གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

ཉོན་མོངས་པ་ལས་བྱུང་བའི་ཤེས་སྒྲིབ་བམ་བདེན་འཛིན་ཆོས་ཅན། སྡུག་བདེན་ཡིན་པར་ཐལ། ཟག་བཅས་འབྲས་བསྡུས་ཡིན་པའི་ཕྱིར། ཁྱབ་སྟེ། ཉ་ཊཱིཀ་ལས། སྡུག་བསྔལ་བདེན་པའི་མཚན་ཉིད་ནི། ཉོན་མོངས་པའི་ཟག་བཅས་འབྲས་བསྡུས་སོ། །ཞེས་གསུངས་པའི་ཕྱིར་ཟེར་ན་དཔྱད། ཡང་ལས་ཉོན་གྱི་དབང་གིས་འཁོར་བ་སྐྱེས་པའི་སོ་སྐྱེ་ཆོས་ཅན། འཁོར་བ་འཁོར་མཁན་དང་འཁོར་ས་གཉིས་ཀ་ཡིན་པར་ཐལ། འཁོར་བ་འཁོར་མཁན་གང་ཞིག སྡུག་བདེན་ཡིན་པའི་ཕྱིར། འདོད་ན། བྱ་བྱེད་གཅིག་ཏུ་ཐལ། འདོད་པའི་ཕྱིར་ཟེར་ན་དཔྱད། ཡང་མི་རྟག་པ་ཡིན་ན་སྡུག་བསྔལ་ལམ་སྡུག་བདེན་ཡིན་པས་ཁྱབ་བར་ཐལ། ཀུན་བཏུས་ས་འགྲེལ་ལས། གང་འདུས་བྱས་ཡིན་པ་དེ་མི་རྟག་པའི་མཚན་ཉིད་ཅན་དང༌། གང་མི་རྟག་པ་དེ་སྡུག་བསྔལ་བའི་མཚན་ཉིད་ཅན་དང༌། ཞེས་དང༌། ཐེག་མཆོག་དབུ་མ་ལས། མི་རྟག་ཕྱིར་ན་གནས་པའི་གོ་སྐབས་མེད། །གནས་པའི་རང་དབང་མེད་ཕྱིར་སྡུག་བསྔལ་ཉིད། །ལམ་ཡང་སྡུག་ཀུན་རིགས་ཀྱི་ཁོངས་སུ་འདུས། །ཞེས་དང༌། སྡུག་བསྔལ་ཐམས་ཅད་མི་རྟག་རྒྱུ་མཚན་ཅན། །ཞེས་གསུངས་པའི་ཕྱིར་ན་མ་ཁྱབ་སྟེ། ཀུན་བཏུས་ས་འགྲེལ་ལས། དེ་ལྟར་སྐྱེ་སོགས་དང་འབྲེལ་བའི་མི་རྟག་པ་སྡུག་བསྔལ་ཡིན་གྱི། མི་རྟག་པ་གང་ཡིན་པ་ནི་སྡུག་བསྔལ་མ་ཡིན་ཏེ། ལམ་ཡང་སྡུག་བསྔལ་དུ་ཐལ་བའི་ཕྱིར་རོ། །འདོད་པར་མི་ནུས་ཏེ། བསྡུ་བར། མི་རྟག་པ་ཡིན་ལ་སྡུག་བསྔལ་མ་ཡིན་པ་ཡོད་དེ། ལམ་གྱི་བདེན་པའོ་ཞེས་གསུངས་པའི་ཕྱིར་རོ། །ཞེས་གསུངས་པའི་ཕྱིར་རོ། །ཡང་ཀུན་འབྱུང་ལ་ལས་ཉོན་གང་རུང་མ་ཡིན་པའི་མི་དགེ་བ་ཡོད་དམ་ཅི། ཡོད་ན་དེ་ཀུན་འབྱུང་མ་ཡིན་པར་ཐལ། རྫས་སྤྱི་གཉིས་འགོད་ཆོད་ལས་ཉོན་གང་རུང་མ་ཡིན་པའི་ཕྱིར། འདོད་མི་ནུས་ཏེ། མི་དགེ་བ་མི་དགེ་བའི་ལས་ཡིན་པའི་ཕྱིར་ཏེ། ཀུན་བཏུས་ས་འགྲེལ་ལས། སྤང་བྱ་