འཇམ་དཔལ་སྨན་གདོང་ནག་པོའི་སྒོ་ནས་རང་གཞན་བསྲུང་བའི་དམིགས་བཟླས་རྫས་སྲུང་།
འཇམ་དཔལ་སྨན་གདོང་ནག་པོའི་སྒོ་ནས་རང་གཞན་བསྲུང་བའི་དམིགས་བཟླས་རྫས་སྲུང་བཞུགས་སོ༔
ཨམནོསཔདྨའག །ཉ༣ཊི༔ འཇམ་དཔལ་སྨན་གདོང་ནག་པོ་མི་ཤིགས་གནམ་ལྕགས་འབར་བ་ལ་ཕྱག་འཚལ་ལོ༔ འདིའི་སྒོ་ནས་རང་གཞན་པསྲུང་བའི་ཐབས་ལ་གསུམ༔ དམིགས་བཟླས༔ རྫས་སྲུང་༔ ཙཀྲ༔ དང་པོ་ནི༔ ཁྲོ་ཆུའི་གཞུང་བསྲང་ན་རབ༔ མ་གྲུབ་ན་མངོན་རྟོགས་ནས་ཇི་ལྟར་བཤད་པའི་བསྐྱེད་རིམ་སྲུང་བའི་གུར་དང་བཅས་པ་སྐད་ཅིག་ལ་གསལ་གདབ༔ རང་གི་ཐུགས་ཀའི་ཧཱུཾ་ཡིག་གི་ནཱ་དའི་ནང་དུ་རྩ་བའི་བླ་མ་དེ་ཉིད་རྩ་བརྒྱུད་ཀྱི་བླ་མ་ཐམས་ཅད་འདུས་པའི་ངོ་བོ་ལ༔ རྣམ་པ་ནི་རྡོ་རྗེ་འཆང་ཆེན་པོ་སྐུ་མདོག་སྔོན་པོ་རུས་པའི་རྒྱན་དྲུག་དང་རིན་པོ་
ཆེས་བརྒྱན་ཅིང་༔ སྐུ་འགྱིངས་བག་དང་བཅས་ཏེ་ཞབས་རྡོ་རྗེ་སྐྱིལ་ཀྲུང་གིས་བཞུགས་པ༔ རྡོ་རྗེ་དྲིལ་བུ་ཐུགས་ཀར་བསྣོལ་ཐབས་སུ་འཛིན་པ་བླ་མ་ཐམས་ཅད་འདུས་པའི་ངོ་བོར་བསྒོམ༔ དེ་ཡང་སྤྲོས་པ་ལ་དགའ་ན་རྩ་བརྒྱུད་བླ་མ་ཐམས་ཅད་ཀྱིས་བསྐོར་བར་བསྒོམ༔ ཡང་བླ་མའི་སྐུ་རིམ་དང་བསྲུང་བ་དགོས་ན་རྡོ་རྗེ་འཆང་གི་མདུན་དུ་བླ་མ་དེ་དངོས་སུ་བསྒོམ༔ ཟླ་ཚེས་ཀྱི་ནང་དུ་ཡི་དམ་ཐམས་ཅད་འདུས་པའི་ངོ་བོ་འཇམ་དཔལ་དབྱངས་དམར་སེར་རལ་གྲི་པོ་ཏི་བསྣམས་ནས་བཞུགས་པར་བསམ༔ སྤྲོས་པ་ལ་དགའ་ན་ཡི་དམ་རྒྱུད་སྡེའི་ལྷ་ཚོགས་དང་རང་གི་ཡི་དམ་གཞན་
ཐམས་ཅད་དེ་ལ་བསྐོར་ནས་བཞུགས་པར་བསྒོམ༔ མགོ་སྐེའི་ནང་དུ་རང་གི་སྲོག་གི་དྭངས་མ་ནི་ཡིག་ལྗང་གུའི་ནང་དུ་ཚེའི་དྭངས་མ་ཐིག་ལེ་དཀར་པོ་རྡེའུ་ཙམ་ཞིག་གི་མཐའ་སྐོར་དུ་མིང་ཡིག་སྐོ་ར་བསྐོར་བར་བསྒོམ༔ ཧ་ཁོག་ནང་དུ་གཡས་སུ་བསྲུང་བྱ་ཕོ་རིགས་གཡོན་དུ་མོ་རིགས༔ རྒྱབ་ཏུ་ཞིང་ཁང་༔ མདུན་དུ་ནོར་རྫས༔ འོག་ཏུ་བྲན་འཁོར་རྣམས་བསྒོམ༔ འ་ཆུང་ནང་དུ་ཆོས་སྐྱོང་ལྷ་ཆེན་མ་ནིང་སོགས་ཕོ་རྒྱུད། ལྷ་མོ་དུད་སོལ་སོགས་མོ་རྒྱུད་བསྒོམ་ཞབས་ཀྱུའི་ནང་དུ་སྡེ་བརྒྱད་ཀྱི་ས་བོན་སྤུས་བྲིས་པ་ཙམ་མགོ་ཐུར་བསྟན་དུ་བསྒོམ༔ སྤྱི་བོའི་མཆོད་རྟེན་གསུམ་གྱི་ལྷ་གསུམ་སྐད་ཅིག་གིས་གནས་འགྱུར་ནས་གཡས་སུ་སྐུའི་འཇམ་དཔལ་དཀར་པོ་གཡོན་དུ་གསུང་གི་འཇམ་དཔལ་དམར་པོ༔ དབུས་སུ་ཐུགས་ཀྱི་འཇམ་དཔལ་མཐིང་ག གསུམ་ཀའང་ཞལ་གཅིག་ཕྱག་གཉིས་པ་ཞི་ཞིང་འཛུམ་པ༔་གཡས་རལ་གྲི་གཡོན་ཨུཏྤལ་པོ་ཏི་བསྣམས་ནས་རྡོ་རྗེ་སྐྱིལ་ཀྲུང་གིས་བཞུགས་པ༔ དར་དང་རིན་པོ་ཆེའི་རྒྱན་དུ་མས་བརྒྱན་པར་བསམ༔ གནམ་ས་གཉིས་པོ་གསེར་གྱི་འཁོར་ལོ་རྩིབས་སྟོང་དང་ལྡན་པ་ཁ་སྤྲོད་གུར་ཐབས་སུ་ཡོད་པ་རྩིབས་སྟོང་གི་ནང་དུ་བསྐལ་བཟང་སངས་རྒྱས་
སྟོང་༔ ཞལ་འཛུམ་ཞིང་སྤྱན་བསྲུང་བྱ་ལ་གཟིགས་པ་ཐམས་ཅད་སྤྲུལ་སྐུའི་ཆ་ལུགས་ཅན༔ མཚན་དང་དཔེ་བྱད་ཡོངས་སུ་རྫོགས་ཤིང་ན་བཟའ་ཆོས་གོས་གསུམ་བཀླུབས་པ༔ སྐུ་མདོག་ནི་མདུན་ཕྱོགས་ཤར་ཡིན་པས་དཀར་པོ༔ ལྷོ་ཕྱོགས་ཐམས་ཅད་སེར་པོ༔ ནུབ་ཕྱོགས་ཐམས་ཅད་དམར་པོ༔ བྱང་ཕྱོགས་ཐམས་ཅད་ལྗང་གུ༔ མཚམས་སུ་བཞུགས་པ་ཐམས་ཅད་སྔོན་པོ༔ གཡས་ཐམས་ཅད་སྐྱབས་སྦྱིན་གྱི་ཕྱག་རྒྱ་མཛད་པའི་འོག་ཏུ་བསྲུང་བྱ་ཐམས་ཅད་ཆོས་ཉན་པའི་འདུན་པས་ཡོད་པར་བསམ་སྟེ༔ སངས་རྒྱས་རེ་རེའི་མདུན་དུ་བསྲུང་བྱ་རེ་རེ་ཡོད་ཅིང་དེ་རེ་རེའི་མཐར་བྱང་ཆུབ་སེམས་དཔའི་ཉན་ཐོས་བྱེ་བ་དུ་མས་བསྐོར་ཐམས་ཅད་ཀྱི་ཕྱག་གཡོན་ན་ཚེའི་བུམ་པ་བསྣམས་ཤིང་༔ རྟེན་འབྲེལ་བསླུ་བ་མེད་པ་དང་ཕ་རོལ་ཏུ་ཕྱིན་པའི་ཆོས་འཁོར་བསྐོར་ནས་སྲུང་བའི་འཁོར་ལོ་ཐམས་ཅད་བྱིན་གྱིས་བརླབས་ཤིང་རབ་ཏུ་གནས་པར་བསྒོམ༔ རྟེན་འབྲེལ་སྙིང་པོ་ཚར་གཅིག་གམ་གསུམ་བཟླ༔ དེ་ནས་རང་གི་སྙིང་གའི་ཧཱུྃ་དང་ཡ་ལས་འོད་ཟེར་འཕྲོས་པས་ལས་ཀྱི་གཤིན་རྗེ་ཁྲོ་ཆུ་དུག་ཡོང་དཔག་ཏུ་མེད་པ་འཕྲོས་པས་བདེ་བར་གཤེགས་པ་ཐམས་ཅད་ཀྱི་ཐུགས་
རྒྱུད་བསྐུལ་བས༔ དེ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ནུས་མཐུ་ཐམས་ཅད་དང་༔ དྲེགས་པ་ཐམས་ཅད་ཀྱི་མཐུ་སྟོབས་ཐམས་ཅད་བསྡུས་ནས༔ བདག་དང་བསྲུང་བྱའི་གུར་ཁང་ལ་ཐིམ་པས་རྡོ་རྗེ་ཕ་ལམ་གྱིས་ཀྱང་མི་ཆོད་པར་གྱུར༔ ཡང་འོད་ཟེར་ཁྲོ་ཆུང་འཕྲོས་པས་བྱད་མ་ལྷ་སྲུང་དང་བཅས་པའི་སྲུང་བའི་གུར་ཁང་བཅོམ གསོད་པའི་མཚོན་ཆ་བཅས༔ ནུས་མཐུ་ཐམས་ཅད་བསྡུས་ནས་རང་དང་གུར་ཁང་རྣམས་ལ་ཐིམ་པས༔ དེའི་ཤུགས་ཀྱིས་རང་གི་གུར་ཁང་སྲ་ཞིང་མཁྲེགས་པ་རྔམས་ལ་མཐུག་པ་འོད་ཟེར་རབ་ཏུ་འབར་བར་གྱུར་པར་བསམ༔ ཡང་ས་བོན་ལས་འོད་ཟེར་འཕྲོས་པས་ནང་བཅུད་ཀྱི་སེམས་ཅན་མཐུ་སྟོབས་ཅན་རྣམས་ཀྱི་ནུས་མཐུ་དང་༔ རང་དང་བསྲུང་བྱ་རྣམས་ཀྱི་ཚེ་དང་བླ་འཁྱམས་པ་དང་༔ བྱད་མའི་སྲོག་གི་དྭངས་མ་ཐམས་ཅད་ཛདང་འོད་ཟེར་གྱི་འཕྲོ་འདུས་བསྡུས་ནས་རང་དང་བསྲུང་བྱ་རྣམས་ལ་ཐིམ་པས་རྡོ་རྗེའི་གུར་དུ་གྱུར༔ ཡང་ས་བོན་ལས་འོད་ཟེར་འཕྲོས༔ ཕྱི་སྣོད་ཀྱི་འཇིག་རྟེན་སྲ་མཁྲེགས་ཀྱི་ནུས་པ་ཐམས་ཅད་དང་༔ འབྱུང་བ་ལྔའི་ནུས་པ་དང་སྟོབས་རྣམས་གུར་ཁང་ལ་ཐིམ་པས༔ གུར་ཁང་གནམ་ལྕགས་ཀྱི་རྡོ་རྗེ་ཕ་ལམ་ལྟ་
