བརྟུལ་ཞུགས་ཉི་ཤུ་རྩ་ལྔ།

བརྟུལ་ཞུགས་ཉི་ཤུ་རྩ་ལྔ།

གཞན་ཡང་དུས་ཀྱི་འཁོར་ལོའི་རྒྱུད་ལས་བརྟུལ་ཞུགས་ཉི་ཤུ་རྩ་ལྔ་གསུངས་ཏེ། དུས་འཁོར་དཀྱིལ་ཆོག་གི་རྣམ་བཤད་བདུད་རྩིའི་རྒྱ་མཚོ་ལས། བཞི་བ་བརྟུལ་ཞུགས་ཉེར་ལྔ་སྦྱིན་པ་ནི། འཚེ་དང་སོགས་ཏེ་དེ་ཡང་རྡོ་རྗེ་སེམས་དཔའི་བརྟུལ་ཞུགས་ཉི་ཤུ་རྩ་ལྔ་ཞེས་བྱ་བ། ཡོད་པའི་སྡིག་པ་ལྔ། ཉེ་བའི་སྡིག་པ་ལྔ། གསོད་པ་ལྔ། འཁུ་བ་ལྔ། ཆགས་པ་ལྔ་སྟེ་ཉི་ཤུ་རྩ་ལྔ་པོ་འདི་རྣམས་ལས་ཟློག་པ་དཔལ་རྡོ་རྗེ་སེམས་དཔའི་དམ་ཚིག་གི་ཡན་ལག་ཡིན་ཕྱིར་བརྟུལ་ཞུགས་སུ་བསྲུང་དགོས་ལ། ཞེས་སོགས་གསུང་པ་ལྟར། ཡོད་པའི་སྡིག་པ་ལྔ་ནི། སྲོག་གཅོད་པ་འཚེ་བ་དང༌། མི་བདེན་པ་རྫུན་ཚིག་དང༌། གཞན་གྱི་བུད་མེད་བསྟེན་པ་སོགས་འདོད་པས་ལོག་པར་གཡེམས་པ་དང༌། གཞན་གྱི་ནོར་མ་བྱིན་པར་ལེན་པ་དང༌། ཆང་གི་བཏུང་བས་མྱོས་པར་བྱེད་པ་སྟེ། དེ་རྣམས་ཕྱོགས་མཐུན་ཆ་ལག་དང་བཅས་པ་སྤོང་དགོས་སོ། །ཉེ་བའི་སྡིག་པ་ལྔ་ནི། ཤོ་དང་མིག་མང་དང་དེ་དག་དང་འདྲ་བ་རྣམས་ནི་ཆོ་ལོ་རྩེ་བ་དང༌། བཟའ་བ་དང་རིན་གྱི་དོན་དུ་བསད་པ་སོགས་མཐོང་ཐོས་དོགས་པའི་ཤ་སོགས་སྡིག་དང་བཅས་པའི་ཟས་རྣམས་སོ། །ཆོས་མ་ཡིན་པ་ལ་ཆོས་སུ་ལོག་པར་རློམ་པ་ནི། མཚན་མ་སྟེ་མཚན་མའི་རྣམ་གཡེང་དང་ཉོན་མོངས་པ་འཕེལ་བྱེད་ཀྱི་བསྟན་བཅོས་ངན་པ་ཀློག་པ་དང༌། ཉོན་མོངས་ཅན་གྱིས་ཀུན་ནས་སླངས་བའི་ངག་འཁྱལ་སྣ་ཚོགས་དང༌། མཚུན་འཐོར་བ་མཆོད་སྦྱིན་རིག་བྱེད་རྣམས་དང་ལྔའོ། །གསོད་པ་ལྔ་ནི། བ་ལང་གསོད་པ། བྱིས་པ་གསོད་པ། བུད་མེད་གསོད་པ། སྐྱེས་པ་གསོད་པ་དང༌། ལྷ་མིའི་བླ་མ་གསོད་པ་དང་ལྔའོ། །འཁུ་བ་སྟེ་ཁྲོ་བ་ལྔ་ནི། ཆོས་དང་འཇིག་རྟེན་གང་རུང་དང་སྦྲེལ་ཡང་རུང་སྟེ་མཉམ་པར་འགྲོགས་པའི་གྲོགས་པོ་དང༌། བཀུར་བར་འོས་པའི་རྗེ་བོ་དང༌། ལྷ་དང་མིའི་བླ་མ་སངས་རྒྱས་དང༌། དགེ་སློང་གི་དགེ་འདུན་དང༌། ཡིད་བརྟན་པར་འོས་པའི་ཡུལ་མཁན་སློབ་སོགས་ལ་ཁྲོ་བའོ། །དེ་ལྟར་ཉི་ཤུ་ནི་འཕྲལ་སྤྱོད་ཀྱི་སྒོ་ནས་སྤངས་ཤིང་ཟློག་པ་ཞིག་དགོས་ལ། ཆགས་པ་ལྔ་ནི། མིག་གི་དབང་པོ་ཡུལ་གཟུགས་ལ་ཆགས་པ་སོགས། དབང་པོ་ལྔ་ཡུལ་ལྔ་ལ་ཆགས་པ་ཞེས་བྱ་ན། དབང་ཤེས་ཀྱི་རྗེས་སུ་འབྲང་བའི་རྣམ་རྟོག་ཡུལ་ལ་ཆགས་པའོ། །དེ་ནི་སོ་སོ་སྐྱེ་བོ་འདོད་ཁམས་པ་རྣམས་ཀྱིས་རྩ་བ་ནས་ཟློག་པར་མི་ནུས་ཀྱང༌། དེའི་གཉེན་པོ་ཉིན་རེ་བཞིན་དུ་ཐུན་གསུམ་སོགས་བསྒོམ་པའོ། །གཉེན་པོ་ཡང་བསྐྱེད་རིམ་ལ་ཡུལ་དབང་ལྷ་སྐུར་ང་རྒྱལ་བྱེད་པ་དང༌། རྫོགས་རིམ་ལ་སོ་སོར་སྡུད་པའི་རྣལ་འབྱོར་གྱིས་སོ། །བརྟུལ་ཞུགས་ཉེ་ལྔ་འདི་རྒྱས་པར་ཏཱ་ར་ནཱ་ཐས་མཛད་པའི་དུས་འཁོར་དཀྱིལ་ཆོག་རྣམ་བཤད་བདུད་རྩིའི་རྒྱ་མཚོ་སོགས་ལས་ཤེས་པར་བྱའོ། །