ཉི་ཟླ་འཛིན་པའི་རྩིས།
ཤཱཀྱ་ཤྲཱི་བྷ་དྲས་མཛད།
ཉི་ཟླ་འཛིན་པའི་རྩིས་བཞུགས།། དཔལ་དུས་ཀྱི་འཁོར་ལོ་ལ་ཕྱག་འཚལ་ལོ། །ཉི་ཟླ་འཛིན་པའི་མན་ངག་ནི། །ཟླ་བ་དག་པར་ཀླུ་ཟླ་སྦྱིན། །དེ་ལ་མིག་གིས་བསྒྱུར་བར་བྱ། །ཟླ་བའི་དོན་དུ་གཅིག་སྦྱིན་ཏེ། །ཉི་མ་ལ་ནི་གཉིས་སྦྱིན་ནོ། །དེ་ལ་མཁའ་དུས་ཆུས་ཐོབ་དོར། །དོར་རྒྱུ་མེད་ན་དེ་ཉིད་དམ། །ལྷག་མ་སྐར་མས་བསྒྱུར་བ་ལ། །མཁའ་དུས་ཆུ་བོས་བགོས་ཐོབ་པ། །སྐར་མའི་གནས་སུ་གཞག་པར་བྱ། །ལྷག་མ་དྲུག་ཅུས་བསྒྱུར་བ་ལ། །གོང་གི་འགོད་བྱེད་ཀྱིས་ཐོབ་པ། །ཆུ་ཚོད་དག་ཏུ་ཤེས་པར་བྱ། །ཆུ་སྲང་དབུགས་དག་རིམ་པས་ཤེས། །དེ་ལྟར་ཐོབ་པ་དེ་རྣམས་ཀྱིས། །རྒྱུ་སྐར་རྣམས་ལ་སྦྱངས་བའི་ལྷག །སྒྲ་གཅན་གདོང་གི་སྐར་མ་ཡིན། །དེ་དང་ཉི་ཟླའི་སྐར་མ་གཉིས། །མཉམ་ན་སྒྲ་གཅན་གདོང་གིས་འཛིན། །མི་མཉམ་ན་ནི་རྒྱུ་སྐར་ཕྱེད། །བསྲེས་པས་སྒྲ་གཅན་མཇུག་སྐར་ཡིན། །དེ་དང་ཉི་ཟླའི་སྐར་མ་གཉིས། །མཉམ་ན་སྒྲ་གཅན་མཇུག་མས་འཛིན། །དེ་ཡང་ཟླ་བ་འཛིན་པ་ནི། །སྒྲ་གཅན་ཕྱེད་ནི་དག་པ་དང༌། །ཉི་མ་དག་པ་གཉིས་བསྲེས་པས། །རྒྱུ་སྐར་རྫོགས་སམ་ཕྱེད་ལྷག་དོར། །ཐིག་ལེ་ཤ་རྣ་ཟླ་བ་ནི། །འཛིན་པར་ཐེ་ཚོམ་མེད་པ་ཡིན། །མཉམ་པོ་གསུམ་དང་ཐིག་ལེ་ཤར། །ཉི་མ་ངེས་པར་འཛིན་པ་ཡིན། །དུས་ཚོད་ཇི་ཙམ་དག་ན་འཛིན། །ཉིན་མཚན་རིང་ཐུང་ཤེས་བྱ་སྟེ། །གཟའ་ཡི་ཆུ་ཚོད་དག་དང་སྦྱར། །ཕྱོགས་ནི་སྐར་མའི་ཕྱོགས་དང་སྦྱོར། །ཆེ་ཆུང་ཇི་ཙམ་འཛིན་བ་ནི། །གཟའ་ཡི་ཆུ་ཚོད་མན་ཆད་དང༌། །སྐར་མའི་ཆུ་ཚོད་མན་ཆད་རྣམས། །བསྲེས་ཏེ་སྐར་མར་བཅས་པ་དང༌། །སྒྲ་གཅན་སྐར་མར་བཅས་བ་རྣམས། །མཉམ་ན་ཟླ་བ་རིལ་པོ་འཛིན། །བཅོ་ལྔས་གང་རུང་མང་གྱུར་ན། །བཞི་གསུམ་དག་ནི་འཛིན་པར་འགྱུར། །སུམ་ཅུས་གང་མང་ཕྱེད་འཛིན་ནོ། །དེ་བཞིན་སུམ་ཆ་ལ་སོགས་པ། །ཞིབ་ཏུ་བརྩིས་ལ་ལེགས་པར་སྨྲ། །ཞེ་ལྔས་གང་
རུང་མང་གྱུར་ན། །མཉམ་པོར་འགྲོགས་ཏེ་འཛིན་མི་འགྱུར། །ཆུ་ཚོད་ཇི་ཙམ་འཛིན་པ་ནི། །ཟླ་བ་རིལ་པོར་འཛིན་འགྱུར་རམ། །སུམ་གཉིས་ཕྱེད་སོགས་འཛིན་བ་ནི། །ཆུ་ཚོད་བཅུ་ཡི་བར་དུ་འཛིན། །བཞི་ཆ་ལ་སོགས་ཆུང་འཛིན་ན། །ཆུ་ཚོད་ལྔ་དང་དྲུག་ལ་སོགས། །མཁས་བས་བརྩིས་ལ་ལེགས་བར་སྨྲ། །སྤྱིར་ནི་ཟླ་བ་དྲུག་དྲུག་ན། །ཟླ་བ་ཕལ་ཆེར་འཛིན་པར་འགྱུར། །རེས་ནི་ལྡན་འང་འཛིན་བ་སྲིད། །གལ་ཏེ་བཅུ་གཉིས་བར་དག་ཏུ། །མི་འཛིན་བའང་སྲིད་པ་ཡིན། །ཟླ་བ་ཉ་ལ་བཟུང་བ་ཡི། །སྟོང་ལ་ཉི་མ་འཛིན་ཡིན་པས། །ཐམས་ཅད་དུ་ནི་བརྩི་བར་བྱ། །ཉི་མ་ཆེ་ཆུང་འཛིན་པ་རྣམས། །ཐིག་ལེ་ཤར་བའི་སྐབས་སུ་ཤེས། །དེ་ལ་ཟླ་བ་ཉ་དང་ནི། །བཅུ་དྲུག་མཚམས་སུ་འཛིན་པ་དང༌། །ཉི་མ་སྟོང་དང་ཚེས་གཅིག་གི །མཚམས་སུ་འཛིན་པར་ཐུབ་པས་གསུངས། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཅེས་བྱ་པ། །རྒྱ་གར་ཁ་ཆེའི་པཎྜི་ཏ་ཆེན་པོ། །ཤཱཀྱ་ཤྲའི་བྷ་དྲས་མཛད་པ་རྫོགས་སོ།།