གདུབ། ཞབས་གདུབ། དཔུང་རྒྱན། དར་གྱི་ཅོད་པཎ་ལ་སོགས་པས་བརྒྱན་ཅིང་། མཚན་དཔེ་རྫོགས་པའི་སྐུ་འོད་ཟེར་དཀར་པོ་འཕྲོ་བའི་རང་བཞིན་ཅན་དུ་གྱུར། དེའི་ཐུགས་ཀར་པད་ཟླའི་སྟེང་དུ་ཧྲཱིཿདཀར་པོ། དེ་ལས་འོད་ཟེར་འཕྲོས། རང་བཞིན་གྱི་གནས་དང་། ལྷོ་ཕྱོགས་པོ་ཏ་ལ་ནས་འཕགས་པ་སྤྱན་རས་གཟིགས་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་བཛྲ་ས་མཱ་ཛཿས་སྤྱན་དྲངས། ༀ་བཛྲ་པུཥྤ་ཨཱཿཧཱུྃ་སྭཱ་ཧཱ། དྷུ་པེ་ཨ་ལོ་ཀེ་གནྡྷེ་ནཻ་ཝིདྱ་ཤབྡ་ཨཱཿཧཱུྃ་སྭཱ་ཧཱ། ཛཿཧཱུྃ་བཾ་ཧོ༔ དམ་ཚིག་པ་དང་གཉིས་སུ་མེད་པར་གྱུར། དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ།
སྙིང་གར་ཧཱུྃ་སྔོན་པོས་མཚན་པར་གྱུར། ཨོཾ་ཨཱཿཧཱུྃ་ལན་གསུམ་བརྗོད་པས། སངས་རྒྱས་ཐམས་ཅད་ཀྱི་སྐུ་གསུང་ཐུགས་སུ་གྱུར། ཡང་འོད་འཕྲོས་དབང་གི་ལྷ་རིགས་ལྔ་སྤྱན་དྲངས། ཨོཾ་བཛྲ་པུཥྤ༴ དྷུ་པེ་ཨ་ལོཀེ་གནྡྷ་ནཻ་ཝིདྱ་ཨཱཿཧཱུྃ་སྭཱ་ཧཱ། ཞེས་རྣམ་ལྔས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ་ཞེས་གསུང་ཞིང་སྤྱི་བོ་ནས་དབང་བསྐུར་བས། སྒོ་གསུམ་གྱི་དྲི་མ་དག༔ ཤེས་ཀྱི་ཆུས་ལུས་གང་ཞིང་ཆུའི་ལྷག་མ་ཡར་ལུད་པས་འོད་དཔག་མེད་གཙོ་བོར་གྱུར་པའི་རིགས་ལྔས་དབུར་བརྒྱན་པར་གྱུར། བཟླས་དམིགས་ནི། རང་གི་ཐུགས་ཀར་
པད་ཟླའི་སྟེང་དུ་རང་འདྲའི་ཡེ་ཤེས་སེམས་དཔའ་ཚོན་གང་བ། དེའི་ཐུགས་ཀར་པད་ཟླ་ལ་ཏིང་འཛིན་སེམས་དཔའ་ཧྲཱི༔ དེ་ལས་འོད་ཟེར་དང་ཐུགས་རྗེ་ཆེན་པོའི་སྐུ་དཔག་ཏུ་མེད་པ་འཕྲོས། ཁམས་གསུམ་གྱི་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ནས་ཇོ་བོའི་གོ་འཕང་ལ་བཀོད། ཚུར་འདུས་ཐུགས་ཀའི་ཧྲཱིཿལ་ཐིམ་པར་གྱུར། ན་མོ་རཏྣ་ཏྲ་ཡཱ་ཡ། ན་མཿ་ཨརྱ་ཛྙཱ་ན་སཱ་ག་ར་བཻ་རོ་ཙ་ན་བ་ཡཱུ་ཧ་རཱ་ཛཱ་ཡ། ཏ་ཐཱ་ག་ཏ་ཡ། ཨརྷ་ཏེ། སམྱཀྶཾ་བུདྡྷ་ཡ། ན་མཿསརྦ་ཏ་ཐཱ་ག་ཏེ་བྷྱ༔ ཨརྷ་ཏེ། སམྱཀྶཾ་བུདྡྷེ་བྷྱ༔ ན་མ་ཨརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚི་ཝིཊྚི། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མ་ཝ་རེ། ཨི་ལི་མི་ལི། ཙི་ཏི་ཛྭ་ལ་མ་པ་ཡ་ནཱ་ཡེ་སྭཱ་ཧཱ།
ཞེས་གཟུངས་རིང་ཚར་གཅིག་དང་། ཏདྱ་ཐཱ་མན་ཆད་སྙིང་པོ་བརྒྱ་དང་བདུན་བཟླའོ། །དེ་ནས་མདུན་བསྐྱེད་ནི། དཀྱིལ་འཁོར། སྭ་བྷ་ཝས་སྦྱངས། སྟོང་པའི་ངང་ལས། རང་གི་ང་གའི་ཧྲཱིཿལས་བྷྲཱྃ་ཆད་དེ་མདུན་བསྐྱེད་ཀྱི་གནས་སུ་བབས་པ་ལས། གཞལ་མེད་ཁང་གྲུ་བཞི་སྒོ་བཞི་རྟ་བབས་བཞི་དང་ལྡན་པའི་དབུས་སུ། པདྨ་འདབ་མ་བརྒྱད་པའི་ཕྱོགས་བཞིར་ཟླ་བའི་གདན་རེ་རེ། དབུས་ཀྱི་གདན་སྟེང་དུ་ཧྲཱིཿལས་འཕགས་པ་སྤྱན་རས་གཟིགས་དབང་ཕྱུག་བཞེངས་པ། སྐུ་མདོག་སྟོན་ཀའི་ཟླ་བ་ལྟར་ཆེས་དཀར་བ། ཞལ་བཅུ་གཅིག་གི་རྩ་ཞལ་དཀར་བ། གཡས་ལྗང་། གཡོན་དམར་བ། དེའི་སྟེང་མ་དབུས་ལྗང་། གཡས་དམར། གཡོན་དཀར་བ། དེའི་སྟེང་མ་དབུས་དམར། གཡས་དཀར། གཡོན་ལྗང་བ། དེ་རྣམས་འཛུམ་ཞིང་ཞི་བ། དེའི་སྟེང་ན་ཁྲོ་ཞལ་ནག་པོ་མཆེ་བ་གཙིགས་ཤིང་ཁྲོ་གཉེར་དང་ལྡན་པ།
སྤྱན་གསུམ་པ། རལ་པ་དམར་སེར་གྱེན་དུ་བསྒྲེང་བ། དེའི་སྤྱི་བོར་ཞི་ཞལ་དམར་པོ་གཙུག་ཏོར་དང་བཅས་ཤིང་རྒྱན་སྤངས་པ་མགུལ་པ་དང་བཅས་པའོ། །རྩ་ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་གཉིས་པས་བགྲང་ཕྲེང་། གསུམ་པས་མཆོག་སྦྱིན་གྱི་ཕྱག་རྒྱ་ལས་བདུད་རྩིའི་རྒྱུན་འཛག་པས་ཡི་དྭགས་ཀྱི་བཀྲེས་སྐོམ་སེལ་བ། བཞི་པས་འཁོར་ལོ་འཛིན་པ། གཡོན་གྱི་གཉིས་པ་ན་གསེར་གྱི་པདྨ་ཡུ་བ་དང་བཅས་པ། གསུམ་པ་ན་རིལ་བ་སྤྱི་བླུགས། བཞི་པ་ན་མདའ་གཞུ་འཛིན་པ། ཕྱག་ལྷག་མ་དགུ་བརྒྱ་དང་དགུ་བཅུ་རྩ་གཉིས་པདྨའི་འདབ་མ་ལྟར་འཇམ་ཞིང་མཆོག་སྦྱིན་མཛད་པ། ཕྱག་ཐམས་ཅད་ཀྱི་མཐིལ་ན་སྤྱན་རེ་རེ་ཡོད་པ། རི་དྭགས་ཀྱི་པགས་པས་ནུ་མ་གཡོན་པ་བཀབ་པ། རས་བཟང་པོའི་ཤམ་ཐབས་དང་ནོར་བུས་སྤྲས་པའི་གསེར་གྱི་སྐ་རགས་ཅན། རིན་
པོ་ཆེའི་དབུ་རྒྱན། རྣ་རྒྱན། མགུལ་རྒྱན། ཕྱག་གདུབ། ཞབས་གདུབ། དཔུང་རྒྱན། དར་གྱི་ཅོད་པན་ལ་སོགས་པས་བརྒྱན་ཅིང་། མཚན་དཔེའི་རྫོགས་པའི་སྐུ་འོད་ཟེར་དཀར་པོ་འཕྲོ་བའི་རང་བཞིན་ཅན་དུ་གྱུར། དེའི་དབུ་གཙུག་ཏུ་སངས་རྒྱས་འོད་དཔག་མེད་དམར་པོ་མཉམ་གཞག་གི་ཕྱག་རྒྱ་མཛད་པ། ཤར་དུ་ཧཱུྃ་༜ ལས་མི་བསྐྱོད་པ་སྔོན་པོ་ས་གནོན་གྱི་ཕྱག་རྒྱ་ཅན། ལྷོར་ཏཱཾ་ལས་རིན་ཆེན་འབྱུང་ལྡན་སེར་པོ་མཆོག་སྦྱིན་གྱི་ཕྱག་རྒྱ་ཅན། ནུབ་ཏུ་ཨོཾ་ལས་རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་ཅན། བྱང་དུ་ཨཱཿལས་དོན་ཡོད་གྲུབ་པ་ལྗང་གུ་སྐྱབས་སྦྱིན་གྱི་ཕྱག་རྒྱ་ཅན། གཤེགས་པ་གཞན་གསུམ་གཡོན་མཉམ་གཞག་མཛད་པ་ཐམས་ཅད་ཀྱང་རྡོ་རྗེའི་སྐྱིལ་ཀྲུང་གིས་བཞུགས་ཤིང་སངས་རྒྱས་རབ་ཏུ་བྱུང་བའི་ཆ་ལུགས་ཅན་ནོ། །མཚམས་ཀྱི་འདབ་མ་བཞིར་བུམ་པ་བཞི་འགྲུབ་པར་གྱུར། དེའི་ཐུགས་ཀར་
པད་ཟླ་ལ་གནས་པའི་ཧྲཱིཿདཀར་པོ་དེ་ལས་འོད་ཟེར་འཕྲོས་རང་བཞིན་གྱི་གནས་དང་། ལྷོ་ཕྱོགས་པོ་ཏ་ལ་ནས་འཕགས་པ་ཐུགས་རྗེ་ཆེན་པོ་ལྷ་ལྔའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ། བཛྲ་ས་མ་ཛཿས་སྤྱན་དྲངས། ༀ་བཛྲ་པུཥྤ༴ དྷུ་པེ་ཨ་ལོ་ཀེ་གཏྗེ་ཝིདྱ་ཤབྡ་ཨཱཿཧཱུྃ་སྭཱ་ཧཱ། ཞེས་མཆོད། ཛཿཧཱུྃ་བཾ་ཧོ༔ དམ་ཚིག་པ་དང་གཉིས་སུ་མེད་པར་གྱུར། དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃསྔོན་པོས་མཚན་པར་གྱུར། ཨོཾ་ཨཱཿཧཱུྃ། ལན་གསུམ། ཡང་འོད་འཕྲོས་དབང་ལྷ་རིགས་ལྔ་སྤྱན་དྲངས། ཨོཾ་བཛྲ་པུཥྤ་སོགས་ཉེར་སྤྱོད་ལྔས་མཆོད། དེ་བཞིན་གཤེགས་པ་ཐམས་ཅད་ཀྱིས་ལྷ་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་
ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་གསུང་ཞིང་དབང་བསྐུར་བར་གྱུར། དེ་ནས་བཟླས་པ་ནི། བདག་མདུན་གཉིས་ཀའི་ཕྱག་མཛུབ་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར། ཅེས་དམིགས་ལ་གཟུངས་རིང་བརྒྱ་རྩ་བརྒྱད་དག༔ པར་བཟླའོ། །གསུམ་པ་རྗེས་ཆོག་གི་རིམ་པ་ནི། བདག་གི་ཡེ་ཤེས་པ་མདུན་གྱི་གཙོ་བོ་ལ་ཐིམ་པར་གྱུར། དེ་ནས་ཚོགས་བསགས་ཡན་ལག་བདུན་པ་ནི། ཕྱག་འཚལ་བ་དང་བཅས། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་དང་དཔལ་མོ་ནས། །བདག་ཅག་འདྲེན་པ་མཆོག་གི་བར་བྱོན་པའི། །དབང་བསྐུར་བྱིན་རླབས་གདམས་ངག་ལེགས་འདོམས་པའི། །དངོས་ བརྒྱུད་བླ་མ་
རྣམས་ལ་ཕྱག་འཚལ་ལོ། །དུས་གསུམ ་བདེ་བར་གཤེགས་པ་ཆོས་ཀྱི་སྐུ། །འགྲོ་དྲུག་སེམས་ཅན་རྣམས་ལ་སྤྱན་རས་གཟིགས། །ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ། །གཟི་བརྗིད་འོད་དཔག་མེད་ལ་ཕྱག་འཚལ་ལོ། །སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱིས་དབུ་ལ་བརྒྱན། །ཐུགས་རྗེའི་སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །མཁའ་ལྟར་ཁྱབ་པའི་རྒྱལ་བ་སྲས་བཅས་ལ། །བདག་དང་མཁའ་མཉམ་འགྲོ་བ་མ་ལུས་པ། །ལུས་འདི་ཞིང་རྡུལ་མཉམ་པར་རབ་སྤྲུལ་ནས། །རྟག་ཏུ་གུས་པའི་ཡིད་ཀྱིས་ཕྱག་འཚལ་
ལོ། །དེ་ནས་མཆོད་པ་འབུལ་བ་ལ་མཆོད་རྫས་བྱིན་རླབས་ནི། མཆོད་པ་རྣམས་ཁ་གསོས་ལ། སྭ་བྷ་ཝས་བསངས་སྦྱངས། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་ཁམས་ཐམས་ཅད་གང་བར་གྱུར། ཨོཾ་བཛྲ་ཨརྒྷཾ་སྭཱ་ཧཱ། པཱཏྱཾ་ པུཥྤེ་ དྷུ་པེ་ ཨ་ལོ་ཀེ་ གནྡྷེ་ནཻ་ཝིདྱ་ཤབྡ་སྭཱ་ཧཱ། ཕྱག་རྒྱ་དང་བཅས་བྱིན་བརླབས་ནས། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གི་གུས་པས་བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྱ་ཨ་ཝ་ལོ་ཀི་ཏེ་ཤྭ་ར་ས་པ་རི་ཝཱ་ར་ཨཧཱུྃ་པྲ་ཏཱིཙྪ་ཨཱཿཧཱུྃ་སྭཱ་ཧཱ། རབ་
