ཉེར་གཅིག་པ་དགག་སྒྲུབ་ཀྱི་རྣམ་བཞག་བཤད་པ།
ཉེར་གཅིག་པ་དགག་སྒྲུབ་ཀྱི་རྣམ་བཞག་བཤད་པ་ལ།
དགག་བཞག་གཉིས་ལས། དང་པོ་དངོས་པོ་ཡིན་ན་སྒྲུབ་པ་ཡིན་པས་ཁྱབ་ཟེར་ན། བུམ་པ་མ་ཡིན་པ་ལས་ལོག་པའི་བུམ་པ་ཆོས་ཅན། སྒྲུབ་པ་ཡིན་པར་ཐལ། དངོས་པོ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དངོས་པོ་ཡིན་པར་ཐལ།གཟུགས་ཡིན་པའི་ཕྱིར། དེར་ཐལ། བུམ་པ་ཡིན་པའི་ཕྱིར། རྩ་བར་འདོད་ན། བུམ་པ་མ་ཡིན་པ་ལས་ལོག་པའི་བུམ་པ་ཆོས་ཅན། སྒྲུབ་པ་མ་ཡིན་པར་ཐལ། དགག་པ་ཡིན་པའི་ཕྱིར། དེར་ཐལ། རང་དངོས་དུ་རྟོགས་པའི་བློས་དགག་བྱ་དངོས་སུ་བཅད་ནས་རྟོགས་པར་བྱ་བའི་ཆོས་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། རང་དངོས་སུ་རྟོགས་པའི་བློས་དགག་བྱ་དངོས་སུ་བཅད་ནས་རྟོགས་པར་བྱ་བའི་ཆོས་དེ་དགག་པའི་མཚན་ཉིད་ཡིན་པའི་ཕྱིར། ཁ་ཅིག་ན་རེ། རང་གི་དངོས་མིང་གི་མཐར་མེད་ཚིག་སྦྱར་བའི་ཆོས་ཡིན་ན་མེད་དགག་ཡིན་པས་ཁྱབ་ཟེར་ན། སངས་རྒྱས་ཚེ་དཔག་མེད་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། སངས་རྒྱས་ཚེ་དཔག་མེད་ཅེས་བརྗོད་པའི་སྒྲ་ཁྱོད་ཀྱི་དངོས་མིང་ཡིན་པ་གང་ཞིག དེའི་མཐར་མེད་ཚིག་སྦྱར་བ་མངོན་སུམ་གྱིས་གྲུབ་པའི་ཕྱིར། རྩ་བར་འདོད་ན། སངས་རྒྱས་ཚེ་དཔག་མེད་ཆོས་ཅན། མེད་དགག་མ་ཡིན་པར་ཐལ། དངོས་པོ་ཡིན་པའི་ཕྱིར། དེར་ཐལ། གང་ཟག་ཡིན་པའི་ཕྱིར། སྔ་མ་ལ་ཁྱབ་པ་ཡོད་པར་ཐལ། མེད་དགག་ཡིན་ན་དངོས་མེད་ཡིན་པས་ཁྱབ་པའི་ཕྱིར། ཁ་ཅིག་ན་རེ། དགག་པ་ཡིན་ན་རང་གི་དངོས་མིང་ལ་དགག་ཚིག་སྦྱར་བའི་ཆོས་ཡིན་པས་ཁྱབ་ཟེར་ན། ནམ་མཁའ་ཆོས་ཅན། རང་གི་དངོས་མིང་ལ་དགག་ཚིག་སྦྱར་བའི་ཆོས་ཡིན་པར་ཐལ། དགག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། ནམ་མཁའ་ཆོས་ཅན། དགག་པ་ཡིན་པར་ཐལ། མེད་དགག་ཡིན་པའི་ཕྱིར། དེར་ཐལ། འདུས་མ་བྱས་པའི་ནམ་མཁའ་ཡིན་པའི་ཕྱིར། ཁ་ཅིག་ན་རེ། གཟུགས་ཆོས་ཅན། དགག་པ་ཡིན་པར་ཐལ། རང་དངོས་སུ་རྟོགས་པའི་བློས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་ཡིན་པའི་ཕྱིར། མ་གྲུབ་ན། གཟུགས་ཆོས་ཅན། དེར་ཐལ། རང་དངོས་སུ་རྟོགས་པའི་རྟོག་པ་དེས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་ཡིན་པའི་ཕྱིར། མ་གྲུབ་ན། གཟུགས་ཆོས་ཅན། དེར་ཐལ། རང་འཛིན་པའི་རྟོག་པས་རང་མ་ཡིན་པ་རྣམ་པར་བཅད་ནས་རྟོགས་དགོས་པའི་ཆོས་ཡིན་པའི་ཕྱིར་ན་མ་ཁྱབ། མ་གྲུབ་ན། གཟུགས་ཆོས་ཅན། ཁྱོད་འཛིན་རྟོག་པས་ཁྱོད་མ་ཡིན་པ་རྣམ་པར་བཅད་ནས་རྟོགས་དགོས་པའི་ཆོས་ཡིན་པར་ཐལ། གཞི་གྲུབ་པའི་ཕྱིར། ཁ་ཅིག་ན་རེ། མ་ཡིན་དགག་ཡིན་ན་རང་ཞེས་བརྗོད་པའི་སྒྲས་རང་གི་དགག་བྱ་བཀག་ཤུལ་དུ་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པའི་ཆོས་ཡིན་པས་ཁྱབ་ཟེར་ན། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཆོས་ཅན། མ་ཡིན་དགག་ཡིན་པར་ཐལ། རང་ཞེས་བརྗོད་པའི་སྒྲས་དགག་བྱ་ཚིག་ཟིན་ལ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་པའི་ཕྱིར། དེར་ཐལ། རང་ཞེས་བརྗོད་པའི་སྒྲས་ཉིན་པར་ཟས་ཟ་བ་དངོས་སུ་བཀག་ནས་མཚན་མོ་ཟ་བ་ཤུགས་ལ་འཕངས་པ་གང་ཞིག མཚན་མོ་ཟ་བ་སྒྲུབ་པ་ཡིན་པའི་ཕྱིར། རྩ་བར་འདོད་མི་ནུས་ཏེ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཞེས་པའི་སྒྲ་འདིས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་མི་འཕེན་ཀྱང་ཤུགས་ལ་འཕེན་པར་བྱེད་པ་དེ་ཡིན་པའི་ཕྱིར། དེར་ཐལ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཞེས་པའི་སྒྲ་འདིས་ཉིན་པར་ཟས་ཟ་བ་བཀག་ནས་མཚན་མོ་ཟ་བ་ཤུགས་ལ་འཕེན་པ་ཡིན་པའི་ཕྱིར། བྱས་པ་ལ་ཁོ་ན་རེ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཞེས་པའི་སྒྲ་འདིས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་ཤུགས་ལ་འཕེན་པར་བྱེད་པ་དེ་མ་ཡིན་པར་ཐལ། བྲམ་ཟེ་ཆང་མི་འཐུང་བ་ཞེས་པའི་སྒྲ་འདིས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་ཤུགས་ལ་འཕེན་པར་བྱེད་པ་མ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། བྲམ་ཟེ་ཆང་མི་འཐུང་བ་ཞེས་པའི་སྒྲ་འདིསབྲམ་ཟེ་ཆང་འཐུང་བ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་མ་ཡིན་པའི་ཕྱིར། དེར་ཐལ། བྲམ་ཟེ་ཆང་མི་འཐུང་བ་མེད་དགག་ཏུ་འཇོག་དགོས་པ་ཡིན་པའི་ཕྱིར། རྟོག་གེ་འབར་བ་ལས། མེད་པར་དགག་པ་ནི་དངོས་པོའི་ངོ་བོ་ཉིད་ཙམ་ཞིག་འགོག་པར་ཟད་ཀྱི་དེ་དང་འདྲ་བ་དེ་མ་ཡིན་པ་གཞན་གྱི་དངོས་པོ་བསྒྲུབ་པར་མི་བྱེད་པ་སྟེ། དཔེར་ན་བྲམ་ཟེ་ཆང་བཏུང་བར་མི་བྱའོ་ཞེས་བྱ་བ་དེ་ཙམ་ཞིག་འགོག་པར་ཟད་ཀྱི་དེ་ལས་གཞན་པའི་བཏུང་བ་བཏུང་ངོ་ཞེའམ་མི་བཏུང་ངོ་ཞེས་མ་བརྗོད་པ་ལྟ་བུའོ། །ཞེས་གསུངས་སོ། །ཁ་ཅིག་ན་རེ། རང་བརྗོད་པའི་སྒྲས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