རོ་བསྲེག་པའི་ཆོ་ག།
འཕགས་པ་ལྷ།
རྒྱ་གར་སྐད་དུ། །མ་ཧོ་མ་བི་དྷིཿ། བོད་སྐད་དུ། རོ་བསྲེག་པའི་ཆོ་ག །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐམས་ཅད་སྟོང་པ་འོད་གསལ་བ། །གཉིས་མེད་ཞེ་སྡང་རྡོ་རྗེ་གཙོ། །སྲིད་པའི་རྒྱ་མཚོའི་གྲུར་གྱུར་ལ། །གུས་པས་རབ་ཏུ་ཕྱག་འཚལ་ལོ། །ལས་ལས་སྐྱེས་པའི་སེམས་ཅན་རྣམས། །ཚེ་འདས་སྡིག་པ་སྦྱང་བ་དང༌། །སྲིད་པའི་གཟེ་བ་ལས་བསྒྲལ་བའི་ཕྱིར། །དཔལ་ལྡན་འདུས་པའི་རོ་བསྲེག་བརྩམ། །དགོན་པ་ཆེན་པོའི་ས་ཕྱོགས་སམ། །མེ་ཏོག་འབྲས་བུ་སོགས་པས་བརྒྱན། །རི་བོ་དབེན་པའི་ས་ཕྱོགས་གང༌། །སློབ་དཔོན་ལས་ལ་མཁས་པ་དང༌། །ལས་ཀྱི་རྡོ་རྗེ་དག་གིས་ནི། །དེ་རུ་བསྲེག་པ་དག་ཏུ་གསུངས། །དང་པོར་ལས་ཀྱི་རིམ་པ་དག །བླ་མ་ཉིད་ཀྱི་ཞལ་སྔ་ནས། །ཆོ་ག་ཉི་ཤུར་རྒྱས་མཛད་པས། །རིམ་པ་བདག་གིས་འདིར་མ་བྲིས། །དེ་ལྟར་རིམ་པར་བྱས་ནས་ཀྱང༌།། སྟ་གོན་གནས་པའི་དུས་དག་ཏུ། །དག་ཅིང་བྱིན་བརླབ་གནང་བྱའི་ཕྱིར། །དྲི་དང་བདུད་རྩིས་བཀྲུ་བ་དང༌། །སྲུང་སྐུད་བྱིན་རླབས་ཚུལ་བཞིན་བྱ། །བདེ་གཤེགས་ས་བོན་རྣམས་ཀྱང་དགོད། །དེ་ནས་དཀྱིལ་འཁོར་ཐིག་གདབ་ནི། །ཆོ་ག་ཉི་ཤུའི་ཚུལ་དག་ཏུ། །བཏབ་ནས་མེ་ཐབ་བཅའ་བར་བྱ། །མེ་ཐབ་ཚད་ནི་ཕོ་བྲང་ཚད། །ཕོ་བྲང་དཀྱིལ་འཁོར་ཚད་དག་ནི། །བདག་ཉིད་ཇི་ཙམ་འདོད་ཀྱི་བར། །དེ་སྲིད་དུ་ནི་བདག་གིས་བྱ། །རྡོ་རྗེར་བའི་ཞིང་ཚད་དུ། །དབངས་ཀྱང་དེ་བཞིན་ཤེས་པར་བྱ། །ཟབས་སུ་ཁྲུ་གང་སོར་བཞི་བྲུ། །བ་ཡི་ལྕི་བས་བྱུགས་པ་དང༌། །དེ་ལྟར་བྱི་དོར་བྱས་ནས་ཀྱང༌། །དང་པོའི་ཐིག་སོ་བཟུང་ནས་ནི། །དེ་བཞིན་དུ་ནི་གདབ་པར་བྱ། །དེ་ནས་ལྷ་ནི་སུམ་ཅུ་གཉིས། །ཚུལ་བཞིན་དུ་ནི་བྲི་བར་བྱ། །ཤིང་བུ་དག་ཀྱང་བརྩིག་པར་བྱ། །སློབ་དཔོན་རིག་མར་བཅས་པའམ། །ཡང་ན་ཐུགས་ཀ་ལས་ཕྱུང་སྟེ། །རིམ་པ་བཞིན་དུ་བསྐྱེད་ནས་