འབྱམས་རྒྱ་མཚོ་དཔག་མེད་ན། །ཞབས་བསིལ་ཇི་སྙེད་ཡོད་པ་དང་། །བདག་གི་གུས་པས་བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྻ་ཨ་ཝ་ལོ་ཀི་ཏེ་ཤྭ་ར་ས་པ་རི་ཝཱ་ར་པཱཏྲཾ་པྲ་ཏཱིཙྪ་ཨཱཿཧཱུྃ་སྭཱ་ཧཱ། རབ་འབྱམས་རྒྱ་མཚོ་དཔག་མེད་ན། །མེ་ཏོག་ཇི་སྙེད་ཡོད་པ་དང་། །བདག་གི་གུས་པས་བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྻ་ཨ་ཝ་ལོ་ཀི་ཏེ་ཤྭ་ར་ས་པ་རི་ཝཱ་ར་པུཥྤ་པྲ་ཏཱིཙྪ་ཨཱཿཧཱྃ་སྭཱ་ཧཱ། རབ་འབྱམས་རྒྱ་མཚོ་དཔག་མེད་ན། །བདུག་སྤོས་ཇི་སྙེད་ཡོད་པ་དང་། །བདག་གི་གུས་པས་བཤམས་པ་འདི། །རྒྱལ་བ་སྲས་དང་བཅས་ལ་འབུལ། ཨོཾ་སརྦ་ཏ་ཐཱ་ག་ཏ་ཨཱརྠ་ཨ་ཝ་ལོ་ཀི་ཏེ་ཤྭ་ར་ས་པ་རི་ཝཱ་ར་དྷུ་པེ་པྲ་ཏཱིཙྪ་ཨཱཿཧཱུྃ་སྭཱ་ཧཱ། རབ་འབྱམས་རྒྱ་མཚོ་དཔག་མེད་ན། །སྣང་གསལ་ཇི་སྙེད་ཡོད་པ་དང་། །
བདག་གི་གུས་པས་བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྻ་ཨ་ཝ་ལོ་ཀི་ཏེ་ཤྭ་ར་ས་པ་རི་ཝཱ་ར་ཨཱ་ལོ་ཀེ་པྲ་ཏཱིཙྪ་ཨཱ་ཧཱུྃ་སྭཱ་ཧཱ། རབ་འབྱམས་རྒྱ་མཚོ་དཔག་མེད་ན། །དྲི་ཆབ་ཇི་སྙེད་ཡོད་པ་དང་། །བདག་གི་གུས་པས་བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྻ་ཨ་ཝ་ལོ་ཀི་ཏེ་ཤྭ་ར་ས་པ་རི་ཝཱ་ར་གནྡྷ་པྲ་ཏཱིཙྪ་ཨཱཿཧཱུྃ་སྭཱ་ཧཱ། རབ་འབྱམས་རྒྱ་མཚོ་དཔག་མེད་ན། །ཞལ་ཟས་ཇི་སྙེད་ཡོད་པ་དང་། །བདག་གི་གུས་པས་ཚི བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྻ་ཨ་ཝ་ལོ་ཀི་ཏེ་ཤྭ་ར་ས་པ་རི་ཝཱ་ར་ནི་ཝིདྱ་པྲ་ཏཱི་ཙྪ་ཨཱཿཧཱུྃ་སྭཱ་ཧཱ། རབ་འབྱམས་རྒྱ་མཚོ་དཔག་མེད་ན། །རོལ་མོ་ཇི་སྙེད་ཡོད་པ་དང་། །བདག་གི་གུས་པས་བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ཨོཾ་སརྦ་ཏ་ཐཱ་ག་ཏ་ཨཱརྷ་ཨ་ཝ་
ལོ་ཀི་ཏེ་ཤྭ་ར་ས་པ་རི་ཝཱ་ར་ཤབྡ་པྲ་ཏཱིཙྪ་ཨཱཿཧཱུྃ་སྭཱ་ཧཱ། ཞེས་འབུལ། དེ་ནས་མཆོད་པའི་མཎྜལ་ལ་ཚོམ་བུ་འགོད་པ་དང་བསྟུན། ཨོྃ་བཛྲ་བྷུ་མི་ཨཱཿཧཱུྃ། གཞི་ཡོངས་སུ་དག་པ་དབང་ཆེན་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུྃ། ཕྱི་ལྕགས་རི་ཁོར་ཡུག་གིས་བསྐོར་བའི་དབུས་སུ། ཧཱུྃ། རིའི་རྒྱལ་པོ་རི་༜ཤར་ལུས་འཕགས་པོ། ལྷོ་འཛམ་བུ་གླིང་། ནུབ་བ་ལང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་ང་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། རིན་པོ་ཆེའི་རི་བོ། དཔག་བསམ་གྱི་ཤིང་། འདོད་འཇོའི་བ། མ་རྨོས་པའི་ལོ་ཏོག །འཁོར་ལོ་རིན་པོ་ཆེ། ནོར་བུ་རིན་པོ་ཆེ། བཙུན་མོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། གཏེར་ཆེན་པོའི་བུམ་པ།
སྒེག་པ་མ། ཕྲེང་བ་མ། གླུ་མ། གར་མ། མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ། ཉི་མ། ཟླ་བ། རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན། ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་འདི་ཉིད་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་༜དམ་པ་རྣམས་དང་ཡི་དམ་ཐུགས་རྗེ་ཆེན་པོའི་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་རྣམས་ལ་དབུལ་བར་བགྱིའོ། ཐུགས་རྗེས་འགྲོ་བའི་དོན་དུ་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཨི་དམ་རཏྣ་མཎྜལ་ཀཾ་ནིརྵ་ཏ་ཡ་མི། མ་ལྕོགས་ན་བསྡུས་
