གཉིས་པ་ཁྱད་པར་གྱི་ཆོས་བཞི་བཤད་པ།
གཉིས་པ་ཁྱད་པར་གྱི་ཆོས་བཞི་བཤད་པ་ནི།
རྩ་བར། བར་ཆད་དྲིས་ནས་ཡོངས་སུ་དག་པ་ལ་སྐབས་དབྱེའོ། །ཞེས་ཁྱད་པར་གྱི་གཞིར་བྱས་ཏེ། ཁྱད་པར་གྱི་ཆོས་ལ་བཞི་ལས།དང་པོ་རྟེན་གང་གིས་སྐབས་དབྱེ་བ་ནི་དང་པོའི་མཁན་པོ་ཉིད་ཀྱིས་སྐབས་དབྱེའོ། །དང་པོའི་མཁན་པོ་ནི་དགེ་ཚུལ་གྱི་མཁན་པོ་ཡིན་ཏེ། ཊཱི་ཀ་ལས། དགེ་ཚུལ་གྱི་མཁན་པོ་ཉིད་ནི་གཞན་གྱི་མཁན་པོ་ཉིད་པས་དང་པོ་ཡིན་པའི་ཕྱིར། ཞེས་གསུངས་སོ། །དེའི་ཚེ་ན་མཁན་པོར་གྱུར་མ་ཟིན་ཡང་དང་པོའི་མཁན་པོ་ཞེས་བརྗོད་པ་འགལ་ཞེ་ན། རྒྱུ་ལ་འབྲས་བུའི་མིང་གིས་བཏགས་པ་སྟེ། མཁན་པོ་བྱེད་པར་འགྱུར་བ་ལ་མཁན་པོ་ཞེས་བརྗོད་པའོ། །གཉིས་པ་བྱ་བ་ཅི་ཞིག་བསྒྲུབས་ནས་སྐབས་དབྱེ་བ་ནི་བར་ཆད་དྲིས་ནས་སྐབས་དབྱེའོ། ། གསུམ་པ་ཡུལ་གང་ལ་སྐབས་དབྱེ་བ་ནི་ཡོངས་སུ་དག་པ་ལ་སྐབས་དབྱེའོ། །ཡོངས་སུ་མ་དག་ན་སྐབས་མི་དབྱེའོ་ཞེས་ཤུགས་ཀྱིས་བསྟན་ཏེ་བར་ཆད་དང་ལྡན་ནོ་ཟེར་ན་ལུང་གཞི་ལས། འོ་ན་སོང་ཞིག་ཅེས་བརྗོད་པར་བྱའོ། །ཞེས་གསུངས་སོ། ། བཞི་པ་ཚུལ་ཇི་ལྟར་སྐབས་དབྱེ་བ་ནི། ཁོ་བོས་ཁྱོད་རབ་ཏུ་དབྱུང་བར་བྱའོ་ཞེས་སྐབས་དབྱེའོ། །ལེན་པ་པོ་ཡོངས་སུ་དག་ན་ཡང་བདག་ཉིད་ལ་འཁོར་སྐྱོང་བའི་ནུས་པ་མེད་ན་ནི་སྐབས་མི་དབྱེ་སྟེ། སྤྲུལ་པའི་གླེང་གཞི་ལས། དེ་ཡང་མཁན་པོ་དགོན་པ་བ་དེས་གདམས་ངག་དང་རྗེས་སུ་བསྟན་པ་བྱེད་པ་མི་འོང་ནས་སྨྲས་པ་རབ་ཏུ་བྱུང་ཞིང་བསྙེན་པར་རྫོགས་པར་བྱས་ནས་ཡལ་བར་བོར་བ་ནི་མི་རུང་བས་འདི་ཡང་དམྱལ་བར་འགྲོ་བར་འགྱུར་ལ། ཁོ་བོ་ཡང་ལྟུང་བ་དང་བཅས་པར་འགྱུར་བས་ཁོ་བོས་འདི་རབ་ཏུ་མི་འབྱིན་ཏོ། །ཞེས་གསུངས་སོ། །ཡོངས་སུ་དག་པ་དང་འཁོར་སྐྱོང་བའི་ནུས་པ་ཡོད་པ་སྟེ། དེ་གཉིས་ཚོགས་ན་ནི་སྐབས་དབྱེའོ། །