བསྟན་སྲུང་ཞིང་སྐྱོང་དབང་མོར་བསྟོད་ཅིང་ཕྲིན་ལས་སུ་གསོལ་བ་བཀྲ་ཤིས་འདོད་འཇོའི་དཔྱིད་དཔལ།

༄༅། །བསྟན་སྲུང་ཞིང་སྐྱོང་དབང་མོར་བསྟོད་ཅིང་ཕྲིན་ལས་སུ་གསོལ་བ་བཀྲ་ཤིས་འདོད་འཇོའི་དཔྱིད་དཔལ་ཞེས་བྱ་བ། ན་མོ་གུ་རུ་བཛྲ་ཝཱ་ར་ཧི། བདེ་ཆེན་རྡོ་རྗེའི་ཞགས་པས་སྲིད་ཞིའི་ཁྱོན། །ཡོངས་བཅིངས་འཁོར་འདས་ཀུན་གྱི་སྤྱི་དཔལ་མོ། །རྡོ་རྗེའི་ཕག་ཞལ་རྔམ་པའི་བཞད་སྒྲ་ཅན། །བྱང་ཆུབ་བར་དུ་བདག་གི་མགོན་མཛོད་ཅིག ༡ །གང་ཐུགས་ཆོས་དབྱིངས་ཞི་ལས་གཡོས་མིན་ཀྱང་། །ལོག་འདྲེན་འདུལ་ཕྱིར་མི་བསྲུན་དྲག་མོའི་སྐུར། །ཡོངས་བཞེངས་ཞིང་སྐྱོང་མཁའ་འགྲོའི་དབང་ཕྱུག་ཅེས། །གྲགས་པའི་རྔ་ཆེན་ནམ་མཁའི་མུ་ཁྱུད་བརྡལ། ༢ །རབ་འབར་བསྐལ་པའི་ཞུགས་ཕུང་འཁྲིགས་པའི་ཀློང་། །འཇིགས་རུང་དུས་མཐའི་ཆར་སྤྲིན་དཀྲིགས་འདྲའི་སྐུ། །གང་ཞིག་དྲན་ན་ལོག་འདྲེན་བཅུད་མེད་དཔུང་། །དགའ་བའི་མངལ་གནས་མི་ལྷུང་རང་དབང་ཅི། ༣ །མི་བསྲུན་སྡང་མིག་རྡོ་རྗེའི་ཚྭ་ཚྭའི་ཟེར། །གང་ལ་འབབ་དེའི་ཁོང་ཁྲག་ཁ་སྒོ་རུ། །ཁྱུར་ཁྱུར་ལྷུང་དང་ཆབས་ཅིག་དོན་སྙིང་ཚོགས། །ལྷུན་པོར་སྤུངས་པའི་འཇིགས་རྔམ་འདི་ཅི་ཞིག ༤ །ཉམས་པའི་སྙིང་ཁྲག་གིས་མྱོས་ང་རོའི་སྒྲས། །སྲིད་རྩེའི་གནས་ཀྱང་ཀུ་ཤའི་རྩེ་མོ་ལྟར། །གཡོས་ཚེ་ཞགས་ལྡན་མངལ་རྒྱ་དབྲལ་དོགས་ནས། །བྱེད་པོ་འཁོར་ཡུག་ར་བས་བཅིང་མིན་ནམ། ༥ །ཁྲག་འཛག་རྒྱུ་མར་བརྒྱུས་པའི་མི་མགོའི་ཕྲེང་། །དམར་བཤུས་ལྤགས་རློན་དྲོད་ལྡན་དགྲ་སྙིང་བཅས། །གཞན་སྡེར་སྐྱེངས་པ་སྟེར་བྱེད་འདི་མཐོང་ཚེ། །སྟོབས་ལྡན་ས་འོག་ཡིབ་པའི་ཆོ་གས་བྲེལ། ༦ །སྲིད་གསུམ་རྣམ་གསལ་འཕྲུལ་གྱི་མེ་ལོང་གིས། །འབྱུང་ཚོགས་སྐྱབས་གྲིབ་བརྟེན་པའི་མ ཚང་རྡོལ་ཚེ། །དབུགས་བྲལ་ཏི་རིའི་ཟོལ་གྱིས་ཞབས་འོག་ཏུ། །མནན་མཐོང་རྡོ་རྗེ་ཅན་ཡང་འདར་ཞེས་གླེང་། ༧ །ཕ་རོལ་ཕྱིན་དྲུག་རུས་པའི་ཕྱག་རྒྱ་དང་། །ཐབས་ཤེས་དུང་གི་སྙན་ཆ་འཐབ་པའི་སྒྲས། །ཡེ་ཤེས་ལྔ་ལྡན་བདེ་གཤེགས་རིག་མཆོག་ལྔ། །དབང་རྟགས་ཐོད་པའི་གུར་ན་བཞེང་པ་འདྲ། ༨ །རྣམ་བཞིའི་ཕྲིན་ལས་འཇུག་པ་བརྒྱ་པའི་གར། །ཀུན་གསལ་ཕ་མཐར་གཡོ་བའི་ངང་ཚུལ་གྱིས། །མེ་ཏོག་གཞུ་ཅན་རང་མཚོན་རྟུལ་ཤེས་ནས། །གཞན་འཕྲུལ་གནས་སུ་སྙིང་ལས་ཆུང་ངུས་ཡིབ། ༩ །སྙིགས་ལྔའི་རང་མཚན་ཉེས་བརྒྱའི་ཚད་གདུང་དབལ། །ཞི་བྱེད་བདུད་རྩིའི་རྫིང་བུ་འདི་འོ་ཞེས། །དམ་ལྡན་རྣལ་འབྱོར་ཡོངས་ལ་དུས་དྲུག་ཏུ། །སྔོ་བསངས་གཟའ་སྐར་མཛུབ་མོས་སྟོན་པ་བཞིན། ༡༠ །གང་ལ་བརྟེན་ནས་སྡེ་བཞིའི་འབྱོར་པའི་དཔལ། །རབ་འཕེལ་ཕུན་ཚོགས་འདོད་དགུའི་ལྕི་ཁུར་གྱིས། །དུབ་ལྡན་ནོར་འཛིན་བུ་མོས་རང་གི་བཞིན། །འབབ་ལྡན་རྔུལ་ཆུའི་ཐིགས་པས་འཁྲུད་པར་ངེས། ༡༡ །སྲིད་ཞིའི་དཔལ་ཀུན་ཅིག་ཅར་འཆིང་ནུས་པའི། །དབང་མཛད་འཕྲུལ་གྱི་ཞགས་པས་གཙུག་ན་ཟླ། །རང་མཐུ་བྱིན་ཟས་ཟོས་པའི་དྲེས་ཐག་ལྟར། །མཐོང་ནས་གངས་ཀྱི་རི་བོར་བྲོས་པར་དོགས། ༡༢ །དྲང་སྲོང་དམོད་པས་མཚོན་མིན་མངོན་སྤྱོད་མདས། །གཟས་དེར་ཀུ་ཤ་རླུང་གི་བསྐྱོད་པའི་སྒྲས། །ཀྱི་ཧུད་མི་རྟག་རྒུད་མཐའ་འདི་འོ་ཞེས། །སྐྱེ་བོ་ཀུན་ལ་བག་ཡོད་འདོམས་པར་ཤེས། ༡༣ །མཆོག་རབ་བདེ་ཆེན་སྤེལ་བའི་མཛའ་ན་མོར། །སོན་ཚེ་དྷཱུ་ཏིའི་འཛུམ་དཀར་དགོད་པའི་ཀློང་། །དགའ་བཞིའི་འགྲོས་ཐིམ་འཕོ་མེད་ལྷན་སྐྱེས་ཀྱི། །ཡེ་ཤེས་སུག་མཐིལ་གཏེར་བཞིན་སྦྱིན་པས་འཚེངས། ༡༤ །ཁྱོད་ནི་ཤིན་ཏུ་ཟབ་པས་ཏི་མིའི་མཛོད། །ཐུགས་རྗེའི་གོ་སྐབས་ཡངས་པས་ཆུ་མཐོངས་ཏེ། །སྒྲུབ་ལ་དངོས་གྲུབ་མཆོག་སྦྱིན་མནྡར། །ཉེས་པའི་གཡུལ་ལས་སྲུང་བས་མཁར་ཡང་ཡིན། ༡༥ །རྟོགས་ན་འཕགས་བཞི་བསྐྱེད་ཡུལ་ཝཱ་ར་ཧི། །མ་རྟོགས་དུར་ཁྲོད་འདྲེ་མོ་ངན་ནེ་མ། །ཞི་ཆགས་ཁྲོ་སོགས་རྣམ་འགྱུར་བསམ་མི་ཁྱབ། །ཕྱོགས་རེར་བགྲང་འདོད་ལྕེ་ལ་ངོ་ཚར་བྱས། ༡༦ །ངེས་དོན་རྡོ་རྗེ་བཙུན་མོའི་བྷ་ག་རུ། །སྲིད་ཞིའི་ཆོས་ཀུན་མ་བསྡོམས་གཞར་ཡང་ཅི། །དེ་སླད་དམན་མཆོག་འཛིན་པ་བྱིས་བློའི་སྐྱོན། །དག་པ་རབ་འབྱམས་འཁོར་ལོར་བདག་སྤྲོ་འོ། ༡༧ །ཨེ་མ་སྔོན་ནས་བརྟེན་པའི་གཡར་དམ་ཅན། །མི་འབྲལ་ཡིད་ལ་གོམས་པའི་པིར་རིས་ཀྱིས། །བི་ཤྭ་ཀརྨའི་ཁེངས་པ་བསྙིལ་ལགས་ན། །རྗེས་ཆགས་བརྩེ་བའི་འཛུམ་མདངས་དེང་སྟོན་ཅིག ༡༨ །ལྷག་བསམ་པདྨའི་རྩ་བ་བརྟན་ལགས་ཀྱང་། །སྙིགས་ལྔའི་རྒུད་པའི་ནམ་མཁའི་པགས་པ་ཡིས། །དོན་གཉིས་སྦྲང་རྩིའི་དགའ་སྟོན་འགྱེད་མ་ནུས། །མཆོག་བྱིན་སྣང་བའི་མཛོད་ཀྱིས་དབྱེ་བར་འོས། ༡༩ །ཞི་མཛད་ཡན་ལག་བརྒྱད་ལྡན་མཐོ་རིས་ཀླུང་། །བརྒྱད་གཉིས་འཇིགས་པས་ནོན་ལྡན་དུག་ཅན་བུའི། །གདུང་བ་སེལ་སླད་རིངས་པར་ཆས་པའི་མོད། །གློ་བུར་ཡེ་འདྲོག་མེ་ཚོགས་གཞིལ་བར་མཛོད། ༢༠ །དམ་ལྡན་སྔགས་འཆང་འབྱོར་པའི་དབང་པོ་ཡིས། །མ་ཅིག་མདངས་ལྡན་གཙུག་ནོར་མཐོན་ཀའི་དཔལ། །བསྙེན་པའི་མོད་ལ་སྡེ་བཞིའི་མཛོད་ཁང་འབུམ། །ཡོངས་འགེངས་རྨུགས་འཛིན་དཔལ་ལ་འཕྱ་བར་མཛོད། ༢༡ །རབ་མྱུར་ཕྲིན་ལས་ནོར་བུའི་ཞགས་པ་ཡིས། །ཆེ་དགུའི་སྣང་ཤེས་ཡིད་འཕྲོག་དྲི་ཟ་མོ། །རབ་བཅིངས་སྔགས་ སྤྱོད་རྒྱལ་བུའི་མངའ་ཐང་དཔལ། །མི་ཉམས་གླིང་བཞིའི་ཁོངས་སུ་ཁྱབ་པར་མཛོད། །མི་བསྲུན་ཉམས་པ་བདུན་ལྡན་སྡང་བྱེད་ཞིང་། །ཤུགས་སྒྲོལ་རྡོ་རྗེའི་མེ་ཆར་མི་བཟད་པས། ༢༢ །མིང་གི་ལྷག་མར་བཅོམ་པའི་གྲགས་སྙན་རྔ། །ཕྱོགས་ཀྱི་བུ་མོའི་སྒྲ་འཛིན་དཔྱིད་དུ་མཛོད། །ཁྱད་པར་འཁོར་ལོའི་དབང་ཕྱུག་རབ་འབྱམས་པའི། །ངོ་མཚར་མཚན་དཔེའི་ཟློས་གར་པདྨའི་གཉེན། །འགོག་མེད་འགྲོ་བསོད་རྟག་སྡོད་ཡངས་པའི་ངོགས། །མངོན་སྣང་ཕན་བདེའི་ཨུཏྤལ་ཆེར་བཞད་མཛོད། ༢༣ །བསྟན་གཉིས་ཉི་ཟླའི་བགྲོད་པས་ཉེར་མཛེས་ཤིང་། །རྣམ་གསུམ་འཁོར་ལོའི་ཕྲིན་ལས་དར་རྒྱས་པའི། །གླིང་འདིའི་བརྒྱུད་འཛིན་བུ་སློབ་ཡོན་བདག་བཅས། །ཁྱོད་ལ་གཉེར་དུ་གཏད་དོ་མེལ་ཚེ་མཛོད། ༢༥ །མདོར་ན་རྣལ་འབྱོར་ཡིད་ཀྱི་མ་ཀུ་རར། །གང་ཤར་ལེགས་བྱས་བྱེ་བའི་ཚེས་རིས་བརྒྱ། །གེགས་མེད་རྫོགས་ལྡན་དང་པོའི་དུས་སྟོན་གྱིས། །ཕྱོགས་ལས་རྣམ་རྒྱལ་རུ་མཚོན་སྒྲེང་བར་མཛོད། ༢༦ །བཀྲ་ཤིས་དཔྱིད་ཀྱི་རྒྱལ་མོའི་སྙན་འགྱུར་གླུས། །བཀྲ་ཤིས་དབྱར་གྱི་དཔལ་མོ་མགྲོན་ཁུགས་པས། །བཀྲ་ཤིས་དཀར་ཕྱོགས་དགྱེས་པའི་རྩེད་འཇོའི་གར། །བཀྲ་ཤིས་སྲིད་པ་གསུམ་ན་སྣང་གྱུར་ཅིག ༢༧ །ཅེས་པའང་ལྕགས་ཁམས་རྡོ་རྗེའི་སྣ་ལྡན་གྱི་ལོའི་དུས་ཚེས་དགེ་བར་ཞེ་ཆེན་པ་འགྱུར་མེད་པདྨ་བསྟན་འཛིན་གྱིས་བྲིས་ཤིང་ཕྲིན་ལས་སུ་གསོལ་བ་སརྦ་དཱ་ཀ་ལྱ་ཎཾ་བྷ་ཝ་ཏུ།