གཤིན་རྗེ་ཁྲོ་ཆུ་དུག་གདོང་གི་སྒོ་ནས་བཟློག་པའི་མན་ངག་ཀུན་གྱི་ཟིན་བྲིས་ཤིན་ཏུ་གསལ་བར་བཀོད་པ།
གཤིན་རྗེ་ཁྲོ་ཆུ་དུག་གདོང་གི་སྒོ་ནས་བཟློག་པའི་མན་ངག་ཀུན་གྱི་ཟིན་བྲིས་ཤིན་ཏུ་གསལ་བར་བཀོད་པ་བཞུགས་སོ༔
འཇམ་དཔལ་གནམ་ལྕགས་འབར་བ་ལ་ཕྱག་འཚལ་ལོ༔ འདིའི་སྒོ་ནས་བཟློག་པ་བྱ་བ་ལ་ལྡ༔་སྔགས་དང་ཏིང་ངེ་འཛིན་གྱི་ཟློག་པ་དང་༔ རྡེབ་ཆོག༔ གདོང་ཟློག༔ གཏོར་མས་ཟློག་པ༔ ཙཀྲས་ཟློག་པའོ༔ དང་པོ་ཏིང་ངེ་འཛིན་ལ་གཉིས༔ ལུས་དཀྱིལ་བཀོད་པ་དང་༔ ཟློག་པ་དངོས་སོ༔ བདག་བསྐྱེད་མངོན་རྟོགས་གཞུང་ལྟར་སྐད་ཅིག་གིས་གསལ་བཏབ་ལ༔ སྤྱི་བོའི་མཆོད་རྟེན་ནང་གི་ལྷ་གསུམ་གནས་འགྱུར་ནས༔ གཡས་རྟ་མགྲིན་གཡོན་བྱ་ཁྱུང་༔ དབུས་གཤིན་རྗེའི་གཤེད་ནག་པོར་གྱུར༔ རང་གི་སྤྱི་བོར་གཤིན་རྗེ་འཆར་ཀ་ནག་པོ༔ ཕྱག་
གཉིས་མཆོད་རྟེན་བསྣམས་ནས༔ སྟེང་ལྷའི་གདུག་པ་ཟློག་པར་བྱེད་པ༔ མགྲིན་པར་མྱོས་བྱེད་འབར་བ། ཕྱག་གཉིས་མཆོད་རྟེན་དགྲ་སྟ་བསྣམས་ནས་བར་གཉན་གྱི་གདུག་པ་ཟློག་པར་བྱེད་པ༔ སྙིང་ཁར་གཤིན་རྗེ་ཚེ་བདག་ནག་པོ་ཞལ་གསུམ་ཕྱག་དྲུག་གིས་གཡས་གསུམ་འཁོར་ལོ༔ རལ་གྲི༔ དགྲ་སྟ༔ གཡོན་གསུམ་བེ་ཅོན་སྡིགས་མཛུབ༔ གཏུན་ཤིང་བསྣམས་ནས༔ འོག་ཀླུའི་གདུག་པ་ཟློག་པར་བྱེད་པ༔ གསང་གནས་སུ་གཤིན་རྗེ་ཁ་ཐུན་ནག་པོ་ཕྱག་ན་ལྕགས་པར་བསྣམས་ནས་དགྲ་བགེགས་ཐལ་བར་བརླག་ཅིང་༔ བྱད་མའི་ཤ་ཁྲག་གསོལ་
བ༔ དཔུང་པའམ་ཕྲག་པ་གཡས་སུ་གཤིན་རྗེ་ཁྲག་མཚོ་ཁོལ་མ༔ ཕྱག་གཉིས་ཉི་ཟླའི་ཆ་ལང་རྡེབ་པ༔ བྱད་མའི་ཤ་ཁྲག་དམར་ཕྱ་ལ་ལ་བཏང་བ༔ དཔུང་པ་གཡོན་དུ་གཤིན་རྗེ་རལ་པ་ཚར་དགུ༔ ཁྲམ་ཤིང་དང་༔ ནད་རྐྱལ་ཐོགས་ནས་བྱད་མ་ཁྲམ་ལ་འདེབས་པ༔ རང་གི་བ་སྤུའི་བུ་ག་ནས་ཁྲོ་ཆུང་ཐམས་ཅད་ཁྲོ་བོ་མཚོན་ཆ་ཐོགས་པས་གང་ནས་བྱད་མ་ལྷ་སྲུང་དང་བཅས་པ་གསོད་ཅིང་གཏུབ་པ༔ ལྷ་དེ་དག་གི་བ་སྤུའི་གསེབ་ནས་མཚོན་ཆ་སྣ་ཚོགས་ཀྱི་ཆར་འབེབས་པས་དགྲ་བགེགས་རྡུལ་དུ་བརླགས་པར་བསམ༔ རང་ཉིད་ཀྱི་ཕྱི་རོལ་དུ་གནམ་ལྕགས་ལས་གྲུབ་པའི་འཁོར་ལོའི་གུར་ཐབས༔ རྩིབས་བརྒྱད་སྟེང་འོག་གཉིས་སུ་རྩིབས་གཉིས་དང་བཅུར་ཡོད་པ༔ གཡོན་དུ་བར་མེད་དུ་འཁོར་བས་བྱེད་མ་གནོད་བྱེད་ལྷ་སྲུང་དང་བཅས་པ༔ ཤ་ཁྲག་དམར་ཐ་ར་ར་བཏང་བར་བསྒོམ༔ རྩིབས་ཀྱི་ནང་ངོས་རྩིབས་ལ་མ་རེག་ཙམ་དུ༔ ཁྲོ་བོ་བཅུ་ནི༔ ཤར་དུ་གཤིན་རྗེ་མཐར་བྱེད་ནག་པོ༔ གཡས་རྡོ་རྗེའི་ཐོ་བ་བསྣམས་པ༔ ལྷོར་གཤིན་རྗེ་མཐར་བྱེད་དཀར་པོ༔ གཡས་དབྱུག་པ༔ ནུབ་ཏུ་པདྨ་མཐར་བྱེད་དམར་པོ༔ གཡས་པདྨ༔ བྱང་དུ་བགེགས་མཐར་བྱེད་སྔོ་ནག༔ གཡས་
རྩེ་ལྔ༔ ཤར་ལྷོར་འདོད་རྒྱལ་སྔོ་ནག༔ གཡས་ལྕགས་ཀྱུ༔ ལྷོ་ནུབ་ཏུ་དབྱུག་སྔོན་ཅན་གཡས་དབྱུག་པ༔ ནུབ་བྱང་དུ་སྟོབས་ཆེན་ནག་པོ་གཡས་རྡོ་རྗེ་རྩེ་གསུམ༔ བྱང་ཤར་མི་གཡོ་བ་སྔོ་ནག་གཡས་རལ་གྲི༔ སྟེང་དུ་ཧཱུྃ་མཛད་སྔོ་ནག་གཡས་རྡོ་རྗེ༔ འོག་ཏུ་གནོད་མཛེས་སྔོ་ནག་གཡས་གཏུན་ཤིང་༔་གཡོན་ཐམས་ཅད་སྡིགས་མཛུབ་མཛད་པ༔ སྟག་དང་སྦྲུལ་སོགས་ཁྲོ་བོའི་ཆ་ལུགས་རྫོགས་པ༔ ཞལ་ཕྱིར་གཟིགས་ནས་གནོད་བྱེད་བྱེད་མ་ལྷ་སྲུང་དང་བཅས་པ་ཤིང་ལོའམ༔ ན་བུན་རླུང་གིས་དེད་པ་ལྟར་མཐའི་རྒྱ་མཚོའི་ཕར་འགྲམ་དུ་བསྐྲད་པར་བསྒོམ༔ དེ་ནས་སྔར་སྲུང་འཁོར་གྱི་དུས་བསྒོམ་པའི་གནམ་ལྕགས་ཀྱི་འཁོར་ལོ་རྩིབས་སྟོང་ལ་སངས་རྒྱས་སྟོང་རྩ་གཉིས་ཀྱི་ངོ་བོ་ཁྲོ་བོ་ནག་པོ་ཕྱག་ན་མཚོན་ཆ་སྣ་ཚོགས་དང་༔ མདའ་གཞུ་འགེངས་ཞལ་ཕྱིར་གཟིགས་ཤིང་ཧཱུྃ་ཧཱུྃ་ཕཊ་ཕཊ་སྒྲོག་ཅིང་གདོན་བགེགས་བྱད་མ་བརྡུང་བ་དང་ཟློག་པར་མཛད་པའོ༔ དེ་ཡན་ནི་ཟློག་པ་དང་བསད་པ་གཉིས་ཀའི་བདག་བསྐྱེད་ཐུན་མོང་བ་ཡིན་ནོ༔ ཟློག་དམིགས་དངོས་ནི༔ རང་ཉིད་གཤིན་རྗེར་གསལ་བའི་ཐུགས་ཀའི་ས་བོན་དང་ཕྱག་གཡས་གཡོན་མཐིལ་བ་སྤུའི་བུ་ག་ཐམས་ཅད་ནས་རང་
འདྲ་བའི་ཁྲོ་ཆུང་བྱེ་བ་དུང་ཕྱུར་མཚོན་ཆ་སྣ་ཚོགས་ཐོགས་པ་འཕྲོས༔ བྱད་མ་ལྷ་སྲུང་དང་བཅས་པའི་གཡུལ་ངོ་ཕར་བཟློག་ནས༔ ཁྲོ་ཆུང་རྣམས་བྲག་རི་ཉིལ་བ་ལྟར་གནམ་ལྕགས་ཀྱི་ཐོག་རྒོད་ལྷུང་བ་ལྟ་བུས་བྱེད་མ་ལྷ་སྲུང་དང་བཅས་པ་མེ་ལྕེ་ཁའི་སྦྲང་བུ་ལྟ་བུའམ༔ བྱིའུ་ཁྲས་དེད་པ་ལྟར་མཐའི་རྒྱ་མཚོའི་ཕ་རོལ་དུ་བསྐད༔ བར་བར་དུ་རང་འདྲ་བའི་འཇམ་དཔལ་ཁྲོ་བོའི་ཚོགས་དཔག་ཏུ་མེད་པས་ཞལ་ཕྱིར་གཟིགས་ནས་ཟློག་པའི་ལས་མཛད་པས་བར་མཚམས་མེད་པར་གཏམས་པར་བསྒོམ༔ ཡང་ཁྲོ་ཆུང་རྣམས་ཀྱིས་མཚོན་ཆ་སྣ་ཚོགས་ཀྱི་སྒྲོགས་དང་༔་འཁྲུལ་འཁོར་ཐོག་སེར་དཔག་ཏུ་མེད་པ་དང་བཅས་ནས༔ བྱད་མ་ལྷ་སྲུང་དང་བཅས་པ་དེད་ནས༔ སྲུང་འཁོར་གྱི་ཕྱི་རོལ་དུ༔ དུག་རླངས་གནམ་ལྕགས་བསྐལ་པའི་མེ་དང་བཅས་པའི་སྟེང་དུ༔ རི་ཉིལ་བ་ལྟར་བཅར་བས༔ ཤ་ཁྲག་དམར་ཉིལ་གྱིས་སོང་བ༔ དུག་རྫས་ཀྱིས་དེད་པས་མྱོས༔ བསྐལ་པའི་མེས་གཞོབ་ཐུལ་གྱིས་བསྲེགས༔ ཐལ་བ་རླུང་ནག་འཚུབས་མས་བུན་གྱིས་གཏོར༔ རྣམ་ཤེས་འབྱུང་བ་བཞི་འདས་པའི་འོག་ཏུ༔ ནམ་མཁའི་དབུས་སུ་ལྟོས་མེད་དུ་འཕངས་བས་ཕྲུག་གིས་བསྲེས་ལ་ཁྲོ་ཆུང་རྣམས་ཚུར་འདུས་ནས༔
སྟེང་འོག་ཕྱོགས་མཚམས་ཐམས་ཅད་ཁྲོ་བོས་ཞལ་ཕྱིར་གཟིགས་ནས༔ བར་མཚམས་མེད་པར་གཏམས་པར་བསྒོམ༔ དེས་ཀྱང་མི་ཟློག་པར་ཆོ་འཕྲུལ་ཆེ་ན༔ གོང་ལྟར་བསྒོམས་པའི་རྗེས་ལ༔ རང་གི་ཐུགས་ཀའི་ས་བོན་གྱི་འོད་ཟེར་ལས༔ ལས་ཀྱི་གཤིན་རྗེ་རང་འདྲ་བ་དང་༔ ལས་གཤིན་དྲུག་པོས་མཚོན་ཆ་དྲུག་ཐོགས་པ་དཔག་ཏུ་མེད་པ་འཕྲོས༔ ཁོའི་གུར་ཁང་སྲ་མཁྲེགས་བརྟན་པའི་ནུས་པ་ཐམས་ཅད༔ རྡོ་ཁབ་ལེན་གྱིས་ལྕགས་ཕྱེ་བསྡུས་པ་བཞིན་དུ༔ རང་གི་གུར་ཁང་ལ་ཐིམ༔ ཁོའི་གུར་ཁང་བྱེ་མའི་ཁང་བུ་ལ་ཆུ་ཕོག་པ་བཞིན་དུ་ཞིག་པར་གྱུར༔ ཡང་བདག་གི་ཐུགས་ཀ་ནས་ཛདམར་རྣོ་ངར་དང་ལྡན་པ་ལྕགས་ཀྱུ་ལྟ་བུར་འཕྲོས༔ ཁོའི་སྣ་བུག་གཡོན་དུ་ཞུགས༔ སྲོག་རྩ་ནས་བརྒྱུད༔ ཁོའི་སྙིང་གི་དཀྱིལ་དུ༔ བླ་ཁྲག་གི་སྦལ་པ་བྱེའུ་ལེབ་མའི་མགོ་ཙམ་གྱི་ནང་དུ༔ སྲོག་གི་རྣམ་པར་ཤེས་པ་ཞྭ་དམར་ནག་གནས་པ་དེ་སྦལ་པའི་ལྟོ་བ་གཤག་ནས་ནི་མིག་ཏུ་ཛ༔ ལྕགས་ཀྱུས་བཟུང་ནས་བླངས་པས་འོ་མའི་སྤྲིས་མ་ཡར་བཀྱག་པ་བཞིན་དུ༔ ཁོའི་ནུས་པ་བཀྲག་མདངས༔ བླ་ཆེའི་དྭངས་མ་རྣམས་ནི་ལ་བསྡུས་ནས་བསྟིམ༔ རྩྭ་ལྗང་དམར་འདར་ལྡི་ལི་ལི་བྱེད་
