གསུམ་པ་སྔགས་ཀྱི་སྡོམ་པའི་བསླབ་བྱ།
གསུམ་པ་སྔགས་ཀྱི་སྡོམ་པའི་བསླབ་བྱ་ལ།
གསང་སྔགས་ཀྱི་སྡོམ་པ་མ་ཐོབ་པ་ཐོབ་པར་བྱེད་པའི་ཐབས། ཐོབ་པ་མི་ཉམས་པ་བསྲུང་བའི་ཚུལ། ཉམས་ན་ཕྱིར་བཅོས་པའི་ཚུལ། སྡོམ་པ་བསྲུང་བའི་ཕན་ཡོན་དང་བཞི། དང་པོ་ནི། སྤྱིར་གསང་སྔགས་ཀྱི་ལམ་ཉམས་སུ་ལེན་པ་ལ། ལམ་ཐུན་མོང་བ་དག་ལ་སྦྱངས་བ་སྔོན་དུ་སོང་བའི་སྒོ་ནས་རྒྱུད་ལེགས་པར་སྦྱངས་ཏེ། སྔགས་ལ་མོས་པ་བརྟན་པོ་དང་ལྡན་པའི་སློབ་མས། རྡོ་རྗེ་སློབ་དཔོན་དབང་བསྐུར་གྱི་ཆོ་ག་ལ་མཁས་པ། དམ་ཚིག་དང་སྡོམ་པ་ལ་གནས་པ། ལྷ་རང་རང་གི་བསྙེན་པ་སོང་བ་སྟེ་ཁྱད་པར་གསུམ་དང་ལྡན་པ་ལས། བྱ་རྒྱུད་ལ་ཆུ་དང་ཅོད་པན་གྱི་དབང་དང༌། སྦྱོང་རྒྱུད་ལ་རིག་པའི་དབང་ལྔ་ཙམ་བླངས་ནས་བྱང་སྡོམ་དང་དམ་ཚིག་རྣམས་བསྲུང་དགོས་ལ་སྔགས་སྡོམ་ལོགས་སུ་མེད། རྣལ་འབྱོར་རྒྱུད་ལའང་རིག་པའི་དབང་ཙམ་ལེན་ན་སྔགས་སྡོམ་མི་དགོས་མོད། རྡོ་རྗེ་སློབ་དཔོན་གྱི་དབང་ལེན་ན་བླ་མ་སྔགས་སྡོམ་ལ་གནས་པ་ལ། གསོལ་བ་རྩེ་གཅིག་ཏུ་བཏབ་ནས་སྔགས་ཀྱི་སྡོམ་པ་བླངས་དགོས་པ་བླ་མེད་ལའང་འདྲ་ལ། རིམ་གཉིས་ཡོངས་རྫོགས་ཉམས་སུ་ལེན་པ་དང༌། བག་ཆགས་འཇོག་ཕྱིར་དབང་བཞི་རྫོགས་པར་བླངས་པར་བྱའོ། །དེ་ཡང་སྔགས་ཀྱི་སྡོམ་པ་ནི། ངེས་པར་སློབ་དཔོན་གྱི་དབང་དང་འབྲེལ་བར་ལེན་དགོས་སོ། །སྔགས་ཀྱི་སྡོམ་པ་ནི། སློབ་དཔོན་གྱི་དབང་འབྲེལ་བའི་ཇི་ལྟར་ཁས་བླང་བའི་དམ་ཚིག་རྣམ་པར་དག་པ་རྟག་ཏུ་བསྲུང་བ་དེ་ཡིན་ཏེ། བླང་དོར་རབ་གསལ་ལས། གསང་སྔགས་སྡོམ་པ་ཇི་ལྟར་ཁས་བླང་བའི། །དམ་ཚིག་རྣམ་དག་རྟག་ཏུ་བསྲུང་བའོ། །ཞེས་སོ། །