བླ་མ་རྒྱང་འབོད་དང་ཡུལ་དམ་པ་རྣམས་ལ་གསོལ་འདེབས་ཞབས་བརྟན་གྱི་སྐོར་དད་བསོད་རྒྱ་མཚོའི་སྤྲིན་ཆེན།

༄༅། །པྲསཱདཔུནྱསམུདྲམཧཱམེགྷནཱམགུརུབིཔྲཀཪྵཧབབིཥཡཔརམསརྦརོཙནཔཱདདྷྲུབཀལྤཱསྟི།
༄༅། །བླ་མ་རྒྱང་འབོད་དང་ཡུལ་དམ་པ་རྣམས་ལ་གསོལ་འདེབས་ཞབས་བརྟན་གྱི་སྐོར་དད་བསོད་རྒྱ་མཚོའི་སྤྲིན་ཆེན་ཞེས་བྱ་བ་བཞུགས་སོ།།

བླ་མ་རྒྱང་འབོད་གསོལ་འདེབས་དད་གསུམ་སྙིང་གི་གདུང་སེལ།

༄༅། །བླ་མ་རྒྱང་འབོད་གསོལ་འདེབས་དད་གསུམ་སྙིང་གི་གདུང་སེལ། བླ་མ་མཁྱེན་ནོ། །བླ་མ་མཁྱེན་ནོ། །བླ་མ་མཁྱེན་ནོ། །སྤྲོས་བྲལ་ཆོས་དབྱིངས་རྣམ་དག་ཆོས་སྐུ་ཡི་ཞིང་ན། །ཆོས་ཉིད་དག་པ་གཉིས་ལྡན་མཁའ་ཁྱབ་ཀྱི་ཡེ་ཤེས། །སྲིད་ཞི་མཉམ་ཉིད་བདེ་ཆེན་རྡོ་རྗེ་ཡི་བདག་ཉིད། །དུས་གསུམ་འགྱུར་མེད་ཆོས་སྐུའི་བླ་མ་དེ་མཁྱེན་ནོ། །འོད་གསལ་ཡེ་ཤེས་ཆེན་པོར་རང་སྣང་གི་འཆར་ཆ། །ཕུན་ཚོགས་ངེས་པ་ལྔ་ལྡན་ཟག་བྲལ་གྱི་བཀོད་པ། །སྐུ་གསུང་ཐུགས་ཡོན་ཕྲིན་ལས་སྒྱུ་འཕྲུལ་གྱི་རོལ་མོ། །བསམ་འདས་བརྗོད་བྲལ་ལོངས་སྐུའི་བླ་མ་དེ་མཁྱེན་ནོ། །རབ་འབྱམས་ཕྱོགས་བཅུའི་ཞིང་ན་ཚད་མེད་ཀྱི་ཐུགས་རྗེས། །གང་འདུལ་རྣམ་འཕྲུལ་བཀོད་པས་མཁའ་ཁྱབ་ཀྱི་འགྲོ་བ། །སྣ་ཚོགས་ཐབས་ཀྱིས་ཕན་བདེའི་དགའ་སྟོན་ལ་སྦྱོར་མཛད། །འདུལ་བཞིའི་གར་རོལ་སྤྲུལ་སྐུའི་བླ་མ་དེ་མཁྱེན་ནོ། །ཕུལ་བྱུང་མཁྱེན་བརྩེ་ནུས་པའི་སྤྲིན་ཆེན་ལས་ཐོན་པའི། །བསྡུ་བཞིའི་ཕྲིན་ལས་ཆར་གྱིས་མཐའ་ཀླས་ཀྱི་གདུལ་བྱའི། །དོན་གཉིས་མྱུ་གུ་བསྐྱེད་མཛད་རིས་མེད་ཀྱི་སྐྱེས་ཆེན། །ངོ་མཚར་རྨད་བྱུང་སྤྱི་ཡི་བླ་མ་རྣམས་མཁྱེན་ནོ། །རྨད་བྱུང་ཐུགས་རྗེ་ཆེན་པོའི་དཔྱང་ཐག་ལ་བརྟེན་ནས། །བདག་བློ་ཉེས་བརྒྱའི་རང་བཞིན་སྲིད་པ་ཡི་འདམ་ནས