མི་དགེ་བ་ནི་མི་དགེ་བའི་ལས་ཀྱང་ཡིན་ལ། ཞེས་གསུངས་སོ་ཞེ་ན་དཔྱད། ཡང་གཉེན་པོས་བཅོམ་ཁ་མའི་ལས་ཉོན་གཉིས་རང་འབྲས་སྡུག་བདེན་སྐྱེད་བྱེད་མིན་ན་ཀུན་འབྱུང་བདེན་པ་མ་ཡིན་པར་འགྱུར་བ་དང་དེ་དང་དེ་སྐྱེད་བྱེད་ཡིན་ན་དེའི་འབྲས་བུ་གྱུར་བའི་དེ་ཡོད་དགོས་པར་འགྱུར་ལ། དེ་ཡང་འདོད་ན་མྱུ་གུའི་རྒྱུ་ཡིན་ན་རང་འབྲས་མྱུ་གུ་བསྐྱེད་པས་ཁྱབ་བར་ཐལ་ལོ། །གོང་དུ་དེ་དེ་སྐྱེད་བྱེད་ཡིན་ན་དེའི་རང་འབྲས་སྡུག་བདེན་རི་བོང་རྭ་དང་མེད་མཚུངས་ཡིན་མིན་དང༌། དེ་འདྲའི་ལས་ཉོན་ཀུན་འབྱུང་བདེན་པའི་མཚན་ཉིད་ཀྱི་ཟུར་གྱི་རྒྱུ་བསྡུས་ཡིན་ཚུལ་དཔྱད། ཡང་སྔོན་མེད་ལེགས་བཤད་ལས། ཀུན་འབྱུང་ནི་སྡུག་བསྔལ་གྱི་རྒྱུ་སྟེ། སྤྱི་ལྡོག་ནས་སྡུག་བསྔལ་གང་ཡིན་ཀུན་འབྱུང་དུའང་འཇོག་མོད་ཀྱི། འདིར་ལས་དང་ཉོན་མོངས་པ་གང་ཡིན་པ་དེ་ཐམས་ཅད་ཀུན་འབྱུང་ངོ༌། །ཞེས་སྡུག་བསྔལ་གང་ཡིན་ཀུན་འབྱུང་དུ་འཇོག་པ་ལྟ་བུར་གསུངས་ལ། འོན་ཀྱང་ཉ་ཊཱིཀ་ལས། སྤྱིར་སྡུག་ཀུན་ངོ་བོ་གཅིག ཀུན་འབྱུང་ལ་སྡུག་བསྔལ་ཡིན་པས་ཁྱབ། སྡུག་བསྔལ་ལ་ཀུན་འབྱུང་ཡིན་པས་མ་ཁྱབ་སྟེ། ཞེས་དང༌། ཀུན་བཏུས་ས་འགྲེལ་ལས། སྡུག་བསྔལ་ཡིན་ལ་ཀུན་འབྱུང་མ་ཡིན་པ་ཡང་ཡོད་པས་མི་གཅིག་པའང་ཡོད་དེ། བྱིས་པའི་རྣམ་སྨིན་ལུང་མ་བསྟན་གྱིས་བསྡུས་པ་ཐམས་ཅད་དང༌། ད་ལྟར་སྐྱེས་བུའི་རྩོལ་བ་ལས་བྱུང་བའི་བདེ་སྡུག་ལུང་མ་བསྟན་བཏང་སྙོམས་རྣམས་དང༌། སྣོད་ཀྱི་འཇིག་རྟེན་ལ་སོགས་པའོ། །ཞེས་གསུངས་སོ། །ཡང་གོང་དུ་འགོག་བདེན་གྱི་དབྱེ་བ་བཞག་པ་ལྟར་མི་འཐད་པར་ཐལ། འགོག་བདེན་ལ་ཆོས་དབྱིངས་སམ་གདོད་ནས་ཟད་པ་ཞིག་དགོས་པའི་ཕྱིར་ཏེ། གཟུངས་རྒྱལ་གྱིས་ཞུས་པའི་མདོ་ལས། ཟད་པ་གཉེན་པོའི་ཟད་པ་མ་ཡིན་ཏེ། །སྔོན་ནས་ཟད་པའི་དེའི་ཕྱིར་ཟད་ཅེས་བྱ། །ཞེས་དང༌། རྒྱུད་བླ་མ་ལས། རང་བཞིན་གྱིས་ནི་ཡོངས་དག་ཕྱིར། །ཉོན་མོངས་གདོད་ནས་ཟད་ཕྱིར་རོ། །ཞེས་སོགས་སྔར་མྱང་འདས་ཀྱི་སྐབས་སུ་ལུང་དུ་མ་བཀོད་པ་དེའི་ཕྱིར་ཟེར་ན། མ་ཁྱབ་སྟེ། ལུང་དེ་དག་གིས་འགོག་བདེན་གཙོ་བོ་དང་ཐུན་མོང་མ་ཡིན་པའི་འགོག་བདེན་གྱི་དབང་དུ་བྱས་ནས་བཤད་པར་སྣང་བའི་ཕྱིར། དེར་ཐལ། ཐེག་ཊཱིཀ་ལས། འདི་ནི་མྱང་འདས་ཀྱི་གཙོ་བོར་གཉིས་མེད་ཡེ་ཤེས་ཀྱི་རང་བཞིན་མྱང་འདས་ཡིན་པར་སྟོན་ཏེ། རང་བཞིན་གྱི་སྤངས་རྟོགས་མཐར་ཐུག་པ་ཆོས་སྐུ་ཉིད་རང་བཞིན་མྱང་འདས་ཡིན་ཞིང་དེ་ཉིད་མྱང་འདས་གོ་ཆོད་པོ་ཡིན་གྱི་གློ་བུར་དྲི་སྤངས་ཀྱི་མྱང་འདས་ནི་མྱང་འདས་བཏགས་པ་བ་ཡིན་ཏེ། ཞེས་དང༌། དེ་ལས། སྤྱིར་བདེན་པ་བཞི་ལ་རྣམ་པར་བཞག་པའི་བདེན་པ་བཞི་དང༌། རྣམ་པར་མ་བཞག་པའི་བདེན་བཞི་གཉིས་ལས། དང་པོ་ནི། ཐེག་པ་ཀུན་ལ་གྲགས་པ་སྟེ་དེ་ནི་སྒྲ་དང་རྟོག་པས་ཐ་སྙད་རྣམ་པར་བཞག་ཏུ་ཡོད་པས་ན་དེ་སྐད་ཅེས་བྱ་ལ། གཉིས་པ་ནི། སྒྲ་རྟོག་གི་ཐ་སྙད་བཞག་ཏུ་མེད་པ་དོན་དམ་ཆོས་ཉིད་བདེན་བཞིའི་རྣམ་པར་སྣང་བ་དེའོ། །དེས་ན་རྒྱུ་མཚན་ལ་རྣམ་པར་བཞག་པའི་བདེན་པ་བཞི་ཆར་གྱི་ཆ་ཡོད་པ་ཡིན་ལ། ཞེས་གསུངས་སོ། ། ཉ་ཊཱིཀ་ལས། དེ་དག་ནི་ཐུན་མོང་བ་དང་བསྟུན་པའོ། །ཐུན་མོང་མ་ཡིན་པའི་ལུགས་ཀྱི་འགོག་བདེན་མཚན་ཉིད་པ་རང་བཞིན་རྣམ་དག་གི་ཆོས་ཉིད་གཙོ་ཆེའོ། །ཞེས་དང༌། ས་བཟང་གི་ཀུན་བཏུས་འགྲེལ་བ་ལས། ལས་དང་ཉོན་མོངས་པ་སྤངས་པ་ལས་ཐོབ་པར་བྱ་བ་འགོག་པའི་བདེན་པ་གང་ཞེ་ན། ཐུན་མོང་གི་རྣམ་བཞག་མདོར་བསྟན་པ། ཞེས་དང༌།དེ་ལས། ཅིའི་ཕྱིར་འགོག་པའི་མཚན་ཉིད་ཅེས་བྱ་ཞེ་ན། སྡུག་བསྔལ་འབྱུང་བའི་ཉོན་མོངས་པ་རྣམས་དང་བྲལ་བའི་ཕྱིར་རོ། ། ཞེས་ཆོས་དབྱིངས་འགོག་བདེན་གྱི་གཙོ་བོ་ཡིན་པར་གསུངས་པས་འགོག་བདེན་ཕལ་བ་ཞིག་ཡོད་པར་གྲུབ་པ་དང༌། ཐུན་མོང་གི་འགོག་བདེན་ཡོད་པར་གསུངས་པའི་ཕྱིར་རོ། །ཡང་ལམ་ལྔ་ཀ་ལམ་བདེན་མ་ཡིན་པར་ཐལ། ཐེག་མཆོག་དབུ་མ་རྩ་འགྲེལ་ལས། ལམ་དངོས་འཕགས་ལམ་ཡིན་ཏེ་ཚོགས་སྦྱོར་ཡང༌། ཞེས་དང༌། ལམ་གྱི་བདེན་པ་དངོས་ལ་ནི་འཕགས་པའི་ལམ་རྣམས་ཡིན་ལ། ཚོགས་སྦྱོར་ཡང་ལམ་བདེན་རྗེས་མཐུན་པར་འཇོག་གོ །ཞེས་དང༌། སྔོན་མེད་ལེགས་བཤད་ལས། ལམ་བདེན་དངོས་ནི། མཐོང་སྒོམ་མི་སློབ་ལམ་གསུམ་གྱིས་བསྡུས་པའི་ཡེ་ཤེས་གསར་བྱུང་རྒྱུ་རྐྱེན་ལས་སྐྱེས་པ་རྣམས་ཡིན་ལ། རྗེས་མཐུན་པ་ནི་སོ་སོའི་སྐྱེ་བོའི་ལམ་རྣམས་ཀྱང་སྟེ།ལམ་བདེན་གྱི་ངོ་བོ་ནི་འཕགས་པའི་ལམ་ཡན་ལག་བརྒྱད་དང༌། ཕ་རོལ་ཏུ་ཕྱིན་པ་བཅུ་ལ་སོགས་པའོ། །ཞེས་གསུངས་སོ་ཞེ་ན་ལམ་བདེན་གྱི་གཙོ་བོ་འཕགས་ལམ་གྱི་དབང་དུ་བྱས་པ་འདྲ་སྟེ། ཚོགས་སྦྱོར་ལ་གོང་དུ་ལམ་བདེན་གྱི་མཚན་ཉིད་བཞག་པ་དག་ཚང་བའི་ཕྱིར་དང༌། བསྟན་པ་སྤྱི་འགྲེལ་གྱི་རྣམ་བཤད་ལས། ཚོགས་ལམ་ཡང་ལམ་བདེན་དུ་འཐད་པར་མངོན་ནོ། །ཞེས་གསུངས་པའི་ཕྱིར་རོ། །ཆོས་དབྱིངས་དང༌། ལམ་མ་ཞུགས་ཀྱི་གཞན་དོན་ཁུར་འཁྱེར་གྱི་སྙིང་རྗེ་དེ་ཐབས་ཤེས་ཟུང་དུ་འབྲེལ་བའི་དགེ་བར་གྱུར་བའི་རྣམ་གྲོལ་ལམ་གྱི་འཇུག་ངོགས་ཡིན་མིན་དཔྱད་པར་བྱའོ། །མི་སློབ་ལམ་ལམ་བདེན་མ་ཡིན་པར་ཐལ། འགོག་བདེན་གྱི་བྲལ་རྒྱུ་མ་ཡིན་པའི་ཕྱིར་དང༌། མདོ་སྡེ་རྒྱན་ས་འགྲེལ་ལས། དངོས་བཏགས་ལ། སློབ་ལམ་བཞི་ལམ་མཚན་ཉིད་པ་ཡིན་ལ། མི་སློབ་ལམ་ནི་ལམ་གྱི་འབྲས་བུ་ལ་ལམ་དུ་བཏགས་པའོ་ཞེས་ཀྱང་གསུང་མོད། དེའང་ཉན་ཐོས་དང་རང་སངས་རྒྱས་རྣམས་ནི་གོང་དུ་འགྲོ་བ་དང་བཅས་པའི་ཕྱིར་ལམ་མཚན་ཉིད་པ་དང་འབྲས་བུ་བཏགས་པ་བ་ཡིན་ཞིང༌། ཐེག་པ་ཆེན་པོ་བ་རྣམས་ཀྱི་ནི་སྤངས་རྟོགས་མཐར་ཕྱིན་པའི་ཕྱིར་ལམ་བཏགས་པ་བ་དང་འབྲས་བུ་མཚན་ཉིད་པ་ཡིན་ནོ། །ཞེས་གསུངས་པའི་ཕྱིར་ཞེ་ན་དཔྱད་དོ། །ཡང་རི་ཆོས་ངེས་དོན་རྒྱ་མཚོ་ལས། དེས་ན་ཀུན་རྫོབ་བདེན་པར་རྟོགས་པའི་སྤངས་རྟོགས་དང་ཚོགས་གཉིས་ནི་ལམ་བདེན་ཡིན་ལ། ཞེས་དང༌། བསྟན་བཅོས་སྙིང་པོ་ལས།ཀུན་རྫོབ་སངས་རྒྱས་དུས་གསུམ་བྱུང་བ་རྣམས། །ལམ་བདེན་ཉིད་ཡིན། ཞེས་དང༌། ཐེག་ཟིན་ལས། དེས་ན་དབང་བསྒྱུར་གྱི་སྐྱེ་བ་དང༌། བསམ་གྱིས་མི་ཁྱབ་པའི་འཆི་འཕོ་བ་དང༌། དག་པའི་ཞིང་ཁམས་རྣམས་ནི་རྣམ་པར་བྱང་བ་ལམ་གྱིས་བསྡུས་ཤིང༌། ཞེས་དང༌། དེ་ལས། དེ་ལ་གཞན་སྣང་གི་སྐུ་དང་མཛད་པ་དང་ཞིང་ཁམས་སོགས་ནི་ལམ་བདེན་དངོས་ཡིན་ནོ། །ཞེས་སོགས་ཀྱིས་བསྟན་པའི་ཀུན་རྫོབ་ཀྱི་སྤངས་བ་སོགས་ལ་ལམ་བདེན་གྱི་མཚན་ཉིད་ཚང་མ་ཚང་དང༌། དག་པའི་ཞིང་ཁམས་ལམ་བདེན་ཡིན་ན་ཀུན་བཏུས་ས་འགྲེལ་ལས། ཤེས་བྱ་ཐམས་ཅད་བདེན་བཞིར་འདུ་བ་ནི་མ་ཡིན་ཏེ། ནམ་མཁའ་དང༌། སོ་སོར་བརྟགས་མིན་གྱི་འགོག་པ་དང༌། མ་དག་པའི་དེ་བཞིན་ཉིད་དང༌། ཡོངས་སུ་དག་པའི་འཇིག་རྟེན་གྱི་ཁམས་ལ་སོགས་པ་རྣམས་བཞི་པོ་གང་དུའང་མ་འདུས་པའི་ཕྱིར་རོ། །ཞེས་དག་པའི་འཇིག་རྟེན་བདེན་བཞི་གང་ཡང་མ་ཡིན་པར་གསུངས་པ་སོགས་ལ་བརྟག་པར་བྱ་དགོས་སོ། །ཡང་དེའི་གསུངས་ཟིན་ལ་མ་དག་པའི་དེ་བཞིན་ཉིད་དེ་བཞི་གང་ཡང་མ་ཡིན་པར་གསུངས་པ་དང༌། ནམ་མཁའ་སྡུག་བདེན་མ་ཡིན་པའི་རྒྱུ་མཚན་དང༌། ཐེག་མཆོག་དབུ་མ་ལས། མིང་ནི་སྡུག་བསྔལ་བདེན་པ་ཁོ་ནས་བསྡུས། །ཞེས་མིང་སྡུག་བདེན་ཡིན་པའི་རྒྱུ་མཚན་སོགས་ལ་དཔྱད་པར་བྱའོ། །ཉ་ཊཱིཀ་སོགས་ལས་བཤད་པ་ལྟར་དང༌། ས་བཟང་ཀུན་བཏུས་འགྲེལ་བ་ལས། ངེས་འབྱེད་ཆ་མཐུན་ནི། ཉོན་མོངས་པའི་ས་བོན་དང་ལྡན་ཡང་སྲིད་པ་ལ་རྒྱབ་ཀྱིས་ཕྱོགས་ཤིང་གཉེན་པོ་བྱེད་པས་ཟག་མེད་དུ་འཇོག ཅེས་པ་ལྟར་ལམ་བདེན་ལ་ཟག་མེད་དགོས་ན་ས་བཟང་ཀུན་བཏུས་འགྲེལ་བ་ལས། སྔར་ངེས་འབྱེད་ཆ་མཐུན་ཟག་མེད་དང་རྗེས་སུ་མཐུན་པས་ཟག་མེད་དུ་བཤད་ཀྱང་འདིར་ནི་ཟག་པའི་ས་བོན་རྗེས་སུ་འབྲེལ་བའི་ཆ་ནས་ཟག་བཅས་སུ་བསྡུའོ། །ཞེས་གསུངས་པས་ཅུང་ཟད་བརྟག་པར་བྱའོ། །ལམ་མ་ཞུགས་ཀྱི་དགེ་བ་ཟག་བཅས་ཀྱི་ཚུལ་ཁྲིམས་སོགས་གཉེན་པོ་ཡིན་པས་དཔྱད་དགོས་སོ། །