ཀྱང། །དམ་ཚིག་ལྷ་རྣམས་དབྱུང་བར་བྱ། །ཡེ་ཤེས་དཀྱིལ་འཁོར་སྤྱན་དྲང་དང༌། །གཞུག་དང་བཅིང་དང་དགྱེས་བསྐྱེད་ནས། །མཆོད་དབུལ་བསྟོད་བ་བྱ་བ་དང༌། །ཞུ་གནས་གསོལ་བ་ལ་སོགས་བྱ། །རྫོགས་ནས་རོ་ནི་དྲང་བའོ། །གདུགས་དང་རྒྱལ་མཚན་བ་དན་དང༌། །སྣ་ཚོགས་པ་ཡིས་བརྒྱན་བྱས་ནས། །ཤར་སྒོར་བཅུག་སྟེ་ལན་གསུམ་བསྐོར། །དེ་ནས་རིམ་བཞིན་དབང་བསྐུར་བྱ། །དབང་བསྐུར་ཟིན་དང་གནས་སུ་གཞག །བདག་གིས་བྱང་དུ་ཁ་བལྟས་ཏེ། །ཆོ་ག་ཉི་ཤུའི་ཚུལ་དག་ཏུ། །མཆོད་རྫས་ལ་སོགས་ཚུལ་བཞིན་གཞག །བདུད་རྩི་འཁྱིལ་པས་བསང་གཏོར་བྱ། །བསིལ་ཡབ་ཀྱིས་ནི་མེ་སྦར་རོ། །ཨོཾ་ཛྭ་ལ་ཛྭ་ལ་ཧཱུཾ་ཕཊ། གཅོ་བོ་སྤྱན་དྲངས་མེ་ལྷ་བསྐྱེད། །རཾ་ལས་བྱུང་བའི་མེ་ལྷ་ནི། །ཁ་དོག་དཀར་པོ་འོད་ཟེར་འབར། །སྤྱན་གསུམ་རལ་པའི་ཐོར་ཚུགས་ཅན། །ཕྱག་བཞི་མཆོད་ཕྱིར་ཐོགས་འཆང་བ། །གཡས་པས་ཐོ་བ་མཆོག་སྦྱིན་བྱ། །གཡོན་པ་གུནྡྷེ་བགྲང་ཕྲེང་འཛིན། །དེ་ལྟར་ཚུལ་བཞིན་བྱས་ནས་ཀྱང༌། །ཡེ་ཤེས་མེ་ལྷ་སྤྱན་དྲང་བ། །ཨོཾ་ཊཀྐི་ཏི་ནི་པཱ་པ་ཀ་ཨགྣ་ཡེ་ཊཀྐི་ནི་ཧཱུཾ་ཛཿ། གཞུག་དང་བཅིང་དང་དགྱེས་པ་བསྐྱེད། །དེ་ལ་ཞལ་བསིལ་མཆོད་ཡོན་དང༌། །སྲེག་རྫས་ལྔའམ་བདུན་དུ་དབུལ། །ཨོཾ་ཛཿཧཱུཾ་བཾ་ཧོཿཁཾ་རཾ། མཆོད་ཡོན་གྱི་སྔགས་སོ། །ཨོཾ་ནི་རི་ཏི་ཧཱུཾ་ཁཾ། ཞལ་བསིལ་གྱིའོ། །ཨོཾ་ཨཱཿབཛྲ་པུཥྤེ་སྭཱ་ཧཱ། །མེ་ཏོག་གིའོ། །ཨོཾ་ཨཱཿབཛྲ་དྷཱུ་པྤེ་ཧཱུཾ་སྭཱ་ཧཱ། སྤོས་མེའིའོ། །ཨོཾ་ཨཱཿབཛྲ་གནྡྷེ་ཧཱུཾ་སྭཱ་ཧཱ། དྲི་ཆབ་ཀྱིའོ། །ཨོཾ་ཨཱཿབཛྲ་དཱི་པེ་ཧཱུཾ་སྭཱ་ཧཱ། མར་མེའིའོ། །ཨོཾ་ཨཱཿབཛྲ་ནཻ་བི་ཏྱེ་ཧཱུཾ་སྭཱ་ཧཱ། ལྷ་བཤོས་ཀྱིའོ། །ཨོཾ་ཨགྣ་ཡེ་སྭཱ་ཧཱ། མར་གྱིའོ། །ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཏིལ་གྱིའོ། །ཨོཾ་བཛྲ་བི་ཛཱ་ཡ་སྭཱ་ཧཱ། དཱུར་བའིའོ། །ཨོཾ་བཛྲ་མ་ཧཱ་བཻ་གཱ་ཡ་སྭཱ་ཧཱ། ཞོའི་འོ། །ཨོཾ་བཛྲ་མ་ཧཱ་བ་ལཱ་ཡ་སྭཱ་ཧཱ། །འབྲས་ཀྱིའོ། །ཨོཾ་བཛྲ་གྷ་སྨ་རི་སྭཱ་ཧཱ། ཀུ་ཤའིའོ། །ཨོཾ་བཛྲ་ཨཱ་ཛྙཱ་པ་ཡ་སྭཱ་ཧཱ། ཨུ་དུམྺཱ་རའིའོ། །ཨོཾ་པོ་དྷི་བྷྲྀཀྵ་ཡེ་སྭཱ་ཧཱ། ཨ་ཤྭདྠའིའོ། །ཨོཾ་བཛྲ་ལ་ཏཱ་ཡ་སྭཱ་ཧཱ། པ་ལ་ཤའིའོ། །ཨོཾ་བཛྲ་ཀུ་བེ་རཱ་ཡ་སྭཱ་ཧཱ། ཉ་གྲོ་དྷིའོ། །ཨོཾ་བཛྲ་ཧ་ས་ཀ་རཱ་ཡ་སྭཱ་ཧཱ། ཨ་མྲའིའོ། །མ་ལྷའི་རྒྱལ་པོ་ལས་ཀྱི་གཙོ། །