། །དྲི་མེད་ཐུབ་བསྟན་བདེ་བའི་སྐྱེད་ཚལ་དུ་འདྲེན་མཛད། །ངོ་མཚར་བཀའ་དྲིན་ཁྱད་འཕགས་བླ་མ་དེ་མཁྱེན་ནོ། །གཞི་དབང་གཉུག་མའི་ཕུང་ཁམས་སྒྲིབ་བྲལ་གྱི་ས་བོན། །ལམ་དབང་བརྡ་ཐབས་ཟབ་མོའི་རྟེན་འབྲེལ་ལ་བརྟེན་ནས། །འབྲས་དབང་སྐུ་བཞིའི་ཡེ་ཤེས་ཆེན་པོ་རུ་སྨིན་མཛད། །དབང་བཞི་རྫོགས་པར་བསྐུར་བའི་བླ་མ་དེ་མཁྱེན་ནོ། །སྨིན་བྱེད་དབང་བཞིས་དུལ་བའི་ཞིང་ས་ནི་གཤིན་པོར། །གྲོལ་བྱེད་རིམ་གཉིས་མྱུ་གུ་འབྲས་བཟང་དུ་སྨིན་པར། །དམ་ཚིག་རྣམ་པར་དག་པའི་བརླན་དྲོད་ལ་རག་ཕྱིར། །དམ་སྐོང་བདུད་རྩིའི་ཆར་སྦྱིན་བླ་མ་དེ་མཁྱེན་ནོ། །གཞི་རྒྱུད་གདོད་ནས་ལྷན་སྐྱེས་བདེ་གཤེགས་ཀྱི་སྙིང་པོ། །ལམ་རྒྱུད་དངོས་པོ་བཅུ་ཡི་བྱེད་རྐྱེན་ལ་བརྟེན་ནས། །འབྲས་ཆོས་ལྔ་ཕྲག་ལྔ་པོར་རང་ཆས་སུ་སྟོན་པའི། །རྒྱུད་དོན་ཟབ་མོས་ཤེས་རབ་རྒྱུད་འགྲོ ལ་དེ་མཁྱེན་ནོ། །སྣང་བཅས་ལྷ་སྐུར་གྲོལ་བྱེད་བསྐྱེད་རིམ་གྱི་རྣལ་འབྱོར། །སྣང་མེད་འོད་གསལ་མངོན་བྱེད་རྫོགས་རིམ་གྱི་ཡང་བཅུད། །ཟུང་འཇུག་ཡེ་ནས་འབྲལ་མེད་རྫོགས་ཆེན་གྱི་དགོངས་པ། །རང་གནས་མན་ངག་སྟོན་མཛད་བླ་མ་དེ་མཁྱེན་ནོ། །དགོངས་རྒྱུད་དུས་གསུམ་རྒྱལ་རྣམས་ཡེ་ཤེས་སུ་རོ་མཉམ། །བརྡ་བརྒྱུད་རིག་འཛིན་ཚོམ་བུ་གང་འདུལ་གྱི་རོལ་རྩེད། །སྙན་བརྒྱུད་གདམས་པའི་བདུད་རྩིས་སྐལ་བཟང་རྣམས་ཡོངས་སྨིན། །བརྒྱུད་གསུམ་ཀུན་འདུས་དྲིན་ཆེན་བླ་མ་དེ་མཁྱེན་ནོ། །སྤངས་རྟོགས་ཡོན་ཏན་ཆ་རྫོགས་ངེས་དོན་གྱི་སངས་རྒྱས། །ཐེག་གསུམ་ཆོས་དབྱངས་མི་འཛད་ལུང་རྟོགས་ཀྱི་གཏེར་མཛོད། །རིག་གྲོལ་ཡོན་ལྡན་ཟག་མེད་དགེ་འདུན་གྱི་ཚོགས་རྗེ། །སྐྱབས་གསུམ་དབྱེར་མེད་དྲིན་ཆེན་བླ་མ་དེ་མཁྱེན་ནོ། །ཕུང་ཁམས་སྐྱེ་མཆེད་གདན་གསུམ་ཡི་དམ་གྱི་དཀྱིལ་འཁོར། །རྩ་རླུང་ཐིག་ལེ་དཔའ་བོ་མཁའ་འགྲོ་ཡི་གྲོང་ཁྱེར། །རྣམ་བཞིའི་ཕྲིན་ལས་མ་འགགས་དམ་ཅན་གྱི་ཆོས་སྲུང་། །རྩ་གསུམ་འདུས་ཞལ་དྲིན་ཆེན་བླ་མ་དེ་མཁྱེན་ནོ། །སྣང་སྲིད་ཀུན་ཁྱབ་ཡེ་ཤེས་སྒྱུ་མ་ཡི་གར་མཁན། །གཅིག་དང་དུ་མར་མི་གནས་སྤྲོས་བྲལ་གྱི་ཕྱག་རྒྱ། །གང་འདུལ་ཕན་བདེའི་རོལ་མོ་བསམ་འདས་ཀྱི་གར་མཁན། །སྲིད་ཞི་མཉམ་ཉིད་དྲིན་ཆེན་བླ་མ་དེ་མཁྱེན་ནོ། །རིག་སྟོང་རིག་པའི་དབྱིངས་སུ་འཁོར་འདས་ཀྱི་ཆོས་ཀུན། །འུབ་ཆུབ་རྟག་པ་དམ་པའི་རྒྱལ་ཐབས་ལ་རོལ་ནས། །ཟང་ཐལ་གཉུག་མའི་ཆོས་འཁོར་རྒྱུན་ཆགས་སུ་བསྐོར་མཛད། །མཐར་ཐུག་བློ་བྲལ་དོན་གྱི་བླ་མ་དེ་མཁྱེན་ནོ། །མཁྱེན་ནོ་མཁྱེན་ནོ་དྲིན་ཆེན་རྩ་བརྒྱུད་ཀྱི་བླ་མ། །དོན་ལ་དབྱེར་མེད་ཁྱབ་བདག་འཁོར་ལོ་ཡི་དབང་ཕྱུག །འབྲལ་མེད་སྙིང་དབུས་དྭངས་མའི་ཐིག་ལེ་རུ་བཞུགས་ནས། །དོན་བརྒྱུད་འཕོ་བའི་བྱིན་རླབས་དབང་མཆོག་དེ་བསྐུར་མཛོད། །ཅིར་སྣང་དག་པ་རབ་འབྱམས་ལྷ་སྐུ་ཡི་ཕྱག་རྒྱ། །འགྲོ་འོང་སྲོག་རྩོལ་གཡོ་བ་གཞོམ་མེད་ཀྱི་སྔགས་སྒྲ། །འཕོ་མེད་ལྷན་སྐྱེས་བདེ་སྟོང་འོད་གསལ་གྱི་འཁོར་ལོ། །དབང་བཞིའི་རྟོགས་པ་གོང་འཕེལ་བྱིན་རླབས་ཤིག་སྩོལ་ཅིག །ཡིད་དཔྱོད་འཛིན་པ་དག་པའི་སྤྲོས་བྲལ་གྱི་ལྟ་བ། །རང་བབས་མ་བཅོས་རྣལ་མའི་ཕྱག་རྒྱ་ཡིས་བསྡོམས་པས། །བྱས་ཆོས་འཁྲུལ་པ་ཞིག་པའི་བྱར་མེད་ཀྱི་ཀློང་དུ། །ལྷུན་རྫོགས་མཉམ་པ་ཆེན་པོའི་གྲུབ་མཐའ་ལ་སྦྱོར་ཅིག །ཤེས་རབ་རང་བྱུང་སྒྲོན་མེའི་ཡེ་ཤེས་ཀྱི་སྣང་ཆ། །འོད་གསལ་རང་གདངས་དབྱིངས་རིག་འཇའ་ཟེར་གྱི་ཐིག་ལེར། །ལྷུན་གྲུབ་ཚོམ་བུའི་དཀྱིལ་འཁོར་ཟུང་འཇུག་གི་བཀོད་པ། །མངོན་གྱུར་མཐར་ཕྱིན་ཆོས་སྐུའི་དགོངས་ཀློང་དུ་སྐྱོལ་ཅིག །འཆི་སྲིད་ཆོས་སྐུའི་དགོངས་པ་མངོན་སུམ་དུ་གྱུར་ཏེ། །བར་དོ་སྒྱུ་འཕྲུལ་དྲྭ་བའི་ཕྱག་རྒྱ་རུ་བཞེངས་ནས། །གང་འདུལ་ཐབས་མཁས་སྤྲུལ་པས་མཐའ་ཀླས་ཀྱི་འགྲོ་ཚོགས། །འདྲེན་པའི་དེད་དཔོན་མཆོག་ཏུ་བྱིན་གྱིས་རང་རློབས་ཤིག །གནས་སྐབས་སུ་ཡང་མི་མཐུན་ཉེས་བརྒྱ་ཡི་གཡུལ་ལས། །རྣམ་རྒྱལ་ཚེ་བསོད་དཔལ་འབྱོར་ལེགས་ཚོགས་ཀྱི་ཡོན་ཏན། །གོང་འཕེལ་བསྟན་འགྲོར་ཕན་པའི་ལྷག་བསམ་གྱི་བགྱི་བ། །གེགས་མེད་མཐའ་རུ་ཕྱིན་པའི་དགའ་སྟོན་ལ་སྦྱོར་མཛོད། །ཚུལ་ཁྲིམས་རྣམ་པར་དག་པས་ལྷར་བཅས་ཀྱི་བཀུར་ཞིང་། །དྲི་མེད་ཐོས་བསམ་སྒོམ་པའི་ཡོན་ཏན་གྱི་མཐུ་ལས། །གཟུངས་སྤོོབས་བློ་གྲོས་བྱེ་བའི་གཏེར་ཁ་མཆོག་བཞད་ནས། །འཆད་རྩོད་རྩོམ་པས་རྒྱལ་བསྟན་གསལ་ནུས་སུ་མཛོད་ཅིག །རང་འདོད་འཁྲི་བའི་ཚང་ཚིང་ངེས་འབྱུང་གི་མེས་སྲེག །གཞན་ཕན་བདུད་རྩིའི་ཆར་གྱིས་བསྡུ་བཞི་ཡི་ས་བོན། །དོན་གཉིས་སྙེ་མར་འཁྲུངས་པའི་ངོ་མཚར་གྱི་འབྲུག་སྒྲ། །ས་གསུམ་རྣ་བའི་བཅུད་དུ་སྨིན་ངེས་སུ་མཛོད་ཅིག །བརྒྱུད་ལྡན་བླ་མའི་མན་ངག་ཞི་བསིལ་གྱི་བདུད་རྩི། །སྣོད་ལྡན་སློབ་མའི་དད་བརྩོན་གསེར་བུམ་དུ་བསྐྱིལ་ནས། །དམ་ལྡན་འདུས་པའི་སྡེ་ཡིས་ཕྱོགས་ཀུན་ཏུ་ཁྱབ་ཅིང་། །དོན་ལྡན་བཤད་སྒྲུབ་བྱ་བས་དུས་འདའ་རུ་མཛོད་ཅིག །ཀུན་ཀྱང་བལྟ་སྤྱོད་ཏིང་འཛིན་དོན་མཐུན་གྱིས་བག་ཕེབས། །རང་རྒྱུད་བསླབ་པས་ཡོངས་གྲོལ་གཞན་རྒྱུད་ཀྱི་འཆིང་བ། །གཅོད་པའི་ཐབས་ཚུལ་རྨད་བྱུང་སྤང་ཀློག་གི་བྱ་བར། །གེགས་མེད་ལྷར་བཅས་སྐྱེ་དགུའི་མཆོད་གནས་སུ་མཛོད་ཅིག །གངས་ལྗོངས་ཡོངས་ལ་གྲགས་པའི་སྒྲུབ་བརྒྱུད་ནི་རྣམ་བརྒྱད། །ཤིང་རྟའི་རིང་ལུགས་ཀུན་འདུས་མ་དྲོས་ཀྱི་མཚོ་ཆེན། །ཀུན་མཁྱེན་བླ་མའི་རིང་ལུགས་མཛོད་ལྔ་ཡི་བསྟན་མཆོག །མི་ཉམས་སྲིད་མཐར་རྒྱས་པའི་རྫོགས་ལྡན་ལ་སྦྱོར་ཅིག །དེར་འཛིན་བྱེད་པའི་མགོན་རྣམས་བསྐལ་བརྒྱ་རུ་ཞབས་བརྟན། །ལེགས་མཛད་ཕྲིན་ལས་ཟབ་མོས་ཕྱོགས་ཀུན་ཏུ་ཁྱབ་ཅིང་། །བསྟན་པའི་ཞབས་འདེགས་རྒྱལ་རིགས་བློན་འབངས་ཀྱི་ཚོགས་རྣམས། །མངའ་ཐང་མི་ཉམས་གངས་ལྗོངས་བདེ་སྐྱིད་ལ་སྦྱོར་མཛོད། །ཁྱད་པར་བདག་ལ་བརྟེན་པའི་བཟང་ངན་གྱི་འབྲེལ་ཐོབ། །ཀུན་ཀྱང་ཚེ་འདིར་བདེ་སྐྱིད་དམ་ཆོས་ལ་སྤྱོད་ཅིང་། །ཕྱི་མར་གནས་ངན་ལེན་པའི་མིང་ཙམ་ཡང་མི་གྲགས། །རྣམ་དག་ཞིང་དུ་སྐྱེ་བའི་སྐལ་བཟང་ལ་སྦྱོར་མཛོད། །མཁའ་ཁྱབ་ཞིང་ན་གནས་པའི་མ་གྱུར་གྱི་འགྲོ་ཚོགས། །ཀུན་ཀྱང་བདག་གི་བྱང་ཆུབ་སྤྱོད་པ་ཡི་གྲུ་ཡིིས། །སྡུག་བསྔལ་སྲིད་མཚོ་ལས་བསྒྲལ་དོན་གཉིས་ཀྱི་ནོར་གླིང་། །བདེ་བར་ངལ་འཚོ་སྦྱིན་ནུས་བྱིན་རླབས་ཤིག་སྩོལ་ཅིག །ཡང་ཡང་ཡིད་ལ་གོམས་པའི་གསོལ་འདེབས་ཀྱི་གླུ་དབྱངས། །ལྷང་ལྷང་མགྲིན་པའི་རྒྱུད་ནས་འབོད་ཚུལ་འདི་གསན་ནས། །ཟབ་ཟབ་མཁྱེན་བརྩེའི་སྤྲིན་ལས་བྱིན་ནུས་ཀྱི་ཆར་ཆེན། །སིབ་སིབ་བདག་རྒྱུད་ཞིང་སར་ལ་འུར་དུ་འབེབས་མཛོད། །བརྒྱུད་གསུམ་རིག་འཛིན་བླ་མའི་བྱིན་ཆེན་ནི་ཐིབས་ཐིབས། །ཡིད་དམ་ཞི་ཁྲོའི་དངོས་གྲུབ་མེ་ཏོག་ནི་སིལ་སིལ། །མཁའ་འགྲོ་ཆོས་སྲུང་དགའ་བའི་གླུ་དབྱངས་ནི་དིར་དིར། །དོན་གཉིས་བསམ་ཀུན་འགྲུབ་པའི་བཀྲ་ཤིས་མཆོག་སྩོལ་ཅིག །ཅེས་པའང་རབ་ཚེས་རྔ་ཆེན་ཆུ་ཁྱི་གསར་དུ་འཆར་པའི་འཕེལ་ཕྱོགས་ཀྱི་དགའ་བ་དང་པོའི་ཚེས་ལ་རིག་འཛིན་གྱི་བཙུན་པ་ཟུང་འཇུག་སྒྲུབ་པའི་རྡོ་རྗེས། རང་བྱུང་པདྨའི་སྒྲུབ་གནས་མདོ་ཁམས་སེང་གེ་གནམ་རྫོང་གི་མགུལ་ན་མཛེས་པའི་དབེན་སྤྱིལ་བདེ་མཆོག་བཀྲ་ཤིས་དགེ་འཕེལ་དུ་བྲིས་ཤིང་གསོལ་བ་བཏབ་པ་དགེ། །།