གསུམ་པ་སྡོམ་པ་རྣམས་སྦྱིན་པའི་གོ་རིམ་བསྟན་པ།
གསུམ་པ་སྡོམ་པ་རྣམས་སྦྱིན་པའི་གོ་རིམ་བསྟན་པ་ནི།
རྩ་བར། དགེ་བསྙེན་ཉིད་དང་དགེ་ཚུལ་ཉིད་དང་དགེ་སློང་ཉིད་དག་གི་སྔ་མ་བསྙེན་པར་མ་རྫོགས་པ་ལ་ཕྱི་མ་མི་བྱའོ། །ཞེས་སོ། །དེའི་དོན་ལ་གསུམ་ལས། དང་པོ་ནི། སྡོམ་པ་གསུམ་རིམ་པ་བཞིན་དུ་བླངས་པའི་དགོས་པའི་དོན་ནི། ཚིགས་ལས་འདས་པའི་ལྟུང་བ་མི་འབྱུང་བ་དང༌། སྡོམ་པ་བརྟན་པར་འགྱུར་བའོ། །དེ་ལ་གཉིས་ཏེ། གཉེན་པོ་གོམས་པའི་སྒོ་ནས་བརྟན་པ་དང༌། བསྟན་པ་རིམ་གྱིས་མི་སྤོང་བའི་སྒོ་ནས་བརྟན་པའོ། །དང་པོ་ནི་མདོ་སྡེ་ལས། ཁྲིམས་གསུམ་པོ་རིམ་གྱིས་མནོས་ན་རིམ་གྱིས་ཆོས་ཀྱི་རོ་བྲོ་བ་ཐོབ་ཅིང་མོས་པ་བརྟན་པ་མི་ཤིགས་པར་འགྱུར་རོ། །ཞེས་གསུངས་སོ། །གཉིས་པ་ནི། དགེ་སློང་གི་བསླབ་པ་ཕུལ་ཡང་དགེ་ཚུལ་ལ་སོགས་པའི་བསླབ་པ་མི་སྤོང་བ་སྟེ། བདག་ཁྱིམ་པའམ་དགེ་ཚུལ་ལམ། ཞེས་སོ། །གཉིས་པ་སྡོམ་གསུམ་སྔ་མའི་མཇུག་ཐོགས་སུ་ཕྱི་མ་རུང་མི་རུང་གི་དོན་ནི། སྡོམ་པ་ལེན་པ་པོ་ཁྱིམ་པ་ལོ་ཉི་ཤུ་ལོན་པ་ལ་ནི་སྡོམ་གསུམ་སྔ་མའི་མཇུག་ཐོགས་སུ་ཕྱི་མ་རུང་བ་ཡིན་ཏེ། ལུང་ཕྲན་ཚེགས་ལས། ཡོ་བྱད་དྲུག་རྙེད་ནས་རབ་ཏུ་དབྱུང་བར་བྱ་ཞིང་བསྙེན་པར་རྫོགས་པར་བྱ། ཞེས་གསུངས་པས་ཤེས་པ་ཡིན་ཏེ། གཞན་དུ་ན་ཡོ་བྱད་དྲུག་ཚང་བ་དོན་མེད་པའི་ཕྱིར་རོ། །ཤཱཀྱ་དང་མེ་པ་རལ་པ་ཅན་མ་གཏོགས་པའི་མུ་སྟེགས་ཅན་གྱིས་སྡོམ་པ་ནོད་པ་དང་བུད་མེད་ཀྱིས་སྡོམ་པ་ནོད་པ་ལ་ནི། སྡོམ་གསུམ་སྔ་མའི་མཇུག་ཐོགས་སུ་ཕྱི་མ་མི་རུང་སྟེ། མུ་སྟེགས་ཅན་རབ་ཏུ་དབྱུང་བར་འདོད་ན་དགེ་བསྙེན་ཉིད་ལ་ཟླ་བ་བཞི་གནས་དགོས་པའི་ཕྱིར་དང༌། དགེ་ཚུལ་མའི་མཇུག་ཐོགས་སུ་བསྙེན་རྫོགས་བྱས་ན་ཚིགས་ལས་འདས་པའི་ཉེས་པར་འགྱུར་བའི་ཕྱིར་ཏེ་གོ་རིམ་བཞིན་ནོ། ། གསུམ་པ་བསླབ་ཚིགས་སྔ་མ་མེད་པ་ལ་ཕྱི་མ་སྐྱེ་མི་སྐྱེའི་དོན་ལ་གཉིས་ལས། དང་པོ་རང་ལུགས་བཞག་པ་ནི། ཚིགས་སྔ་མ་མེད་ཀྱང་རྒྱུ་གཞན་ཚང་ན་ཚིགས་ཕྱི་མའི་སྡོམ་པ་སྐྱེ་སྟེ།ཚིགས་སྔ་མ་མེད་པ་ལ་ནི་ཉེས་བྱས་ཙམ་དུ་ཟད་དེ། ཞེས་དང༌། ཊཱི་ཀ་ལས་ཀྱང༌། ཉེས་བྱས་ཙམ་དུ་ཟད་ཀྱི་དེ་ལ་ནི་སྡོམ་པ་སྐྱེའོ། །ཞེས་དང༌། ༼གོ་རིམ༽དེ་ནི་རྣམ་པར་བཞག་པ་བསྟན་པ་ཡིན་གྱི་འབྱུང་བའི་རྒྱུ་བསྟན་པ་ནི་མ་ཡིན་ཏེ། ཞེས་གསུངས་སོ། །