པ་དབུལ། ཐལ་མོ་སྦྱར་ཏེ་སྤྱི་བཤགས། བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་ཚེ་འཁོར་བ་ཐོག་མ་མ་མཆིས་པ་ནས། ད་ལྟ་ལ་ཐུག་གི་བར་དུ་ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་གི་དབང་གིས་ལུས་ངག་ཡིད་གསུམ་གྱི་སྒོ་ནས་སྡིག་པ་མི་དགེ་བ་བཅུ་བགྱིས་པ་དང་། མཚམས་མ་མཆིས་པ་ལྔ་བགྱིས་པ་མ་དང་། དེ་དང་ཉེ་བ་ལྔ་བགྱིས་པ་དང་། སོ་སོར་ཐར་པའི་སྡོམ་པ་དང་འགལ་བ་དང་། བྱང་ཆུབ་སེམས་དཔའི་བསླབ་པ་དང་འགལ་བ་དང་། གསང་སྔགས་ཀྱི་དམ་ཚིག་དང་འགལ་བ་དང་། ཕ་དང་མ་ལ་མ་གུས་པ་དང་། མཁན་པོ་དང་སློབ་དཔོན་ལ་མ་གུས་པ་དང་། གྲོགས་ཚངས་པ་མཚུངས་པར་སྤྱོད་པ་རྣམས་ལ་མ་
གུས་པ་དང་། དཀོན་མཆོག་གསུམ་ལ་གནོད་པའི་ལས་བགྱིས་པ་དང་། དམ་པའི་ཆོས་སྤངས་པ་དང་། འཕགས་པའི་དགེ་འདུན་ལ་བསྐུར་བ་བཏབ་པ་དང་། སེམས་ཅན་ལ་གནོད་པའི་ལས་བགྱིས་པ་ལ་སོགས་པ་སྡིག་པ་མི་དགེ་བའི་ཚོགས་བདག་གིས་བགྱིས་པ་དང་། བགྱིད་དུ་བསྩལ་བ་དང་། གཞན་གྱིས་བགྱིས་པ་ལ་རྗེས་སུ་ཡི་རང་བ་ལ་སོགས་པ་མདོར་ན་མཐོ་རིས་དང་ཐར་པའི་གེགས་སུ་གྱུར་ཅིང་། འཁོར་བ་དང་ངན་སོང་གི་རྒྱུར་གྱུར་པའི་ཉེས་ལྟུང་གི་ཚོགས་ཅི་མཆིས་པ་ཐམས་ཅད་བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་མཐོལ་ལོ་བཤགས་སོ། མི་འཆབ་བོ། །མི་སྦེད་དོ། །ཕྱིན་ཆད་སྡོམ་པར་བགྱིད་ལགས་སོ། ཡན་ལག་ལྷག་མ་ནི། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་
སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་རྣམས། །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པར་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། བདག་གི་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །དེ་ནས་བསྟོད་པ་ནི། རང་གི་སྤྱི་བོར་པད་ཟླའི་སྟེང་དུ་དགེ་སློང་མ་དཔལ་མོ་ཐལ་མོ་སྦྱར་ཏེ་
བཞུགས་ནས་ངོ་ཆེན་མཛད་པར་གྱུར། གུས་པས་ཕྱག་དང་བཅས་ཏེ། ༀ། འཇིག་རྟེན་མགོན་པོ་ལ་ཕྱག་འཚལ་ལོ། །འཇིག་རྟེན་བླ་མ་སྲིད་པ་གསུམ་གྱིས་བསྟོད་པོ། །ལྷ་ཡི་གཙོ་བོ་བདུད་དང་ཚངས་པས་བསྟོད་པ་པོ། །ཐུབ་པའི་རྒྱལ་མཆོག་བསྟོད་པས་གྲུབ་པར་མཛད་པ་པོ། །འཇིག་རྟེན་གསུམ་གྱི་མགོན་པོ་མཆོག་ལ་ཕྱག་འཚལ་ལོ། །བདེ་གཤེགས་དཔག་མེད་སྐུ་སྟེ་སྐུ་བཟང་འཛིན་པ་པོ། །བདེ་གཤེགས་སྣང་བ་མཐའ་ཡས་དབུ་རྒྱན་འཛིན་པ་པོ། །ཕྱག་གཡས་མཆོག་སྦྱིན་ཡི་དྭགས་བཀྲེས་སྐོམ་སེལ་བ་པོ། །ཕྱག་གཡོན་གསེར་གྱི་པད་མས་རྣམ་པར་བརྒྱན་པ་པོ། །དྲི་ཞིམ་རལ་པའི་ཕྲེང་བ་དམར་སེར་འཁྱུག་པ་པོ། །ཞལ་རས་རྒྱས་པ་ཟླ་བ་ལྟ་བུར་མཛེས་པ་པོ། །སྤྱན་གྱི་པདྨ་མཆོག་ཏུ་བཟང་ཞིང་ཡངས་པ་པོ། །ཁ་བ་དུང་ལྟར་རྣམ་དཀར་དྲི་ངད་ལྡན་པ་པོ། ཁ་བ་དུང་ལྟར་རྣམ་དཀར་དྲི་ངད་ལྡན་པ་པོ། །དྲི་མེད་འོད་ཆགས་མུ་ཏིག་ཚོམ་བུ་འཛིན་པ་
པོ། །མཛེས་པའི་འོད་ཟེར་སྐྱ་རེངས་དམར་པོས་བརྒྱན་པ་པོ། །པདྨའི་མཚོ་ལྟར་ཕྱག་ནི་དངར་བར་བྱས་པ་པོ། །སྟོན་ཀའི་སྤྲིན་གྱི་མདོག་དང་ལྡན་ཞིང་གཞོན་པ་པོ། །རིན་ཆེན་མང་པོས་དཔུང་པ་གཉིས་ནི་བརྒྱན་པ་པོ། །ལོ་མའི་མཆོག་ལྟར་ཕྱག་མཐིལ་གཞོན་ཞིང་འཇམ་པ་པོ། །རི་དྭགས་པགས་པས་ནུ་མ་གཡོན་པ་བཀབ་པ་པོ། །སྙན་ཆ་གདུ་བུས་སྒེག་ཅིང་རྒྱན་རྣམས་འཆང་བ་པོ། །དྲི་མ་མེད་པའི་པདྨོའི་མཆོག་ལ་གནས་པ་པོ། །ལྟེ་བའི་ངོས་ནི་པདྨའི་འདབ་ལྟར་འཇམ་པ་པོ། །གསེར་གྱི་སྐ་རགས་མཆོག་ལ་ནོར་བུས་སྤྲས་པ་པོ། །སྟ་ཟུར་དཀྲིས་པའི་རས་བཟང་ཤམ་ཐབས་འཛིན་པ་པོ། །ཐུབ་པའི་མཁྱེན་མཆོག་མཚོ་ཆེན་ཕ་རོལ་ཕྱིན་པ་པོ། །མཆོག་བརྙེས་བསོད་ནམས་མང་པོ་ཉེ་བར་བསགས་པ་པོ། །རྟག་ཏུ་བདེ་བའི་འབྱུང་གནས་རྒ་ནད་སེལ་བ་པོ། །སུམ་མཐར་མཛད་ཅིང་མཁའ་སྤྱོད་
