རབས་བཞི་པ། འཁྲུལ་པ་ཡེ་ཤེས་སུ་དག་པ།
དེ་ནས་འཁྲུལ་པ་ཡེ་ཤེས་དག་པ་ཡང་། །གནས་སྐབས་མཐར་ཐུག་དོན་གྱི་རིམ་པ་ལས། །དང་པོ་གནས་སྐབས་ཉམས་ལེན་ལམ་གྱི་དུས། །ཟབ་མོའི་ཐབས་ཀྱིས་གོམས་པར་བྱས་པ་ལས། །ཉོན་མོངས་གང་སྐྱེ་དབྱིངས་སུ་རྣམ་པར་དག །རང་གསལ་ཡེ་ཤེས་མངོན་དུ་གྱུར་པ་ནི། །འཁྲུལ་རྟོག་ཡེ་ཤེས་དབྱིངས་སུ་དག་ཅེས་བྱ། །དེ་ཡང་ཐུན་མོང་ཁྱད་པར་བླ་མེད་ལ། །བསྟེན་པའི་ཐབས་ཀྱིས་སོ་སོར་དབྱེ་བ་ནི། །གཉེན་པོས་སྦྱངས་དང་ཐབས་ཀྱིས་བསྒྱུར་བ་དང་། །རང་སར་རྣམ་གྲོལ་མ་སྤངས་དབྱིངས་སུ་དག །གང་དག་འདོད་ལ་ཇི་ལྟར་བསླབ་ན་ཡང་། །འགག་པ་ཉོན་མོངས་དག་པའི་དོན་དུ་གཅིག །འདོད་ཆགས་ཞེ་སྡང་གཏི་མུག་ང་རྒྱལ་དང་། །ཕྲག་དོག་སྐྱེས་པའི་རང་ས་ངོས་ཟིན་དུས། །རང་བཞག་རང་གྲོལ་ཡེ་ཤེས་རྣམ་ལྔར་དག །ཀུན་རྟོག་མེ་ལོང་ཆོས་དབྱིངས་མཉམ་པ་ཉིད། །བྱ་བ་གྲུབ་པའི་ཡེ་ཤེས་ཆེན་པོ་རུ། །དུག་ལྔའི་འཁྲུལ་པ་གནས་སྐབས་དག་ཅེས་བྱ། །མཐར་ཐུག་ཁམས་ཀྱི་གློ་བུར་དྲི་བྲལ་ཏེ། །བྱང་ཆུབ་ཞི་བ་རྡུལ་བྲལ་བརྙེས་པ་(༩)ན། །དབྱིངས་ཀྱི་རང་བཞིན་ཅི་འདྲ་མངོན་དུ་གྱུར། །སྐུ་གསུམ་ཆོས་སྐུ་རོ་གཅིག་ཡེ་ཤེས་བརྙེས། །དག་པ་གཉིས་ལྡན་དབྱིངས་ཀྱི་སྐུ་ཞེས་བྱ། །རྒྱལ་བ་ཉིད་ལས་གཞན་གྱི་ཡུལ་མིན་པ། །ཆོས་དང་ལོངས་སྤྱོད་སྤྲུལ་པའི་སྐུ་གསུམ་ཉིད། །ཡེ་ཤེས་དང་བཅས་ངོ་བོ་ཉིད་སྐུས་བསྡུས། །རྟག་ཁྱབ་འདུས་མ་བྱས་ཤིང་འཕོ་འགྱུར་མེད། །ཡིད་བཞིན་ནོར་བུ་ཆོས་སྐུའི་དབྱིངས་ན་བཞུགས། །དེ་ཉིད་ངང་ལས་ཡེ་ཤེས་ཕྲིན་ལས་སྐུ། །ལོངས་སྤྱོད་རྫོགས་དང་སྤྲུལ་སྐུའི་རོལ་པ་ནི། །སར་གནས་རྣམས་དང་འགྲོ་གཞན་སྣང་བ་ཡང་། །རྒྱལ་བའི་བྱིན་རླབས་གདུལ་བྱའི་བསོད་ནམས་མཐུ། །ཚོགས་དོན་དག་ལས་དེ་ལྟར་སྣང་བ་ལས། །སྲིད་པ་ཇི་སྲིད་ཕྲིན་ལས་རྒྱུན་མི་འཆད། །ནོར་བུ་དཔག་བསམ་ལྗོན་ཤིང་རེ་བ་སྐོང་། །འདི་ནི་འཁྲུལ་པ་ཡེ་ཤེས་དག་ཅེས་བྱ། །དེ་ལྟར་དོན་ཟབ་སྙིང་པོའི་རྟ་བདུན་གྱིས། །ཡིད་མཁའི་ལམ་ནས་གདུལ་བྱའི་འཇིག་རྟེན་དུ། །ཚིག་དོན་རྣམ་བཀྲའི་འོད་སྟོང་འཕྲོ་བ་ཡིས། །འགྲོ་ཀུན་མ་རིག་མུན་པ་སངས་པར་ཤོག །ཆོས་བཞི་རིན་པོ་ཆེའི་ཕྲེང་བ་ལས། འཁྲུལ་པ་ཡེ་ཤེས་སུ་དག་པའི་རབས་ཏེ་བཞི་པའོ།། །།
ཚུལ་འདི་བློ་གྲོས་ཡངས་པའི་ཁང་བཟང་ནས། །ཐོས་བསམ་སྒོམ་པའི་འབྱོར་པས་རབ་བརྒྱན་པ། །རང་གཞན་དོན་གཉིས་དགའ་སྟོན་འགྱེད་པ་དེས། །མདོ་རྒྱུད་མན་ངག་སྙིང་པོའི་དོན་བཞིན་བཀོད། །དགེ་བ་འདི་ཡིས་བདག་དང་འགྲོ་བ་ཀུན། །ཚེ་འདིར་སྲིད་པའི་རི་བོ་ཕྱིར་བསྙིལ་ནས། །བྱང་ཆུབ་ཞི་བ་རྡུལ་བྲལ་མཆོག་ཐོབ་སྟེ། །རང་གཞན་དོན་གཉིས་རྫོགས་པའི་སངས་རྒྱས་ཤོག །དོན་གསལ་གངས་རི་རྒྱ་ཆེར་མཛེས་པའི་གནས། །རབ་དཀར་ཡོན་ཏན་ཕྱོགས་ཀྱི་ཐ་གྲུར་ཁྱབ། །གསུང་རབ་རིན་ཆེན་སྙིང་པོའི་གནས་འཚེར་བས། །དད་ལྡན་སྐྱེ་བོའི་ཚོགས་རྣམས་དགའ་བར་མཛོད། །ཆོས་བཞི་རིན་པོ་ཆེའི་ཕྲེང་བ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀུན་མཁྱེན་ངག་གི་དབང་པོས་གངས་རི་ཐོད་དཀར་གྱི་མགུལ། མེ་ཏོག་སྤྲིན་གྱི་སྐྱེད་མོས་ཚལ་གྱི་ནང་། ཀུན་ཏུ་བཟང་པོའི་ཁང་བཟང་ཟླ་བ་ཆུ་ཤེལ་གྱིས་འཚེར་བར་སྦྱར་བ་སྟེ་རེ་ཞིག་རྫོགས་སོ། །ཕྱོགས་དུས་ཀུན་ཏུ་བདེ་ཆེན་གྱི་ཆར་བསྐལ་པ་རྫོགས་ལྡན་གྱི་དུས་བཞིན་དུ་འབབ་པས་བསམ་རྒུའི་རེ་བ་ཐམས་ཅད་འགྲུབ་པར་གྱུར་ཅིག། །།