གསུམ་པ་གང་ཟག་གང་གནས་ན་རབ་ཏུ་འབྱུང་བ་དང་བསྙེན་པར་རྫོགས་པར་འདོད་པ།

གསུམ་པ་གང་ཟག་གང་གནས་ན་རབ་ཏུ་འབྱུང་བ་དང་བསྙེན་པར་རྫོགས་པར་འདོད་པ་དེ་གནས་ཞེས་སྐབས་ཀྱིས་གྲུབ་བོ། །

བཞི་བ་ཡུལ་གང་ལ་གནས་ན་རྩ་བར། དགེ་སློང་འགའ་ཞིག་ལ་མཁན་པོ་ཉིད་དུ་གནས་པ་ལའོ། །ཞེས་སོ། །ཊཱི་ཀ་ལས། འགའ་ཞིག་ལ་ཞེས་བྱ་བ་མིང་མ་བསྟན་པའོ། །དེས་འདི་སྐད་སྟོན་ཏེ། གང་ཁོ་ན་ལ་གནས་ཏེ་རབ་ཏུ་བྱུང་བ་དེ་ཁོ་ན་ལ་གནས་ཏེ་བསྙེན་པར་རྫོགས་པར་ངེས་པ་མ་ཡིན་གྱི་འདོད་པས་འཇུག་པར་རིག་པར་བྱ་སྟེ། ཞེས་སོ། །འོ་ན་རྩ་བར། དང་པོའི་མཁན་པོས་བསྙེན་པར་རྫོགས་པར་བྱའོ། །མི་སྟེར་བ་ལ་མཐུས་བཀུག་སྟེའོ་ཞེས་འབྱུང་བ་དང་འགལ་ལོ་ཞེ་ན། འདོད་པས་འཇུག་ཅེས་སྐབས་འདིར་བསྟན་པ་ནི་མཁན་བུའི་ཆ་ནས་བསྟན་པ་སྟེ། རང་གང་ལ་མོས་པ་དེ་ལ་བསྙེན་རྫོགས་ཀྱི་མཁན་པོ་ཞུ་བ་སྟེ། དང་པོའི་མཁན་པོ་ཁོ་ན་ལ་ཞུ་དགོས་པར་མ་ངེས་པའོ། །དང་པོའི་མཁན་པོས་བསྙེན་པར་རྫོགས་པར་བྱ་ཞེས་པ་ནི་མཁན་པོའི་ཆ་ནས་བསྟན་པ་ཡིན་ཏེ། རང་གི་མཁན་བུ་དེ་དགེ་སློང་གི་སྡོམ་པ་ལེན་པར་འདོད་ཀྱང་གཏད་པའི་ཡུལ་དེས་གེགས་བྱེད་ན་རང་གི་དགེ་ཚུལ་མཐུས་བཀུག་སྟེ་ཡང་དང་པོའི་མཁན་པོས་བསྙེན་རྫོགས་བྱ་ཞེས་བསྟན་པའོ། །