བསྔོ་སྨོན་རྣམ་དག་བསོད་ནམས་མཐའ་ཡས་རྒྱ་མཚོ།
བསྔོ་སྨོན་རྣམ་དག་བསོད་ནམས་མཐའ་ཡས་རྒྱ་མཚོ་ཞེས་བྱ་བ་བཞུགས་སོ། ན་མོ། རྩ་
བརྒྱུད་བླ་མ་དཀོན་མཆོག་རིན་ཆེན་གསུམ 
། །ཡི་དམ་ལྷ་ཚོགས་དཔའ་བོ་མཁའ་འགྲོ་ལ། །ཕྱག་འཚལ་སྐྱབས་མཆི་སྙིང་ནས་གསོལ་བ་འདེབས། །མྱུར་དུ་སངས་རྒྱས་འགྲུབ་པར་བྱིན་གྱིས་རློབས། །རྫོགས་པའི་བྱང་ཆུབ་མ་ཐོབ་བར་དུ་བདག །དཔལ་ལྡན་བླ་མ་དཀོན་མཆོག་རྩ་གསུམ་ལ། །བཅོས་མིན་དག་སྣང་མོས་གུས་རྒྱུད་བསྐྱེད་ནས། །ལམ་ལྔའི་ཉམས་རྟོགས་རྫོགས་པར་བྱིན་གྱིས་རློབས། །སྐྱབས་གནས་མཆོག་རྣམས་བདག་ལ་དགོངས་སུ་གསོལ། །འདིས་མཚོན་བདག་གིས་དུས་གསུམ་དགེ་རྩ་ཀུན། །གཅིག་ཏུ་བསྡོམས་ཏེ་དཔལ་ལྡན་བླ་མར་འབུལ། །བླ་མ་རྣམས་ཀྱི་ཐུགས་དགོངས་ཁྱད་པར་ཅན། །གང་གིས་ཡོངས་སུ་རྫོགས་པའི་
རྒྱུར་གྱུར་ཅིག །དེ་ལས་བྱུང་བའི་དགེ་བ་རབ་བཟང་གིས། །མཁའ་ཁྱབ་རྒྱལ་བ་སྲས་བཅས་སྤྱན་ལམ་དུ། །མཆོད་པའི་བྱེ་བྲག་དཔག་ཡས་མི་ཟད་སྤྲིན། །དེང་ནས་རྟག་ཏུ་འབྱུང་ཞིང་རྒྱས་གྱུར་ཅིག །དེ་ཡི་བསོད་ནམས་བདག་གིས་གང་ཐོབ་པ། །མཁའ་མཉམ་འགྲོ་ལ་ཐུན་མོང་ཉིད་དུ་བསྔོ། །ཀུན་ཀྱང་འཁོར་བའི་རྒྱ་མཚོ་ལས་བསྒྲལ་ནས། །མྱུར་དུ་མངོན་པར་རྫོགས་སངས་རྒྱས་གྱུར་ཅིག །སྲིད་པ་ཇི་སྲིད་བདག་ཀྱང་སངས་རྒྱས་ཀྱི། །གོ་ཆ༷ འཕང་ཐོབ་ནས་འབྲེལ་ཐོགས་ཀྱིས་གཙོར་བྱས། །ཡིད་ཅན་མཐའ་དག་བདག་ཉིད་ཁོ་ན་ཡིས། །འདྲེན་པ་མཆོག་གི་བླ་མར་ཆས་གྱུར་ཅིག །སྐྱེ་དང་ཚེ་རབས་དག་ནི་ཐམས་ཅད་དུ། །རིན་ཆེན་བྱང་ཆུབ་སེམས་གཉིས་རྨི་ལམ་ནའང་། །མི་བརྗེད་གོང་ནས་གོང་དུ་འཕེལ་བ་དང་། །རྐྱེན་ངན་བྱང་ཆུབ་
གྲོགས་ཁྱེར་ནུས་གྱུར་ཅིག །མི་དགེའི་རྟོག་པ་རྣམ་ཀུན་སྐྱེ་མ་གྱུར། །གལ་ཏེ་སྐྱེས་ཀྱང་དེ་ཉིད་མི་འགྲུབ་ཅིང་། །བདག་གིས་སྒོ་གསུམ་བྱ་བ་ཐམས་ཅད་ཀྱིས། །འགྲོ་ལ་ཕན་ཐོགས་རྒྱ་ཆེར་འབྱུང་གྱུར་ཅིག །མདོར་ན་ཕྱོགས་དུས་རྒྱལ་བ་སྲས་དང་བཅས། །དེ་དག་ཀུན་གྱི་ཐུགས་དགོངས་མ་ལུས་པ། །བདག་ཉིད་ཁོ་ནས་ཡོངས་སུ་རྫོགས་བྱེད་པའི། །རྣམ་དག་སྨོན་པའི་གནས་འདི་འགྲུབ་གྱུར་ཅིག །སངས་རྒྱས་སྐ་གསུམ་བརྙེས་པའི་བྱིན་རླབས་དང་། །སོགས་བརྗོད་པར་བྱའོ། ཞེས་སྐྱབས་སེམས་མཆོད་པ་བསྔོ་སྨོན་བློ་སྦྱོང་རྣམས་ཀྱི་དོན་ཚང་ཞིང་ཁྱད་པར་དུ་འཕགས་པ་འདི་ནི་རང་ཉིད་ཀྱི་ཁ་ཏོན་དུ་སྔ་མོ་ནས་འབྲི་འདུན་ཡོད་ཀྱང་ལེ་ལོས་འགྱངས་པ་དང་ཉེ་ཆར་མོན་སྒོམ་དྷརྨ་ཀཱིརྟིས་ནན་ཏན་ཆེན་པོས་བསྐུལ་བའང་རྒྱུ་རྐྱེན་ལས་དུས་མཐའི་བྱ་བྲལ་མ་ཎི་སངས་རྒྱས་རྡོ་རྗེས་གུ་རུའི་སྒྲུབ་གནས་ཀྱི་རྒྱལ་པོ་