བུ་སྲུབ་མེད་པ་གང་གིས་ཀྱང་མི་ཆོད་པ་མི་ཤིགས་པ་མི་ཚུགས་པར་གྱུར་པར་བསམ༔ དེ་ལྟར་འཕྲོ་འདུའི་དམིགས་པ་ཡང་དང་ཡང་དུ་གསལ་གདབ་ཅིང་༔ ཨོཾ་མཉྫའི་ཡ་མཱནྟ་ཀ༔ བྱ་གྷི་ཝ༔ བཛྲ་པཱ་ཎི༔ དུ་ཏྲི་ཡ་མ་རཱ་ཙ༔ ཡ་མ་རཀྵ༔ ཀྲོ་ཏ་པ་ཙ་ལ༔ ཀཱ་ལ་རཱུ་པ༔ ཨ་ཀྲོ་རཱ་༔ ཡ་མ་རཱ་ཙ༔ ས་མ་ཡ་ཛ༔ བདག་ཅག་མི་ནོར་འཁོར་དང་བཅས་པ་ལ་སྲུངས་ཤིག་ནི་ཧཱུཾ་བཛྲ་རཀྵ་རཀྵ་སྭཱ་ཧཱ༔ ཞེས་བརྒྱ་རྩ་བརྒྱད་དང་རྒྱུན་དུ་ནི་དུ་ཏྲི་མན་ཆད་བཟླ༔ རང་ཁོ་ན་སྲུང་བ་ལ་ནི༔ མ་མ་རཀྵ་རཀྵ་ཀུ་རུ་ཡེ་སྭཱ་ཧཱ༔ ཞེས་སྦྱར༔ ཡང་རྒྱལ་པོ་དང་རྗེ་དཔོན་དང་༔ བླ་མ་དང་ཡོན་བདག་གི་རིམ་གྲོ་བྱེད་ན་བདག་ཅག་དཔོན་གཡོག་འཁོར་དང་བཅས་པ་ལ་སྲུངས་ཤིག་ནཾ་ཧཱུཾ་བཛྲ་རཀྵ་རཀྵ་སྭཱ་ཧཱ༔ ཞེས་སྦྱར་བ་བཟླ༔ ཐུན་མཚམས་སུ་གཏོར་ཆུང་འབུལ་ཞིང་༔ བཅོམ་ལྡན་འཇམ་དཔལ་ཁྲོ་ཆུ་དུག་གདོང་གི་ལྷ་ཚོགས་འཁོར་དང་བཅས་པ་རྣམས་ཀྱིས་བདག་ཅག་དཔོན་སློབ་ཡོན་མཆོད་མི་ནོར་འཁོར་དང་བཅས་པ་ཐམས་ཅད་ནད་གདོན་བྱེད་མ་ལ་སོགས་པའི་གནོད་པ་ཐམས་ཅད་ལས་བསྲུང་བ་དང་༔ བསྐྱབ་པ་དང་༔ སྦ་བའི་ཕྲིན་ལས་མཛད་དུ་གསོལ༔ ཞེས་བརྗོད་
ཅིང་རྟགས་མ་བྱུང་གི་བར་དུ་འབད་པར་བྱའོ༔ རྨི་ལམ་དུ་ཉི་ཟླ་ཤར་བ༔ ནམ་ལངས་པ༔ གོས་གསར་གྱོན་པ༔ གོ་ཆ་དང་ཁྲབ་གྱོན་པ༔ རྫོང་ནང་དུ་འདུག་པ༔ མཁར་བརྩེགས་པ༔ གཞན་དོན་དུ་ཡིན་ན་བསྲུང་བྱ་དེ་རྣམས་དངོས་སམ་བརྡ་རྟགས་ཀྱི་སེམས་ཅན་སྐྱབས༔ བཙན་པོའི་མཁར་དུ་ཁྲིད་པ༔ གོས་གསར་པ་དང་གོ་ཆ་བཀོན་པའི་རྨིས་ལྟས་རང་དང་བསྲུང་བྱ་གཉིས་ཀ་ལ་འབྱུང་༔ དངོས་སུ་ཁམས་བདེ༔ རིག་པ་དྭངས༔ བསྐྱེད་རིམ་སྲུང་འཁོར་གསལ་བ་དང་༔ ཁྱད་པར་གློ་བུར་དུ་དོན་མེད་པར་དཔའ་སེམས་སྐྱེ་བར་འབྱུང་ངོ་༔ དེ་ལྟར་སྲུང་བ་གལ་ཆེ་ན་མཚམས་བསྡམས༔ དེ་ཙམ་མིན་ན༔ མཚམས་མ་གྲུབ་ཀྱང་ཐུན་དང་ཐུན་དུ་བཟླས་པས་འགྲུབ་བོ༔ རྒྱུན་གྱི་སྲུང་བ་ནི༔ དམིགས་པ་གསལ་བས་སྔགས་བརྒྱའམ་ཉེར་གཅིག་ཐུན་རེ་ཙམ་བཟླས་པས་ཆོག་གོ༔ ས་མ་ཡ་རྒྱ་རྒྱ་རྒྱ༔ ས་མ་ཡ་ཁ་ཐཾ༔ ཨྠྀི༔ ཤིམ། གཉིས་པ་ལ་རང་བསྲུང་བ་དང་གཞན་བསྲུང་བའོ༔ དང་པོ་ནི་རང་ལ་བྱད་ཁ་སྟོན་མཁན་མང་དུ་ཡོད་ན་རྫ་ས་སྲུང་འདི་རྣམས་བྱའོ༔ རང་གི་བྱང་སེམས་ལ་བསྙེན་སྔགས་སྟོང་བཏབ་སྟེ་དེ་ནས་བསྙེན་སྔགས་ཤམ་དུ་མ་མ་བཛྲ་ཀཱ་ཡ་
ནཾ་ཧཱུཾ་བཛྲ་རཀྵ་རཀྵ༔ ཞེས་བརྒྱ་རྩ་བཟླས་ཏེ་བཏབ༔ དཔྲལ་བར་ཐིག་ལེ་གཅིག་བྱས་པས་སྐུ་རྡོ་རྗེ་འཇམ་དབྱངས་དཀར་པོ་དཔྲལ་བར་ཨོཾ་དཀར་པོས་མཚན་པར་བསྒོམ༔ བསྙེན་སྔགས་ཀྱི་མཇུག་ཏུ་མ་མ་བཛྲ་ཝཱཀ་ནི་ཧཱུཾ་བཛྲ་རཀྵ་རཀྵ༔ ཞེས་བརྒྱ་རྩ་བཟླས་མགྲིན་པར་ཐིག་ལེ་བྱས་པས་གསུང་རྡོ་རྗེ་སྤྱན་རས་གཟིགས་དཀར་དམར་གྱི་མགྲིན་པར་ཨཱཿདམར་པོས་མཚན་པར་བསམ༔ རྩ་སྔགས་མཇུག་ཏུ་མ་མ་བཛྲ་ཙིཏྟ་ཏྲཾ་ཧཱུཾ་བཛྲ་རཀྵ་རཀྵ༔ ཞེས་བརྒྱ་རྩ་བཟླས༔ སྙིང་གར་ཐིག་ལེ་བྱས་པས་ཐུགས་རྡོ་རྗེ་ཕྱག་ན་རྡོ་རྗེ་མཐིང་གའི་ཐུགས་ཀར་ཧཱུཾ་སྔོན་པོས་མཚན་པར་བསམ༔ དེ་ནས་ལྷ་གསུམ་རང་གི་ལུས་ངག་ཡིད་གསུམ་ལ་ཐིམ་པས༔ རང་གི་ལུས་ངག་ཡིད་གསུམ་སྐུ་གསུང་ཐུགས་རྡོ་རྗེའི་རང་བཞིན་དུ་བྱས་ནས་རྒྱས་བཏབ་པར་བསྒོམ༔ རྡོ་རྗེ་གསུམ་གྱི་སྲུང་བའོ༔ ཨྠྀི༔ རང་གི་དྲི་ཆུ་བར་པ་ལ་བསྙེན་སྔགས་མཇུག་ཏུ་མ་མ་ནི་ཧཱུཾ་བཛྲ་རཀྵ་རཀྵ་ཀུ་རུ་ཡེ་སྭཱ་ཧཱ་ཞེས་བརྒྱ་རེ་བཟླས་ནས་གནས་གསུམ་དུ་ཐིག་ལེ་བྱ༔ ཨོཾ་དཀར་ཨཱཿདམར་ཧཱུྃ་མཐིང་གསུམ་དུ་གྱུར་སྐུ་གསུང་ཐུགས་རྡོ་རྗེའི་རྒྱས་བཏབ་པར་བསམ་དྲི་ཚུ་ལ་བརྟེན་ནས་རང་སྲུང་བའོ༔ ཨྠྀི༔ གྲི་ལྕགས་ཀྱི་ཕུར་