པ་དེ་བླངས་ནས་ཁོའི་སྣ་བུག་གཡས་ནས་ཐོན༔ རང་གི་སྣ་བུག་གཡོན་དུ་ཞུགས་ནས༔ ས་བོན་ལ་ཐིམ་པས༔ རང་གི་ནུས་པའི་ཁ་ལ་ཁོའི་ནུས་པ་ཁན་ནས༔ རལ་གྲི་ལ་ངར་བླུད་པ་ལྟར་བཀྲག་གཟི་མདངས་ནུས་པ་དང་ལྡན་པར་གྱུར༔ ཁོའི་ལུས་ངག་ཡིད་གསུམ་གྱི་དཔལ་ཉམས་ཏེ༔ སྔོ་ལྗང་ལོ་སད་ཀྱིས་ཁྱེར་བ་བཞིན༔ ཉམས་ཐག་ཅིང་རེད་པ༔ བུ་ག་དགུ་ནས་ཁྲག་འབབ་པར་གྱུར༔ ཡང་རང་གི་ཐུགས་ཀ་ནས་འོད་ཟེར་འཕྲོས་པས༔ ལས་ཀྱི་གཤིན་རྗེའི་ཚོགས་དཔག་ཏུ་མེད་པར་གྱུར་ནས༔ ཁོའི་ལྷ་སྲུང་གི་ཚོགས་བསྡུས་ནས་ཁོའི་ལྷ་སྲུང་ཁོ་རང་གི་གཤེད་དུ་གྱུར་ནས༔ མཚོན་ཆའི་ཆར་ཕབ་ནས་རྡུལ་དུ་བརླག་པར་གྱུར༔ ཁྱད་པར་དུ་ཁོས༔ བསྐལ་པ་དཔག་ཏུ་མེད་པ་ནས༔ ད་ལྟའི་བར་བསགས་པའི་ལས་ངན་ཐམས་ཅད་ཀྱི་རྣམ་པར་སྨིན་པ་དུས་གཅིག་ལ་སྨིན་ནས༔ གཤིན་རྗེའི་ནུས་པ་དང་༔ འབྱུང་བ་ལྔའི་རང་བཞིན་འཁྲུགས་པའི་མཚོན་ཆ་རབ་ཏུ་རྣོ་བ་དཔག་ཏུ་མེད་པ་དུས་གཅིག་ལ་སྨིན་ནས༔ གཤིན་རྗེའི་ནུས་པ་དང་༔ འབྱུང་བ་ལྔའི་རང་བཞིན་འཁྲུགས་པའི་མཚོན་ཆ་རབ་ཏུ་རྣོ་བ་དཔག་ཏུ་མེད་པ་ཆུ་ཡི་རྦ་རླབས་ལྟར་འཁྲུགས་ནས༔ ཁྲག་དམར་ཆ་ལ་ལ་བྱེད་
ཅིང་༔ ཁོ་རང་ལྷ་སྲུང་དང་བཅས་པ་རྡུལ་དུ་བརླགས་པར་བསམས་ལ༔ བསྙེན་སྔགས་ལ་འདི་བཏགས་ལ་བཟླས༔ དུ་ཏྲི་ཡ་མ་རཱ་ཙ༔ ཡ་མ་རཀྵ༔ ཀྲོ་ཏ་པ་ཙ་ལ་ཏི༔ ཨ་ཡ་མ་དུ་རུ་ཙ་ཤ་ན་གནོད་བྱེད་བྱད་མ་ལྷ་སྲུང་དང་བཅས་པ་ཐམས་ཅད་ནི་ཏྲི་མཱ་ར་ཡ་བྷྱོ་བྷྱོ་ཟློག་ཟློག༔ ཟློག་པ་བདུན་ནམ་ཉེར་གཅིག་སོགས་གང་ལྕོགས་བཟླ༔ བྱད་མ་མང་ན་རྒྱུན་དུ་བརྒྱ་རེ་བྱ༔ ཤིན་ཏུ་དོགས་ཟོན་ཆེ་ན་དུས་གསུམ་བརྒྱ་རེ་བྱ༔ དེ་བས་མང་མི་རུང་གསུངས་ཀྱང་༔ ཁ་ཆད་སྤངས་བའི་མཐུ་འདྲེན་ཡོད་ན་དུས་གསུམ་དུ་སྟོང་བཟླའོ༔ དེ་བས་མང་ནི་ངེས་པར་མི་རུང་ངོ་༔ དེ་ལྟར་རྟགས་མ་བྱུང་གི་བར་དུ་སྔགས་དང་དམིགས་པ་ལ་འབད་དོ༔ བཟློག་པའི་རྟགས་ནི་དམག་བཟློག་པ་དང་༔ འཇའ་འོད་མཐའ་ནས་བཟློག་པ༔ འཚུབ་མ་བཟློག་པ༔ གཅན་གཟན་སྣ་ཚོགས་ཀྱི་ཁ་བཅིངས་པ༔ ཐོག་འཕང་བ་གཡུལ་བཤིག་པ་དང་དམག་ཚོགས་བཅོམ་པ༔ རི་བསྙིལ་བ༔ བྲག་གཤིག་པ༔ ཆུ་བཟློག་པ༔ དགྲ་ལ་ཆས་པ༔ དམག་འགྱེད་པ༔ གཡུལ་ལས་རྒྱལ་བ༔ ཆུ་བོ་གྱེན་དུ་བཟློག་པ༔ རྦབ་ཆེན་གྱེན་དུ་བཟློག་པ༔ ཤིང་བཅད་ཅིང་༔ ཞིང་སྨོ༔ ལོ་
ཏོག་བརྔ་བ༔ ལིང་འདེབས་པ༔ འདབ་ཆགས་བསད་པ་ལ་སོགས་རྨིས་ལྟས་དང་༔ དངོས་སུ་དཔའ་སེམས་སྐྱེ་བ་སོགས་འབྱུང་ངོ་༔ རྒྱ་གཞུང་ལས༔ རྟགས་མཚན་དེ་དག་བྱུང་དུས་ན༔ དེ་དུས་ཕ་རོལ་བྱད་མ་ནི༔ རྔ་ཕུར་ཐོགས་པ་འབུམ་གྱིས་ཀྱང་༔ བྱད་དང་རིག་སྔགས་ཅི་བྱས་ཀྱང་༔ སྐད་ཅིག་ཉིད་ལ་འཇོམས་པར་འགྱུར༔ ཅེས་གསུངས་སོ༔ དེ་དག་གི་ཐུན་མཚམས་སུ༔ གཏོར་མ་འབུལ་ཞིང་༔ བསྟོད་བསྐུལ་བྱ༔ གཏོར་མ་དགྲ་ཕྱོགས་སུ་འབུལ༔ ཡང་ན་རྒྱུ་ལྡོག་ལེགས་པར་འགྲིགས་ཤིང་༔ ཐེབས་ཡོད་དུས་ན་དགྲ་ཕྱོགས་སུ་གཏོར་མ་འཕང་༔ སྔགས་དང་ཏིང་ངེ་འཛིན་གྱིས་བཟློག་པའོ༔ ས་མ་ཡ་རྒྱ་རྒྱ་རྒྱ༔ ཨྠྀི༔ དེ་ནས་རྡེབ་ཆོག་ནི༔ དགོང་མོའི་དུས་སུ༔ རང་ཉིད་ཁྲོ་ཆུ་ལུས་དཀྱིལ་དང་བཅས་པ་སྐད་ཅིག་ལ་གསལ་བའི༔ ཕྱག་མཐིལ་འཛམ་གླིང་ཁྱོན་ཙམ་པའི༔ གཡོན་གྱི་མཐིལ་དུ་མཚོན་ཆ་སྣ་ཚོགས་ཀྱི་ས་གཞི་བུ་ཡུག་ལྟར་འཚུབས་པའི་དཀྱིལ་དུ་རྗེ་དྲི་ཡོངས་སུ་གྱུར་པ་ལས༔ དམིགས་བྱ་འཁོར་བཅས་བསྐྱེད༔ ཁྲོ་ཆུང་གི་ཚོགས་དང་རླུང་ནག་འཚུབ་མས་རང་དབང་མེད་པར་བཀུག་ལ་གཉིས་མེད་དུ་བསྟིམ༔ ཕྱག་གཡས་པའི་དཀྱིལ་དུ་གནམ་
ལྕགས་ཀྱི་འཁོར་ལོ་རྩིབས་བརྒྱད་པ་དང་༔ རྩེ་ཐམས་ཅད་ལས་ཀྱི་གཤིན་རྗེ་མཚོན་ཆ་ཐོགས་པ་དཔག་ཏུ་མེད་པའི༔ ལྟེ་བར་དཔོན་ལ་གསེར་གྱི་རྡོ་རྗེ༔ བཙན་པོ་ལ་ཕུར་པ༔ བྱད་མ་ལ་ཆུ་གྲི༔ བུད་མེད་ལ་སྤུ་གྲི༔ སྐྱེ་བོ་ལ་རལ་གྲི༔ ཕྱག་གཉིས་དྲག་ཏུ་བརྡབས་པས་སྲོག་སྙིང་ཐལ་བྱུང་དུ་ཕུག༔ སྲོག་རྩ་བཅད་ནས༔ མཚོན་ཆ་ལ་སོགས་ཁྲག་གིས་ངར་བླུད་པ་ལྟར་གྱུརཿ༔ ཤ་ཁྲག་དམར་ཉིལ་གྱིས་ཁྲག་སྐྱོ་ལྟ་བུར་གྱུར༔ ཁོའི་ཤ་ཁྲག་རྣམས༔ ཁོའི་ལྷ་སྲུང་རྣམས་གཤིན་རྗེའི་དམག་ཚོགས་སུ་གྱུར་ནས༔ ཤ་ཟོས། ཁྲག་འཐུང་༔ ཀླད་ཁྲག་གསོལ་བར་བསམ༔ ལྷག་རོལ་དང་༔ ཁོའི་སྟོབས་ནུས་ཐམས་ཅད་བསྐལ་པའི་མེས་གཞོབ་བུན་གྱིས་བསྲེག༔ བསྐལ་པའི་ཆུ་བོ་ཆེན་པོས་བསངས་ཤིང་བཀྲུས༔ བསྐལ་པའི་རླུང་གིས་རྗེས་ཤུལ་མེད་པར་གཏོར༔ རྣམ་ཤེས་ཡུམ་ཡིག་ཏུ་གྱུར་ནས༔ འོག་ཕྱོགས་ཀྱི་འཇིག་རྟེན་ཁམས་སུ་སངས་རྒྱས་པར་བསྒོམ༔ ཟློག་སྔགས་བརྒྱའམ་ཅི་ལྕོགས་བཟླས་ལ་ཐལ་མོ་ལན་དགུར་བརྡབ་བོ༔ རྡེབ་ཆོག་བྱད་མ་འབུམ་རྡུགས་སྤུ་གྲི་རེག་གཅོད་ས་མ་ཡ༔ རྒྱ་རྒྱ་རྒྱ༔ ཨྠྀི༔ ཡང་ཉི་མ་མདུང་གང་ཙམ་དུས༔ ཁ་ནུབ་ཏུ་གྱུ་
