བླང་བྱའི་བླ་མའི་མཚན་ཉིད།
གཉིས་པ་བླང་བྱའི་མཚན་ཉིད་ནི། ཨ་ཏི་བཀོད་པ་ཆེན་པོ་ལས། མཁས་ཤིང་བྱ་བ་བྲལ་བ་དང་། །ཆོས་ཉིད་དོན་ལྡན་ཚད་ཕེབས་དང་། །འདོད་པའི་དོན་ལ་རྨོངས་པ་མེད། །གསང་སྔགས་བླ་མའི་མཚན་ཉིད་དོ། ཞེས་ཐེག་པ་སྤྱི་དང་ཁྱད་པར་རྡོ་རྗེའི་ཐེག་པ་ལ་མཁས་ཤིང་། བདག་འཛིན་དང་འདོད་ཞེན་ཆུང་བས་བྱ་བ་བཏང་ཞིང་དབེན་པ་ལ་དགྱེས་པ། ཆོས་ཉིད་ཀྱི་དོན་སྟོན་པ་ལ་མཁས་པ། བསྐྱེད་རྫོགས་ཉམས་ལེན་ལ་དྲོད་རྟགས་ཐོན་ཞིང་འདི་བར་ཕྱི་གསུམ་གང་རུང་ལ་གྲོལ་བའི་ཚད་དང་ལྡན་པ། གདུལ་བྱ་རང་ར ང་གི་གང་འདོད་ཀྱི་ཆོས་སྟོན་པ་ལ་མཁྱེན་བརྩེ་རླབས་ཆེ་ཞིང་སྐྱོ་དུབ་མེད་པ། ཡོན་ཏན་ཕུལ་དུ ་བྱུང་ཡང་ང་རྒྱལ་དང་རློམ་སེམས་མེད་པ་སྟེ། ཡོན་ཏན་གྱི་མཚན་ཉིད་དེ་རྣམས་དང་ལྡན་ན་རིགས་དང་ཆ་བྱད་དམན་ཡང་ཡང་དག་པའི་ལམ་གྱི་དེད་དཔོན་ཡིན་པས་བསྟེན་དགོས་ཤིང་། དེར་བརྟེན་པས་རྡོ་རྗེ་བླ་མ་དེ་ཡིས་ཐར་བ་དང་ཐམས་ཅད་མཁྱེན་པའི་གོ་འཕང་མྱུར་དུ་ཐོབ་པར་བྱེད་ནུས་པ་ཡང་། ཀློང་གསལ་ལས། མཚན་ཉིད་ལྡན་པའི་བླ་མ་ཡིས། །དབང་བསྐུར་བས་ནི་སྡུག་བསྔལ་གྲོལ། ཞེས་གསུངས་སོ།།