༈ སྨོན་མགུར་དཔལ་ལྡན་མགྲིན་སྔོན།
གནས་འདི་ནི་སློབ་དཔོན་པདྨའི་གནས། །ཡུལ་བཀྲ་ཤིས་བལ་ཡུལ་ཚ་བ་ཤོད། །ལྷ་བཀྲ་ཤིས་འཇིག་རྟེན་སྐྱོང་བའི་གཙོ། །དཔལ་མཆོག་དང་ལྡན་པ་མགྲིན་སྔོན་རྒྱུད། །ལྷ་ཆེན་མོ་དཔལ་མོ་ཉེར་མཚུངས་མ། །དཔལ་བལ་ཡུལ་གྱི་རྒྱལ་མོ་མ་ལགས་བསམ། །ཁོང་ཆོས་མཛད་ཡོངས་ཀྱི་དགྲ་ལྷ་ཡིན། །དཔལ་རིག་པ་འཛིན་པའི་བསྲུང་མ་ཡིན། །སྒོས་རྣལ་འབྱོར་བདག་གི་སྙིང་གྲོགས་ཡིན། །ཡུལ་འདིར་གནས་ཀྱི་ལྷ་སྲིན་སྡེ་བརྒྱད་རྣམས། །ཀུན་བྱང་ཆུབ་སྤྱོད་པའི་གྲོགས་བཟང་ཡིན། །ཡུལ་མི་གཅིག་མི་རིགས་མང་པོ་ཡི། །གླུ་རང་རང་ཡུལ་ཆོས་མཐུན་པ་འདི། །ལྷ་གཉན་པོ་ཁྱེད་ལ་མཆོད་པར་འབུལ། །གནས་འདིར་ཚོགས་ཀྱི་དཔོན་སློབ་འཁོར་འབངས་ཀུན། །ལས་ཅི་ལ་ཚོགས་པ་ཆོས་ལ་ཚོགས། །ཆོས་རྣམ་དཀར་དགེ་བ་བསྒྲུབ་ལ་ཚོགས། །ཆོས་རྣམ་དཀར་དགེ་བའི་འབྲས་བུ་དེ། །ཁྱེད་མི་མིན་རྣམས་དང་ཐུན་མོང་བསྔོ། །དོན་བྱང་ཆུབ་སེམས་ཀྱི་དཀྱིལ་འཁོར་དུ། །དུས་གཅིག་ཏུ་ཚོགས་པའི་མཆེད་ལྕམ་ཡིན། །དུས་འདི་ནས་བྱང་ཆུབ་སྙིང་པོའི་བར། །དུས་ཀུན་ཏུ་ལྷན་ཅིག་ཚོགས་པར་ཤོག །སརྦ་མངྒ་ལཾ།