ལ༔ རང་ཉིད་འཇམ་དཔལ་ལུས་ལྷ་དང་བཅས་པ༔ སྐད་ཅིག་ལ་གསལ་བཏབ༔ མདུན་དུ་བརྫུས་སྐྱེས་སུ་སྐད་ཅིག་གིས་གཤིན་རྗེ་ཡ་མ་རཱ་ཙ༔ དུག་གསུམ་ཁྲོས་པའི་ལྷ་དབུ་གསུམ་དབུས་ཆུ་སྲིན༔ གཡས་སེང་གེ༔ གཡོན་ཕག་ཞལ༔ ཡ་ཁ་གནམ་ལ་མ་ཁ་ས༔ ལྕེ་བར་སྣང་གློག་ལྟར་འཁྱུག་པ༔ མཆེ་བ་གངས་རི་གཙིགས་པ་འདྲ་ལ༔ འཇིགས་སུ་རུང་བ་ཞིག་བསྒོམས་ནས༔ བསྙེན་སྔགས་ལ་ཟློག་སྔགས་བཏགས༔ དེ་ལ་སྔགས་འདི་བཏགས༔ ཡ་མ་ས་ཡ་ཏི༔ དགྲ་བོ་བྱད་མའི་སྲོག་ལ་བྷྱོ་བྷྱོ་ཟློག་ཟློག༔ ཅེས་བརྒྱ་བས་མི་མང་བ་ཅི་ལྕོགས་ཤིག་བཟླ༔ ཕྱག་གཡས་ཉི་མ་གཡོན་ཟླ་བ་དེ་གཉིས་ཀྱི་བར་དུ་དགྲ་བོ་བྱེད་མ་སྒོ་ང་བྲག་ལ་བརྒྱབ་པ་བཞིན་ཤ་ཁྲག་དམར་ཚེལ་ཆལ་སོང་ཞིང་༔ ཤ་ཁྲག་དེ་དག་དམར་ཆིལ་གྱིས་གཤིན་རྗེ་ཡ་མ་རཱ་ཙའི་ཞལ་དུ་སོང་བས་ཁ་བཙུམས་ནས་ས་རིམ་པ་བདུན་གྱི་འོག་ཏུ་མར་སོང་བར་བསམ་ལ་ཐལ་མོ་བརྡབ་བོ༔ ཡ་མ་རཱ་ཙའི་ལག་རྡེབ་ས་མ་ཡ་ཁ་ཐཾ༔ ཨོཾ༔ ཡང་བགེགས་གདུག་པ་ཅན་དང་བྱེད་མ་བསད་ཅིང་གཅུན་པ་ནི༔ རང་ཉིད་ཁྲོ་ཆུ་བཟློག་པའི་སྐབས་ལྟ་བུ་ལ༔ ཞལ་གསུམ་ཕྱག་དྲུག་གམ་ཞལ་གཅིག་ཕྱག་གཉིས་པ་
དམྱལ་བ་ནས་སྲིད་པའི་རྩེ་མོར་ཁྱབ་ཅིང་ལྟོ་བ་ན་སྲིད་པ་གསུམ་གསལ་བ༔ དེའི་ཐུགས་ཀའི་ཧཱུཾ་དང་ཡ་ལས་ལྕགས་ཀྱི་སྡིག་པ་ནག་པོ་མང་པོ་འཕྲོས༔་དམིགས་བྱའི་སྙིང་གི་ནང་དུ་ཞུགས་ནས་ཤ་ཟོས་སྙིང་ཁྲག་འཇིབ༔ རྣམ་ཤེས་ནག་སྐམ་སྐམ་སོང་༔ སོར་མོའི་རྩེ་ནས་ཀྱང་སྡིག་པ་གྲངས་མེད་པ་འཕྲོས་པས་གནོད་བྱེད་བརྒྱལ་ནས་འདར་ལྡི་ལི་ལི་བྱེད་ཅིང་ལུས་ཐམས་ཅད་ཀྱི་ཤ་ཁྲག་ཧབ་ཧབ་ཟོས་པས་ཁས་བླངས་དམ་བཅས་སྲོག་སྙིང་ཕུལ་ཞིང་རང་ཉིད་ལ་སྐྱབས་ཞུས་པར་བསམ༔ ཤིན་ཏུ་ཐུལ་དཀའ་ན་གཡས་ཀྱི་སོར་མོ་ལྔ་ཁྲོ་བོ་མཐིང་ནག་མཚོན་ཆ་ཐོགས་པ་ལྔ༔ གཡོན་གྱི་སོར་མོ་ལྔ་ལྕགས་ཀྱི་སྡིག་པ་མེ་འབར་བ་ལྔར་བསྒོམ་ཐལ་མོ་བརྡབས་པས་དེ་གཉིས་ཀྱི་བར་དུ་བཅིར་ནས་འདར་ལྡི་ལི་ལི་བྱེད་ཅིང་ཁས་བླངས་སྲོག་སྙིང་ཕུལ༔ འདི་ཐུན་མཇུག་ཏུ་བྱའོ༔ འདི་ཤིན་ཏུ་ཟབ༔་ཨར་ལ་གཏད་པ༔ ཁྲོ་བོ་སྡིག་རྡེབ་ཅེས་བྱ་སྟེ༔ གདོན་ཐུལ་བ་ལ་འདི་ལས་ཟབ་པ་མེད༔ མྱོང་བས་ཀྱང་གྲུབ་བོ༔ སྔགས་ནི་བསད་ན་བསད་སྔགས་བཟླ༔ བཟློག་ན་ཟློག་སྔགས་བཟླ༔ བསྙེན་སྔགས་ཀྱི་མཇུག་ཏུ༔ དུ་ཏྲི་ཡ་མ་རཱ་ཙ༔ ཡ་མ་རཀཱ་ཀྲོ་ཏ་པ་ཙ་ལ་ཏི༔ ཨ་ཡ་
