སློབ་དཔོན་ཡེ་ཤེས་སྙིང་པོ་དང་དགེ་བསྙེནབཙུན་པ་ངོ་བོ་ཉིད་མེད་པ།
༈ སློབ་དཔོན་དཔལ་སྦས་རང་གི་ལོ་རྒྱུས་ཞིབ་པ་མ་མཐོང་ཡང་དེའི་སློབ་མ་སློབ་དཔོན་ཡེ་ཤེས་སྙིང་པོ་ནི། ལེགས་ལྡན་གྱི་སྲོལ་འཛིན་དབུ་མ་པ་ཆེན་པོར་གྲགས་པ་ཡིན་ཏེ། སྤྱན་རས་གཟིགས་བསྒྲུབས་ནས་ཡིད་བཞིན་ནོར་བུའི་འཁོར་ལོས་སྒྱུར་བ་ཞལ་གཟིགས། མངོན་ཤེས་དང་ལྡན་པ་ཞིག་བྱུང་། མདོ་སྡེ་དུ་མ་ཐུགས་ནས་འདོན་པ་མུ་སྟེགས་རྣམས་ཕམ་པར་མཛད་པ་ཡིན་ནོ། །༈ དགེ་བསྙེནབཙུན་པ་ངོ་བོ་ཉིད་མེད་པ་ནི། ཐེག་པ་ཆེན་པོར་རིགས་སད་ཅིང་འཇམ་དཔལ་གྱིས་ཞལ་གཟིགས། མདོ་སྡེ་ལྔ་བཅུ་ཙམ་ཐུགས་ནས་འདོན་པ། འཁོར་དགེ་བསྙེན་སྟོང་ཕྲག་དང་བཅས་པ། འཁོར་རྣམས་ལ་དུག་སྦྲུལ་གྱི་གནོད་པ་བྱུང་བ་སྒྲོལ་མའི་རིག་སྔགས་ཀྱིས་མེ་ཏོག་གཏོར་བས་ཁོང་དུ་མིད་པ་རྣམས་ཀྱང་ཕྱིར་ཕྱུང་སྟེ་ཐམས་ཅད་བདེ་བར་གྲོལ་ལོ། །དུས་སྐབས་འདི་ཙམ་ན་དུས་དབང་གིས་མཁས་པ་ཉུང་བ་དང་། མུ་སྟེགས་ཀྱི་རྒོལ་བ་ལྷག་པར་མང་བས། ནང་པའི་རྒོལ་བ་རྣམས་སེམས་འཚབ་འཚབ་མོར་གནས་པ་གཅིག་ཡོད་པ་ན། པཎྜི་ཏ་བི་ཧ་ར་ཞེས་བྱ་བ་ཞིག་ཡོད་པ་དེས། ནངས་པར་རྒོལ་བའི་མུ་སྟེགས་མང་པོ་དང་རྩོད་པར་ཁས་བླངས་ཀྱང་། ཐུབ་བམ་མི་ཐུབ་བམ་སྙམ་པའི་ཐེ་ཚོམ་མེ་ཡོད་པ་ལས། བུད་མེད་རྒན་མོ་ཞིག་བྱུང་ནས། ཚེར་མ་ལྟ་བུའི་ཅོད་པན་མགོ་བོར་གྱོན་