སྤྱད་པ་སྟོན་པ་པོ། །ལུས་ཅན་མཆོག་སྟེ་བདུད་དཔུང་འཁྲུགས་ལ་རྒྱལ་བ་བོ། །གསེར་གྱི་རྐང་གདུབ་སྒྲ་ཡིས་ཞབས་ཡིད་འོང་བ་པོ། །ཚངས་པའི་གནས་པ་བཞི་ཡིས་དབེན་པར་མཛད་པ་པོ། །ངང་པའི་འགྲོས་འདྲ་གླང་ཆེན་དྲེགས་ལྟར་གཤེགས་པ་པོ། །ཡོངས་རྫོགས་ཉེ་བར་བསགས་ཤིང་བསྟན་པ་གཉེར་པ་པོ། ༜མཚོ་དང་ཆུ་ཡི་མཚོ་ལས་སྒྲོལ་བ་པོ། །འདི་ཡན་ཆད་ལན་ཉེར་གཅིག་འདོན། གང་ཞིག་རྟག་ཏུ་ཐོ་རངས་ལངས་ནས་གུས་པ་ཡིས། །སྤྱན་རས་གཟིགས་ཀྱི་དབང་པོ་ཡིད་ལ་སེམས་བྱེད་ཅིང་། །བསྟོད་པའི་མཆོག་འདིས་དག་ཅིང་གསལ་བར་བསྟོད་བྱེད་ཅིང་། །དེ་ནི་སྐྱེས་པའམ་ནི་བུད་མེད་ཡིན་ཀྱང་རུང་། །སྐྱེ་བ་འདིའམ་མ་འོངས་སྐྱེ་།འཇིག་རྟེན་འཇིག་རྟེན་ལས་འདས་དགོས་པ་ཀུན་འགྲུབ་འགྱུར། །ཞེས་ལན་གཅིག་དང་། འཕགས་པ་སྤྱན་རས་གཟིགས་དབང་ཕྱུག་བདག་ལ་
དགོངས་སུ་གསོལ། ཕན་བདེའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་པར་བྱིན་གྱིས་བརླབ་ཏུ་གསོལ། བསྟན་པའི་རྩ་ལག་སྐྱེས་བུ་དམ་པ་རྣམས་སྐུ་ཚེ་རིང་ཞིང་འགྲོ་དོན་འཕེལ་བར་བྱིན་གྱིས་བརླབ་ཏུ་གསོལ། བདག་སོགས་སེམས་ཅན་ཐམས་ཅད་བདེ་ཞིང་དམ་པའི་ཆོས་ལ་པར་བྱིན་གྱིས་བརླབ་ཏུ་གསོལ། བྱམས་པ་དང་སྙིང་རྗེ་བྱང་ཆུབ་ཀྱི་སེམས་འབྱོངས་པར་བྱིན་གྱིས་བརླབ་ཏུ་གསོལ། ཞི་གནས་དང་ལྷག་མཐོང་ཟུང་དུ་འཇུག་པའི་ཏིང་ངེ་འཛིན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཇི་ལྟ་བ་དང་ཇི་སྙེད་པ་རྟོགས་པའི་ཤེས་རབ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་གདབ་བོ། །དེ་ནས་གཏོར་མ་འབུལ་བ་ནི། གཏོར་མ་དང་པོ་སྭ་བྙས་སྦྱངས། སྟོང་པའི་ངང་ལས་བྷྲཱྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཧཱུྃ་ལས་བྱུང་བའི་གཏོར་མ་
བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབ་ལ། ཨོཾ་ཨཱརྻ་ཨ་ཝ་ལོ་ཀི་ཏེ་ཤྭ་ར་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཕུལ། ཨརྒྷཾ་པཱཏྱཾ་པུཎྱེ་དྷུ་པེ་ཨ་ལོ་ཀེ་གནྡྷ་ནཻ་ཝིདྱ་ཤབྡས་མཆོད། སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱིས་དབུ་ལ་བརྒྱན། །ཐུགས་རྗེའི་སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ་ཕྱག་འཚལ་ལོ། །ཞེས་བསྟོད། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་འཕགས་པ་སྤྱན་རས་གཟིགས་དབང་ཕྱུག་གི་ལྷ་ཚོགས་རྣམས་ལ་འབུལ་ལོ། །བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་མ་ལུས་པ་བྱང་ནས། བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེས་ནས་མྱུར་དུ་འཕགས་པའི་གོ་འཕང་ཐོབ་པར་མཛད་དུ་གསོལ། གཏོར་མ་གཉིས་པ། ༀ་་ཨཱཿཧཱུྃ། ལན་གསུམ་གྱིས་སྦྱངས་སྤེལ་བསྒྱུར་ལ། ཨོཾ་ཨ་ཀཱ་རོ་མུ་ཁཾ་སརྦ་
དྷརྨཱ་ཎཾ་ཨཱ་དྱནུ་ཏྤནྣ་ཏོཏྟ་ཨོཾ་ཨཱཿཧཱུྃཧཱྃ་ཕཊ་སྭཱ་ཧཱ། ཞེས་ལན་གསུམ་གྱིས་བསྔོ། ཨརྒྷཾ་པཱཏྱཾ་པུཥྤ་དྷུ་པེ་ཨ་ལོ་ཀེ་གནྡྷེ་ནཻ་ཝིདྱ་ཤབྡས་མཆོད་ཅིང་། མཆོད་སྦྱིན་གྱི་གཏོར་མ་འདི་བསྟན་སྲུང་དམ་ཅན་རྣམས་ལ་འབུལ་ལོ། །སངས་རྒྱས་ཀྱི་བསྟན་པ་དར་བ་དང་། འཇིག་རྟེན་ཁམས་སུ་ ྂའཁྲུགས་འཚེ་ཞི་ཞིང་། བདེ་ལེགས་འབྱུང་བ་དང་། ཆོས་སྒྲུབ་པ་རྣམས་ཀྱི་བར་ཆད་ཞི་ནས་བསམ་དོན་ལྷུན་གྱིས་གྲུབ་པའི་ཕྲིན་ལས་མཛད་དུ་གསོལ། གཏོར་མ་གསུམ་པའང་འབྲུ་གསུམ་བརྗོད་པས་བྱིན་གྱིས་བརླབས། ཨ་ཀཱ་རོ་ལན་གསུམ་གྱིས་བསྔོས། མཆོད་སྦྱིན་གྱི་གཏོར་མ་འདི་ལྷ་ཀླུ་ཁྱད་པར་ཅན་རྣམས་ཀྱིས་གཙོ་བྱས་པའི་གཞི་བདག །གནས་བདག །གཉུག་མར་གནས་པ་རྣམས་ལ་འབུལ་ལོ། །འཇིག་རྟེན་ཁམས་སུ་བདེ་ལེགས་འབྱུང་ཞིང་། གནས་མགྲོན་གྱི་དམ་ཚིག་བསྲུང་
