དང་པོ། རྟེན་རྩའི་མན་ངག
༄༅། །ཟབ་མོ་ཡང་ཏིག་ལས། ཟབ་མོ་པྲ་ཁྲིད་བཞུགས་སོ། །
༄༅། ཟབ་མོ་པྲ་ཁྲིད་ཅེས་བྱ་བ། དཔལ་བདེ་བ་ཆེན་པོ་ལ་ཕྱག་འཚལ་ལོ། །རྡོ་རྗེ་མཆོག་གསུམ་སྒྲུབ་པའི་དཀྱིལ་འཁོར་དུ། །ཡོན་ཏན་རབ་རྫོགས་སྣང་སྲིད་སངས་རྒྱས་ཤིང་། །ཡེ་ནས་ཡབ་ཡུམ་ཐབས་ཤེས་འདུ་འབྲལ་མེད། །གཉིས་མེད་བྱང་ཆུབ་སེམས་ལ་ཕྱག་འཚལ་ལོ། །རྣལ་འབྱོར་འབྲས་བུ་ཚེ་གཅིག་ངེས་པའི་ལུང་། །རྡོ་རྗེའི་ལུས་ལ་ཐབས་ལམ་སྙིང་པོར་བྱེད། །དེ་ཡི་ལག་ལེན་ཟངས་ཀྱི་ཡི་གེའི་དོན། །ཉམས་མྱོང་གནས་བསྡུས་ཟབ་མོའི་པྲ་ཁྲིད་བྱ། །
འདི་ལ་གསུམ་སྟེ། རྟེན་རྩའི་མན་ངག །བརྟེན་པ་རླུང་གི་མན་ངག །ཁམས་བདེ་བ་ཆེན་པོའི་མན་ངག་གོ། །
དང་པོ་རྩ་ཡུར་བ་དང་འདྲ་ལ། རླུང་དང་ཐིག་ལེའི་རྟེན་ཡིན་པས། སྔོན་དུ་མ་སྦྱངས་ན་རླུང་ཐིག་སྒོམ་དུ་མི་རུང་བའི་ཕྱིར། ཐོག་མར་སྦྱང་དགོས། འདི་ལ་རྩའི་གཙོ་བོ་གསུམ། འཁོར་ལོ་བཞི་ཡི་རྩ་བྲན་བསམ་གྱིས་མི་ཁྱབ་པ་ཡོད་ཀྱང་། གཏུམ་མོ་ཡེ་ཤེས་ཀྱི་མེ་དབུ་མར་དག་པས་ཐམས་ཅད་ཞར་ལ་འབྱོངས་པའི་ཕྱིར། དེའི་མན་ངག་ནི། དྲང་སྲོང་གི་འདུག་སྟངས་ཀྱིས་ཙོག་པུར་འདུག་ལ། པུས་འཁྱུད་བཅིངས་ལ་བླ་མའི་རྣལ་འབྱོར་གྱི་རྗེས་ལ། རང་ཉིད་ཕག་མོ་དམར་མོ་གཅེར་བུ་གྲི་གུག་དང་ཐོད་པ་ཁ་ཊྭཱཾ་ག་དང་རུས་པའི་རྒྱན་ཅན། སྤྱན་གསུམ་པ། བཞད་པ་ཞབས་བརྐྱང་བསྐུམ་དུ་བཞུགས་པ། ཡེ་ཤེས་ཀྱི་མེ་དཔུང་འབར་བའི་ཀློང་ན། བདེ་དྲོད་རབ་ཏུ་འབར་བར་བསྒོམས་པའི་གསང་བ་ནས་སྤྱི་གཙུག་གི་བར། རྩ་དབུ་མ་མདའ་སྨྱུག་ལྟར་དྲང་ལ། སྦུབས་མ་ཡོ་བའི་འོག་སྒོར་ཨ་ཡྃ་གཉིས་སུ་མེད་པ་ཡེ་ཤེས་ལྔའི་རླུང་འོད་ལྔའི་གོང་བུ་སྲན་མ་ཙམ། ལྟེ་བར་ཧྲི་མྃ་གཉིས་སུ་མེད་པ་མེའི་གོང་བུ་སྲན་མ་ཙམ་པ་དང་། ཡར་སྣ་སྤྱི་བོ་ནས་མར་སྣ་ལྟེ་བ་ལ་ཧཾ་བྃ་གཉིས་སུ་མེད་པ་བྱང་ཆུབ་སེམས་ཀྱི་གོང་བུ་སྲན་མ་ཙམ་བསྒོམ་སྟེ། འོག་རླུང་འཐེན། སྟེང་རླུང་མནན། ཕོ་འོག་ལྟེ་བའི་མེ་ལ་ཤེས་པ་གཏད་ལ། རླུང་དལ་བུས་ཕྱིར་སོང་། རང་སོར་དར་ཅིག་ཀློད། ནང་དུ་འཇུག་དུས་སྣ་བུག་གཡས་ནས་དབུ་མའི་བར་རོ་མ་དར་སྐུད་ལྟར་དཀར་བ་དང་། གཡོན་རྐྱང་མ་དར་སྐུད་ལྟར་དམར་བ་ནས་སྣོད་བཅུད་ཐམས་ཅད་ནམ་མཁའ་གཅིག་ཏུ་སྔོ་ཕྱམ་གྱུར་པ་དེ་ཚུར་བྱུང་ནས། འོག་སྒོའི་རླུང་གི་གོང་བུ་ལ་ཕོག །གསལ་བདེ་མི་རྟོག་པའི་ཡེ་ཤེས་སུ་གྱུར། དེའི་ངད་ཀྱིས་རླུང་ལྔའི་དྭངས་མ་དུ་བ་ལྟར་ཡར་སོང་། ལྟེ་བའི་མེ་ལ་རེག །བདེ་ལ་དྲོད་དུ་འབར་བའི་ཡེ་ཤེས་སྐྱེས། དེའི་ངང་མེའི་འོད་ཟེར་སེར་པོ་རྟ་རྔ་ཙམ་ལས་དམིགས་པ་ཇེ་བརྟན་ལ་སོང་དུས་ཇེ་སྦོམ་དུ་འབར་བས་སྤྱི་བོའི་ཧཾ་བྃ་བྱང་ཆུབ་སེམས་ཀྱི་གོང་བུ་ལ་རེག །སྟོང་པ་དེ་རང་གསལ་དག་པའི་ཡེ་ཤེས་སྐྱེས། དེའི་ངད་ཀྱིས་དྭངས་མ་བདུད་རྩིའི་ཐིགས་པའི་ཚུལ་དུ་དཀར་ལ་དམར་ཆགས་པ་ནར་ར་ར་མར་བབས་མེ་གསོས་བྱས། བདེ་དྲོད་ཆེར་འབར་དབུ་མའི་ནང་ཐམས་ཅད་ཁྱབ། ཇེ་ཆེར་འབར། སྤྱི་བོ། མགྲིན་པ། སྙིང་ག་གསང་གནས་ཁྱབ་པར་བདེ་དྲོད་ཡེ་ཤེས་ཀྱི་མེ་བཟོད་པར་དཀའ་བས་ཁྱབ། མཐར་བ་སྤུའི་ཁུང་ཐམས་ཅད་ནས་ནང་གི་བདེ་དྲོད་མེའི་འོད་ཟེར་ཕྲ་མོ་འབར་བས་ལུས་ཕྱི་ནང་དྲོད་དུ་འབར་ཞིང་། རླུང་གིས་བསིལ། མེས་དྲོས། ཁམས་ཀྱི་བདེ་བ་ཆེན་པོར་ཁྱབ་པ་ལ་མ་ཡེངས་པར་བརྩོན་པས་བསྒོམ་ཞིང་། རྒྱུ་ཞབས་འུབས་སེ། ཨ་ལོང་ཚུམ་མེ། འོག་རླུང་ཐེན་ནེ་བྱས་པས། སྟེང་རླུང་རྩོལ་མེད་ནང་དུ་བསྐྱིལ་དུས་འདོད་པ་ཡིན་ནོ། །
དེ་ལྟར་བསྒོམས་པས་དང་པོ་ཁམས་བདེ་བ་ཆེན་པོར་ཁྱབ་པ་ལ་མ་ཡེངས་པར་བརྩོན་པས་བསྒོམ་ཞིང་། དྲོད་ཁོལ་བུར་སྐྱེ། དེ་ནས་མཆེད་དེ་ཁྱབ་པར་སྐྱེའོ། །ཞག་བདུན་དྲོད་ཀྱི་རྟགས་དང་པོ་འབྱུང་སྟེ། ལུས་རྔུལ་བ་དང་། ཁ་(༡༨༨)སྐམ་པ་དང་། ཤེས་པ་བདེའོ། །དེ་ནས་གོས་ཀྱང་ཇེ་སྲབ་ལ་བྱས་པས་བཅུ་བཞི་ན་ཁྱབ་པར་སྐྱེའོ། །ཉི་ཤུ་རྩ་གཅིག་ན་བརྩོན་པ་རབ་རྣམས་གོས་རྐྱང་རེས་ཆོག་པར་འགྲོ། འབྲིང་ཟླ་བ་གཅིག་ནས་འགྲོའོ། །ཐ་མ་ཟླ་བ་གཉིས་ནས་འགྲོའོ། །དེའི་བར་ཁ་ཟས་བཅུད་ཅན་བརྟེན། ཤ་ཆང་མེད་དུ་མི་རུང་ངོ་། །དངོས་སུ་ཉམས་དགའ་བྱིན་འཐིབས། བག་དྲོ། ཤེས་པ་བདེ། གཟི་བྱིན་སྐྱེ། ཏིང་འཛིན་གསལ། རྨི་ལམ་དུ་བུད་མེད་ཀྱི་ཚོགས་འདུ། མཁའ་འགྲོས་ལུང་སྟོན། བླ་མས་ཆོས་གསུངས་པ་ལ་སོགས་པ་ངོ་མཚར་ཅན་མང་པོ་འབྱུང་ངོ་། །སྔོན་འགྲོ་རྩ་སྦྱོང་བའི་མན་ངག་བསྟན་ཟིན་ཏོ། །