གསུམ་པ་སངས་རྒྱས་འཚོ་སྐྱོང་བ་དེར་སྐྱེས་པའི་རྒྱལ་སྲས།
གསུམ་པ་སངས་རྒྱས་འཚོ་སྐྱོང་བ་དེར་སྐྱེས་པའི་རྒྱལ་སྲས་ནི།
ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་དང་པོ་ནས། བཞི་པ་ལའང་སྙོམས་པར་འཇུག བྱམས་པ་ལའང་སྙོམས་པར་འཇུག སྙིང་རྗེ་དང༌། དགའ་བ་དང༌། བཏང་སྙོམས་ལའང་སྙོམས་པར་འཇུག ནམ་མཁའ་མཐའ་ཡས་སྐྱེ་མཆེད་ལའང་སྙོམས་པར་འཇུག རྣམ་ཤེས་མཐའ་ཡས་སྐྱེ་མཆེད་དང༌། ཅུང་ཟད་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལའང་སྙོམས་པར་འཇུག དྲན་པ་ཉེ་བར་བཞག་པ་བཞི་ལའང་སྙོམས་པར་འཇུག ཡང་དག་པར་སྤོང་པ་བཞི་དང༌། རྫུ་འཕྲུལ་གྱི་རྐང་བ་བཞི་དང༌། དབང་པོ་ལྔ་དང༌། སྟོབས་ལྔ་དང༌། བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱད་པ་ལའང་སྙོམས་པར་འཇུག སྙིང་རྗེ་ཆེན་པོ་ལའང་སྙོམས་པར་འཇུག་སྟེ། སྙིང་རྗེ་ཆེན་པོ་དང་ལྡན་པ་དེ་དག་ཐབས་མཁས་པས་བསམ་གཏན་གྱི་དབང་གིས་མི་སྐྱེ། ཚངས་པའི་རྣམ་པར་སྤྱོད་པའི་དབང་གིས་མི་སྐྱེ། གཟུགས་མེད་པའི་སྙོམས་པར་འཇུག་པའི་དབང་གིས་མི་སྐྱེ་སྟེ། སངས་རྒྱས་བཅོམ་ལྡན་འདས་རྣམས་གང་ན་བཞུགས་ཤིང་འཚོ་སྐྱོང་བ་དེ་དང་དེ་དག་ཏུ་སྐྱེ་བར་འགྱུར་བ་ཡོད་དོ། །དེ་དག་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་དང་མ་བྲལ་བས། བསྐལ་པ་བཟང་པོ་འདི་ཉིད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །ཞེས་གསུངས་སོ། །མདོ་འདི་ཉ་ཊཱིཀ་ལས་ཆགས་བྲལ་སྔོན་སོང་གི་འབྲས་བུ་བར་བ་གཉིས་ཀྱི་དབང་རྣོན་ལ་སྦྱར་ནས་བཤད་དོ། །