བ་དང་། འགོ་ཞིང་སྡོང་གྲོགས་གཉེན་པོ་མཛད་དུ་གསོལ། །ཞེས་ཕྲིན་ལས་བཅོལ། ཆོ་ག་ཚར་རེ་བཞིན་གཏོར་མ་བཏང་བ་མ་ལྕོགས་ན། ཆོ་ག་སྔ་མ་གཉིས་ལ་འབྲུ་དང་ཟན་རིལ་གྱིས་གཏོར་མ་སྔ་མ་གཉིས་ཁ་གསོ། ཕྱི་མ་ལན་གསུམ་པར་བཏང་། སྤྲོས་པ་བསྡུ་ན། ཚར་རྗེས་ཁོ་ནར་གཏོར་འབུལ་རྣམས་ལན་གཅིག་བྱས་ཀྱང་ཆོག་པར་གསུངས་པས་གོང་དུ་བཅའ་གཤོམ་སྐབས་ནས་གྲབ་ཡུལ་དེ་མཚུངས་བྱའོ། །དེ་ནས་སྨོན་ལམནི། སྐྱེ་ཞིང་སྐྱེ་བ་དག་ནི་ཐམས་ཅད་དུ། །རིགས་བཟང་བློ་གསལ་ང་རྒྱལ་མེད་པ་དང་། །སྙིང་རྗེ་ཆེ་ཞིང་བླ་མ་ལ་གུས་ཏེ། །སྤྱན་རས་གཟིགས་ཀྱི་དམ་ཚིག་ལ་གནས་ཤོག །བྱང་ཆུབ་སེམས་ནི་རིན་པོ་ཆེ། །སོགས་བརྗོད་དོ། །སྤྲོ་ན་ཁྲུས་ཁང་བསྐྱེད་པ་ནས་ན་བཟའ་འབུལ་བའི་བར་ཁྲུས་གསོལ་རྒྱས་པར་བྱ། བསྡུ་ན། མེ་ལོང་དུ་ལྷའི་གཟུགས་བརྙན་ཤར་བ་ལ་བུམ་ཆུ་བླུགས་ཤིང་། འགྲོ་བའི་སྒྲོན་མེ་སྤྱན་རས་གཟིགས་མགོན་ལ། །དྲི་ཞིམ་བདུད་རྩིའི་རྒྱུན་གྱིས་ཁྲུས་གསོལ་བས།
འགྲོ་བའི་སྒྲིབ་གཉིས་དྲི་མ་ཀུན་བསལ་ནས། །དྲི་བྲལ་སྐུ་གསུམ་བརྙེས་པའི་བཀྲ་ཤིས་ཤོག །ཅེས་སྐུ་ཁྲུས་གསོལ། ཐལ་མོ་སྦྱར་ཏེ། བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་བདག་ལ་དགོངས་སུ་གསོལ། བདག་ཅག་ལས་དང་པོ་པར་གྱུར་པས་བྱིང་བ་དང་རྒོད་པའི་དབང་གིས། ཏིང་ངེ་འཛིན་མི་གསལ་བ་དང་། སྔགས་མ་དག་པ་དང་། ཆོ་ག་ལྷག་ཆད་དུ་གྱུར་པ་དང་། གཙང་སྦྲ་ཆུང་བ་ལ་སོགས་པ་ཐམས་ཅད་འཕགས་པ་ཐུགས་རྗེ་ཆེན་པོ་དང་ལྡན་པ་ཁྱེད་ལ་བཟོད་པར་གསོལ་གྱིས། བདག་ཅག་ལ་སྒྲིབ་པར་མི་འགྱུར་བར་བྱིན་གྱིས་བརླབ་ཏུ་གསོལ། ཨོཾ་པདྨ་སཏྭ་ས་མ་ཡ། མ་ནུ་པཱ་ལ་ཡ། པདྨ་སཏྭ་ཏྭེ་ནོ་པ་ཏིཥྛ་དྲྀ་བྷོ་མེ་བྷ་ཝ། སུ་ཏོ་ཥྱོམེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུྃ། ཧ་ཧ་ཧ་ཧ་ཧོ༔ བྷ་
ག་ཝཱན། སརྦ་ཏ་ཐཱ་ག་ཏ། པདྨ་མཱ་མེ་མུཉྩ། པདྨ་བྷ་ཝ་མ་ཧཱ་ས་མ་ཡ་སཏྭ་་ཨཱ༔ ཞེས་ལན་བདུན་ནམ་གསུམ་བརྗོད། གཟུངས་ཆབ་ལེན་པ་ནི། སྔར་གྱི་ཁྲུས་ཆུ་བུམ་པར་བླུགས་པ་རང་དང་སྒྲུབ་གྲོགས་རྣམས་ལ་བཀྱེ་ཞིང་། ཨོཾ་མ་ཎི་པདྨེ་ཧཱུྃ། ཞེས་ལན་གསུམ་བཟླས་པ་དང་། དཀྱིལ་འཁོར་ལྷ་ཚོགས་རྣམས་ཀྱི་ཐུགས་ཀ་ནས་འཕགས་པ་གཙོ་འཁོར་གསུམ་མདུན་གྱི་ནམ་མཁར་བྱོན་ཏེ་ཡུམ་ཡི་གེ་དྲུག་མའི་ཕྱག་ནས་བདུད་རྩིའི་རྒྱུན་བབས་པ་བདག་གི་སྤྱི་བོར་བླུགས་པར་གྱུར། ཞེས་ལན་གསུམ་བཀྲུས་པར་བསམ་ལ། དང་པོས་ཉོན སྒྲིབ་དག །གཉིས་པས་ཤེས་སྒྲིབ་དག །གསུམ་པས་སྐྱེ་མེད་ཆོས་སྐུར་གྱུར། །ཅེས་བུམ་ཆུ་ལན་གསུམ་འཐུང་། དངོས་གཞིའི་ཉིན་བུམ་ཆུ་བཏུང་མི་རུང་ཡང་ཁྲུས་ལན་གསུམ་བྱ། གཙོ་འཁོར་གསུམ་པོ་རང་གི་སྤྱི་བོར་ཐིམ་པར་གྱུར། །ཅེས་ཅུང་ཟད་མཉམ་པར་བཞག་གོ། །དེ་རྗེས་སྨྱུང་གནས་ཆོ་ག་མང་པོ་སྦྲེལ་ནས་བྱེད་པའམ་སྦྱོར་དངོས་ཉིན་རྡུལ་ཚོན་གྱི་ལྷ་ལ་བརྟན་པར་
བཞུགས་བྱ། ཚེས་བཅུ་དྲུག་ལྟ་བུ་རྗེས་གྲོལ་བའི་ཉིན་སྐྱ་རེངས་ཀྱི་དུས་ནས་གསོ་སྦྱོང་མ་གཏོགས་ཆོ་ག་ཚར་གཅིག་གཏང་རག་གི་ཚུལ་དུ་བྱས་ནས་བརྟན་བཞུགས་མེ་ཏོག་འཐོར་རྗེས། ཐུགས་རྗེ་ཕྱག་ན་པདྨོ་ཡིས། །ཡིད་ཀྱི་པདྨོ་ཁ་ཕྱེ་ནས། །རི་བོ་ཏ་ལར་གཤེགས་ནས་ཀྱང་། །ཚུར་སྤྱོན་ཐུགས་རྗེ་ཆེན་པོ་མུ ཞེས་སེ་གོལ་དང་བཅས། རྡུལ་ཚོན་གྱི་ཡེ་ཤེས་པ་གཤེགས། དམ་ཚིག་པ་རང་ལ་ཐིམ་པར་གྱུར། ཞེས་བརྗོད་ལ། ཚོམ་བུ་སོགས་བསྡུའོ། །དེ་མིན་ཆོ་ག་ཀུན་ལ། བདག་བསྐྱེད་ཀྱི་ཞལ་ཕྱག་རྣམས་རྩ་བའི་ཞལ་ཕྱག་ལ་བསྡུས་ཏེ་རང་ཐུགས་རྗེ་ཆེན་པོ་ཞལ་གཅིག་ཕྱག་གཉིས་པའི་སྐུར་གྱུར། ཞེས་བརྗོད། དེ་ནས་བསྔོ་སྨོན་བཀྲ་ཤིས་ནི། དགེ་བ་འདི་ཡིས་མྱུར་དུ་བདག༔ སྤྱན་རས་གཟིགས་དབང་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །བྱང་ཆུབ་སེམས་ནི་རིན་པོ་ཆེ། །སོགས་དང་། བཟང་
སྤྱོད་དང་སྤྱོད་འཇུག་བསྔོ་བའི་ལེའུ་གཙོར་གྱུར་ཐེག་ཆེན་སྨོན་ལམ་ཅི་ནུས་བརྗོད། བསྡུ་ན། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །སོགས་བྱ། དེ་ནས། སྟོན་མཆོག་དམ་པ་ལྷ་མིས་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཞི་བ་ཆགས་བྲལ་ལྷ་མིས་མཆོད་འོས་པ། །ཆོས་ལ་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཚོགས་མཆོད་དམ་པ་ལྷ་མིའི་མཆོད་འོས་པ། །དགེ་འདུན་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཅེས་དང་། ཆེ་བའི་ཆེ་མཆོག་སྟོན་མཆོག་བླ་ན་མེད། །ཆོས་རྗེ་ཉི་མ་རྒྱལ་བའི་བྱིན་
རླབས་ཀྱིས། བདུད་དང་བགེགས་རིགས་གནོད་པའི་དགྲ་ཞི་ནས། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཆོས་ཉིད་བདེན་པའི་ཆོས་མཆོག་བླ་ན་མེད། །དམ་ཆོས་བདུད་རྩི་བདེན་པའི་བྱིན་རླབས་ཀྱིས། །ཉོན་མོངས་དུག་ལྔས་གདུང་བའི་དགྲ་ཞི་ནས། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །དགེ་འདུན་ཡོན་ཏན་རིན་ཆེན་དཔལ་འབར་བ། །རྒྱལ་སྲས་ཕན་མཛད་བདེན་པའི་བྱིན་རླབས་ཀྱིས། །ཉེས་པའི་སྐྱོན་བྲལ་དགེ་ཚོགས་རྣམ་པར་འཕེལ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཚངས་དང་ལྷ་དབང་སྲུང་མའི་བྱིན་རླབས་ཀྱིས། །ཕན་མཛད་ལྷ་ཡི་བཀྲ་ཤིས་གནས་གྱུར་ནས། བདེ་ལེགས་བསམ་པ་ཡིད་བཞིན་འགྲུབ་གྱུར་ནས། །ཚེ་རིང་ནད་མེད་བདེ་སྐྱིད་ལྡན་པར་ཤོག །བཅས་ཀྱིས་ཐོག་དྲངས། ཤིས་བརྗོད་རྒྱ་ཆེར་བརྗོད་ཅིང་མེ་ཏོག་འཐོར་བ་དང་རོལ་
མོའི་སྒྲ་རྒྱ་ཆེར་བྱའོ། །དེ་ལྟར་སྦྱོར་དངོས་གཉིས་ལ། ཆོ་ག་ཚར་གསུམ་རེ་དང་། རྗེས་ཆོག་ཉིན་ཚར་གཅིག་བྱ་བ་ལས། ཐུན་དང་པོར་གོང་བཤད་ཚང་མ་དང་། ཐུན་ཕྱི་མ་གཉིས་ལ་གསོ་སྦྱོང་སྐོར་བཞག །གཞན་ཤིས་བརྗོད་བར་ཆ་ཚང་བཏང་། ཉིན་གསུམ་པའི་ཞོགས་པར་ཡང་གསོ་སྦྱོང་མ་གཏོགས་ཆོ་ག་སྔར་བཞིན་ལ། གཟུངས་རིང་ཉེར་གཅིག་དང་། པོ་བསྟོད་བདུན་ཙམ་བྱས་ཀྱང་ཆོག །སྦྱོར་བའི་ཉིན་ཤ་ཆང་། སྒོག་ཙོང་། ལ་ཕུག །ཏིལ། སྲན་མ་སོགས་སྤངས་ཏེ། དཀར་གསུམ་ལ་བརྟེན་པའི་ཁ་ཟས་གདན་གཅིག་བྱ། དེ་ཡང་འཁར་བ་དང་། ལོ་མ་དང་། ལག་མཐིལ་རྣམས་སུ་མི་བཟའ། ཕྱི་དྲོ་ཇ་བུ་རམ་ཞུན་མར་སོགས་བསྟེན་རུང་། དངོས་གཞིའི་ཉིན་གཉིད་སད་ནས་སྨྲ་བཅད་བྱ། འབྲུ་ཉག་གཅིག་གམ་ཆུ་ཐིགས་གཅིག་ཀྱང་བཟའ་བཏུང་མི་བྱ། ཆོ་ག་ཡང་ཡིད་འདོན་དགོས་པར་དམིགས་པ་མི་གསལ་བ་དག་གིས་སྒྲ་བཅས་བྱས་ན་ལེགས་ཞེས་དམ་པ་གོང་མ་འགས་གསུངས། རྗེས་ཀྱི་ཉིན་ནམ་ལངས་པ་དང་ལུས་ཀྱི་སྲིན་བུ་བཀྲེས་པ་སེལ་ཕྱིར་ཆུ་ཐང་སླ་མོ་ཕོར་པ་གང་རེ་
བཏུང་། དེ་ཉིན་ཡང་བཟའ་བཏུང་སྦྱོར་བའི་སྐབས་དང་འདྲ་ཞིང་། སྤྱོད་ལམ་འཇམ་དེས་གཙང་སྦྲ་ལ་གནས་པར་བྱ། གཟུངས་ཆབ་ལ་གཟུངས་སྔགས་ཀྱི་ཕན་ཡོན་ཆ་མཐུན་ཡོད་པས་རང་གཞན་སྐྱེ་བོ་ཀུན་གྱིས་ཁྲུས་བྱ་ཞིང་ཁར་བཏུང་བ་དང་། རུས་པ་དང་རོ་སོགས་ལ་འཐོར་ཞིང་ཆུ་ཀླུང་ཆེན་པོར་བླུགས་པ་སོགས་འགྲོ་དོན་ཅི་ཆེར་བྱ། རྡུལ་ཚོན་རྣམས་ཀྱང་ས་དང་ཆུ་ལ་གནས་པའི་སེམས་ཅན་རྣམས་ལ་ཕན་གདགས་ཕྱིར། རི་ཆེན་པོའི་རྩེ་དང་། རྒྱ་མཚོར་འབབ་པའི་ཆུ་བོར་སྤྱན་འདྲེན་པ་དང་། མཆོད་རྫས་དམན་པ་རྣམས་མགོན་མེད་དང་དབུལ་ཕོངས་ལ་སྦྱིན་པར་བྱ། གཉིས་རེ་ལ་ཚར་གཅིག་ཏུ་བརྩིས་པའི་ཚར་བརྒྱད་ལ་དཀར་པོ་ཆ་བརྒྱད་ཅེས་གྲགས་ཏེ་བཅུ་གཅིག་ཞལ་གྱི་དུས་བསྙེན་ཐེམས་པ་ཡིན། དེ་ལྟར་བསམ་པ་དག་པས་སྨྱུང་གནས་དང་། ཆོ་ག་ཡང་དག་པ་བྱས་པའི་ཕན་ཡོན་ནི། ཇི་སྐད་དུ། རིགས་ཀྱི་བུའམ། རིགས་ཀྱི་བུ་མོ་གང་དག་ཚེས་བརྒྱད་དམ་བཅོ་ལྔའི་དུས་ལ་བབ་པའི་ཚེ། སྨྱུང་བར་གནས་པའམ། བསྙེན་གནས་ལ་གནས་པ་དག་གིས་ཀྱང་རུང་སྟེ།
བདག་གི་མིང་ནས་བརྒྱ་རྩ་བརྒྱད་ཀྱི་བར་དུ་བརྗོད་ཅིང་ཕྱག་འཚལ་བར་བྱེད། ཡིད་ལ་སེམས་པར་བྱེད་ན། སེམས་ཅན་དེས་མཚམས་མེད་པ་ལྔའི་ལས་བྱས་ཀྱང་དེ་ངེས་པར་དྲངས་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་བགྱིའོ། །ཡིད་ལ་སེམས་པར་བྱེད་ན། སེམས་ཅན་དེས་མཚམས་མེད་པ་ལྔའི་ལས་བྱས་ཀྱང་ངེས་པར་དྲངས་ནས་བདེ་བ་ཅན་གྱི་ཞིང་ཁམས་སུ་སྐྱེ་བར་བགྱི་སྟེ། ངན་སོང་དང་ངན་འགྲོར་འགྲོ་བའི་གནས་མ་མཆིས་གོ་སྐབས་མ་མཆིས་སོ། །ཞེས་གསུངས། གཞན་ཡང་བསྐལ་པ་བཞི་ཁྲིའི་འཁོར་བ་ཕྱིར་བསྙིལ་བ་དང་། རྩ་ལྟུང་ཕོག་པ་དང་། མཚམས་མེད་ལྔ་བྱས་པའང་ཡོངས་སུ་བྱང་ཞིང་། སྐྱེ་བ་དམན་པའི་བུད་མེད་ཀྱིས་ཀྱང་། སྨྱུང་གནས་ལན་གཅིག་བྱས་ན། ཤི་ནས་སྐྱེས་པའི་ལུས་ཐོབ་སྟེ་བྱང་ཆུབ་སེམས་དཔར་འགྱུར་ཞིང་འཁོར་བ་ལ་རྒྱབ་ཀྱི་ཕྱོགས་པར་གསུངས་པ་དང་། གཟིགས་དངོས་བྱང་སེམས་ཟླ་བ་རྒྱལ་མཚན་གྱིས་ཀྱང་། སྨྱུང་གནས་རྣམ་དག་ཚར་བརྒྱད་བྱས་ཤིང་འཕགས་པའི་མཚན་བརྒྱ་རྩ་རེ་བརྗོད་དེ་ཕྱག་འཚལ་ན་ངེས་པར་བདེ་བ་ཅན་གྱི་འཇིག་རྟེན་དུ་ཕྱིར་མི་ལྡོག་པའི་ས་
