གཉིས་པ་ཡན་ལག་གི་དམ་ཚིག་གསུམ།
གཉིས་པ་ཡན་ལག་གི་དམ་ཚིག་གསུམ་ལས།
སྤོང་བའི་དམ་ཚིག་ནི། རྩ་བ་བཞི་ཆང་དང་བཅས་སྤོང་བ་དང་སེམས་ཅན་འདུལ་བའི་ཕྱིར་མ་གཏོགས་བྱ་བ་མ་ཡིན་པ་ཐམས་ཅད་སྤངས་པ་ལ་བརྩོན་པར་བྱ་བའོ། །གཉིས་པ་བསྟེན་པའི་དམ་ཚིག་ནི། བླ་མ་དམ་པ་ལ་བསྟེན་ཞིང༌། རྣལ་འབྱོར་བ་རྣམས་ལ་བསྙེན་བཀུར་བྱ་བ། དགེ་བའི་ལས་ལམ་བཅུ་ནུས་པ་ཅི་ཡོད་ཀྱིས་སྐྱོང་ཞིང་སྤེལ་བར་བྱེད་པའོ། །གསུམ་པ་སྤོང་བའི་དམ་ཚིག་གཞན་བསྟན་པ་ནི། ཐེག་དམན་གྱི་ལམ་གྱིས་བགྲོད་འདོད་མི་བྱ་ཞིང༌། དེའི་འབྲས་བུ་ཉན་རང་གི་མྱང་འདས་ལ་སྨོན་ཅིང་ཆགས་པར་མི་བྱ་ལ། སེམས་ཅན་གྱི་དོན་ལ་རྒྱབ་ཀྱིས་མི་ཕྱོགས་པར་འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་བྱེད་པའི་གོ་ཆ་གྱོན་པ། ལྷ་དང་ལྷ་མིན་གསང་བ་སྟེ་གནོད་སྦྱིན་བཅས་ལ་བརྙས་པར་མི་བྱ་ཞིང༌། ལྷའི་གཟུགས་བྲིས་པའི་ཕྱག་རྒྱ་དང༌། ལྷའི་བཞོན་པའི་གཟུགས་བྲིས་པའམ་དངོས་དང་བླ་མའི་བཞོན་པ་མཚོན་ཆ་ལྷའི་ཕྱག་མཚན་རལ་གྲི་སོགས་དང༌། མཚན་མ་ལྷའི་ཕྱག་མཚན་འཁོར་ལོ་རྡོ་རྗེ་སོགས་འགོམ་པ་དང༌། དེ་འདྲའི་གཟུགས་བྱས་ཏེ་བཟའ་བར་མི་བྱ་ལ། དམན་མ་ལྷ་ལ་ཕུལ་བའི་མཆོད་རྫས་རྙིང་བ་རྣམས་རྐང་བས་བརྫི་བ་དང༌། ཡོ་བྱད་གཞན་དེའི་སྟེང་དུ་བཞག་པ། ལྷ་དང་བླ་མ་མཆོད་རྟེན་སོགས་ཀྱི་གྲིབ་མ་འགོམ་པར་མི་བྱ་ལ། གལ་སྲིད་འགོམ་དགོས་པ་བྱུང་ན། ཨོཾ་བཛྲ་བེ་གཱ་ཀྲ་མ་ཧཱུཾ། ཞེས་བརྗོད་ཅིང་རང་ཉིད་དེ་དག་གི་འོག་ནས་འཇུག་པའི་མོས་པ་བྱ། དེ་ལྟར་རིགས་ལྔ་སྤྱི་དང་སོ་སོའི་དམ་ཚིག་རྣམས་དུས་དྲུག་ཏུ་བསྔོ་བགྲང་བྱས་ཏེ་བསྲུང་བར་བྱའོ། །