ཏེ་རྩོད་ཅིག་རྒྱལ་བར་འགྱུར་རོ་ཟེར་དེ་བཞིན་བྱས་པས། དེར་རྒྱལ་ཞིང་། གཞན་དུ་ཡང་རྒྱལ་བ་བྱུང་ནས། དེ་ཕྱིན་ཆད་ནས་པཎྜི་ཏ་རྣམས་ཞྭ་རྩེ་རིང་གྱོན་པ་རིམ་གྱིས་དར་རོ། །དེ་ནས་ལི་ཁ་ར་ཤིང་འཕེལ་གྱི་ནགས་ཚལ་དང་ཉེ་བ་ཞིག་ན། རྒྱལ་རིགས་ཀྱི་བུ་མོ་གཟུགས་བྱད་ལེགས་པ་ཞིག་ཤིང་གི་ལྷ་དང་འདུས་པ་ལས། ནམ་ཞིག་ན་ཁྱེའུ་མཚན་དང་ལྡན་པ་ཞིག་བཙས། ཆེར་གྱུར་ནས་ལྷ་མོ་ཙནྡྲ་ལིའི་སྒོམ་ལུགས་ཞུས་ཏེ་སྒྲུབ་པས་རྨི་ལམ་དུ་ཞལ་བསྟན་ཏེ། རྒྱལ་སྲིད་ཐོབ་པར་གསོལ་བ་བཏབ་པས། ཁྱོད་ཤར་ཕྱོགས་སུ་སོང་ཞིག་དང་ཐོབ་པར་འགྱུར་རོ་ཞེས་ལུང་བསྟན་ཏེ། དེའི་ཚེ་བྷངྒ་ལའི་ཡུལ་དུ་རྒྱལ་པོ་མེད་པར་མང་ཞིག་སོང་། ཡུལ་མི་རྣམས་སྡུག་བསྔལ་བར་གྱུར་བས། གཙོ་བོ་རྣམས་འདུས། གྲོས་བྱས་ཏེ། རྒྱལ་པོ་ཞིག་བསྐོས་པ་ལས། དེ་ན་ཀླུ་མོ་མཐུ་ཆེ་བ་གདུག་རྩུབ་ཅན་ཞིག་ཡོད་པ་དེས་བསྐོས་པའི་ནུབ་མོ་ཟོས་སོ། །དེར་རེས་ཀྱིས་བསྐོས་ཀྱིན་སྔ་དྲོ་བསྐོས་པ་དེ་ནུབ་ཟོས་པས་སྐྱ་རེངས་ཤར་བ་ཙམ་ན་ཕུང་པོ་འདོན་ནོ། །ལྷ་མོ་ཙནྡྲ་གྲུབ་པ་དེ་ཁྱིམ་ཞིག་ཏུ་ཕྱིན་པ་དེ་རྣམས་སྡུག་བསྔལ་གྱིས་ནོན་པ་ལ། རྒྱུ་མཚན་དྲིས་པས། ནངས་པར་དེའི་བུ་ལ་རྒྱལ་པོ་རེས་བབས་ཟེར། གླ་བྱིན་ན་ངས་ཚབ་བྱའོ་བྱས་པས་ཤིན་ཏུ་དགའ་སྟེ། གླ་ཡང་བླངས། ནངས་པར་རྒྱལ་སར་བསྐོས། དེའི་ནམ་ཕྱེད་ན་ཀླུ་མོ་དེ་སྲིན་མོའི་གཟུགས་སུ་བསྒྱུར་སྔར་བཞིན་ཟ་བར་འོངས་པ་ལ། ཡི་དམ་གྱི་ཕྱག་མཚན་བསྣུན་པས་ཀླུ་མོ་རང་ཤིའོ། །ཐོ་རངས་ཕུང་པོ་འབྱིན་མཁན་རྣམས་བྱུང་བ་ལ། མ་ཤི་བར་མཐོང་ནས་ཐམས་ཅད་ཡ་མཚན་དུ་གྱུར་ནས་རྒྱལ་སྲིད་ལ་བསྐོས་ཏེ། སྐུ་ཚེའི་སྟོད་ལ་བྷངྒ་ལར་དབང་བསྒྱུར། སྨད་ལ་བྷངྒ་པ་དབང་དུ་བསྡུས་ཏེ། ཨོ་ཏནྟ་པུ་རི་དང་ཉེ་བར་ནཱ་ལེན་དྲ་ཞེས་བྱ་བའི་གཙུག་ལག་ཁང་ཞིག་ཀྱང་བཞེངས། ཡུལ་དེ་ཉིད་དུ་དགེ་འདུན་གྱི་སྡེ་མང་དུ་བཙུགས་ནས་བསྟན་པ་མཆོད་པར་བྱས་སོ། །རྒྱལ་སྲིད་ལོ་ཞེ་ལྔ་བྱས། རྒྱལ་པོ་འདིའི་རིང་ལ་ཞི་བ་འོད་དང་། བསོད་ནམས་གྲགས་ཀྱི་སློབ་མ་ཤཱཀྱ་འོད་ཀྱི་ཁ་ཆེའི་ཡུལ་དུ་འགྲོ་དོན་མཛད། དེའི་ཡུལ་དུ་དྷ་ན་ཤི་ལ་ཆེན་པོ་དང་། ཁྱད་པར་བཤེས་གཉེན་དང་། ཤེས་རབ་གོ་ཆ་དང་། འདུལ་འཛིན་སློབ་དཔོན་དཔའ་
བོ་རྣམས་བྱུང་། ཤར་ཕྱོགས་སུ་སློབ་དཔོན་ཡེ་ཤེས་སྙིང་པོ་ཡོད་ཐོགསངས་རྒྱས་ཡེ་ཤེས་ཞབས། ཡེ་ཤེས་སྙིང་པོ། ཞི་བ་འཚོ་རྣམས་ཀྱིས་དབུ་མའི་ལུགས་སྲོལ་འཛིན། དེ་རྗེས་ནུབ་ཕྱོགས་གཙྪའི་ཡུལ་དུ་བི་བྷ་རཊྚ་ཞེས་བྱ་བའི་རྒྱལ་པོ་བྱུང་། དེའི་དུས་སུ་བི་རུ་པ་ཆུང་བ་བྱུང་། རྒྱལ་པོ་དེ་ནང་པ་ལ་མོས་ཀྱང་བློན་པོ་རྣམས་ཕྱི་པ་ལ་མོས་པས། དེར་ལྷ་ཁང་ཕྱི་ནང་གཉིས་ཀའི་ལྷའི་རྡོ་སྐུ་མི་ཚད་ཙམ་མང་པོ་བཞེངས། ཕྱི་ནང་གི་ལྷ་ཁང་ཐ་དད་བྱེད་བྱས་པས་བློན་པོ་རྣམས་ཀྱིས་གཅིག་ཏུ་བཀོད་དེ། དེར་རབ་གནས་ལ་མཁས་པ་གཅིག་དགོས་པར་གཞན་མེད། ནང་པའི་དགེ་བསྙེན་ཞིག་ལ་ཡོན་ཏན་དེ་འདུག་པ་མཐོང་སྟེ། དེས་གྱིས་བྱས་པ། མུ་སྟེགས་པའི་སྒྲུབ་གཡོག་མི་བྱེད་ཟེར། དེ་ན་རེ། ཁྱོད་མུ་སྟེགས་པ་ལ་སྐྱབས་སུ་འགྲོ་ནི་མི་དགོས་ལོངས་སྤྱོད་མི་ཟད་པ་འབྱུང་བས་ཆོས་དར་བ་བྱས་ཆོག་མོད་ཟེར། འོ་ན་སློབ་དཔོན་ལ་ཞུས་ནས་འོང་གི་བྱས་ནས། ཞུས་པས་གནང་སྟེ་དེའི་སྒྲུབ་གཡོག་བྱས། རོ་ལངས་ལྕེ་ཕྱིར་གཡུག་པ་ལན་གསུམ་བྱེད། དང་པོ་ཟིན་ན་དངོས་གྲུབ་ཆེན་པོ། གཉིས་པ་འབྲིང་། གསུམ་པ་ལ་ཆུང་ངུ་འགྲུབ། ལན་གསུམ་པ་ལ་མ་ཟིན་ན། དང་པོར་འོ་སྐོལ་གཉིས་ཟ། དེ་ནས་