༈ ཞྭ་ལུ་དགེ་སློང་ལ།

སྭཱསྟི། རྒྱལ་བསྟན་བསམ་འཕེལ་རིན་ཆེན་གང་། །རྙེད་པར་དཀའ་བ་ཡང་ཤེས་ཏེ། །རིན་ཆེན་གསེར་ཕྱེ་ཆ་ཤས་ནས། །བསགས་པ་བཞིན་ལ་གཅིག་ཅར་དུ། །སྡེ་སྣོད་མཐའ་དག་ནོས་པའི་ཡུལ། །སྙིགས་མའི་དུས་འདིར་དཀའ་བར་འགྱུར། །དེས་ན་སངས་རྒྱས་རབ་གསལ་གྱིས། །རྣམ་སྤྲུལ་བུ་སྟོན་རིན་ཆེན་ཏོག །གང་གི་རིང་ལུགས་ལས་འོང་བའི། །ཆོས་ཚུལ་ཇི་སྙེད་འདུས་པ་དེར། །རྒྱལ་བ་རྣམས་ནི་ཐབས་མཁས་པས། །གདུལ་བྱ་དང་མཐུན་འདུལ་བྱེད་སྐུ། །ཅིར་ཡང་སྟོན་པར་མོས་བྱས་ནས། །དག་པའི་སྣང་བས་ལམ་བཟང་པོར། །དོགས་པ་མེད་པའི་ཤིང་རྟ་ལ། །བརྟེན་ནས་ཆོས་རྒྱུན་ཚང་པའི་ཆུད། །སྔོན་བསགས་སྐལ་བ་བཟང་པོ་ཅན། །བདག་འདྲ་ཤིང་རྟ་བཅུ་པ་ཡི། །སྐལ་དང་མཚམ་པར་ཡོངས་འཇོམས་པ། །འདི་ཡང་ལེགས་བྱས་ཉིད་དུ་གྱུར། །གང་ཞིག་ཆོས་ཀྱི་འབྲེལ་པ་ནི། །འབྲེལ་པ་ཀུན་གྱིས་མཆོག་དམ་པར། །བདེན་པའི་ལྗགས་ལྡན་དེས་གསུང་ན། །འདི་ཡང་དོན་ལྡན་ཕུལ་དུ་བྱུང་། །ངེས་པའི་དོན་ལ་ཆོས་ཐམས་ཅད། །སྒྱུ་མ་ལྟར་ཡང་རྒྱལ་བས་གསུངས། །དེ་བཞིན་གང་ལ་ཡང་ཆེ་ཆེར་པོ། །ཞེན་མེད་བློ་བདེ་རྙེད་པ་འདི། །བཅིངས་གྲོལ་ལས་འདས་སེམས་ཀྱི་གཤིས། །དཔལ་ལྡན་རྩ་བའི་བླ་མའི་མཐུ། །ཆ་ཤས་རྟོགས་པས་བློ་བདེའི་གདེང་། །ཇི་བཞིན་བརྙེས་པའི་རྣལ་འབྱོར་ལགས། །འོན་ཀྱང་རྒྱུ་འབྲས་རྟེན་འབྲེལ་ཆོས། །ཁྱད་དུ་མི་གསོད་དང་བླང་བ། །དེ་ཡང་གཉིས་མེད་གཟིགས་པས་གསུངས། །དེས་ན་ཚིགས་བཅད་གཅིག་ཉན་པའི། །ཡུལ་ཡང་འཕགས་པར་མོས་བྱས་ཏེ། །རྣམ་ཀུན་བསྙེན་པའི་གནས་གསུང་ན། །བདག་ཀྱང་ཚེ་རབས་ཐམས་ཅད་དུ། །རྩ་བའི་བླ་མ་མཉེས་གྱུར་ན། །བསྐལ་པ་རྒྱ་མཚོར་མནར་མེད་མེས། །གདུང་ཡང་བཟོད་པས་ལེན་ནུས་ཤོག །ཡན་ལག་བླ་མ་མཆོག་དང་དམན། །ཐ་ན་ཚིགས་བཅད་རྐང་པ་གཅིག །ཞུས་པར་གྱུར་པ་དེ་དག་ཀུན། །དགྱེས་པའི་ལས་ལ་སྒོ་གསུམ་གྱི། །སྡིག་མེད་དགེ་སྤྱོད་ཁྱད་པར་དུ། །ཤེས་རབ་མཆོག་གི་དགྱེས་བྱེད་ཤོག །དེ་སྐད་ཚིགས་སུ་བཅད་པ་ཡིས། །ཞུ་ཡིག་འདི་ནི་རྒྱལ་ཁམས་པ། །རང་གཞན་གྲུབ་མཐའ་རྒྱ་མཚོའི་གནས། །ལེགས་སྨྲ་སྤོབས་པ་ཅན་དེའི་ཕུལ། །སརྦ་མངྒ་ལཾ།