མ་དུ་རུ་ཙ་ཤ་ན་གནོད་བྱེད་ཆེ་གེ་མོའི་སྲོག་ལ་ནི་ཏྲི་ཏྲིག་ནན་ཨེ་ཧུར་ཐུ་ཛ༔ མཱ་ར་ཡ་རྦད༔ ཅེས་དམིགས་པས་དྲག་ཏུ་གཅུན་པས་ཐུལ་རྟགས་མྱུར་དུ་འོང་ངོ་༔ ས་མ་ཡ༔ རྒྱ་རྒྱ་རྒྱ༔ གསུམ་པ་སེར་བའི་གདོང་ཟློག་ནི༔ སེང་ལྡེང་སྐྱེར་པ་སོགས་དྲག་པོའི་ཤིང་ལ་རལ་གྲི་བྱས༔ དུག་ཁྲག་བྱུག་ཅིང་སྔོན་པོ་བྱུག༔ སྦལ་མགོར་ཧཱུཾ་མགོ་ཕྱིར་བསྟན་པ་དང་༔ སྙིང་རྩ་ནས་ཕྱིར་ལ་བསྙེན་སྔགས་ཀྱི་མཇུག་ལ་ཟློག་སྔགས་ལ་གནོད་བྱེད་སེར་བ་སེར་བྱེད་ཀྱི་མིང་བྲིས་པའི་ལིང་ག་རེ་བས་བཏུམ་ལ་རྡོག་ཞབས་སུ་དྲིལ་ཞིང་༔ རང་ཉིད་སྐད་ཅིག་གིས་ལུས་དཀྱིལ་དང་བཅས་པའི་ལྷར་བསྒོམ༔ ལྟོ་བ་ནས་ཁྲོ་ཆུང་སྤྲུལ་པ་གྲངས་མེད་འཕྲོ་བ༔ གཡས་གཤོག་རལ་གྲིའི་རྩེ་མོ་ལས་མེ་འབར་བ༔ གཡོན་གཤོག་ཆུ་གྲི་རྩེ་མོ་ལས་མཚོན་ཆ་ཁོལ་བ༔ ཆུ་སྲིན་གྱི་ཁ་ནས་གློག་དང་འབྲུག་སྒྲ་གྲག་པ༔ རང་གི་གཡས་སུ་ལྷ་སྲིན་སྡེ་བརྒྱད་ཀྱི་གདན་ལ༔ ཚེ་བདག་ནག་པོ་ཕྱག་གཡས་རལ་གྲིའི་རྩེ་ལ་མེ་འབར་བ༔ བཏབ་པ་ཙམ་གྱིས་གནོད་བྱེད་གཞོབ་ཏུ་རག་རག་བཏང་བ༔ གཡོན་དུ་སྡིགས་མཛུབ་ཀྱི་རྩེ་ན་རང་འདྲ་བའི་ཁྲོ་བོ་སྤྲོས་པས༔ གནོད་བྱེད་རྣམས་ཞབས་འོག་ཏུ་བཀུག་ནས་བྲོ་མཛད་པ༔ གཡོན་དུ་
དྲེགས་པ་ཕོ་མོའི་གདན་ལ་འཆི་བདག་ལྡང་ནག༔ གཡས་ཕུར་པའི་རྩེ་ནས་མཚོན་ཆ་སྤྲོས་པས་གནོད་བྱེད་རྣམས་བསད་བཅད་རྡུལ་དུ་བརླགས་པ༔ གཡོན་སྡིགས་མཛུབ་ཀྱི་རྩེ་ནས་རང་འདྲ་བ་མང་པོ་སྤྲོས་པས༔ གནོད་བྱེད་རྣམས་ཞབས་འོག་ཏུ་བཀུག་ནས་བརྡུང་བར་བསྒོམ༔ རང་གི་ཐུགས་ཀ་ནས་ཁྲོ་ཆུང་དང་གནམ་ལྕགས་ཀྱི་སྡིག་རྒོད་མེ་འབར་བའི་དམག་དཔུང་སྤྲོས་ནས༔ སེར་བ་སེར་བྱེད་སྣ་འདྲེན་དང་བཅས་པ་ཐམས་ཅད་བཟློག་ནས༔ གཞན་དགྲ་བོའི་ཡུལ་དུ་ཟ་ལམ་སྟོན༔ ཕུས་གདབ༔ རལ་གྲི་གཡུག༔ ཡུངས་ཀར་དང་ཐལ་ཆེན་སྔགས་ལ་གཏོར་རོ༔ སྡིགས་མཛུབ་ཀྱིས་དགྲ་ལ་ཟ་ལམ་བསྟན་ཏོ༔ སེར་བ་གདོང་ནས་ཟློག་པར་ཐེ་ཚོམ་མེད་དོ༔ བསྙེན་སྔགས་མཇུག་ཏུ༔ དུ་ཏྲི་ཡ་མ་རཱ་ཙ༔ ཡ་མ་རཀྵ༔ ཀྲོ་ཏ་པ་ཙ་ལ་ཏི༔ ཨ་ཡ་མ་དུ་རུ་ཙ་ཤ་ན༔ གནོད་བྱེད་སེར་བ་སེར་བྱེད་སྣ་འདྲེན་དང་བཅས་པ་ཏྲི་མཱ་ར་ཡ་བྷྱོ་བྷྱོ༔ ཟློག་ཟློག༔ ཅེས་དྲག་ཏུ་བཟླའོ༔ ས་མ་ཡ༔ རྒྱ་རྒྱ་རྒྱ༔ ཨྠྀི༔ གཏོར་མ་དང་༔ ཙཀྲས་ཟློག་པ་ནི་ལོགས་སུ་གསལ་ལོ༔ ཞེས་བཟློག་པའི་མན་ངག་འཁྲུགས་དང་གབ་སྦས་བསལ་ནས་བཀོད་པའོ༔ འདི་ལ་ཉེས་མཆིས་འཇམ་
དབྱངས་ཉིད་ལ་བཤགས༔ དགེ་བས་བདུད་བཞིའི་གཡུལ་ངོ་བཟློག་ནས་ཀྱང་༔ འགྲོ་ཀུན་འཇམ་དཔལ་དབྱངས་ཉིད་འགྲུབ་པར་ཤོག༔ ཀྱེ་མ༔ དུས་ངན་དུས་འདིར་བདུད་ཚོགས་སྤྲིན་ལྟར་གཏིབས༔ ལུས་སྲོག་ཆོས་ཀྱི་བར་ཆད་ཆར་ལྟར་འབེབས༔ གསང་སྔགས་སྒོ་རུ་ཞུགས་པ་ཕལ་ཆེར་ཀྱང་༔ ཕྲག་དོག་ངན་སེམས་མ་རུངས་མེ་ལྟར་འབར༔ ངག་མནན་སེལ་དང་འགོང་ཆོག་རྫས་ངན་གྱིས༔ བྱང་ཆུབ་བསྒྲུབ་ཏུ་མི་སྟེར་ལུས་སྲོག་འཕྲོག༔ དེ་འདྲའི་དུས་ན་གནམ་ལྕགས་འབར་བའི་མཚོན༔ འདི་ཉིད་ཡིན་ནོ་རིན་ཐང་གསེར་བས་དཀོན༔ སྲོག་དང་འདྲ་བས་གཞན་ལ་མ་སྤེལ་ཅིག༔ འོན་ཀྱང་བསྟན་དགྲས་མཐོང་ན་བསྟན་ལ་གནོད༔ དེ་ཕྱིར་ཙིའི་དཀྱིལ་དུ་ཨ་ཐོ་རྒྱ༔ ས་མ་ཡ་རྒྱ་རྒྱ་རྒྱ༔ གུ་ཧྱ༔ ཁ་ཐཾ༔ ཞེས་པ་སྔགས་ནག༔ ༧ ཀརྨ་རཱ་གས་སོ༔ ༈ འདིར་བསད་པའི་དམིགས་པ་གུད་དུ་སྦས་པ་ནི༔ སྔགས་པ་ཁོ་ཡི་སྙིང་དེ་སྦལ་པ་དམར་པོས་ཟོས་པར་བསམ༔ བོན་པོ་ལ་ཁོའི་སྙིང་དེ་དུག་གི་ཕག་རྒོད་ཀྱིས་ཟོས་པར་བསམ༔ བཙན་པོ་ལ་ཁོའི་སྙིང་དེ་དུག་སྦྲུལ་ནག་པོས་ཟོས་པར་བསམ༔ བན་དེ་ལ་ཁོའི་སྙིང་དེ་ལྕགས་ཀྱི་སྡིག་པས་ཟོས་པར་བསམ༔ སྐྱེས་
པ་དང་བུད་མེད་ལ་ཁོའི་སྙིང་དེ་སྤྲུལ་པ་ནག་པོ་དང་དམར་པོས་ཟོས་པར་བསྒོམ་པ་སོགས༔ སོ་སོའི་སྔགས་བཟླ་ཚེ་གསེབ་དམིགས་སུ་ཤེས་པར་བྱའོ༔ ༈ ཀུན་ལ་བསྙེན་སྔགས་ལ་བཏགས་ན། རྒྱུད་འཇམ། ལས་སྔགས་ལ་བཏགས་པ་ནི། འཕྲལ་རྣོ་ཤིང་ཟབ་པ་ལ། དེ་གཉིས་ཀ་སྦྲག་པ་ནི་མཆོག་ཏུ་ལེགས་སོ། །མར་མེ་ཁྲག་གསོད་ནི། །ཤོག་གཙང་ལ་ལིངྒ་བྲི། རོ་ཤིང་སྐྱེར་པ་གང་རུང་ལ་ལིངྒ་ཕྱི་བསྟན། གཞོག་གཡོན་ནས་མགོ་ཐུར་བསྟན་ལ་དཀྲི་དེའི་ཕྱི་ནས་རོ་རས་ཀྱིས་དཀྲི། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།