ཡུལ་ཁམས་ཐམས་ཅད་སྟོངས་པ་ཙམ་དུ་འགྲོ་ཟེར། དགེ་བསྙེན་དེས་དང་པོ་གཉིས་ལ་མ་ཟིན། དེ་ནས་རོ་ལངས་དང་ཁ་སྤྲད་དེ་བསྡད་པས། གསུམ་པ་ལ་སོ་བཏབ་པས་ཟིན། དེ་ནས་ལྕེ་རལ་གྲིར་གྱུར། ལུས་གསེར་དུ་སོང་ངོ་། །དགེ་བསྙེན་གྱིས་རལ་གྲི་ཐོགས་ཏེ་བསྐོར་བས་ནམ་མཁའ་ལ་འཕགས་པ་ན། མུ་སྟེགས་པ་ན་རེ། ངས་རལ་གྲིའི་དོན་དུ་བསྒྲུབ་པ་ཡིན་པས་རལ་གྲི་ང་ལ་གཏོད་ཟེར། ངས་ལྟད་མོ་ཞིག་བལྟས་ལ་འོང་གི་བྱས་ནས་རི་རབ་གྱི་རྩེ་མོར་ཕྱིན། གླིང་བཞི་གླིང་ཕྲན་དང་བཅས་པ་ཡུད་ཀྱིས་བསྐོར་ནས། རལ་གྲི་ཁོ་རང་ལ་གཏད་པས། ལུས་གསེར་དུ་སོང་བ་འདི་ཁྱོད་རང་གྱིས། རུས་པ་ལ་མ་ཐུག་པར་ཤའི་ཐད་ནས་ཆོད། ཆང་རིན་དང་སྨད་ཚོང་མའི་དོན་སོགས་ལོག་པ་ལ་མ་སོང་བ་གྱིས། རང་འཚོ་བ་དང་དགེ་བའི་ལས་ལ་སྤྱད་ན་དེ་རིང་བཅད་པའི་ཤུལ་དོ་ནུབ་གང་སྟེ་ཟད་མི་ཤེས་པ་ཡིན་ནོ་ཟེར། ཁོ་རང་རལ་གྲི་ཐོགས་ནས་ལྷ་ཡུལ་དུ་སོང་ངོ་། །དགེ་བསྙེན་
དེས་རོ་ལངས་ཀྱི་གསེར་ལ་བརྟེན་ནས། ཨོ་ཏནྟ་པུ་རིའི་གཙུག་ལག་ཁང་བཞེངས། ཨོ་ཏནྟ་འཕུར་བྱེད་ཀྱི་དོན་ཡིན་ལ། ནམ་མཁར་ཕྱིན་ནས་རི་རབ་གླིང་བཞི་དངོས་སུ་མཐོང་བའི་བཀོད་པ་ལྟར་བཞེངས། དེ་བཞེངས་པའི་རྒྱུ་དང་དེར་གཉུག་མར་གནས་པའི་དགེ་སློང་ལྔ་བརྒྱ་དང་། དགེ་བསྙེན་ལྔ་བརྒྱའི་འཚོ་བའང་སྦྱར། རང་མ་ཤིའི་བར་ཁོ་རང་གིས་ཆོས་གཞི་བཏེགའདའ་བའི་ཚེ་གསེར་ལྷག་མ་མ་འོངས་པའི་སེམས་ཅན་གྱི་དོན་དུ་གཏེར་དུ་སྦས། ཆོས་གཞི་རྒྱ་ཆེན་པོ་དེ་ཝ་པཱ་ལར་གཏད་པར་གྲགས། དེ་ཀླུའི་བུ་ཡིན་པར་གྲགས་ཏེ། རྒྱལ་པོ་འདིའི་ཡབ་རྒྱལ་པོ་གཽ་པཱ་ལ་ཡིན་ལ། དེའི་བཙུན་མོས་བྲམ་ཟེ་རིག་སྔགས་གྲུབ་པ་ཞིག་ལ་རྒྱལ་པོ་དབང་དུ་བྱེད་པའི་རིག་སྔགས་ཞུས་པས། སྨན་ལ་སྔགས་བཏབ་ཁ་ཟས་དང་སྦྱར་རྒྱས་བཏབ་རྒྱལ་པོ་ལ་དྲོངས་ཤིག་བྱས་ནས་བྲན་མོ་ལ་བསྐུར་བས་རྫས་ཆུ་ལ་ལྷུངས་ཆུས་ཁྱེར་ཏེ་ཀླུའི་གནས་སུ་སླེབས་པ་ན། ཀླུའི་རྒྱལ་པོ་རྒྱ་མཚོ་སྐྱོང་ཞེས་བྱ་བས་ཟོས་པས། དེ་དབང་དུ་གྱུར་ཏེ། རྒྱལ་པོའི་གཟུགས་ཀྱིས་འོངས་ནས་བཙུན་མོ་དང་འཕྲད་སྦྲུམ་པར་གྱུར་པས་ནམ་ཞིག་ཁྱེའུ་བཙས་ཏེ་ལྷ་མཆོད་པའི་ཚེ་སྦྲུལ་མགོ་རོང་གིས་བྱུང་བས། ཀླུའི་རྒྱལ་པོའི་བུར་ཤེས་ནས་སྐྱེད་བསྲིངས། རྒྱལ་པོ་གཽ་པཱ་ལ་འདས་ནས་རྒྱལ་པོ་དེ་ཝ་པཱ་ལ་དེས་སྲིད་བྱས། གོང་མ་ལས་ཀྱང་མངའ་ཐང་ཆེ་སྟེ། ཤར་ཕྱོགས་ཝ་རེནྡྲ་མངའ་འོག་ཏུ་འདུས། གཙུག་ལག་ཁང་ཁྱད་འཕགས་ཤིག་རྩིག་པར་བཞེད་ནས་སོ་མ་པུ་རི་བཞེངས། འདི་ལ་བོད་ཀྱི་ལོ་རྒྱུས་ཕལ་ཆེ་ན་ཆོས་སྐྱོང་ལ་མར་མེ་ཕུལ་ནས་གསོལ་བ་བཏབ་ཀོང་བུ་གང་དུ་ཁྱེར་བ་དེར་རྩིག་གོ་སྙམ་པ་ན་ཆོས་སྐྱོང་གི་སྤྲུལ་པ་བྱ་རོག་ཅིག་བྱུང་ནས་ཀོང་བུ་མཚོར་བསྐྱུར་བས་ཡིད་ཆད་པ་ན་ཀླུའི་རྒྱལ་པོ་སྦྲུལ་མགོ་ལྔ་པ་བྱུང་ཏེ་ང་ཁྱོད་ཀྱི་ཕ་ཡིན་མཚོ་བསྐམས་ནས་རྩིག་པར་གཞུག་གོ་བྱས་པ་ལྟར་མཚོ་བསྐམས་པའི་ཤུལ་དུ་བརྩིག་ཟེར་བ། དེ་ནི་ཁ་ཆེའི་ཡུལ་གྱི་རྒྱ་མཚོ་སྦས་པའི་གཙུག་ལག་ཁང་བཞེངས་པའི་ལོ་རྒྱུས་འདིར་སྦྱར་བར་ཟད་དོ་ཞེས་ཇོ་ནང་རྗེ་བཙུན་ཏ་ར་ནཱ་ཐས་གསུང་། རྒྱལ་པོ་འདིས་མུ་སྟེགས་རྣམས་ཕམ་པར་བྱ་བའི་ཆེད་དུ་དམག་བསྡུས་ནས་གནས་པ་ན་ནག་པོ་ཆེན་པོས་བྱེ་མའི་ཕུང་པོ་འདི་བསལ་
