ལྔ་པ་རྣམ་པ་ཅི་ཞིག་ཏུ་གནས་ན་མཁན་པོ།

ལྔ་པ་རྣམ་པ་ཅི་ཞིག་ཏུ་གནས་ན་མཁན་པོ་ཉིད་དུ་གནས།

ཞེས་སོ། །དྲུག་པ་དང་བདུན་པ་གནས་པའི་ཕན་ཡོན་དང༌། མི་གནས་པའི་ཉེས་དམིགས་ནི། མཁན་པོ་དང་ལྡན་པའི་སྡོམ་པ་སྐྱེ་བ་དང་མི་སྐྱེ་བ་སྟེ། གནས་པ་ལའོ་ཞེས་པའི་ཊཱི་ཀ་ལས། མཁན་པོ་ཉིད་དུ་གནས་པ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དག་ཡོད་ཀྱི་མི་གནས་པ་ལ་མེད་དོ། །ཞེས་དང༌། དེའི་རབ་ཏུ་འབྱུང་བ་དང་བསྙེན་པར་རྫོགས་པ་དག་ནི་གཞན་ལ་རག་ལས་པའི་ཕྱིར་དང༌། མཁན་པོ་དང་འབྲེལ་བའི་ཕྱིར། ཞེས་གསུངས་སོ། །འོ་ན་ཞུ་བའི་སྐབས་ལས་མཁན་པོ་མེད་ཀྱང་སྡོམ་པ་སྐྱེ་བར་བཤད་པ་དང་འགལ་ཞེ་ན། འགལ་སྤོང་ཞིབ་པར་འོག་ཏུ་འཆད་དོ། །