བཞི་བ་བསྲུང་བའི་ཕན་ཡོན་།
བཞི་བ་བསྲུང་བའི་ཕན་ཡོན་ནི།
གནས་སྐབས་ཀྱི་ཕན་ཡོན་འདི་ཕྱི་གཉིས་ཀར་རྒྱལ་བ་སྲས་བཅས་ཀྱིས་བུ་ལྟར་དགོངས་པས་དགེ་བའི་ཆོས་མི་ཉམས་ཤིང་འཕེལ་བ་དང༌། ཚེ་འདིར་མཆོག་ཏུ་དགའ་བ་དང་ལྡན་པའི་འཆི་བའི་དུས་བྱེད་པ་དང༌། ཚུལ་ཁྲིམས་ཀྱི་ཕུང་པོ་ཚད་མེད་པ་དང་ལྡན་པས་ངན་སོང་གི་འཇིགས་པ་མེད་ཅིང༌། རྒྱལ་བ་སྲས་བཅས་དང་འཕྲད་པ་ཡིད་ལ་བྱེད་པ་དང༌། ཕྱི་མར་རང་དང་ལྟ་སྤྱོད་མཚུངས་པའི་བྱང་སེམས་དང་དེ་ལས་ལྷག་པའི་དགེ་བའི་བཤེས་གཉེན་གནས་པའི་ཞིང་དུ་སྐྱེ་བ་དང༌། རང་འཁྲུངས་ཀྱི་ཚུལ་ཁྲིམས་དང་ལྡན་པར་འགྱུར་བ་སོགས་དང༌། མཐར་ཐུག་གི་ཕན་ཡོན་འདི་ལ་བརྟེན་ནས་ཚུལ་ཁྲིམས་ཀྱི་ཕར་ཕྱིན་ཡོངས་སུ་རྫོགས་ཏེ་བླ་ན་མེད་པའི་བྱང་ཆུབ་ཏུ་འཚང་རྒྱ་བར་འགྱུར་རོ། །