བའི་འོག་ན་མུ་སྟེགས་ཀྱི་ལྷ་ཁང་ཡོད་དེ་འཇིག་པར་འདོད་ན་མཐའ་དམག་གིས་སྐོར་ལ་རོལ་མོ་གྱིས་ཤིག་ཟེར། དེ་ལྟར་བྱས་པས། བྱེ་མའི་ཕུང་པོའི་འོག་ནས་རྡོའི་ལྷ་ཁང་ངོ་མཚར་ཅན་ཞིག་ཐོན། དཔལ་ཚ་གསུམ་གྱི་གཙུག་ལག་ཁང་དུ་མིང་བཏགས་སོ། །ལོ་རྒྱུས་ཁ་ཅིག་ན། དེ་ལྟར་བྱས་པས་བྱེ་མའི་འོག་ནས་ཉན་ཐོས་འགོག་པའང་བྱུང་ཆོ་འཕྲུལ་བསྟན་ནས་མྱ་ངན་ལས་འདས། མུ་སྟེགས་ཀྱི་གཙུག་ལག་ཁང་དང་གནས་གཞི་བཞི་བཅུ་ཙམ་རང་ཞིག་པར་སོང་ངོ་ཟེར་བར་ཡང་སྣང་། རྒྱལ་པོ་འདིའི་རིང་ལ་ནག་པོ་སྤྱོད་པ་ཆུང་བ་བྱའོ། །དེས་ནི་བདེ་མཆོག་བསྒོམ་པས་མཁའ་འགྲོ་མས་ལུང་བསྟན་ནས། ཀཱ་མ་རུའི་ལྷ་མོའི་གནས་ན་དངོས་གྲུབ་ཀྱིས་རྫས་ཡོད་ལོངས་ཤིག་ཟེར། དེར་ཕྱིན་པས་ཟ་མ་ཏོག་ཅིག་རྙེད། ཁ་ཕྱེ་བས་ཌཱ་མ་རུ་དྲ་བ་ཅན་ཞིག་བྱུང་། དེ་ལག་ཏུ་ཐོགས་པ་ཙམ་གྱིས་རྐང་པ་ས་ལ་མི་རེག་ཅིང་། དྲག་ཏུ་དཀྲོལ་ན་གྲུབ་པའི་རྣལ་འབྱོར་ཕོ་མོ་ལྔ་བརྒྱ་ཙམ་གང་ནས་ཆ་མེད་པར་འོངས་ནས་དེའི་འཁོར་བྱེད་པ་བྱུང་སྟེ་ཡུན་རིང་པོར་འགྲོ་དོན་མཛད་དོ། །འདི་སྐབས་སློབ་དཔོན་ཤཱཀྱ་འོད་ཀྱི་སློབ་མ་ཤཱཀྱ་བཤེས་གཉེན་དང་། དཥྚཾ་སྱ་ན་སྟེ་མཆེ་བའི་སྡེ་དང་། ཡེ་ཤེས་ཟླ་བ་དང་། རྡོ་རྗེ་མཚོན་ཆ་དང་། འཇམ་དཔལ་གྲགས་པ་དང་། ཡེ་ཤེས་བྱིན་དང་། ལྷོ་ཕྱོགས་ཀྱི་རྒྱུད་དུ་བཙུན་པ་སྤྱན་རས་གཟིགས་བརྟུལ་ཞུགས་གྲུབ་པ་རྣམས་དང་། སློབ་དཔོན་སེང་གེ་བཟང་པོ་ཡང་རྒྱལ་པོ་འདིའི་དུས་པཎྜི་ཏར་གྱུར། དེ་ནས་རྒྱལ་པོ་ཏཱ་པ་པཱ་ལས་རྒྱལ་སྲིད་ལོ་བཅུ་གཉིས་བྱ་སྐབས། ཨོ་རྒྱན་གྱི་སློབ་དཔོན་སྒེག་པ་རྡོ་རྗེ་དཔལ་ན་ལེནྡྲར་ལོ་བཅུའི་བར་དུ་བཞུགས།