་ན་རང་ཉིད་དགག་པ་ཡིན་པས་ཁྱབ་ཟེར་ན། བྱས་པ་ཆོས་ཅན། རང་ཉིད་དགག་པ་ཡིན་པར་ཐལ། རང་བརྗོད་པའི་སྒྲས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། བྱས་པ་ཆོས་ཅན། ཁྱོད་ཅེས་བརྗོད་པའི་སྒྲས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་པར་ཐལ། ཁྱོད་ཅེས་བརྗོད་པའི་སྒྲས་ཁྱོད་ཀྱི་རྒྱུ་རྐྱེན་འཕེན་པར་བྱེད་པ་ཡིན་པའི་ཕྱིར། རྩ་བར་འདོད་ན། བྱས་པ་ཆོས་ཅན། དགག་པ་མ་ཡིན་པར་ཐལ། སྒྲུབ་པ་ཡིན་པའི་ཕྱིར། མ་གྲུབ་ན། བྱས་པ་སྒྲུབ་པ་ཡིན་པར་ཐལ། དངོས་པོ་སྒྲུབ་པ་ཡིན་པ་གང་ཞིག དེ་གཉིས་འདྲ་བའི་ཕྱིར། ཁ་ཅིག་ན་རེ། བྱས་པ་ཆོས་ཅན། སྒྲུབ་པ་མ་ཡིན་པར་ཐལ། དགག་པ་ཡིན་པའི་ཕྱིར། མ་གྲུབ་ན། བྱས་པ་དགག་པ་ཡིན་པར་ཐལ། སྒྲ་བྱས་པ་དགག་པ་ཡིན་པའི་ཕྱིར། མ་གྲུབ་ན། དེར་ཐལ། སྒྲ་བྱས་པ་ཡིན་ནོ། །ཞེས་པའི་སྒྲ་འདིས་སྒྲ་བྱས་པ་མ་ཡིན་པ་རྣམ་པར་བཅད་ནས་བརྗོད་དགོས་པའི་ཆོས་ཡིན་དགོས་པའི་ཕྱིར་ཟེར་ན་མ་ཁྱབ། འོ་ན་ཁྱོད་རང་ལ་གཟུགས་དགག་པ་ཡིན་པར་ཐལ། གཟུགས་ཞེས་བརྗོད་པའི་སྒྲས་གཟུགས་མ་ཡིན་པ་རྣམ་པར་བཅད་ནས་བརྗོད་དགོས་པའི་ཆོས་ཡིན་པའི་ཕྱིར། འདོད་ན། སྒྲུབ་པ་མེད་པར་ཐལ། གཟུགས་སྒྲུབ་པ་མ་ཡིན་པའི་ཕྱིར། འདོད་མི་ནུས། ཁ་ཅིག་གཟུགས་དེ་གཟུགས་ཞེས་བརྗོད་པའི་སྒྲས་གཟུགས་མ་ཡིན་པ་རྣམ་པར་བཅད་ནས་བརྗོད་དགོས་པའི་ཆོས་མིན་ཟེར་ན། དེ་ཡིན་པར་ཐལ། གཟུགས་དེ་གཟུགས་ཞེས་བརྗོད་པའི་སྒྲ་འདིས་གཟུགས་མ་ཡིན་པ་རྣམ་པར་བསལ་ནས་བརྗོད་དགོས་པའི་ཆོས་ཡིན་པའི་ཕྱིར། དེར་ཐལ། གཟུགས་ཞེས་བརྗོད་པའི་སྒྲ་གཟུགས་ལ་སེལ་འཇུག་ཡིན་པའི་ཕྱིར། ཁྱབ་སྟེ། སེལ་འཇུག་ཅེས་པའི་སེལ་བའི་དོན་ནི་ཆོས་དེ་མ་ཡིན་པ་རྣམ་པར་སེལ་བ་ལ་ལྟོས་དགོས་པ་ཡིན་པའི་ཕྱིར། ཁ་ཅིག་ཤེས་རབ་སྒྲོན་མེ་ལས། མ་ཡིན་དགག་དེར་སྒྲུབ་པར་མི་བྱ་སྟེ། དེ་ནི་དངོས་པོ་སྒྲུབ་པ་ཤས་ཆེ་བའི་ཕྱིར། ཞེས་པའི་དོན་དུ་བསམས་ནས་མ་ཡིན་དགག་དགག་པ་མིན་ཟེར་ན། དེ་མི་འཐད་པར་ཐལ། མ་ཡིན་དགག་དགག་པ་ཡིན་པའི་ཕྱིར། མ་གྲུབ་ན། མ་ཡིན་དགག་ཆོས་ཅན། དགག་པ་ཡིན་པར་ཐལ། དགག་པའི་དབྱེ་བ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། ཞི་མཚོའི་ཚད་ཆེན་ལས། འདི་ནི་སེལ་བ་རྣམ་གཉིས་ཏེ། །མ་ཡིན་དགག་དང་མེད་པའོ། །ཞེས་དང༌། ལྡོག་པ་བསྡུས་པ་ལས། དགག་པའི་རྣམ་གྲངས་ཇི་སྙེད་པ། །མེད་དང་མ་ཡིན་གཉིས་སུ་འདུས། །ཞེས་གསུངས་པའི་ཕྱིར།