པ་སོར་བཞི་པ་གྲི་ཁྲག་གིས་ངར་བླུད་པ་ལ་བསྔགས་ནས་མགུལ་དུ་བཏགས་པ་དེ་ལ་སྔགས་བསྐྱར་ལ་བཏབ༔ མེད་ན་གསར་དུ་བསྙེན་སྔགས་ལ་མ་མ་ཏྲཾ་ཧཱུཾ་བཛྲ་རཀྵ་རཀྵ་ཀུ་རུ་ཡེ་སྭཱ་ཧཱ༔ ཞེས་བརྒྱ་སྟོང་བཟླས་ལ་རང་གི་གོང་བ་གཡས་སུ་བཏགས་སོ༔ དེ་ལ་ནི་ཁྱད་མ་འབུམ་གྱིས་བྲུབ་ཀྱང་གནོད་མི་ནུས་སོ༔ ཨྠྀི༔ གཉིས་པ་ནི༔ རང་གི་དྲི་ཆུ་བར་པ་ལ་བསྙེན་སྔགས་ཤམ་དུ་བདག་ཅག་དཔོན་སློབ་མི་ནོར་འཁོར་དང་བཅས་པ་ལ་སྲུངས་ཤིག་ནཾ་ཧཱུཾ་བཛྲ་རཀྵ་རཀྵ༔ ཞེས་བརྒྱའམ་སྟོང་བཏབ་ལ་བསྲུང་བྱ་མི་ནོར་ཐམས་ཅད་ལ་གཏོར༔ དུད་འགྲོའམ་ནད་པ་གདོན་ཅན་ལྟ་བུ་ལ་ཁོང་སུ་བཏང་བ་དང་ཕྱི་ནས་བྱུགས་པར་བྱའོ༔ དྲི་ཆུ་གཏོར་མ་བདེ་ན་སྔགས་ཆུ་ལ་དྲི་ཆུ་བསྲེས་ན་རུང་ཙམ་མོ༔ དེས་བྱད་མ་འབུམ་གྱིས་གླགས་མི་རྙེད་དོ༔ དྲི་ཆུས་གཞན་བསྲུང་བའོ༔ ཨྠྀི༔ ས་མ་ཡ༔ རྒྱ་རྒྱ་རྒྱ༔ སེང་ལྡེང་གི་ཕུར་པ་གྲི་ལྕགས་ཀྱི་མདེའུ་ཅན་དང་༔ ཚེར་ནག་གི་ཕུར་པ་གཉིས་ལ་སྔགས་བསྙེན་པའི་སྟ་གོན་དུ་བཤད་པ་ལྟ་བུ་མང་དུ་བྱ༔ བསྐྱེད་བསྟིམས་དང་རྩ་སྔགས་ཤམ་དུ་འདི་ཁྱིམ་དུ་འཆང་བའི་མི་ནོར་འཁོར་དང་བཅས་པའི་ལུས་ངག་ཡིད་གསུམ་ལ་སྲུངས་ཤིག་ནི་ཧཱུཾ་བཛྲ་རཀྵ་རཀྵ༔
ཞེས་བརྒྱའམ་སྟོང་གིས་བསྔགས་ནས་བསྲུང་བྱ་རྣམས་ཀྱི་ཁྱིམ་ཕུག་ཏུ་སྦའོ༔ རྫས་ཕུར་གྱིས་གཞན་བསྲུང་བའོ༔ ཨྠྀི༔ ཡང་བོང་ནག་ཆུང་ཆུང་ཡུངས་ཀར་ཙམ་དུ་གཏུབས་ལ་སྔགས་སྟོང་ཙམ་གྱིས་སྔགས་ལ་ཉི་མ་རེ་ལ་རེ་རེ་ཟོས་པས་གཟའ་ནད་ཐུབ་བོ༔་ཧ་ས་ཧ་ས་ཀཱི་ལ་ཡ་སོ་ཏི་ཙིཏྟ་ཧ་ས་ཧཱུྃ་ཕཊ༔ ཕྲེང་སྐོར་རེ་རེའི་མགོར་རྩ་སྔགས་ཚར་རེ་སྦྱར་རོ༔ ཨྠྀི༔ ཡང་བོང་བ་བཟང་པོ་སྔགས་ལ་སློབ་དཔོན་དང་ལྷ་དུག་གདོང་ནག་པོ་དང་སྔགས་གསུམ་དྲན་ཅིང་གཞན་མ་མཐོང་བར་ནས་འབྲས་ཀྱི་ཆ་ཙམ་ཟའོ༔ ཧ་ས་ཧ་ས་ཀཱི་ལ་ཡ་ན་མ་ཡ་སོ་ཏི་ཙིཏྟ་ཧ་ས་ཧཱུྃ་ཕཊ༔་རྨ་བྱ་མས་དུག་ཆེན་བསྲུང་བའི་གདམས་པའོ༔ ཨྠྀི༔ ཡང་བཙན་དུག་ཟ་ཐབས་གཅིག་ལ༔ ཧ་ས་ཧ་ས་ཀཱི་ལ་ཡ་ན་ལ་ཡ་སོ་ཏི་ཙིཏྟ་ཧ་ས་ཡ་ཧཱུཾ་ཕཊ༔ སློབ་དཔོན་ལྷ་སྔགས་རྗེས་དྲན་གསུམཾ༔ བོང་ང་རིལ་མ་ཙམ་ལ་བཞི་བརྒྱ་རེ་ཟེར་ཀྱང་སྟོང་ཙམ་བཟླ་གྲངས་བྱེད་ཅིང་བསྒོམ༔ དང་པོ་ནས་བོང་ང་གཏུབས་ནས་སྔགས་པར་བྱའོ༔ དུག་རིགས་དང་རིམས་ནད་ཆུ་སེར་རླུང་ནད་ལ་ཕན་ནོ༔ ཨྠྀི༔ ཡང་བྱད་མ་གནོད་བྱེད་ས་བདག་སོགས་ཀྱི་ཆོ་འཕྲུལ་བྱི་བས་གཏོར་མ་དཔེ་ཆ་སོགས་ལ་ཐང་རང་དང་མི་འདྲ་
བའི་གནོད་པ་བྱེད་ན༔ བཙན་དུག་སོགས་དུག་སྣ་དང་བག་ཕྱེ་ལ་བྱི་བའི་གཟུགས་བྱས་ལ༔ དེའི་ཁོག་པར་བསད་སྔགས་ཀྱི་མཐའ་ལ༔ བྱད་མ་གང་དང་གང་གི་སྤྲུལ་པ་ཡིན་པའི་མུ་སྟེགས་བུ་མོའི་ཁ་ཆིངས་ཤིག་སོད་ཅིག༔ ཅེས་པ་བྲིས་ལ་བཅུག་ནས་འགྲུལ་སྲང་དུ་བཞག༔ བྱེ་མ་ལའང་དེ་ལྟར་སྔགས་ལ་གཟུགས་དང་འགྲིམ་སྲང་དུ་གཏོར༔ གཏོར་མའི་བར་ཆད་བསྲུང་བའོ༔ ཨྠྀི༔ ཡང་ཁྲོ་ཆུའི་གཏོར་མ་ལ་བྱི་བས་གནོད་ན༔ ཨོཾ་ར་ཀུ་མ་ར་ཙཱུ༔ ཙུ་རུ་ཙུ་རུ་སྭཱ་ཧ༔ ཡུངས་ཀར་ལ་བསྔགས་ནས་འགྲིམ་སྲང་དུ་གཏོར་ན་ཁ་འཆིང་༔ མི་ཁྱིས་མ་འགོང་པའི་བྱེ་མ་ལ་བསྔགས་ནས་གཏོར་ན་ཁེ་གཞན་དུ་བསྒྱུར་བར་འགྱུར་རོ༔ སྤྱི་གསུམ་པ་ཙཀྲས་སྲུང་བ་གཞན་དུ་གསལ༔ ཤམབ་༔ རྒྱ་རྒྱ་རྒྱ༔ ཨེ་མ༔ རྒྱུད་གཞུང་མན་ངག་ལག་ལེན་རྣམས་ཀྱི་བཅུད༔ རང་གིས་ཉམས་བླངས་རྟགས་མཚན་གཏན་ལ་ཕབ༔ གནམ་ལྕགས་ཁྲོ་ཆུའི་རྫོང་ཆེན་ལྟ་བུ་ཡི༔ སྲུང་བ་གབ་སྦས་མེད་པར་བཀོད་པ་ལ༔ འགལ་འཁྲུལ་ཉེས་པ་གང་མཆིས་མཐོལ་ཞིང་བཤགས༔ དགེ་བས་འགྲོ་ཀུན་བྱང་ཆུབ་གེགས་མེད་ཤོག་ཅེས་པ་འདི་རིག་སྔགས་འཆང་བའི་རྣལ་འབྱོར་པ་ཨ་རཱ་གས་སྦྱར་བའོ་བྷ་ཝནྟ༔