ས་སྐྱ་པ་ལ་གདམས་པ་བྲམ་ཟེ་ཆེན་པོ་སོགས།

༈ ས་སྐྱ་པ་ལ་གདམས་པ་གཞུགས་སོ། ན་མོ་གུ་རུ། བྲམ་ཟེ་ཆེན་པོའི་ཞལ་ནས་ཀྱང༌། མ་བཅོས་སོ་མར་བཞག་པ་ཕྱག་རྒྱ་ཆེ། །ཞེས་གསུངས། འོ་སྐོལ་གྱི་བླ་མའི་ཞལ་ནས། ཕྱག་རྒྱ་ཆེན་པོ་རང་གི་སེམས་ལ་ཟེར་བ་ཡིན། གསུངས། དེ་ཡང་གཉིས་སུ་མེད་པའི་དོན་གྱིས་ན་ཕྱག མི་འདའ་བའི་དོན་གྱིས་ནི་རྒྱ། དེ་ཡི་གོང་ན་གཞན་མེད་པས་ན་ཆེན་པོའོ། །ཕྱག་ཅེས་པ་ནི་མི་ལ་ལག་པ་གཉིས་ཡོད་པ་ཐལ་མོ་གཅིག་ཏུ་སྦྱར་བ་ལྟར། སེམས་སྣང་བ་དང་སྟོང་པ་གཉིས་སུ་མེད། སྣང་སྲིད་འཁོར་འདས་ཀྱི་ཆོས་ཐམས་ཅད་གཉིས་མེད་ཟུང་འཇུག དེ་ལས་མི་འདའ་བས་ན་རྒྱ། རང་གིས་སེམས་དེ་ལྟར་རྟོགས་ན་སངས་རྒྱས་བྱ་བ་གཅིག་དེའི་གོང་ན་མེད་པས་ཆེན་པོ་བྱ་བ་ཡིན་གསུངས། ཡིད་དང་རིག་པ་སེམས་དང་རླུང༌། །དེའི་འབྲེལ་བ་ཤེས་པར་གྱིས། །ཞེས་པས། དེ་ལ་ཡིད་ཅེས་པ་ནི། ཉོན་མོངས་པ་ཅན་གྱི་ཡིད་དང༌། ཡིད་ཀྱི་རྣམ་པར་ཤེས་པ། རིག་པ་ཞེས་པ་ནི་ཀུན་གཞི་རིག་པ་བྱང་ཆུབ་ཀྱི་སེམས་གདོད་ནས་དག་ཅིང་སྟོང་པའི་ངང༌། སེམས་དང་རླུང་ཞེས་པ་ནི། རླུང་གི་རྟ་ལ་སེམས་ཉིད་ཞོན་ནས་སྒོ་ལྔ་ལ་འགྱུས་པས། ཡིད་ཀྱི་རྣམ་པར་ཤེས་པ་དེར་འཛིན་དུ་ཞུགས་པས་ཉོན་མོངས་པ་ཆགས་སྡང་རྨོང་གསུམ་སྐྱེས་པས། དེ་འཁོར་བའི་ཆོས་སུ་སྣང༌། གང་ཞིག་སེམས་ནི་ཞི་བ་དེར། །དེར་ནི་རླུང་ཡང་ཞི་བར་འགྱུར། །གང་ཞིག་རླུང་ནི་ཞི་བར་དེར། །དེར་ནི་སེམས་ཀྱང་ཞི་བར་འགྱུར། །ཞེས་པས་སེམས་མ་བཅོས་པར་བཞག་པས་རླུང་ནང་དུ་ཟིན། དེས་ཀུན་གཞིའི་རིག་པ་བྱང་ཆུབ་སེམས་ཀྱི་འདུག་ཚུལ་ཇི་ལྟ་བ་བཞིན་དུ་རྟོགས་ཙ་ན། སྒོ་ལྔའི་ཤེས་པ་དང་ཡིད་ཀྱི་རྣམ་ཤེས། ཉོན་མོངས་པ་ཅན་གྱི་ཡིད་ལ་སོགས་པ་ལོགས་ན་མེད་པས། ཀུན་གཞིའི་རང་སྣང་འབའ་ཞིག་ཏུ་སྣང༌། དེ་ནི་མྱ་ངན་ལས་འདས་པའི་ཆོས་ཡིན། བདག་གིས་ཀུན་གཞི་བཟང་པོ་མྱ་ངན་ལས་འདས་པ་གཅིག་ལོགས་ནས་བསྒྲུབ་པར་འདོད། རྣམ་པར་རྟོག་པའམ། ཡིད་ཀྱི་རྣམ་པར་ཤེས་པ་ལ་སོགས་པ་འདི་དག་ཞིའམ་སྤང་བར་འདོད་པའི་བློ་སྐྱེས་རྟོག་པ་བྱུང་ཙ་ན་མི་དགའ། སེམས་གནས་ཙ་ན་དགའ་བར་བྱུང་བས་ཅི་ཞིག་ལྟར་ལ་བླ་མའི་བྱིན་གྱིས་བརླབས་པས། རྣམ་པར་རྟོག་པ་སྐད་ཅིག་མ་དེ་དངོས་པོ་མ་གྲུབ་པར་སྟོང་པར་རྟོགས། དེས་ཀུན་གཞི་རྣམ་དག་ལོགས་ན་མེད་པས་རྣམ་རྟོག་སྟོང་པར་འདུག་པའི་སེམས་དེ་རང་དུ་འདུག ཡིད་ཀྱི་རྣམ་ཤེས་ལ་སོགས་པའི་འཁོར་བའི་ཆོས་དེ་ཡང་སྤང་མི་དགོས་པར་སྟོང་པར་འདུག དཔེར་ན་ཆབ་རོམ་ཞུ་བར་ཆུ་མི་དགོས་པར་ཆབ་རོམ་རང་ཆུ་ཡིན་པ་བཞིན་དུ། དེས་ན་རྟོག་པ་ཞི་བའི་སྟོང་པ་བསྒྲུབ་མི་དགོས། སྣང་གྲག་གི་ཆོས་ཐམས་ཅད་རང་གི་སེམས་འདི་དེ་ལྟར་སྣང་བ་མ་ཡིན་པ་གཞན་གང་ཡང་མི་སྣང་བར་གོ ཆོས་ཐམས་ཅད་སེམས་ཡིན་བྱ་བ་དེ་ཡང་འདི་རང་ཡིན་པར་རྟོགས། ཇི་ལྟར་སྣང་སྣང་སེམས་དེ་རང་དེ་ལྟར་སྣང་བས། ཕྱིའི་ཡུལ་ལོགས་ན་མེད་པར་གོ ཡུལ་ཡུལ་ཅན་གཉིས་མེད་ཟེར་བ་དེ་ཡང་དེར་གཟོད་གོ ཡུལ་བུམ་པ་ལྟ་བུ་དང་སེམས་གཉིས་དབྱེར་མེད་ཟེར་བ་རེ་ནི་མི་འདོར། ཡུལ་སེམས་ཀྱིས་མ་བཟུང་ན། ཕྱི་རོལ་དོན་དུ་གྲུབ་པ་ཡང་མི་སྣང་ལ། སྣང་སེམས་གཉིས་སུ་མེད་བྱ་བ་ཡིན་ཡང་གང་ལྟར་སྣང་ཡང་སེམས་དེ་དེ་ལྟར་སྣང་བ་མ་ཡིན་པ་གཞན་མི་སྣང༌། སྣང་བ་སེམས་སུ་འདོད་ན་གྲུབ་སྡེ་ཅིག་པའམ། བདག་གཅིག་པའི་སྐྱོན་འབྱུང༌། འོ་ན་ཡུལ་སེམས་ཐ་དད་པའམ། ཕྱི་རོལ་དོན་དུ་གྲུབ་པའི་སྐྱོན་མི་འབྱུང་ངམ་སྙམ་ན། ཇི་ལྟར་སྣང་སྣང་སེམས་འདི་སྣང་བ་མིན་པ་གཞན་མི་སྣང་མིག་ཀ་བ་ལ་བལྟས་ན་སེམས་ཡི་དམ་གྱི་ལྷར་བསྒོམས་པས་ཀ་བ་མི་སྣང༌། སེམས་འདི་སྣང་བ་ཡང་མི་གདའ། སེམས་སྣང་བ་ཡིན་ན་རིག་པ་འདི་བེམ་པོར་འགྲོ་དགོས་པ་ལ། མི་འགྲོ་བར་གདའ། དེས་ན་རང་གི་སེམས་འདི་མ་ཡིན་པར་ཕྱག་རྒྱ་ཆེན་པོའམ། སྟོང་པ་གཅིག་བསྒོམ་མི་དགོས་པར་གདའ། ཇི་ལྟར་སྣང་སྣང་སེམས་ལྟ་བུར་སྣང་སྣང་བདེ་བ་དེ་ཕྱག་རྒྱ་ཆེན་པོ་ལྷུན་གྱིས་གྲུབ་པར་ཤེས་པས། ཕྱག་རྒྱ་ཆེན་པོ་མ་ཡིན་པའི་རང་སེམས་སམ་ཡུལ་མི་གདའ། ཇི་ལྟར་སྣང་སྣང་ནི་སེམས་དེ་ལྟར་དུ་སྣང༌། དེ་ལྟར་སྣང་བ་དེ་སེམས་ཕྱག་རྒྱ་ཆེན་པོ་མ་ཡིན་པ་མེད་པས། ད་སྒོམ་མ་ཡིན་པ་གཅིག་ཀྱང་མེད་པས་ས་ཕྱོགས་དག རང་གིས་དེ་ལྟར་གོ་བས་སེམས་ཅི་ཚུག་འདུག་འདུག་འདི་མ་ཡིན་པའི་ཕྱག་རྒྱ་ཆེན་པོ་ལོགས་ན་མེད་པས་དགའ་བ་ཆེན་པོ་གཅིག་སྐྱེས། འདི་བླ་མའི་དྲིན་ཡིན་པར་གདའ་སྙམ་ནས། བླ་མར་སངས་རྒྱས་ཀྱི་འདུ་ཤེས་སྐྱེས། ཕྱག་རྒྱ་ཆེན་པོ་དོ་ཧ་ལས། བླ་མས་གསུངས་པ་གང་གི་སྙིང་ཞུགས་པ། །ལག་པའི་མཐིལ་ན་ཡོད་པའི་རྫས་མཐོང་འདྲ། །གསུངས་པ་ཡང་འདི་ཡིན་པར་གདའ་སྙམ་པ་བྱུང༌། སེམས་འདི་དང་པོ་ནས་འདི་ཚུག་སྣང་བ་ལ། འདི་ངོ་མ་ཤེས་པ་ཆུག་སོང་བ་ཡིན་ན་ཨང་སྙམ་པ་བྱུང༌། སེམས་ཅན་ཐམས་ཅད་ཀྱི་སེམས་ཀྱང་འདི་བཞིན་དུ་སྣང་བ་ལ་མ་རྟོག་པ་དེ་སེམས་འདི་ལྟར་སྣང་སྙམ་ནས་བྱུང༌། སྙིང་རྗེ་ངམ་ཤུགས་ཀྱིས་སྐྱེས། བདག་གི་བླ་མ་རིན་པོ་ཆེ་འདི་དང༌། སེམས་ཅན་ཐམས་ཅད་མཇལ་ནས་སེམས་འདི་ལྟར་དུ་བསྟན་ན་སྙམ་པ་བྱུང༌། མི་ཞེ་སྡང་ཆེ་བ་ཞེ་སྡང་གིས་ཀར་ཀར་འདུག་པ་མཐོང་ཙ་ན། ཞེ་སྡང་དེ་རང་ཕྱག་རྒྱ་ཆེན་པོ་རང་སྣང་བ་ལ་ཨང་འདི་མ་ཤེས་པ་སྙམ་པ་བྱུང༌། སེམས་ཅན་གཞན་ཉོན་མོངས་པ་དུག་ལྔ་དུག་གསུམ་གྱིས་མནར་བ་མཐོང་ཙ་ན། ཉོན་མོངས་པའམ་རྣམ་པར་རྟོག་པ་འདི་རང་སྟོང་ཡིན་པ་ལ། འདི་མ་ཤེས་པར་འདུག་འཁྲུལ་ནས་སྣང་ཨང་སྙམ་པ་བྱུང༌། ད་ལྟ་སེམས་ལ་སྙིང་རྗེ་སྒོམ་པ་དང༌། བླ་མ་ལ་མོས་གུས་བྱེད་པ་དང༌། ལུས་ཡི་དམ་ལྷར་སྒོམ་པ་དང༌། ཐབས་ཀྱི་ཆ་ཉམས་སུ་ལེན་པ་འདི་མ་གཏོགས་པའི་སྟོང་པ་ཉིད་བསྒོམ་མི་དགོས་པར་གདའ། ཐབས་ཤེས་རབ་གཉིས་སུ་མེད་པ་ཡང་འདི་རང་དུ་གདའ། ཕ་རོལ་ཏུ་ཕྱིན་པའི་བརྗོད་བྱ་གཉིས་མེད་ཟེར་བ་དེ་ཡང་འདི་མ་ཡིན་པ་གཞན་མེད། སྣང་བ་སྒྱུ་མར་འདོད་པ་ནི་ཕྱག་རྒྱ་ཆེན་པོའི་སྐྱོན་ཡིན་ཏེ། སེམས་དེ་རང་དེ་ལྟར་སྣང་བ་དེ་མ་ཡིན་པར་སྒྱུ་མར་སྣང་བར་འདོད་ན་བཅོས་པ་ཡིན་པས་སྐྱོན་ཡིན། འདི་ལྟར་སྣང་བ་སྒྱུ་མ་ལྟར་སྣང་ལ། སྒྱུ་མ་ཉིད་མ་གྲུབ་པར་ཤེས་པས་སྒྱུ་མ་གཉིས་མེད་ཀྱི་དབུ་མ་ཡང་ལོགས་ན་མི་གདའ། ལུས་ཡི་དམ་ལྷར་སྒོམ་ཙམ་ན། ལུས་ཡི་དམ་གྱི་ལྷར་མི་སྣང་སེམས་ཡི་དམ་གྱི་ལྷར་སྣང༌། ཡི་དམ་གྱི་ལྷ་ཚུར་འོངས་པ་ཡང་མི་སྣང༌། སེམས་ཡི་དམ་གྱི་ལྷར་སོང་བ་ཡང་མི་སྣང༌། སེམས་དེ་རང་ཡི་དམ་གྱི་ལྷར་སྣང་བ་དེ་སྟོང་པར་སྣང༌། ཡི་དམ་གྱི་ལྷ་ཞི་ནས་སྟོང་པ་ཉིད་མི་འདོད་པ་བསྐྱེད་རྫོགས་ཟུང་འཇུག་ཟེར་བ་ཡང་དེ་རང་དུ་གདའ། སེམས་གང་ལྟར་སྣང་སྣང་སྟོང་པ་ཉིད་ཡིན་པས། གསང་སྔགས་ཀྱིས་ཟུང་འཇུག་ཟེར་བ་ཡང་དེ་རང་ཡིན། སྤྲོས་པ་སྤྲོས་པས་སྟོང་ཞིང་དག་ཅིང་གསལ་བ་འདི་ཆོས་སྐུ། དྲན་པ་དང་རྟོག་པ་ཅི་ཡང་སྣང་ཞིང་འདུག་པ་དེ་སྤྲུལ་པའི་སྐུ། དེ་གཉིས་དབྱེར་མེད་མཚན་དང་དཔེ་བྱད་ལ་སོགས་པའི་ཡོན་ཏན་ཡང་དེ་ལས་ཚངས་བས་ལོངས་སྤྱོད་རྫོགས་པའི་སྐུ། ཟག་པ་དང་བཅས་པ་ཟག་པ་དང་བཅས་པས་སྟོང༌། ཉོན་མོངས་པའམ་རྣམ་པར་རྟོག་པ་ལ་སོགས་པ་ཟུག་རྔུ་སྡུག་བསྔལ་དུ་སྣང་བ་དེ་དེ་རང་གིས་སྟོང་པ་དེ་བདེ་བ་ཆེན་པོའི་སྐུ། དེ་ལ་སྒྲིབ་པའམ་སྒྲིབ་མཁན་གང་ཡང་མ་གྲུབ་པས་རྣམ་དག་གི་སྐུ། སྐུ་ལྔ་ཡང་སེམས་དྲན་པ་སྐད་ཅིག་མ་འདི་ལ་ཚང་བས། ཕྱག་རྒྱ་ཆེན་པོ་ནས་ལྷུན་གྱིས་གྲུབ་པ་ཟེར་ཡང་སེམས་སྐུ་ལྔ་ལྷུན་གྱིས་གྲུབ་པ་འདི་ལྟར་གདའ། བློས་བྱས་པའི་ཆོས་འདི་ཞི་བའམ་ཞི་ཡང་མི་དགོས་པས་བློ་འདི་རང་འདི་འདྲ་བ་གཅིག་ཡིན་བྱ་བའི་མཐའ་མི་སྣང་བས། བློ་ལས་འདས་པ་ཟེར་བ་ཡང་དེ་རང་དུ་སྣང༌། འཁོར་འདས་ཀྱི་ཆོས་མ་ལུས་པ་རིག་པ་འདི་མ་ཡིན་པ་གཞན་མེད་པས་ཡོན་ཏན་གྱི་ཆོས་ཐམས་ཅད་གཅིག་ཙམ་ཞིག་མ་ལུས་པ་མེད་པར་སེམས་འདི་ལ་རྫོགས་པས་བློ་འདས་སམ། རྫོགས་པ་ཆེན་པོ་པས་ཡེ་ནས་ཡེ་རྫོགས་ཡིན་ཟེར་བ་དེ་ཡང་འདི་རང་དུ་གདའ། དེ་ལྟར་ཡིན་ཡང་ཆོས་ཅན་སོ་སོའི་མཚན་ཉིད་མ་འདྲེས་པར་མྱ་ངན་ལས་འདས་པར་རྣམ་པ་ཐམས་ཅད་མཁྱེན་པའི་ཡེ་ཤེས་དང་སེམས་ཅན་སོ་སོའི་སྣང་བ་སྣ་ཚོགས་སུ་སྣང་བ་འདི་མཚན་ཉིད་མ་འདྲེས་པར་སོ་སོར་ཤིག་གེ་ས་ལེ་གསལ་བར་གདའ། སྒོམ་པ་ཀུན་གྱིས་སེམས་ཡུལ་གཅིག་ཏུ་བསྒོམས་ནས་ཆོས་ཉིད་སྟོང་པ་ཉིད་ཡིན་ཟེར་ཞིང་བྱེ་བྲག་མང་པོ་གང་ནས་དགོས་ཟེར་བར་གདའ་སྟེ། དེ་སྟོང་པ་ཉིད་སྒོམ་ཟེར་ཡང་བཏང་སྙོམས་དང་མཉམ་ཉིད་དང་ཆོས་ཉིད་སྒོམ་པར་གདའ། དེ་ནི་སྟོང་པ་ཉིད་དེ་མ་རྟོགས་སྒོམ་མ་ཤེས་པ་ཡིན། སྟོང་ཉིད་རྟེན་ཅིང་འབྲེལ་བར་འབྱུང་བ་འགགས་པ་མེད་པ་རང་གི་སེམས་འདི་ཡིན་སྙམ། ད་ལྟར་གྱི་ཤེས་པ་ཅུག་འདུག་པ་འདི་སྒོམ་བྱེད་ཀྱི་ཤེས་པ་གཉིས་སུ་མེད་པར་སྒོམ་མཁན་གྱི་ཤེས་པ་གཉུག་མ་འདི་ཕྱག་རྒྱ་ཆེན་པོ་ཡིན་པ་ལ་ཡིན་པར་ཤེས་པའི་ཚུལ་གྱིས་མ་ཡེངས་པར་བསྐྱང་ན། སེམས་ཕྱག་རྒྱ་ཆེན་པོ་ཡིན་པ་སྟེ། ཕྱག་རྒྱ་ཆེན་པོར་མྱོང་བར་གདའ། རྟོགས་པའི་དོན་དེ་མ་སྣང་ན། ནུབ་རྟོགས་ན་ནུབ་སངས་རྒྱས། ནང་རྟོགས་ན་ནང་སངས་རྒྱས་བྱས་པས་མི་ཕན། སྔར་མ་རྟོགས་པའི་དུས་བཞིན་ཉོན་མོངས་པ་དང༌། རྣམ་རྟོག་དང་གཟུང་འཛིན་ཐ་མལ་པར་སྔར་བཞིན་དུ་སྣང་ན་རྟོགས་བྱས་ཀྱང་མི་ཕན། སེམས་ཅན་ཐམས་ཅད་ཀྱིས་སེམས་ཆོས་ཀྱི་སྐུར་ཐོག་མ་མེད་པ་ནས་ཡོད་ཀྱང་ཆོས་སྐུར་མི་སྣང་བས་འཁོར་བར་སྣང་བ་ཡིན། དེས་ན་གཉུག་མའི་ཡིད་ཀྱིས་ཟིན་པ་གལ་ཆེ། གཉུག་མ་ཞེས་པ་ནི་སྒྲོ་སྐུར་དང་བྲལ་བའི་ཤེས་པ་འདི་ལ་ཟེར་བ་ཡིན། ཡོད་ཅེས་བྱ་རྒྱུ་ལ་དངོས་པོ་འདི་འདྲ་བ་གཅིག་ཡིན་བྱ་བ་གྲུབ་པ་མེད་པས་སྒྲོ་འདོགས་སུ་མི་སྣང༌། མེད་ཅེས་བྱ་རྒྱུ་ལ་རྒྱུན་ཆད་པ་མེད་པར་ཅིར་སྣང་གིན་འདུག་པས་སྐུར་པ་བཏབ་དུ་མི་སྣང༌། སྒྲོ་སྐུར་དང་བྲལ་བའི་ཤེས་པ་གཉུག་མ་འདི་གམ་པར་བསྐྱངས་ནས་སྣང་གྲགས་ཀྱི་དངོས་པོ་འདི་ཐམས་ཅད་ལ་འདི་སྤང་འདི་བླང་བྱ་བ་མེད་པར་ཐམས་ཅད་སྒོམ་དུ་འཆར་ཞིང་འདུག དེ་ལྟར་ཡིན་པ་ཡང་དོ་ཧ་ལས། གཉུག་མའི་ཡིད་ནི་གང་ཚེ་བསྐྱང་གྱུར་ན། །དེ་ཚེ་བླ་མའི་མན་ངག་སྙིང་ལ་འཇུག །ཅེས་གསུངས། ཡང་དོ་ཧ་ལས། མཐོང་དང་ཐོས་དང་དྲན་དང་རིག་པ་དང༌། །ཅལ་ཅོལ་སྨྲ་དང་ལན་སྨྲར་གྱུར་པ་ལ། རྣམ་པ་དེ་ཉིད་ལས་ཀྱང་སྤྱོད་མི་བྱ། །ཞེས་གསུངས་པའི་དོན་ཡང་དེ་ཉིད་ལ་གསུངས་པར་སྣང༌། དེ་ཉིད་གོམས་པ་མངོན་དུ་གྱུར་ན་འབྲས་བུ་ཡང་དེ་རང་དུ་འདུག་པས་འཁོར་བར་ལྟུང་བ་དང་ལྟུང་བའི་དོགས་པ་དང་བྲལ། མྱ་ངན་ལས་འདས་པ་རང་གི་སེམས་ཆོས་ཀྱི་སྐུར་རྟོགས་པས་སངས་རྒྱས་ཐོབ་པའི་རེ་བ་དང་བྲལ། གཞན་དོན་ཕུན་སུམ་ཚོགས་པའི་རྒྱུ་ཡང༌། བྱང་ཆུབ་མཆོག་ཏུ་སེམས་བསྐྱེད་པ་དང༌། བྱམས་པ་དང་སྙིང་རྗེ་བྱང་ཆུབ་ཀྱི་སེམས་སྒོམ་པ་དང༌། བླ་མ་ལ་མོས་གུས་བྱེད་པ་དང༌། ལུས་ཡི་དམ་གྱི་ལྷར་སྒོམ་པ་དང༌། སྨོན་ལམ་རྣམ་པར་དག་པ་བཏབ་ན་རང་གཞན་གཉིས་ཀའི་བདེ་སྐྱིད་ཕུན་སུམ་ཚོགས་པ། མཆོག་ཐུན་མོང་གཉིས་ཀྱི་དངོས་གྲུབ་རང་ལ་ཡོད་པ་འདི་རང་ཡིན། འདི་ལས་བྱུང་བའི་དགེ་བའི་རྩ་བ་འདིས། །བདག་གཞན་བླ་མེད་བྱང་ཆུབ་ཐོབ་པར་ཤོག །དགེ་བའི་བཤེས་གཉེན་པས། ངེད་ཀྱིས་ཉམས་སུ་མྱོང་བའི་ཆོས་གཅིག་ཡི་གེར་ཞིབ་པར་མཛོད་ལ་བསྐུར་གསུངས་པ་ལ། རང་སེམས་ཉམས་སུ་མྱོང་ཚོད་ཡི་གེར་བྲིས་པ་ལགས། ཐུགས་ལ་བདེ་ན་འདི་བཞིན་ཉམས་སུ་ལོངས། འོན་ཀྱང་ཁྱེད་ལ་འདི་མི་དགོས་ཏེ། བསྐུར་གསུངས་པའི་གསུང་མ་བཅག་པ་ལགས་པས་ཐུགས་མཉེས་པར་ཞུ། དགེ་བའི་བཤེས་གཉེན་ལ་འབུལ་བ་རྒྱ་ཆེན་པོ་དགོས་པ་ཡིན་ཏེ་མི་གདའ། ན་བཟའི་རྒྱུ་ཆེ་ཞ་ཐུན་རི་རབ་ཡུག་གཅིག དངུལ་བྲེ་ཆེན་སྲང་ལྔ་བཅུ་ཡོད་པ་གཅིག འབྲོམ་གྱིས་ཕུལ་བའི་གཡུ་དམར་ཟུར་གསུམ་ཞེས་པ་ཞོ་གཉིས་པ་རབ་གཅིག སོག་པོའི་ཞེའུ་བྱིན་བཟང་བ་གཅིག་དང་འདི་རྣམས་འབུལ། འབུལ་བ་ཆུང་བར་སྣང་བ་ལ་ཐུགས་རྗེ་མི་ཆུང་བར་ཞུ། ས་སྐྱ་པ་ལ་གདམས་པ། ཏི་ཤྲི་རས་པས་མཛད་པ་རྫོགས་སོ། །དགེའོ། །