རྣམ་རྫོགས་སྦྱོར་བ་མཚོན་བྱེད་ཀྱི་ཆོས་བཅུ་གཅིག་རྒྱས་པར་བཤད་པ།
རྣམ་རྫོགས་སྦྱོར་བ་མཚོན་བྱེད་ཀྱི་ཆོས་བཅུ་གཅིག་རྒྱས་པར་བཤད་པ། རྣམ་དཔྱོད་དབྱར་སྐྱེས་གཞོན་ནུའི་ལང་ཚོ་འགྲོ་ལ་ངོམས་པའི་སྒྱུ་འཕྲུལ་གྱིས། །མཐོན་མཐིང་ཟུར་ཕུད་ལོ་འདབ་བསྐྱོད་ལས་ཅུང་ཟད་གཡོན་དུ་ལེགས་འཕྱང་ཞིང་། །མཚན་དཔེའི་རང་སྣང་མཚམས་སྤྲིན་མཛེས་མས་མི་ཕྱེད་ཕྱག་རྒྱས་དམ་འཁྱུད་ལ། འཇམ་དབྱངས་རང་གཟུགས་མི་ཡི་གར་མཁན་ཡོངས་འཛིན་མཁས་པའི་དབང་པོ་རྒྱལ། །འདི་ན་འབྲུག་གི་སྒྲ་དབྱངས་ཀྱིས། །གདོངས་མཐའི་མངལ་ནི་འཛིན་བྱེད་ན། །རྣམ་རྫོགས་སྦྱོར་བའི་ཚུལ་ལུགས་ཀྱིས། །སྐལ་བཟང་ངལ་སོ་ཅིས་མི་བྱེད། །ཚུལ་འཆོས་བཟང་རྫུའི་སུམ་བརྩེགས་གྲོང་། །རིགས་པའི་ཉག་ཕྲན་གྱིས་འཇོམས་པའི། །རིགས་གཞུང་སྨྲ་བའི་མགྲིན་སྔོན་ཅན། །ལྗོངས་འདིར་ཁོ་བོའི་བླ་མ་ཙམ། །མང་དུ་ཐོས་པའི་རྣ་བའི་ཁུང་། །རྨོངས་པའི་འདམ་གྱིས་ཆེར་འགགས་ཀྱང་། །གཞན་སྣང་བཅོས་མའི་གཟུགས་བརྙན་གྱིས། །སྒྲ་འཛིན་ཅན་གྱི་གྲལ་ཕྱིར་སྙེགས། །རྒྱལ་བའི་དབང་པོ་ཙོང་ཁ་པའི། །བཞེད་གཞུང་རྣམ་བཤད་སྙིང་པོའི་དོན། །དམ་པའི་ལམ་སྲོལ་ཇི་བཞིན་དུ། །བཞི་པའི་ཚིག་དོན་ཕྱེ་ཡིས་ཉོན། །