ཕྲིན་ལས་ཀུན་ལ་སྙོམས་མཛད་པ། །ཐམས་ཅད་ཀུན་གྱི་བདག་པོ་སྟེ། །མཉམ་སྙོམས་ཁྱོད་ལ་ཕྱག་འཚལ་ལོ། །བསྟོད་ནས་མེ་ལྷར་གསོལ་བ་གདབ། །མེ་ལྷ་རྡོ་རྗེ་ལས་ཀྱི་གཙོ། །ཚེ་འདས་སེམས་ཅན་སྦྱང་བ་དང༌། །ལྷ་རྣམས་ཚིམ་པར་བྱ་བའི་ཕྱིར། །དེ་ཉིད་དུ་ནི་ཕྲིན་ལས་མཛོད། །ཕྲིན་ལས་རྣམ་པ་གཉིས་ཞེས་བྱ། །མེ་ལྷའི་རྒྱལ་པོའི་ཐུགས་ཀ་ནས། །ཡེ་ཤེས་འབར་བའི་མེ་ཕྱུང་སྟེ། །ཚེ་འདས་སེམས་ཅན་མི་མཐུན་ཕྱོགས། །རྣམ་རྟོག་བག་ཆགས་བསྲེག་པ་དང༌། །ལྷ་རྣམས་ཚིམ་པར་བྱ་བའོ། །རྟོག་པའི་དངོས་པོ་བསྲེགས་ནས་ཀྱང༌། །སྒྱུ་མ་ཆུ་ཟླ་ལྟ་བུ་ཡི། །རྡོ་རྗེ་སེམས་དཔར་བྱིན་གྱིས་བརླབ། །རྡོ་རྗེ་སེམས་དཔའ་ལྷ་རྣམས་ཀྱི། །ཐུགས་ཀར་ཡེ་ཤེས་ཚུལ་དུ་བཞུགས། །ཚིམ་པར་བྱ་བའི་རིམ་པ་དག །རང་ལ་མཆོད་ཡོན་དབུལ་བ་དང༌། །སྲེག་རྫས་རིམ་པ་བཞིན་དུ་ནི། །རྣལ་འབྱོར་པ་ཡིས་གྲུབ་ཚད་དབུལ། །སྔགས་ཀྱི་ཐོག་མར་རང་སྔགས་གཞུག །ཐལ་བར་གྱུར་པའི་ཕུང་པོ་དག །བཤད་གཅིའི་མཐར་ནི་རྣམ་པར་བརྟག །དེ་ནས་བསྟོད་དང་བསྡུ་བ་བྱ། །ཡི་གེ་གསུམ་གྱིས་བསྡུ་པའོ། །ཚེ་འདས་དོན་དུ་བདག་གིས་ནི། །རོ་བསྲེག་ཆོ་ག་འདི་བྱས་པས།། འདི་ལས་དགེ་བ་གང་ཐོབ་པས། །ཐམས་ཅད་གཉིས་མེད་ཐོབ་པར་ཤོག །ཚེ་འདས་པ་ཡི་སེམས་ཅན་འདི། །དབང་བསྐུར་བྱང་ཆུབ་སེམས་བསྐྱེད་ནས། །ལྷ་རྣམས་ཚིམ་པར་བྱས་པ་དང༌། །རྟོག་པའི་དངོས་པོ་བསྲེགས་པ་ཡིས། །བསྐྱེད་པའི་རིམ་པ་མཐར་ཕྱུང་སྟེ། །རྡོ་རྗེ་བཟླས་པ་ཐོབ་པར་ཤོག །རྡོ་རྗེ་བཟླས་ནས་རྣལ་འབྱོར་པས། །སེམས་ལ་དམིགས་པ་ཐོབ་པར་ཤོག །སེམས་ལ་དམིགས་པ་ཐོབ་གྱུར་ནས། །བདག་བྱིན་བརླབ་པའི་རིམ་ཐོབ་ཤོག །བདག་བྱིན་བརླབ་པའི་རིམ་ཐོབ་ནས། །འོད་གསལ་བ་ནི་ཐོབ་གྱུར་ཅིག །འོད་གསལ་བ་ནི་ཐོབ་གྱུར་ནས། །ཆོས་སྐུ་མཁའ་དང་འདྲ་བ་ལས། །ཟུང་འཇུག་ལོངས་སྤྱོད་རྫོགས་པའི་སྐུ། །སྤྲིན་ལྟ་བུ་ནི་འབྱུང་གྱུར་ཅིག །དེ་ལས་སྤྲུལ་སྐུ་ཆར་ལྟ་བུས། །སྲིད་པའི་རྒྱ་མཚོར་སྤྲུལ་གྱུར་ནས། །སེམས་ཅན་ཐམས་ཅད་སྒྲོལ་བར་ཤོག །གསང་བ་འདུས་པའི་རོ་བསྲེག་གི་ཆོ་ག་འཕགས་པ་ལྷས་མཛད་པ་རྫོགས་སོ།། །།རྒྱ་གར་གྱི་
མཁན་པོ་ཤྲདྡྷཱ་ཀ་ར་ཝརྨ་དང༌། བོད་ཀྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།།