དཔལ་གྱི་བསམ་ཡས་མཆིམས་ཕུའི་དབེན་ཁྲོད་དུ་རབ་ཚེས་མེ་སྤྲེལ་གྲོ་བཞིན་ཟླ་བའི་དཀར་ཕྱོགས་ཀྱི་དགའ་བ་གཉིས་པ་ལ་བྲིས་པ་སྟེ། འདིས་ཀྱང་བདག་གཞན་རྣམས་ཀྱི་རྒྱུད་ལ་ལམ་ལྔའི་ཉམས་རྟོགས་མྱུར་དུ་སྐྱེ་བའི་རྒྱུར་གྱུར་ཅིག། །།སརྦ་མངྒ་ལཾ།།
ཏཱཾ་ཧྲཱི༔ རང་སྣང་ཤེས་རིག་མ་འགགས་ཚེ་ཡི་ལྷ། །བཅོམ་ལྡན་ཡིད་བཞིན་འཁོར་ལོ་ཚེ་འཕེལ་མ། །མགྱོགས་མ་བཞི་དང་གྲུབ་པའི་རྒྱལ་མོ་སོགས། །འཆི་མེད་རིག་འཛིན་ཚོགས་ལ་གསོལ་བ་འདེབས། །བདག་གི་བླ་ཚེ་ཆད་ཉམས་ཡར་བ་གང་། །སོར་ཆུད་དུས་མིན་འཆི་ལས་ཐར་བ་དང་། །འཆི་མེད་རྡོ་རྗེའི་སྲོག་ལ་དབང་ཐོབ་ནས། །ཚེ་བདག་འཕགས་མའི་གོ་འཕང་འགྲུབ་གྱུར་ཅིག །ཨོཾ་ཏཱ་རེ་ཏུ་ཏྟཱ་རེ་ཏུ་རེ་མ་མ་ཨཱ་ཡུ་པུཙྪིཾ་ཀུ་རུ་ཧྲཱིཿབྷྲཱུྃ་ནྲྀ་ཛཿསརྦ་སིདྡྷི་ཕ་ལ་ཧཱུྃ །ཞེས་པའང་རང་སློབ་བཙུན་མ་སངས་རྒྱས་སྒྲོལ་མས་ནན་བསྐུལ་ངོར་དུས་མཐའི་སྤྲང་སྨྱོན་སངས་རྡོར་པས་བྲིས་པ་སིདྡྷི་རསྟུ།།
ཤོག་སྟོང་།
ན་མོ་གུ་རུ་རཏྣ་ཡེ། དེ་ལ་འདིར་འདུས་བྱས་ཀྱི་དགེ་བ་ལ་ཕན་ཡོན་ཆེ་བ་ཕྱག་འཚལ་ལ་གསུམ། དང་པོ་སྦྱོར་བ་བྱང་ཆུབ་ཏུ་སེམས་བསྐྱེད་པ་ནི། མ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་སྒོ་གསུམ་འཇུག་པ་གཅིག་པས་ཕྱག་འཚལ་བའི་རིམ་པ་ལ་འཇུག་པར་བགྱིའོ། །ལན་གསུམ། དེ་ནས་དངོས་གཞི་ཕྱག་འཚལ་བ་ལ་ཐོག་མར་ཐལ་མོ་སྙིང་གར་སྦྱར་ཏེ། དཀོན་མཆོག་གསུམ་ལ་ཕྱག་འཚལ་ལོ། ན་མོ་མཉྫུ་ཤྲཱི་ཡེ། ན་མོ་སུ་ཤྲཱི་ཡེ། ན་མོ་་ཨུ་ཏ་མ་ཤྲཱི་ཡེ་སྭཱ་ཧཱ། ཞེས་ལན་གསུམ་བརྗོད་ན་གྲངས་རེ་རེ་ཡང་བྱེ་བར་འགྱུར་རོ། །དེ་ནས་ཚོགས་ཞིང་རྣམས་མངོན་སུམ་བཞུགས་པའི་སྤྱན་སྔར་རང་གཞན་གྱི་ལུས་ཞིང་གི་རྡུལ་སྙེད་དུ་སྤྲུལ་ནས་ལྷན་ཅིག་ཏུ་ཕྱག་འཚལ་བར་བསམ་ལ། སངས་རྒྱས་ཐམས་ཅད་འདུས་
པའི་སྐུ་སོགས་དང། ཕྱག་བྱར་འོས་པ་ཐམས་ཅད་ལ་སོགས་དང། སྐྱབས་འགྲོ་དང་ཡན་ལག་བདུན་པ་ཞི་ཁྲོའི་ཕྱག་གི་བཀོལ་བྱང་གང་རུང་དང་སྦྲགས་ནས་ཅི་ནུས་འཚལ་བའི་རྗེས་ཀྱི་རིམ་པ་ནི། ཕྱག་འཚལ་བ་དང་མཆོད་ཅིང་བཤགས་པ་དང་སོགས་བསྔོ་སྨོན་གང་ཤེས་ཀྱིས་དགེ་རྩ་རྒྱ་ཆེར་སྤེལ་བར་བྱའོ། །ཞེས་པའང་མོས་ལྡན་ཤེས་བྱ་ལ་རྨོངས་པ་རྣམས་ཀྱི་དོན་དུ་སྤྲང་བན་སངས་རྒྱས་རྡོ་རྗེས་སྦྱར་བ་དགེ།