ཐོབ་ཅིང་། བྱང་ཆུབ་ཏུ་འཚང་རྒྱ་བར་འགྱུར་ལ། ལན་གཅིག་གིས་ཀྱང་ངེས་པར་ངན་འགྲོའི་སྒོ་བཅད་པར་འགྱུར། ཆོས་འདི་སངས་རྒྱས་བྱུང་སེམས་ཐམས་ཅད་ཐབས་ཡིན་པས་ཀུན་གྱིས་འདི་ལ་བསླབ་པར་བྱའོ། །ཞེས་དང་། སྨྱུང་གནས་སྔོན་འགྲོ་གདན་གཅིག་ཉིན་མི་གཅིག་ལ་འཚོ་བ་དྲངས་ན། ས་བརྒྱད་པའི་བྱང་སེམས་ལ་དྲངས་པ་དང་བསོད་ནམས་མཉམ་ཞིང་། གནས་ཚར་བའི་ཕྱིར་ནང་མི་གཅིག་ལ་འཚོ་བ་དྲངས་ཀྱང་རང་སངས་རྒྱས་ལྔ་བརྒྱ་ལ་དྲངས་པ་དང་འདྲ། གསོ་སྦྱོང་བླངས་པ་ཙམ་ལ་དྲངས་ན་དགྲ་བཅོམ་པ་ལ་དྲངས་པའི་ཕན་ཡོན་ཐོབ་པ་དང་། བདག་དེ་ངན་སོང་གསུམ་དང་། ནད་མཚོན་མུ་གེའི་བསྐལ་པར་ནམ་ཡང་མི་སྐྱེ་ཞིང་། ཚེ་རབས་ཐམས་ཅད་དུ་བདེ་སྐྱིད་ཕུན་སུམ་ཚོགས། བྱང་ཆུབ་ཀྱི་སེམས་རྒྱུད་ལ་འཁྲུངས་པ་སོགས་ཕན་ཡོན་དཔག་ཏུ་མེད་པ་འབྱུང་བར་གསུངས། དེ་བཞིན་དུ་བྱང་སེམས་ཆུ་བཟང་པས་ཀྱང་འདའ་ཁར་ཞལ་ཆེམས་སུ། ད་ང་འགྲོ་བས་ངའི་རྒྱགས་ལྷག་གང་ཡོད་ཀྱིས་དགེ་བ་གཞན་བྱ་མི་དགོས། སྨྱུང་གནས་འཚོགས་མི་
རྣམས་ལ་འབྱོར་ན་གདན་གཅིག །མ་འབྱོར་ན་ཐོར་ཐུག་རེ་དྲོངས། དེའང་མ་འབྱོར་ན་མེ་ཤིང་དུམ་པ་རེའི་གཞི་གྱིས་དང་འདི་ཁོ་ན་བསོད་ནམས་ཆེ་བ་ང་ལ་འཕགས་པས་དངོས་སུ་གསུངས་པ་ཡིན། མིའི་ཟེར་ལོ་ཙམ་མིན། ཁོང་གིས་རྫུན་མི་གསུང་། ཞེས་རྗེས་འཇུག་རྣམས་ལ་བརྩེ་བས་རྗེས་སུ་གདམས་པར་མཛད། ད་ལྟ་རྩོད་ལྡན་སྙིགས་མའི་དུས་ངན་འདིར་སྔགས་བླ་མེད་ཀྱི་ལྟ་སྒོམ་ཟབ་མོ་རྣམས་གོ་ཡུལ་ཙམ་ཡང་མ་ཆགས་པར། སྨྱོ་ཆང་སོགས་ལ་བག་མེད་དུ་སྤྱོད་པ་ལ་བརྟུལ་ཞུགས་སུ་རེ་ནས་ཆོ་ག་བོན་གྱེར་ནོར་འཁྲུལ་རྒྱུན་འབྱམས་རེ་གཏོང་བ་ལ་རྩིས་པོ་ཆེ་བྱེད་ནས་རང་གིས་རང་བསླུ་བ་དེ་འདྲ་ལས། གང་ཟག་མཐོ་དམན་སུས་ཀྱང་ཉམས་སུ་ལེན་ཆོག་པ་ཚེགས་ཆུང་ལ་དོན་ཆེ་བ་ཁེ་ཆེ་ལ་ཉེན་ཆུང་བ་ཕྱི་གཙང་ནང་གཙང་འདི་ལྟ་བུའི་ལམ་བཟང་ལ་འབད་འབུངས་བཏོན་ན་གནས་སྐབས་སུའང་གསོན་པོའི་ནད་གདོན་བར་ཆད་ཞི་གཤིན་པོ་སྐྱབས་མེད་མགོན་མེད་རྣམས་ཀྱི་དགེ་རྩ་ལ་དེ་ལས་ལྷག་པ་མེད་ངེས། དེ་ཡང་ཕྱོགས་འདིའི་ཆོས་པར་རློམ་པ་ཕལ་ཆེར་བཤེས་གཉེན་ཚད་ལྡན་ལ་མ་གཏུགས་པར་ཆོས་སྤྱན་དང་བྲལ་བས་
ཡིག་དྲུག་གསོལ་འདེབས་སྒྲུབ་ཐབས་ཀྱིས་སྨྱུང་གནས་ཆོ་ག་ལ་ཞྭ་དཔེ་ལྷམ་འགེབས་བྱེད་པ་དང་། ཡང་ཁ་ཅིག་དཔལ་མོའི་ལུགས་ཀྱི་སྡོམ་ལུང་སོགས་བརྒྱུད་པ་ཐ་དད་ལས་ནོད་ནས། ཆོ་ག་བཏང་ཚེ་དགེ་ལྡན་བླ་བརྒྱུད་ཅན་ཁོ་ནར་བླུན་པོ་གྲགས་རྗེས་སུ་འབྲང་བ་སོགས་འབྲེལ་མ་ཆགས་པ་མང་པོ་ཞིག་མཐོང་བས་བློ་ལྡན་རྣམས་ཀྱིས་དེ་དག་ལ་ནམ་ཡང་ཡིད་རྟོན་པར་མི་བྱའོ། །རྣམ་དག་ཆོག་ཁྲིགས་བཀོད་པའི་དགེ་བ་ཡིས། །འགྲོ་དྲུག་ཕ་མ་མཁའ་མཉམ་སེམས་ཅན་རྣམས། །མཐའ་གཉིས་མཚོ་ཆེན་ཕ་རོལ་མྱུར་བགྲོད་ནས། །སྤྱན་རས་གཟིགས་དབང་གོ་འཕང་མཆོག་ཐོབ་ཤོག༔ ཅེས་པའང་བསྟན་ཞབས་ཀྱི་བྱ་སྤྲང་མ་ཎི་བ་སངས་རྒྱས་རྡོ་རྗེས། རྩ་བ་དཔལ་མོའི་རྒྱ་གཞུང་དང་ཐོགས་མེད་ཞབས་སོགས་བོད་ཀྱི་ཡིག་ཆ་ཁུངས་ཐུབ་བདུན་ཙམ་ལ་ཞིབ་མོར་དཔྱད་ནས། དོན་གནད་ཚང་ཞིང་ཚིག་རོ་ཉུང་བ་གཙོ་བོར་བཏོན་ནས་ཆུ་བབས་སུ་རང་གནས་ཕུན་ཚོགས་རྔ་ཡབ་ཆོས་གླིང་དུ་སྦྱར་བའི་ཡི་གེ་པ་ནི་རྟ་མང་བིཀྵུ་སྐད་གཉིས་སྨྲ་བ་བི་ཛ་ཡས་བགྱིས་པ་དགེ་ལེགས་སུ་གྱུར་ཅིག། སརྦ་མངྒ་
ལཾ།།