བསྐང་བཤགས་ཉེས་ལྟུང་ཀུན་བྱང་།
འོད་ཟེར་ཅན་མའི་ཐུགས་སྒྲུབ་ལས༔ བསྐང་བཤགས་ཉེས་ལྟུང་ཀུན་བྱང་ཞེས་བྱ་བ་བཞུགས་སོ༔
རྒྱལ་ཡུམ་དཔའ་མོའི་ཞབས་ལ་འདུད༔ རྣལ་འབྱོར་བར་ཆད་སེལ་བའི་མཆོག༔ འོད་ཟེར་ཅན་མ་སྒྲུབ་པའི་ཚེ༔ བསྐང་བཤགས་ཉེས་ལྟུང་ཀུན་བྱང་འདི༔ བརྩོན་པས་ཉམས་སུ་བླང་བར་གྱིས༔ ས་མ་ཡཱ༔ དེ་ཡང་ཆོས་མཐུན་གང་ཟག་ལ༔ སྔོན་ལས་ངན་པའི་རྒྱུ་འབྲས་སམ༔ གློ་བུར་དགྲ་དང་བགེགས་ཀྱིས་འཚེ༔ རྨི་ལམ་བཀྲ་ལྟས་ངན་པ་འམ༔ ཉམས་གྲིབ་གསོ་འམ་བྱང་དགོས་ན༔ རྩ་གསུམ་སྤྱི་དང་འོད་ཟེར་ཅན༔ སྙིགས་དུས་སྐྱོབས་པའི་ལྷར་ངེས་པས༔ བསྙེན་སྒྲུབ་ཚོགས་བསྐང་བཤགས་པར་འབད༔ དེས་ནི་སྐྱོན་སེལ་བདེ་ལེགས་འབྱུང་༔ དཀྱིལ་འཁོར་སྒྲུབ་རྫས་རང་གཞུང་བཞིན༔ སླ་ཆོས་དེས་ཆོག་མི་བྱ་བར༔ བཀོད་ལེགས་བཤམས་ཤིང་བསྙེན་སྒྲུབ་བརྩམས༔ མཆོད་པ་ནོངས་བཤགས་ཚོགས་རྫས་བཀྲམ༔ བྱིན་རླབས་བསངས་སྦྱངས་ཚོགས་ཕུད་འབུལ༔ བསྐང་རྫས་དངོས་བཤམས་ཡིད་ལས་སྤྲུལ༔ འབྲུ་གསུམ་ནམ་མཁའ་མཛོད་ཀྱི་སྔགས་༔ ལན་གསུམ་བརྗོད་པས་སྦྱངས་སྤེལ་བསྒྱུར༔ སྤོས་རོལ་དབྱངས་དང་གདུང་ཤུགས་ཀྱིས༔ སྤྱན་དྲངས་བསྐང་བཤགས་འདི་བཞིན་བྱ༔ ཧཱུྃ་ཧྲཱིཿ རང་བཞིན་སྐུ་གསུམ་དག་པའི་ཕོ་བྲང་ནས༔ བརྒྱུད་གསུམ་རིག་འཛིན་བླ་མ་གནས་འདིར་གཤེགས༔ སྣ་ཚོགས་པདྨ་ཉི་ཟླའི་གདན་ལ་བཞུགས༔ སྒོ་གསུམ་གུས་པས་ཕྱག་འཚལ་མཆོད་ཅིང་བསྟོད༔ ཉམས་ཆག་ཉེས་ལྟུང་སྒྲིབ་པ་ཀུན་བྱང་ནས༔ བདག་ལ་ཚངས་པ་མཆོག་གི་དངོས་གྲུབ་སྩོལ༔ ཧཱུྃ་ཧྲཱིཿ དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ༔ སྔོན་ཚེ་ཐུགས་བསྐྱེད་སྨོན་ལམ་མཐར་ཕྱིན་མཐུས༔ སྙིགས་དུས་འགྲོ་བའི་ནད་མཚོན་མུ་གེ་ལས༔ སྐྱོབས་མཛད་དཔའ་མོ་འོད་ཟེར་ཅན་གྱི་ལྷ༔ རིགས་བཞིའི་ཡུམ་དང་སེམས་མ་མཆོད་འབུལ་བའི༔ རྡོ་རྗེའི་ལྷ་མོ་སྒོ་སྲུང་ཆེན་པོ་བཞི༔ སངས་རྒྱས་བྱང་སེམས་རྩ་གསུམ་སྲུང་མར་བཅས༔ ཐུགས་དམ་ཐུགས་རྗེས་དབང་གིས་གནས་འདིར་གཤེགས༔ རང་མཐུན་པདྨ་ཉི་ཟླའི་གདན་ལ་བཞུགས༔ སྐྱེ་འགག་འགྱུར་མེད་རྡོ་རྗེའི་སྐུ་གསུང་ཐུགས༔ ཡོན་ཏན་ཕྲིན་ལས་རྫོགས་ལ་ཕྱག་འཚལ་བསྟོད༔ ཧཱུྃ་ཧྲཱིཿ རང་བྱུང་སྐྱེ་མེད་ཆོས་སྐུའི་མཁའ་ཀློང་ནས༔ རང་གསལ་འགགས་མེད་གཟུགས་སྐུའི་རོལ་གར་སྟོན༔ རང་ཤར་དམིགས་མེད་ཐུགས་རྗེའི་མངའ་བདག་མཆོག༔ རྒྱལ་ཡུམ་འོད་ཟེར་ཅན་མའི་ཐུགས་དམ་བསྐང་༔ རྣམ་ཤེས་རྣམ་དག་མེ་ལོང་ཡེ་ཤེས་འཕྲུལ༔ ཞེ་སྡང་དགྲ་གདོན་ས་འོག་གནོན་མཛད་པའི༔ ཞི་བའི་ལས་མཛད་དཔའ་བའི་འོད་སྟོང་འཕྲོ༔ ཞི་མཛད་འོད་ཟེར་ཅན་མའི་ཐུགས་དམ་བསྐང་༔ ཚོར་བ་རྣམ་དག་མཉམ་ཉིད་ཡེ་ཤེས་འཕྲུལ༔ ང་རྒྱལ་དགྲ་གདོན་དབྱིངས་སུ་སྲེག་མཛད་མ༔ རྒྱས་པའི་ལས་མཛད་ཁྲོས་པའི་ཉམས་བརྒྱ་འབར༔ རྒྱས་མཛད་འོད་ཟེར་ཅན་མའི་ཐུགས་དམ་བསྐང་༔ འདུ་ཤེས་དབྱིངས་གྲོལ་ཀུན་རྟོག་ཡེ་ཤེས་འཕྲུལ༔ འདོད་ཆགས་དགྲ་གདོན་སྐྱེ་མེད་ཀློང་དུ་འཁྲུད༔ དབང་གི་ལས་མཛད་ཆགས་པའི་སྒེག་ཉམས་སྟོན༔ དབང་མཛད་འོད་ཟེར་ཅན་མའི་ཐུགས་དམ་བསྐང་༔ འདུ་ཤེས་རང་དག་བྱ་གྲུབ་ཡེ་ཤེས་སྐུ༔ ཕྲག་དོག་དགྲ་གདོན་བྱར་མེད་རླུང་གིས་གཏོར༔ དྲག་པོའི་ལས་མཛད་རྔམ་པའི་ང་རོ་རྒོད༔ དྲག་ཤུལ་འོད་ཟེར་ཅན་མའི་ཐུགས་དམ་བསྐང་༔ རྡོ་རྗེ་རིགས་ཀྱི་ཡུམ་མཆོག་སངས་རྒྱས་སྤྱན༔ འགྱུར་མེད་རྡོ་རྗེའི་ཐུགས་ལ་མངའ་བརྙེས་པས༔ དམིགས་མེད་ཆོས་དབྱིངས་ཀློང་དུ་དགྲ་བགེགས་སྒྲོལ༔ ཐུགས་མཆོག་རྡོ་རྗེ་སེམས་དཔའི་ཐུགས་དམ་བསྐང་༔ རིན་ཆེན་རིགས་ཀྱི་ཡུམ་མཆོག་མ་མཱ་ཀི༔ མི་ཟད་ཡོན་ཏན་གཏེར་ལ་མངའ་བརྙེས་པས༔ སྣ་ཚོགས་ཤེས་བྱའི་རྩལ་གྱི་དགྲ་བགེགས་གཞོམ༔ ཡོན་ཏན་རིན་ཆེན་སེམས་མའི་ཐུགས་དམ་བསྐང་༔ པདྨ་རིགས་ཀྱི་ཡུམ་མཆོག་གོས་དཀར་མོ༔ འགགས་མེད་རྡོ་རྗེའི་གསུང་ལ་མངའ་བརྙེས་པས༔ གྲགས་སྟོང་བརྗོད་མེད་སྔགས་ཀྱིས་དགྲ་གདོན་འདུལ༔ གསུང་མཆོག་པདྨ་སེམས་མའི་ཐུགས་དམ་བསྐང་༔ ལས་རབས་རིགས་ཀྱི་ཡུམ་མཆོག་དམ་ཚིག་སྒྲོལ༔ སྣ་ཚོགས་འགྲོ་འདུལ་ཕྲིན་ལས་མངའ་བརྙེས་པས༔ ཐབས་མཁས་མཛད་པས་དགྲ་གདོན་སྤ་བཀོང་མཛད༔ ཕྲིན་ལས་ཀརྨ་སེམས་མའི་ཐུགས་དམ་བསྐང་༔ རྒྱལ་ཀུན་དགྱེས་པ་བསྐྱེད་མཛད་ལྷ་མོའི་ཚུལ༔ སྣ་ཚོགས་མཆོད་པའི་ཡོ་བྱད་མངའ་བརྙེས་པས༔ དགྲ་གདོན་ལོངས་སྤྱོད་དཀྱིལ་འཁོར་རྫས་སུ་གྱུར༔ མཆོད་པའི་ལྷ་མོ་བཞི་ཡི་ཐུགས་དམ་བསྐང་༔ ཐུགས་རྗེའི་ལྕགས་ཀྱུས་དགྲ་གདོན་གནས་ནས་འདྲེན༔ བྱམས་པའི་ཞགས་པས་བདེ་ཆེན་ཞིང་དུ་འཆིང་༔ དགའ་བའི་ལྕགས་སྒྲོག་སྐུ་གསུམ་ཀློང་དུ་སྡོམ༔ བཏང་སྙོམས་དྲིལ་བུས་མཉམ་ཉིད་དོན་ལ་སྦྱོར༔ སྒོ་སྲུང་ཁྲོ་མོ་བཞི་ཡི་ཐུགས་དམ་བསྐང་༔ ཧཱུྃ་ཧྲཱིཿ ཐུགས་དམ་གཉན་པོ་བསྐང་བའི་དམ་རྫས་ནི༔ ཕྱི་མཆོད་དབང་པོ་དྲུག་ལ་ཉེར་སྤྱོད་རྫས༔ ནང་མཆོད་དམ་རྫས་སྨན་གཏོར་རུ་དྷི་ར༔ གསང་མཆོད་སྦྱོར་སྒྲོལ་ཆོས་དབྱིངས་རིག་པའི་གཤིས༔ འཁོར་འདས་མཉམ་ཉིད་ལྟ་བའི་ཀློང་དུ་བསྐང་༔ ཡེངས་མེད་འཛིན་བྲལ་སྒོམ་པའི་ཀློང་དུ་བསྐང་༔ སྒྱུ་མའི་ཆོ་འཕྲུལ་སྤྱོད་པའི་ངང་དུ་བསྐང་༔ རེ་དོགས་དམིགས་མེད་འབྲས་བུ་ཀློང་དུ་བསྐང་༔ གསལ་དག་བརྟན་གསུམ་བསྐྱེད་པའི་ཏིང་འཛིན་གྱིས༔ སྣོད་བཅུད་དག་པ་རབ་འབྱམས་ཀློང་དུ་བསྐང་༔ སྲིད་གསུམ་ཡེ་གྲོལ་འོད་གསལ་ཆེན་པོའི་སྦུབས༔ མཐའ་བྲལ་རྫོགས་རིམ་མཉམ་པའི་ཀློང་དུ་བསྐང་༔ ཐ་མལ་ལས་རླུང་ངག་གི་བརྗོད་པ་ཀུན༔ གྲག་སྟོང་མི་ཤིགས་ནཱ་དའི་དབྱིངས་སུ་བསྐང་༔ རྩ་ཁམས་ཀུན་རྫོབ་ལས་རླུང་ཐིག་ལེའི་འཕྲུལ༔ ལྷན་སྐྱེས་དགའ་བཞིའི་ཡེ་ཤེས་ཀློང་དུ་བསྐང་༔ རྐྱེན་ངན་གློ་བུར་འཁྲུལ་བའི་དགྲ་དང་བགེགས༔ རང་རྩལ་དག་ཆེན་སྒྱུ་མའི་ཀློང་དུ་བསྐང་༔ ཉམས་ཆག་ཉེས་ལྟུང་འཁོར་བའི་རྟོག་ཚོགས་རྣམས༔ སྐྱེ་མེད་རང་གྲོལ་སྐུ་གསུམ་ཀློང་དུ་བསྐང་༔ ཧཱུྃ་ཧྲཱིཿ དེ་ལྟར་ཐུགས་དམ་བསྐང་བའི་བྱིན་རླབས་ཀྱིས༔ མཁན་པོ་སློབ་དཔོན་རྡོ་རྗེ་སྤུན་གྲོགས་དང་༔ ཡི་དམ་ལྷ་མཆོག་མ་སྲིང་ཌཱཀྐི་མ༔ བཀའ་སྲུང་གཏེར་བདག་དམ་ཅན་ཐམས་ཅད་ཀྱི༔ སྤྱན་སྔར་ཁས་བླངས་དམ་ཚིག་ཉམས་ཆག་ཀུན༔ མི་འཆབ་མི་སྦེད་སྙིང་ནས་བཤགས་པར་བགྱི༔ ཉམས་ཆག་རྟོག་སྒྲིབ་མ་ལུས་དབྱིངས་སུ་གྲོལ༔ དགྲ་བགེགས་མཚོན་རྩེ་དུག་ནད་འཇིགས་ཚོགས་སོལ༔ ལུས་ངག་ཡིད་གསུམ་མཐུ་རྩལ་ནུས་པ་བསྐྱེད༔ ཕ་རོལ་ལོག་འདྲེན་སྤ་བཀོང་ཆམ་ལ་ཕོབ༔ སྦས་པའི་གཏེར་ཁ་དུས་བབས་ལུང་བྱང་སྤྲོད༔ ཉམས་རྟོགས་རྩལ་རྒྱས་རང་སྣང་དབང་དུ་བསྡུས༔ སྒྲུབ་པའི་རྟགས་ཐོན་གཞན་སྣང་ཟིལ་གྱིས་གནོན༔ མཆོག་ཐུན་དངོས་གྲུབ་ད་ལྟ་ཉིད་དུ་སྩོལ༔ ཅེས་དང་ཡི་གེ་བརྒྱ་པ་ཉེར་གཅིག་གམ༔ བདུན་ལྔ་གསུམ་བརྗོད་ལྟ་བའི་ངང་མདངས་བསྐྱངས༔ ས་མ་ཡཱ༔ གུ་ཧྱ༔ ཞེས་པ་འདི་དག་སྣང་དགོངས་པའི་གཏེར་ལ་དབང་བ་བདག་ཆོས་གཟུགས་པ་ལུང་རིག་གླིང་པས་རང་བྱུང་ཆོས་དབྱིངས་དག་པའི་སྒྲོམ་ནས་བཏོན་ཏེ་སྤེལ་བས་དུས་གསུམ་དགྲ་གདོན་འབྱུང་པོ་རྨིང་མེད་དུ་བརླག་ནས་རྒྱལ་བསྟན་མི་ནུབ་དར་ཞིང་རྒྱས་ནས་ཡུན་རིང་དུ་གནས་པའི་རྒྱུར་གྱུར་ཅིག །དགེའོ། །དགེའོ། །དགེའོ། །